Sociedá El CAO dirá en primavera al parlamentu européu pa informar sobre la llingua asturiana by asturnet 6 d'avientu, 2007 El Conceyu Abiertu pola Oficialidá (CAO) va dir al parlamentu européu na primavera pa informar a los diputaos de la UE sobre la situación de la llingua asturiana, sigún dió anuncia esti miércoles el voceru del colectivu, Fernando Ornosa. El CAO axunta a más de 250 organizaciones, firmantes d’un manifiestu a favor de la oficialidá de la llingua asturiana qu’esti martes se llevó hasta Bruseles. Ornosa anunció nuna rueda de prensa que la intención del CAO ye solicitar la intervención de la UE y ve “mui posible” que la mesma se produza tres del conceyu qu’ayeri martes caltuvo en Bruseles con responsables de la Comisión Europea de Multillingüismu, a la qu’entregó dos informes n’asturianu y n’inglés sobre la situación de la llingua asturiana, ún d’ellos a nivel xeneral (políticu, alministrativu y social) y otru a nivel educativu, según informa Europa Press. “Tamos ya faciendo xestiones y prevemos que la intervención se produza na primavera del 2008, coincidiendo col momentu central del procesu de reforma del Estatutu d’Autonomía d’Asturies”, comentó Ornosa, calculando que’l memsu seya “n’abril”. Na declaración parlamentaria, el CAO va denunciar públicamente la “falta d’oficialidá” de la llingua, situación cola que’l so voceru entiende que se ta incumpliendo “l’artículu 3 de la Constitución Española”. Según Europa Press, Ornosa aseguró tamién que los representantes europeos colos que s’aconceyaron, ente ellos Johan Haggan, ún de los máximos responsables del organismu, xunto col comisariu Leonard Orban, “mostráronse sorprendíos” porque n’Asturies nun se declare oficial la llingua asturiana. “Tamién espresaron la so preocupación pola sobrevivencia del idioma ensin la oficialidá”, añadió. Según esplicó, “la comisión nun ye vinculante, pero informáronmos de que puen facer un llamáu d’atención al Gobiernu del Principáu” sobre esti asuntu. El voceru del CAO aseguró que la Comisón ta estudiando una posible visita a Asturies de Leonard Orban nel 2009, na que “s’entrevistaría colos principales axentes implicaos nesti asuntu”, ente los que mencionó a los representantes de los grupos políticos y de l’Alministración, l’Academia de la Llingua o los colectivos implicaos na llucha pola oficialidá. De la mesma manera, adelantó que’l CAO va caltener una “intensa comunicación” cola comisión nel añu 2008, na que van dir “informando de toles nueses actividaes asina como de la sitaución de la llingua”. Según Ornosa, na so visita a Bruseles, en compañía de Xulio Casado, otro resposable del CAO, pudieron comprobar que “n’Europa hai total desconocencia de la llingua asturiana” nel sen de que “nun saben nin qu’existe”. Al so xuiciu, esta situación débese a la falta d’oficialildá, porque “sólo ven les Llingües que son oficiales, anque seyan minoritaries; les non oficiales son inexistentes”. Criticó’l fechu de que “per parte del Gobiernu asturianu se promocione la llingua asturiana n’Asturies, pero nun haya nengún tipu de publicidá fuera, motivu pol cual existe un altu grau de desconocencia”. 6 d'avientu, 2007 0 FacebookTwitterPinterestEmail
Música Carlos Rubiera saca al mercáu un discu nuevu con doce Asturianaes by asturnet 28 de payares, 2007 El cantautor Carlos Rubiera ta acabante dasoleyar un discu nuevu, Asturianaes, un proyeutu musical nel que lleva munchos meses trabayando y nel quaxunta doce tonaes, seis tradiciones y seis de creación propia, que van suponer una auténtica renovación del xéneru. Lactu tuvo llugar nos llocales de la Sociedá Xeneral dAutores y Editores, nUviéu. Nel discu, asoleyáu por Producciones La Capitana, apaecen doce temes acompañaos por pianu y otros ritmos del nuevu folk. Amás, nAsturianes, Carlos Rubiera cunta cola