Olimpia Díez, de 98 años y Herminio García, de 95, son los Paisanos del Añu 2022

Olimpia Díez, de 98 años y Herminio García, de 95, son los Paisanos del Añu 2022
31 mayu 09:30 2022 Imprimir

L’Auditoriu acoyó esti sábadu la entrega d’estos galardones venceyaos cola Feria de l’Ascensión. El primera teniente d’Alcalde, Nachu Cuesta; la conceyala de Festexos, Cuadonga Díaz y otros miembros de la Corporación asistieron a unu de los actos más emotiivos d’estes fiestes, el de la declaración de los Paisanos del Añu 2022.

Herminio García García cumplía’l pasáu febreru 95 años. Natural de Villartorey, nel conceyu de Villayón, nació Herminio n’una familia de 4 hermanos de los que foi’l segundu, na que’l campu y la ganadería, 5 o 6 vaques, yeren el so sustentu y la so forma de vida, “trabayando como burros, con cargues de too lo malo y de lo bono, pocu”.

Olimpia Diez Fernandez, de 98 años, de Casa Marcela, de Villatresmil, nel conceyu de Tinéu, llegó a esti mundu nel núcleu cuartanu de Peñafulgueiros el día de Navidá de 1923. De neña diba a la escuela per caminos de carru y con merienda”  y les tardes dedicar a “llevar les vaques y les oveyes a pastiar”. La so tenacidá, el so esfuerzu y el so amor pela nuesa tierra convirtiéron-yos nel Paisanu y Paisana del Añu 2022, unu de los actos más emotivos de L’Ascensión.

L’Auditoriu acoyó  la entrega d’estos galardones y d’otros munchos venceyaos a les muyeres y homes del campu. So los acordes la Real Banda de gaites Ciudad d’Uviéu, Nachu Cuesta aseguró: “Güei homenaxamos a los homes y les muyeres del nuesu campu, el nuesu raigañu, la nuesa verdadera riqueza”.

El primer teniente d’Alcalde tamién treslladó a los presentes  “un candial saludu en nome del primera edil, Alfredo Canteli, que por motivos personales nun puede acompañanos esta mañana. Pidióme que-yos tresmita tol so ciñu y la so felicitación a los galardonaos, auténticos referentes d’entrega y amor pela tierra, defensores de la tradición y exemplu de constancia y trabayu”.

Anguaño, a feria de l’Ascensión, “recupera tou la so rellumanza ya inclúi nuevos escenarios y actividaes. Esta fiesta, declarada d’Interés Turísticu Nacional y de la que yá se tien constancia yá nel sieglu XVI, convídanos a tornar a lo esencial, al orixe”, comentó Cuesta.

“Esti conceyu y esta rexón, esti paraísu natural, moldia’l so paisaxe en redol a montes, praderías y terrenes de cultivu, ayalgues verdes curiaos por toos vós. Sois los verdaderos garantes de la nuesa mayor riqueza, la nuesa tierra. Supistis curiala y respetala como naide, trabayando’l campu con sacrificiu, curiando’l ganáu ensin fuelgu, xeres ensin horariu y con poca reconocencia. Mientres la pandemia y especialmente mientres el confinamientu, toos dimos cuenta de que sois la pilastra más esencial, la despensa del planeta.

“La mio absoluta reconocencia y felicitación a toos, una reconocencia que personalizo na nuesa Paisana, Olimpia, de la Casa Macela, un cuartanu de Villatresmil, un exemplu d’entereza, esfuerzu y coraxe, y en Hermino, 95 años, 95 años de sabiduría y lideralgu”, concluyó’l primera teniente d’Alcalde.
Tamién fueron reconocíos el Veterinariu 2022, l’Inxenieru Agrónomu, l’Inxenieru Técnicu Agrícola, el Premiu a la Horticultura, el Premiu a la Investigación, los  meyores ganaderos de trés races: Frisona, Asturiana de los Valles y Asturiana de Monte, el premiu a la Defensa y espardimientu de la nuesa tradición y folclore, la meyor Quesería y el Premiu d’artesanía.

  Categories: