Portada Lliteratura Pablo X. Suárez algama’l Xuan maría Acebal de Poesía

Pablo X. Suárez algama’l Xuan maría Acebal de Poesía

by redacción asturnews

Esta selmana conocíase al ganador del segundu premiu de los que concede la Conseyería d’Educación y Cultura cada añu. El Premiu Xuan María Acebal de Poesía n’asturianu recayía nel escritor Pablo X. Suárez.

La ventésima tercera edición del Premiu Xuan María Acebal de Poesía n’asturianu recayía nel escritor Pablo X. Suárez (que ye’l nome artísticu de Pablo Suárez Fernández), un premiu que concede la Conseyería d’Educación y Cultura y que ta dotáu con 3.000 euros.

El xuráu encargáu de valorar les trece obres finalistes tuvo presidíu pol director xeneral de Planificación Llingüística y Normalización, Fernando Padilla Palicio, ya integráu polos escritores M.ª Ángeles Carbajal Roza, Raquel Fernández Menéndez, Ana Isabel Medina Zarabozo, Xuan Santori Vázquez y Xosé Miguel Suárez Fernández.
A esti gallardón podíen presentase poemarios de tema, xéneru y estructura llibres escritos en llingua asturiana con una estensión mínima de quinientos versos, siempre que foren inéditos y non premiaos n’otros concursos.

Ente les obres presentaes, el xuráu decidió por unanimidá conceder el premiu al poemariu tituláu Little Babilonia, destacando “el nivel llingüísticu y estilísticu, y la brillantez de les imáxenes d’un testu que xuega y entemez la tradición más clásica coles referencies más pop”.

La obra presentóse baxo’l seudónimu Richard Richmond. Abierta la plica, el autor ganador resultó ser Pablo X. Suárez. Pablo X. Suárez, (Orviz, Siero, 1981) ye filólogu y especialista en llingua asturiana. Creador de la Timba Poétika y poeta oral, tien publicaos n’asturianu los poemarios Asturiana Beat (2005) y El sistema débeme una chocolatina (2011), amás del volume de relatos Yoni y yo. Ye autor tamién de les obres en castellanu Pop retórika (2010) y Cómo evitar el apocalipsis (2016)

Tamién te podria gustar