Pablo Rodríguez Alonso nomáu meyor ensayista n’asturianu del 2011 polos Premios de la Crítica

22 10:04 2012 Imprimir

L’hestoriador xixonés Pablo Rodríguez Alonso algamó’l Premiu Críticu de les Lletres Asturianes na categoría d’ensayu pola obra «De totalitarios a demócrates. Franquismu, fascismu y nazismu na II Guerra Mundial al traviés del diariu xixonés Voluntad» qu’espublizara nel 2011 Zahorí Ediciones. Esta obra, que yá algamara’l XII Premiu d’ investigación y divulgación «Rosario de Acuña», estudia cómo’l diariu xixonés Voluntad, creáu en 1937 como mediu d’espresión de Falanxe, empondera’l totalitarismu nazi y fascista y, per otra parte, denuncia les democracies y les llibertaes. Sicasí, el periódicu xixonés va dir cambiando esti discursu al empar que cambia l’escenariu internacional, marcáu pola derrota d’Alemaña, Italia y Xapón na Segunda Guerra Mundial. Asina, Pablo Rodríguez Alonso fai un analís pormenorizáu del posicionamientu ideolóxicu de Voluntad ente los años 1938 y 1946 y de cómo quixeron pasar de «totalitarios» a «demócrates».

El xuráu del Premiu, formáu por Rafael R. Valdés, Antón García y Xuan Xosé Sánchez Vicente, decidió por unanimidá conceder el premiu a esta obra pola so contribución a los estudios históricos, de la que destacaron el rigor nel tratamientu de la información y el so bon facer metodolóxicu, abordando cuestiones históriques internacionales al traviés del estudiu de lo local.

Pablo Rodríguez Alonso (Xixón, 1979), ye llicenciáu n’Historia pola Universidá d’Uviéu. Tien publicao los artículos «El nacionalismo bretón desde 1945 a la actualidad» na obra recopilatoria de les I Xornaes d’Historia Contemporánea y «La nacionalización llingüística nos Estaos-nación: l’exemplu español» nel llibru Teoría e historia de los nacionalismos contemporáneos, dambos editaos pola Facultá d’Historia de la universidá asturiana. Asinamesmo tien editáu’l poemariu La lluz del Nordés (Trabe, 2006), ganador del XV Premiu Teodoro Cuesta de Poesía.

Estos Premios que convoca la Xunta pola Defensa de la Llingua Asturiana quieren valir pa reconocer y reivindicar el bon facer de los y les escritores n’asturianu y gallego-asturianu, asina como la calidá de les sos obres, y son una reacción positiva a la decisión de l’Asociación d’Escritores d’Asturies de nun convocar anguaño nos sos premios les categoríes pa los idiomes autóctonos.

La entrega de Premios va facese’l vienres 30 de payares, a les 19:30 hores, na galería d’arte Texu, na cai el Postigo 13 d’Uviéu. Tres la entrega de gallardones, va convidase a los presentes a vinu de Cangas L.lumés y quesu afuega’l pitu Ca Sanchu.

  Categories:
Loading Facebook Comments ...