Portada Comunicación Padilla y Borge inauguren con González Riaño la UABRA esti llunes

Padilla y Borge inauguren con González Riaño la UABRA esti llunes

by redacción asturnews

Estipróximu llunes 30 de xunetu, a les 13:00 hores, nel Salón d’Actos de la Casa de la Cultura «Palaciu d’Omaña» de Cangas del Narcea, entamen los Cursos y les Actividaes Abiertes de la Universidá Asturiana de Branu (UABRA).

La Universidá Asturiana de Branu, un proyeutu lleváu alantre gracies a la collaboración ente l’Academia de la Llingua Asturiana, la Universidá d’Uviéu y el Conceyu de Cangas del Narcea, entama esti llunes 30 con un actu nel que van intervenir el Direutor Xeneral de Planificación Llingüística y Normalización del Principáu d’Asturies, Fernando Padilla Palicio; el Vicerrector d’Estensión Universitaria y Proyeición Internacional de la Universidá d’Uviéu, Francisco José Borge López; la Teniente d’Alcalde del Conceyu de Cangas del Narcea, Laura Álvarez García y el Presidente de l’Academia de la Llingua Asturiana, Xosé Antón González Riaño.

Los Cursos y xeres complementaries van desendolcase ente los díes 30 de xunetu y 10 d’agostu y nellos van participar al rodiu de 150 persones.

Esti mesmu llunes, a les 13.30 hores, dientro de les Actividaes Abiertes d’esta edición de la UABRA, tendrá llugar la inauguración de la esposición «Día de les Lletres asturianes: El llargu camín de la oficialidá», na Casa de Cultura de la villa canguesa y que tará abierta al públicu nestes selmanes.

Tamién te podria gustar