participación de trés grandes de la música asturiana, la cantante Mariluz Cristobal Caunedo y los gaiteros Xuaco Amieva y José Ángel Hevia. Unes collaboraciones de lluxu que faen quel CD apaeza precedíu duna espectación importante. El músicu xixonés ye ún de los hestóricos miembros del llamáu Nueu Canciu Astur, que entamó a garrar puxu nos primeros años de la transición, a mou d’otros movimientos asemeyaos que se dieron n’otres nacionalidaes del estáu, como la Nova Canço Catalana. Tamién formó parte de la organización Conceyu Bable en Xixón, dende la qu’empezó a trabayar pola recuperación llingüística del asturianu. Ye miembru activu de lAcademia de la Llingua Asturiana y lañu pasáu espublizabal so discu últimu hasta agora, Canciones de Xixón, onde axuntaba temes nuevos y versiones de los sos yá clásicos sobre la villa de Xovellanos. 28 de payares, 2007 0 FacebookTwitterPinterestEmail
Cooperación Mieres manifestose pola oficialidá nuna de les seis marches que van llegar a Uviéu esta tarde by asturnet 24 de payares, 2007 Escontra la lluvia y pola oficialidá del asturianu nel prósimu estatutu d’autonomía entamó la marcha organizada pol COA (Conceyu Abiertu pola Oficialidá) en Mieres, una de les seis que dende varios puntos de la rexón tan averándose agora mesmu a Uvieu pa axuntase na gran manifestación de les 18:00 hores na Estación del Norte de la capital asturiana. La marcha a pie dende Mieres escomenzó a les 12:30 hores delantre’l Ayuntamientu de la llocalidá y cuntó con un buen numberu de participantes anque la lluvia ficiera actu de presencia dende bien ceo. Tres una pancarta na que podía lleese “El Caudal pola oficialidá” y vistiendo petos azules col llema “Arturianu, llingua oficial” los participantes nesta reivindicación del asturianu pasiaron a buen ritmu poles calles de la capital mierense detrás d’un coche de la policía llocal que cortaren el tráficu pa face-yos más fácil el tránsitu a los manifestantes. Caleyarán a pie pela carretera vieya d’Uvieu hasta llegar a lña capital esta tarde. A les 17:30 hores ta previsto que tolos participantes nes seis marches a pie, Xixón, Aviles, La Pola Siero, La Felguera, Trubia y Mieres tean ya n’Uvieu pa entamar la manifestación xeneral, que’l CAO espera seya la mayor de la hestoria d’esta reivindicación. Tres de la marcha va llese un comunicáu y va cellebrase un conciertu de La Bandina, que serán los encargaos de pone-y el ramu a esta gran xornada de reivindicación del asturianu. 24 de payares, 2007 0 FacebookTwitterPinterestEmail
Política Riosa, Samartín y Llaviana oficializarán darréu la toponimia by asturnet 9 de payares, 2007 Riosa, Samartín del Rei Aurelio y Llaviana van ser los tres siguientes conceyos qu’oficialicen la so toponimia tradicional, xuntándose a los 24 que ya tienen aprobada y vixente esa oficialización. Estos cuatro conceyos son los últimos de la llista de 24 ayuntamientos nos que la toponimia tradicional foi aprobada pol Conseyu de Gobiernu del Principáu. Colos próximos mencionaos (Riosa, Samartín y Llaviana) van ser 27. Van restar tovía 51 pa completar la xeografía asturiana. Finar esti llabor “ye un oxetivu pa esta llexislatura”, sigún dixo la Directora Xeneral de Cultura, Consuelo Vega na presentación del Anuariu 2006 de la Xunta Asesora de Toponimia d’Asturies. 9 de payares, 2007 0 FacebookTwitterPinterestEmail
Sociedá Conceyu Abiertu anuncia la manifestación del día 24 en más de 100.000 sobres d’azucre by asturnet 8 de payares, 2007 Cola manifestación del 24 de payares nel horizonte los respnsables de Conceyu Abiertu pola Oficialidá (CAO) tan faciendo delles iniciatives pa promocionar l’eventu, la última ye’l repatu de 100.000 sobres d’azucre decoraos col logu de l’anuncia de la manifestación polos chigres, cafeteríes y pubs de tol Principáu d’Asturies. La iniciativa fui presentada pol voceru de la organización Fernando Ornosa y representantes de la Xunta pola defensa de la Llingua. Ornosa qu’aprovecho pa recordar que munchos de los militantes del PSOE son tamien favoratibles al reconocimientu oficial del asturianu nel nuevu estatutu d’autonomía, apuntó que’l deber de los grupos politicos mayoritarios n’Asturies ye’l de garantizar el derechu constitucional de los asturianos a poder falar un idioma con más de 1000 años d’antiguedá. Al tiempu tamien dixo que la oficialidá ye la única ferramienta llegal que garantiza la supervivencia del idioma. La manifestación del 24 de payares va entamar a les 18:00 hores na estación del Norte d’Uvieu, llugar onde aportarán les distintes marches a pie que van salir dende Xixón, Aviles, Mieres, Llangreu y Trubia. La marcha xeneral va finar na plaza Porlier. 8 de payares, 2007 0 FacebookTwitterPinterestEmail
Escéniques Teatru Kumen estrena Actu Imprevistu nel Teatru Palacio Valdés by asturnet 25 d'ochobre, 2007 Teatru Kumen lleva a escena la obra Actu Imprevistu adaptación pal asturianu del orixinal Acto Imprevisto del autor malagueñu Miguel Gallego, cola que la compañía Estable Teatro tien feches más de mil representaciones. La traducción ye dEloy Antuña y va estrenase esti vienres 26 dochobre nel Teatru Palaciu Valdés dAvilés. Actu Imprevistu valse de la naturalidá, inocencia y sinceridá de dos llimpiadores pa llanzar una denuncia social acerca de la realidá cotidiana de munches muyeres a les que circunstancies vitales, problemátiques y conflictos les lleven a pervivir en condiciones sociales penoses. Les dos muyeres ponen sobre lescenariu les sos frustraciones personales dende lhumor, realizando ensin querer una representación teatral y poniendo sobre les tables les aspiraciones de los trabayadores y de les muyeres en xeneral. Dos seres traxicómicos que, por un casual, permítensel lluxu de soñar nun actu pasaxeru ya imprevistu. Esti montaxe pretende averanos a la realidá cotidiana, comprometenos con esa realidá social que nos arrodia por… humor al arte. Nel escenariu van xuntase dos realidaes mui estremaes: dun llau la frenética actividá que precede a una representación teatral: montaxe de les lluces, el soníu, los decoraos…, too ello tiñío dun llinguaxe y rituales propios, que de sópitu sinterrumpe énte lapaición de les trabayadores de la llimpieza, ayenas a too ello, y sorprendíes ante cada nuevu descubrimientu. Será, la intervención dun tercer personaxe, lo que posibilitará que la maxal teatru raspie, per un instante, la triste vida de les dos muyeres. Tamos énte una comedia con posu amargu, que llogra trescender los tópicos gracies a un argumentu bien preparáu, que nos avera a una realidá cercana con un llinguaxe atrayente nel que reinen lhumor y la tenrura. 25 d'ochobre, 2007 0 FacebookTwitterPinterestEmail
Tecnoloxía Xixón acueye lAlcuentru Fundamentos Web 2007 by asturnet 3 d'ochobre, 2007 El Palaciu de Congresos de Xixón, asitiáu na Feria de Muestres dAsturies, acueye dende güei lalcuentru internacional Fundamentos Web 2007, que va axuntar a más de cuatrocientos especialistes en desenrrollu web de tol estáu ente güei y el vienres. Esta ye la tercer edición desti eventu. Esta tercer edición del congresu, afaláu pol Gobiernu dAsturies y organizáu pola Fundación CTIC y la Oficina Española del W3C, da la oportunidá de sentir a figures relevantes nel ámbitu mundial del diseñu web con estándares y va centrase en facer analís de la Web dende una perspeutiva téunica y social. Al actu inaugural va asistir el viceconseyeru de Modernización y Recursos Humanos del Gobiernu del Principáu, Luís Iturrioz Viñuela; lalcaldesa de Xixón, Paz Fernández Felgueroso y el director xeneral de la Fundación CTIC, Pablo Priesca Balbín. Les actividaes van desenrrollase ente les 9:45 y les 18:30. Ufrimos un vidiu de les actividaes del añu pasáu Programa completu de Fundamentos WEB 2007 3 d'ochobre, 2007 0 FacebookTwitterPinterestEmail
