Pablo Casado respuende a l’Academia con otru tonu sobro l’asturianu

Pablo Casado respuende a l’Academia con otru tonu sobro l’asturianu
04 xineru 14:43 2019 Imprimir

Esti viernes 4 de xineru, el Presidente de l’ALLA recibió carta de respuesta de Pablo Casado, Presidente del PP, a la que con fecha de 14 de noviembre-y unviare l’ALLA en rellación con unes declaraciones de Casado nes qu’esti cuestionaba la realidá del asturianu como llingua viva nel Principáu y el tonu de la carta de respuesta de Pablo Casado (PP) sobre la llingua asturiana paez otru.

Na carta de la institución llingüística asturiana dicíase-y al Presidente del PP que l’asturianu yera una llingua histórica documentada dende’l sieglu XII, que yera una de les llingües qu’emplegaba Xovellanos y que la demanda d’oficialidá yera mayoritaria ente la población asturiana y abrumadora ente la mocedá. Tamién se falaba del marcu xurídicu qu’afita al asturianu como llingua tradicional d’Asturies (Llei d’Usu del Asturianu de 1998, impulsada pol PP) y el fechu de la so presencia educativa como materia curricular cursada por miles d’alumnos d’Educación Primaria y Secundaria dende l’añu 1984.

Na respuesta de Casado esti tresllada que’l Partíu Popular tien el deber de defender los derechos llingüísticos de tolos españoles y que la pluralidá llingüística de les comunidaes autónomes ye un patrimoniu cultural qu’hai que caltener, pero ensin amenorgar la realidá del español como llingua común. El Presidente del PP fina amosando’l so respetu y consideración dafechu pa col asturianu.

L’ALLA valora que’l tonu y el sentíu constructivu d’esta respuesta fairía posible agora l’aconceyamientu que’l Presidente de l’ALLA reclamaba al dirixente del PP p’afondar sobre la problemática llingüística y cultural d’Asturies. Poro, el Presidente de l’Academia de la Llingua Asturiana reitera’l brinde a Pablo Casado pa caltener una xunta nel so llar d’Uviéu con motivu d’una de les sos próximes visites al Principáu

  Categories:
Loading Facebook Comments ...