‘Orgullo y Satisfacción’, la revista formada por exdibuxantes de ‘El Jueves’, anuncia’l so zarru

La revista satírica dixital ‘Orgullo y Satisfacción’, formada por exdibuxantes de ‘El Jueves’, anunció que va cerrar n’avientu de 2017 porque, tres dos años y mediu de vida, la revista nun algamó la cantidá mínima de 12.000 suscriptores qu’envalora necesaria p’algamar la so viabilidá.

Asina lo esplica la mesma publicación nel so sitiu web, na que recuerda que cuando empecipió la so andadura nun esperaba repitir los 40.000 exemplares vendíos del so númberu 0, pero siquier sí consolidase en 12.000 suscriptores.

Nesti sentíu, esplica que ‘Orgullo y Satisfacción’ parte equitativamente los beneficios ente tolos que la escriben, dibuxen, editen, alministren, promocionen y ponen n’Internet cada mes. “Xeres qu’esixen munches hores y que merecen un sueldu dignu, imposible con menos suscriptores”, añede. Por ello, avanza que l’últimu númberu que va salir a la vienta va ser el númberu 40, n’avientu de 2017 y, hasta entós, la revista va allegar cada mes a la so cita colos llectores. La decisión de la fecha esplícase porque nesi mes vencen les últimes suscripciones formalizaes hasta güei.

La publicación asegura que, ensin resultancies y dientro de la so idea fundacional d’independencia frente a socios financieros y a la publicidá, intentaron adoptar midíes pa evitar esti desenllaz. Na mesma llínea, afirma que nun tien entamáu reconvertise porque supondría la so independencia financiera y de la publicidá. Sía que non, señala que toles suscripciones van siguir n’activu mientres 2017 y tamién van poder realizase nueves suscripciones pol númberu de númberos que queden por publicar. Tres el zarru, el sitiu web va siguir activu mientres unos meses pa que tolos suscriptores tengan marxe abondo pa descargar toles sos revistes.