Sociedá Areces apuesta pola consideración del asturianu nel nuevu estatutu… pero en sin ¿”proclames nacionaliegues”? by asturnet 1 d'ochobre, 2007 El Presidente del Principáu, Vicente Álvarez Areces apostó nel so discursu d’apertura del Alderique d’Orientación Política porque’l gobiernu diba tener en cuenta la consideración estatutaria de la llingua asturiana na elaboración del prósimu Estatutu d’autonomía. Dicho esto, Areces recordó que va procurar qu’Asturies participe nel mantenimientu d’un Estáu fuerte y un poder central frente a lo que que calificó como “proclames nacionaliegues que planteguen frayar esi espaciu públicu en nome de pretendíos derechos históricos”. El xefe del executivu asturianu fizo estes declaraciones nel trescursu del entamu del Alderique d’Orientación Política que se cellebro na Xunta Xeneral del Principáu. 1 d'ochobre, 2007 0 FacebookTwitterPinterestEmail
Reportaxe La h.oguera y el nemetón, un reportaxe de Xe. M. Sánchez by asturnet 26 de setiembre, 2007 Anque foi un ritu espardíu per tola xeografía d’Asturies y tamien podemos atopalu con delles estremeces per otros países , la h.oguera caltúvose hasta güei con más puxu y vida nel Conceyu Llanes .Ye raru’l pueblu nel que nun se cellebra añalmente esti vezu y de xemes en cuando afayamos ejemplos de braeres competiciones pente los vecinos d’un llugar ya otru pa espitar la h.oguera más grande y gorda . La pallabra h.oguera paez facer clara referencia a la quema , al fueu al que tamos avezaos na nueche máxica de San Xuan col protagonismu de la madera , y col enfotu ritual de facer desapaecer lo vieyo , de dexar atrás l’iviernu y la primavera p’abri-y les puertes al branu , pa remozar l’espíritu y pa saborgar el frutu de los vexetales que tuvieren maureciendo tol añu . Pero ye xusto nesti puntu au ta la singularidá de la h.oguera llanisca : nun s’ambura , a nun ser por una esceición de la que falare más p’alantre. Per otros llugares d’Asturies atopamos nomes pa la mesma costume como plantar el pinu o plantar el maderu , ya ensin salir del territoriu llaniscu tamien se dixo plantar el mayu . Los cancios tradicionales , los testimonios orales recoyíos , y la memoria coleutiva del pueblu dan fe d’ello . Poro , nestos díes que cuerren de duldes identitaries , de duldes relixoses , de desaniciu de los pegoyos culturales en beneficiu de la globalización xabaz que nun tien güeyos masque pal dineru , ye tan importante alcontrar n’estáu más o menos puru una manifestación d’esti calibre que ye una parte d’una manera de ver el mundu , d’una manera de tar nel mundu . El significáu que pudo tener abenayá esti actu de plantar la h.oguera na sociedá llanisca y asturiana ye dafechu un misteriu , porque a la fin , los ritos , los bailles , los cancios , avecen a facese col tiempu porque asina lo manda la costume y los protagonistes dan esa razón pa que se siga faciendo .Como dixo Kluckhohn , ye mui difícil que’l pexe se decate de qu’esiste l’agua . Lo que ye un fechu , ye que la mayor parte de les folixes llanisques nun s’entienden ensin la h.oguera , y en dalgún casu , representa inclusu’l puntu cimeru d’elles , la razón mesma de ser de la cellebración . En llínies xenerales , el ritu suel facese la xornada d’anantes del día grande de la folixa patronal .Los mozos del pueblu van a dalguna viesca del terminu parroquial y corten l’árbol pa tresportalu al llugar indicáu pola tradición nun llugar acutáu pa ello nel pueblu , en dalgunos casos nes places principales o inclusu al dellaú de les ilesies . Acompañáu pola gaita en do , la gaita de ribera ,y el tambor tradicional , y al llombu de los participantes nel eventu o nos últimos tiempos basnáu cola