Pablo Carrera (Duerna): “Yá trabayamos nun segundu discu tan bonu como’l primeru, polo menos…”

09 setiembre 10:38 2011 Imprimir

Pablo Carrera (Llaviana, 1986) ye miembru del grupu Duerna, ún de los más nuevos del folk asturianu, y ente los más prometedores, recibiendo dellos premios, como’l de la Crítica RTPA como grupu revelación en 2008. Xunto a Andrés Martínez, Estefanía Moro y Pedro Pablo Iglesias percorrió esti branu munchos escenarios asturianos presentando’l so discu primeru. D’esti trabayu y del futuru del grupu falános Carrera nesta primer Entrevista de la selmana de la nueva temporada.

-Lleven yá trés años nos escenarios, ¿cómo evolucionó’l grupu?

-La nuesa intención al facer el grupu foi pasalo bien y tresmitir esa allegría al nuesu públicu, con un repertoriu animáu y qu’incitare a baillar, non sólo xéneros tradicionales d’Asturies, sinón tamién foranos (tangu, rumba…) Entamemos nosotros cuatro (Pablo, Pedro, Andrés y Fani) que con guitarra, armónica, gaita, tambor y bombu defendíamos lo que yá diba siendo’l soníu característicu de Duerna. Pero les ganes de meyorar musicalmente ficieron qu’aumentáremos el grupu y tamién la cantidá d’instrumentos. Asina cuntemos con Pablo Pérez col bouzouki y baxu pedal, y con nueves percusiones como’l caxón o’l timbal múltiple. Poco a poco fuimos metiendo más repertoriu y marcando una llinia d’estilu que ta ente’l folk y la música tradicional y qu’agora mesmo define al grupu completamente, porque Duerna nun suena a nengún otru. Anguaño, cuntamos con dos músicos collaboradores: Daniel Álvarez al bouzouki y Melanie Moers al contrabaxu.

-Primero foi la maqueta “Dende’l chigre”, y agora anímense con un discu completu, ¿cuántu tiempu lleven trabayando n’él?

-Pensémoslo en febreru y n’abril yá tábemos metíos nel estudiu. La verdá que foi too bastante rápido, quiciabes porque la base de tol repertoriu que grabemos yá la teníemos mui trabayada, magar que ficimos dalguna variación en dellos temes, ya incluyimos ún nuevu, como ye “Fiestes de prau”.

-Va un par de meses ficieron una presentación na que punxeron tolos esfuercios y participaron una montonera de collaboradores, ¿cómo foi la esperiencia?

-¡Impresionante!, llevónos munchu trabayu’l preparalo too, porque hubo qu’ensayar con tolos músicos collaboradores por separtao, dempués ensayos xenerales, organizar tol espectáculu, encargase de lluces y soníu, etc… Pero dempués xubes a tocar y ves aquella carpa a reventar, tola xente baillando y cantando, la motivación de los músicos que t’acompañen, y tola xente volcada… qu’escaeces tolo que tuvisti que trabayar pa ello. Foi ún de los momentos más especiales que tuvimos, individualmente y como grupu. Y tenemos que dar les gracies a la Sociedá de Festexos de Santiago de Sama por dexanos facer la presentación dientro del so programa de fiestes, y por apoyanos yá dende un principiu en tolo que facemos.

-¿Vamos poder ver a Duerna tocando en más llugares no poco que queda de branu?

-Yá anduvimos abondo esti branu, n’espacios tan guapos como la Nueche Folk de Baiña, el 26 d’agostu; la Nueche Celta de Carrio en Llaviana, el 7 de setiembre; les fiestes d’El Carbayu, güei mesmu, 9 de setiembre; y el 25 aniversariu de la Banda Gaites de Villaviciosa, que sedrá’l 12 de setiembre.

-Amás esti mesmu añu, recibieron un premiu bien importante, el VI Escenariu Prau…

- Sí, dempués d’un primer intentu l’añu pasáu, onde quedemos cuartos; esti añu llogremos pasar a la final, que nengún grupu asturianu lo consiguiera enantes, y amás ganar. Quedemos percontentos con esti premiu; per un llau porque ye recompensa a tol trabayu que facemos, y per otru porque decatémonos que la nuesa música llega a tola xente, lo mesmo a una paisana de Cuturrasu porque sabe los cantares de cuando yera pequeña, qu’a un rapaz de Santander que nun t’entiende nin la metá de lo que cantes. Y eso ye seña de que vamos pel bon camín.

-¿Son importantes los festivales pa la promoción de la música folk?

- Siempres ye importante too aquello que se faiga por y pa la música folk, seya cual seya’l formatu. Nesti casu, esti concursu ábrenos munches puertes fuera d’Asturies, al ser un concursu internacional; y amás, sirvionos pa conocer y deprender del restu grupu que pasaron per él.

-Y les instituciones y los medios de comunicación públicos, ¿cómo ven dende’l grupu la promoción que faen?

-Hai de too… Como suel dicise “naide ye profeta na so tierra”, y munchos medios de comunicación prefieren sacar siempres lo de fuera que lo de casa porque “viende muncho más”. Pero de toes maneres, nel nuesu casu, sentímonos apoyaos por un gran númeru d’instituciones y medios que muestren interés polo que facemos.

-¿Qué proyectos tien agora en mente Duerna?

-Pues lo primero preparar el segundu discu. El premiu del Concursu Escenariu Prau ye grabar un discu y tenemos que facelo enantes de que fine l’añu. Asina que, estos prósimos meses vamos tar trabayando a fondu pa sacar un segundu discu, tan bonu como’l primeru, polo menos…

  Categories:
Loading Facebook Comments ...