Portada Sociedá Organízase un cursu d’asturianu nel Atenéu Obreru de Villaviciosa

Organízase un cursu d’asturianu nel Atenéu Obreru de Villaviciosa

by asturnet

L’Atenéu Obreru de Villaviciosa organiza un cursu d’iniciación al asturianu los martes y xueves de 19 a 20:30 hores.

L’Atenéu, “fiel al compromisu cola cultura y la llingua asturiana, quier contribuyir a potenciar estos valores cola puesta en marcha d’esti nuevu cursu”, espliquen. “La tradición asturianista del Atenéu consolídase col apueste inequívocu y el tesón de dellos socios y directivos d’esta Sociedá, como Mundo Collada o Lluis Portal”, comenten dende la organización, que da les gracies a estes y otres persones “pol esfuerciu y entusiasmu por caltener viva la llingua, treslladando a los asturianos la importancia de caltener y consolidar esti preciosu bien cultural qu’heredamos de los nuesos antepasaos, y que tamos obligaos a proyectar escontra’l futuru al traviés de los más nuevos”.

Esta iniciativa cunta col respaldu del Gobiernu del Principáu d’Asturies, al traviés de la Dirección Xeneral de Política Llingüística. “La so directora, Ana María Fueyo, animónos a que punxéramos en marcha l’actividá, que sofita y potencia la llingua”, comenten miembros de la Xunta Directiva del Atenéu, que faen al mesmu tiempu un llamáu “nesti nuevu cursu, qu’esperamos sía l’entamu y l’afitamientu d’un programa de sofitu a la cultura asturiana dende esti Atenéu”.

El nuevu Cursu d’asturianu va ser gratuitu, al tar sofitáu pola Comarca la Sidra, y va poner clases Pablo Suárez Fernández, técnicu responsable del Serviciu de Normalización llingüística de la Comarca la Sidra.

Preinscripciones: ateneo.obrero.de.villaviciosa@gmail.com

Tamién te podria gustar