fuercia mecánica del tractor , o de les carrocetes, llega l’arbol yá peláu de corteya y ramaxe (cola esceición de les rames y fueyes de la pica ) , xera qu’avecen a facer nel mesmu monte .Hai un gran furacu , una poza de midíes afayadices , esperando a la h.oguera p’acoyela onde quedará llancada un añu enteru , polo que ye importante que seya abondo fonda p’aguantar los emburriatos de les ventoleres tan corrientes na costa y nes rases costeres atlántiques asturianes o pa que nun fine en suelu per aciu de la mesma fuercia de la gravedá .Tamien se dexen esperando nel mesmu sitiu les escaleres con forma piramidal , les cuerdes , les pales , palotes y los picos , que son los preseos colos que los homes allevantarán la h.oguera . Les muyeres , faciendo un corru o una media lluna en cuantes que talanten que ta aportando la comitiva , entamen los sos cancios al entrar nel recintu , al son de les panderetes y un o más tambores que fain la base d’un ritmu repetitivu , pegadizu y con traces de ser enforma vieyu .Toquen y cancien muyeres de toles edaes , coles panderetes engalanaes con cintes que-y dan más vitalidá y colloríu al conxuntu , y colos tambores que tamien s’empleguen pa ufrir los ramos , de los que se manguen pa tocar nes caderes , más anchos y aplanaos que’l de la parexa de gaita y tambor , dando un soníu únicu al canciu de plantar la h.oguera. En Ponga , el vezu yera (digo yera porque yá nun se fai ) allugar un regalu polo xeneral de perres contantes y sonantes o dalguna otra cosa pal mozu qu’algamare esguilando l’estremu del palu .Pa facer una migaya más difícil la xera , untábase’l maderu con daque preparáu resbariosu p’asina da-y más emoción al asuntu .Yera un triba de preba de bravura , un ritu delantre de la tribu . Nes h.ogueres que queden per Llanes , al facer delles repoblaciones pela fastera con ocalitos al llau de la costa n’esficies d’un porgüeyu económicu rápidu pa da-yos materies primes afayadices a les industries papeleres qu’entamaren a espolletar pel arcu atlánticu , los tradicionales carbayos qu’emplegaben na folixa fueren quedando arrequexaos del eventu , hasta desapaecer , quiciabes camudando dalgo el xacíu orixinal de la cellebración de la que falamos , porque nun hai qu’escaecer que palos antiguos asturianos el carbayu yera un árbol máxicu , como’l texu . Ello ye qu’entovía nes lletres de los cancios (güei castiellanizaes) que paez que tuvieren que camudar muncho a lo llargo los sieglos , atopamos dellos cachos que polo menos , fainmos arrecaldar na intención d’elles . Como na de Vibañu , que vien a dicir : El que cortó la h.oguera y non-y cortó’l ramu buen San Xuan Verde-y espera a las h.ueyas del veranu. Vamos plantar la h.oguera con verdaderu entusiasmu si non pueden los solteros que tiren los casaos. Arriba mozos arriba arriba qu’arriba va que tiren los del roble que non se-yos vuelva atrás. Afayamos el ritual de pasu al verañu , pero tamien sal un personax mui llaniscu , San Xuan Verde , que surde verde y ecolóxicu en dellos pueblos más del conceyu . Hai que decatase de que apaecen los protagonistes que tienen que plantar la h.oguera , los homes solteros , a los que en casu de necesidá pueden echa-yos un gabitu los casaos , y l’arbol que dalgún día tuvo que ser l’homenaxeáu : el roble. Na de Pancar , sal el llugar onde hai que dir a cortalu : Esta h.oguera h.oi cortada nuna preciosa güerta nel mediu d’una llaguna onde’l sol non la penetra. Nun hai denguna dulda de que’l llugar tien pinta de ser secretu y únicu , nun val cualuquier árbol nin cualuquier requexu de la viesca .En Vibañu , apaez tamien esta misteriosa llaguna onde se corten les h.ogueres , pero tien una estremeza no que cinca a la lluz enforma curiosa : Esta h.oguera h.oi cortada nuna hermosa llaguna onde penetraba’l sol las estrellas y la lluna. Dizse que pa los celtes , el Nemeton yera’l llugar sagráu de la viesca .Yera un claru nel monte onde los druides facíen ritos arreyaos al carbayu , onde camentaben que s’axuntaben toles fuercies naturales , el so santuariu . Esa “llaguna” , con dalgo d’imaxinación , asemeyase a una posible imaxe d’esi Nemeton de la relixón celta .Igual nun ye frutu de la casualidá que n’Eire nesos llugares avezaran a medrar carbayos solitarios ; nin que Duir n’irlandes signifique carbayu , o puerte . Les pontes culturales ente esi país y Asturies que podíen facese sedríen munches .¿Esi Nemeton yera la puerte dica otru mundiu o otra dimensión?. Nel ritual celta alredol del carbayu apaez con un protagonismu cimeru una planta abondo conocida poles sos propiedaes máxiques y místiques : l’arfueyu . Ye un parásitu de dellos árboles como’l nuesu carbayu o de los mazanales , que fai años comercializábase pa iguar delles medicines , faciendo collecha d’ello como sofitu a les economíes del campesináu asturianu . Ye de collor verde y da unes bolines d’un verde más clarino d’un tamañu poco más que los arbeyos de frutu . La entruga de si podemos identificar esa llaguna d’au vien la h.oguera col Nemeton nun dexa de tener daque d’especulación , pero ye xusto esa el primer camín pel que se caleya dica les hipótesis . Ye un casu curiosu el qu’acontez en Nueva , nel mesmu conceyu llaniscu , onde a falta d’una , plántense dos h.ogueres , una pal Cristu ya otra pa la Blanca .Y xusto nesi máxicu llugar onde se corta ye onde apaez una de les estremeces más bultables.Na del Cristu : Esta h.oguera h.oi cortada en mediu d’una llaguna onde solo penetraban las estrellas y la lluna. ¡Ea! mozos valerosos presentai vuestru valor plantando esta h.oguera nel campu del honor . Vemos equí la preba del “valor” , anque seya pa entamar a plantala .Y nun ye que seya un asuntu pa non aniciaos , porque por aciu del grandísimu tamañu del arbol qu’avecen a arrempuña-y a la viesca los mozos de Llanes , si nun se dominen les teuniques afayadices pa ello , lo más facil ye que caya en suelu al allevantala o a lo llargo l’añu coles ventoleres qu’azoten les rases llitorales . Na h.oguera de la Blanca vase a por ella a un llugar con otres característiques : Esta h.oguera h.oi cortada en mediu de cuatro pinos p’agora ser plantada nesti campu floridu. Llevantai mozos la h.oguera hasta dexala plantada que e la bandera’l triunfu pal bandu de la Blanca . Namai se fala de cuatro pinos , pero nun sal la llaguna . Equí sal como una amuesa d’identidá del bandu que la planta y nómenla bandera : ye’l símbolu d’un triunfu . Siguir lleendo’l reportaxe de Xe. M. Sánchez 26 de setiembre, 2007 0 FacebookTwitterPinterestEmail
Reportaxe La h.oguera y el nemetón (y II) by asturnet 26 de setiembre, 2007 La lletra de la h.oguera de Porrúa ye asemeyada a estes d’atrás , pero fai una descripción daque más llarga : Esta h.oguera h.oi cortada nuna preciosa güerta a la oriella d’una h.uente onde’l sol non la penetraba. Esta h.oguera h.oi cortada nuna h.ermosa llaguna onde’l sol non la penetra las estrellas y la lluna. Y en Vidiagu , atopamos una estremeza malpenes visible , pero que fai falta apuntala equí pal meyor estudiu del casu : Esta h.oguera h.oi cortada(bis) nuna h.ermosa llaguna onde’l sol non penetraba(bis) nin los rayos de la lluna. Equí apaecen “los rayos de la lluna” y nun salen les estrelles . Ye tamien una novedá qu’haiga un “bis” nos versos impares . El simbolismu d’esa “llaguna” , “güerta” , “en mediu de cuatro pinos” , esto ye , un llugar zarráu y tapecíu paez que ye claru , y , ¿por que ye un sitiu nel que’l sol nun lu penetra? . Quiciabes faiga referencia al secretismu necesariu pa facer los vieyos vezos sagraos per parte d’un grupu de persones escoyíes . Un detái importante al tiempu de cortar la h.oguera ye’l pagu del árbol al propietariu del mesmu , qu’avezaba a apoquinar daquien que taba emigráu del so pueblu como un ofrecimientu que como ye normal sedría pa pidir dalguna gracia de les divinidaes a les que pudiera tar dedicáu esti ritu n’antigüedá y nos tiempos más averaos a los de nueso , al cultu cristianu .En Lledíes , vemos que la h.oguera ye “dada” por daquien : Esta h.oguera que traemos un devotu nos la dio n’honor de San Francisco pa llucir la función. Y na h.oguera de la Blanca de Nueva fain un saludu y vitoreen al que la “regaló” : Tien la h.oguera na so copa un ramín y una flor con un lletreru que diz : ¡Viva quien la regaló!. La dixebra pente l’orixe paganu de la h.oguera y el cristianismu oficial magar de la cristianización (y castiellanización ) de les lletres , podemos tamien vela’n que toes les h.ogueres cellebrense el víspera de la folixa patronal . Un casu especial de les h.ogueres ye’l de la Madalena de la capital del conceyu , de la villa de Llanes .Pa entamar , los mozos del bandu traspórtenla al llombu per tola villa vestíos col traxe’l país diendo de un llau a otru de les cais de Llanes , cásique menaciando a la xente curioso que ta viendo’l cortexu pasar con llevalos per delantre , hasta’l llugar onde arróu de plantala , ambúrenla como si fos una foguera de les de San Xuan .na mayor parte del restu de los llugares onde se planta , los mozos nun visten güei col traxe tradicional esi día , pero sí pal día depues que ye la folixa cristiana .El víspera , nestos otros pueblos , namái visten col nuesu traxe les moces y les muyeres pa canta-yos a los mozos mentres la planten . Tamien el llombu foi sustituyíu en dellos sitios pola fuercia motriz de les máquines col pasu’l tiempu. Una de les fontes documentales más señeres del ritu nel sieglu XIX , ye de xuru l’apartáu que-y dedica a la h.oguera d’entóncenes l’escritor Manuel García Mijares , que lleemos darreu : Fai munchos sieglos que n’Asturies yera xeneral vezu plantar un palu altu nun llugar públicu , perengalanáu con cintes , flores y frutes au s’aconceyaben los mozos y les moces pa rebodiegase pel mes de mayu , razón pola que nomaben al palu Mayu. Tamien yera costume’n Llanes y so conceyu que llancara’l palu citáu la nueche de San Xuan dalgún mozu delantre la casa de la so novia y poner na puerte o nos corredores de la mesma casa arcos y Corones de flores , pero ello foi que ciertu Moru naguaba polos amores d’una d’aquelles mocines ya en viendo que nun-y facía casu dalu , enraxonando dafechu , pego-y fueu al mayu , a los arcos y a les flores , faciendo de too una foguera y faciendolo too puvisa . Dende entóncenes p’acó , nomose La H.oguera lo qu’anantes nomaben Mayu. Estes pallabres son , lo que podíemos dicir la parte de la lleenda y la imaxinación coleutiva o de dalgún “eruditu” llocal decimonónicu de los qu’abondo atopamos peles nueses biblioteques o inda güei pelos nuesos chigres chumando un culín , y de los que , pa nun escaecelo enxamás , el qu’escriba d’estes coses puede ser miembru d’esi club ensin decatase siquier .Pero sabemos que la pallabra “mayu” n’asturianu arriendes del quintu mes del añu tien el significáu de palu , de mazu , de preseu pa “mayar” sidre , anque sí ye verdá que si emplegamos el femenín de la pallabra , maya , ye posible que faiga referencia a una folixa que se fai pa cellebrar qu’aportó la primavera , o tamien pa nomar el palu que se planta , o inclusu pa nomar el llugar que ye la meta o l’abellugu pa los xuegos de los guah.es .El mayu de la h.oguera , ye ensin dubia , el palu y non el mes . Pero Manuel García Mijares dexanos depues d’esa introducción unos pasaxes saborgosos de la h.oguera de Llanes : Consiste La H.oguera anguaño nun árbol drechu , llamera , umeru , chopu o alisa de quince a venti metros d’altor que llibre de les sos rames , los sos ñudos , y de la corteya hasta un metru de la so quima , adórnase la fueya que queda arriba con flores , cintes y frutes , ya inda con aves , y lláncase na plazuela onde fain les folixes y les velaes .Magar que decayó enforma esti vieyu vezu , y sedría una llástima’l so desaniciu completu , pola so orixinalidá y cenciellez que tanto-yos presta a los viaxeros que ye la primer vegada que lu ven , vamos describila brevemente. El víspera de les manches folixes y velaes que’n Llanes se cellebraren siempres , una comisión de mozos brengosos diba a les viesques averaos , o a les márgenes del Rïu Carroceu a escoyer el meyor árbol , y llueu de tratalu col dueñu , socortalu ya esgamaya-y les rames inferiores ,tresportalu hasta un llugar determináu na entrada la villa . Sobre les cincu la tardi más o menos , aconceyábase ellí lo más escoyío de les moces , lluciendo rellumantes traxes d’aldeana y tocando les panderetes y el tamboril, dirixíes poles casaes ya inda poles vildes , entamaben los cancios propios de la folixa , cargaben al llombu los mozos cola h.oguera y pente l’españíu de la pólvora y bayurosu acompañamientu , empobinábense con pasu menudu y pausáu hasta’l llugar au diben facer la folixa .N’aportando a la plaza , arrebullábase la corteya l’arbol , quitábase-y los ñudos , adornábase y engalanábase la quima , facíase un furacón en suelu y entamábase a arrechar l’árbol , ensin que les moces dexaran de tocar les panderetes y de dirixir aquellos trabayos colos sos cancios .Ellí quedaba llancada la h.oguera , sirviendo d’entretenimientu pa los guah.es y rapazones , que trataben d’esguilala p’algamar les flores o premios guardaos na pica , trabayu dificilísimu y poques vegaes recompensáu que servía de gorxa y pasatiempu al públicu presente . Depues de la velada , y mayaos yá del baille y les dances , axuntábense igual númberu de moces y mozos p’arrodiar la h.oguera de despedida . Facíase un círculu alredol del árbol y coyíos toos de les manes , la drecha alantre y la isquierda p’ atrás , pa que resultara un home pente dos muyeres , y una mujer pente dos homes , caminábase de frente con pasu regular y de perfeutu compás , canciando en dos coros los versos : Quien rodeare esta h.oguera buen San Xuan Verde le venga y buena Pascua florida y buena florida Pascua … Y darreu cantábase’l restu del conocíu Rodeu de la Madalena , un cantar abondo llargu y que de xuru que camudaría como tolos cancios de les folixes col pasu’l tiempu hasta aportar a nos , pero que ye un referente na nuesa heredá cultural coleutiva por ser xusto la esceición a la riegla de les h.ogueres en Llanes . Hai qu’insistir nun detái importante que ye la dixebra d’esti ritu de la folixa cristiana , y qu’arriendes de facela’l día d’anantes , por exemplu na lletra de la de Porrúa afayamos : Gracias a Dios que llegamos a nuestru queríu Templu , contemplámoslu per h.uera non podemos entrar dientro. Paez enforma clara la prohibición esi día pa los mozos a entrar na ilesia . Na mesma llínia , les h.ogueres pueden ser un símbolu protector escontra les divinidaes cristianes fadies , con dalguna razón pa facer mal a les persones , como na de Vidiagu : A la Virxen de la Paz pedimos-y muy de veras non h.aga ninguna desgracia con esta preciosa h.oguera. La h.oguera ye un de los ritos qu’inda tan lloñe d’identificase col ritual cristianu , de nun ser poles lletres que les identifiquen con un santu o una virxen , pero qu’inclusu caltienen pasaxes qu’a les muyeres qu’añu tres añu les canten pela fastera , nun-yos “cuadra” , nun-yos atopen el sentíu nun contestu relixosu , entendiendo por relixón el Cristianismu. Quiciabes seya esi detai l’indicador más fiable de que teamos delantre d’un posu importantísimu ya espectacular del paganismu asturianu . 26 de setiembre, 2007 0 FacebookTwitterPinterestEmail