Portada Sociedá OFICIALIDÁ: UN DERECHU CIVIL IRRENUNCIABLE

OFICIALIDÁ: UN DERECHU CIVIL IRRENUNCIABLE

by asturnet

OFICIALIDÁ: UN DERECHU CIVIL IRRENUNCIABLE

El Conceyu Abiertu pola Oficialidá da aniciu con esta Rueda de Prensa, a les sos actividaes na presente llexislatura encamentando a los partíos políticos representaos na Xunta Xeneral del Principáu d’Asturies a remanar la OFICIALIDÁ como la única ferramienta posible p’algamar un estatus de llegalidá qu’acabe cola non reconocencia d’un derechu civil democráticu como ye la falta de llibertá d’espresión de los falantes d’asturianu y de gallego-asturianu.

Les elecciones autonómiques supunxeron un parentesis pal llabor del Conceyu Abiertu pola Oficialidá porque nos paecía que’l protagonismu correspondía-yos a los partíos políticos. Dempues d’esi parón, volvemos a l’actividá pública cola movilización, pero tamien cola nuestra llinia de diálogu y esplicación a los representantes políticos buscando’l consensu pa la reconocencia de la oficialidá.

Agora mesmo tenemos enriba la mesa dos cuestiones qu’afecten sobre manera al futuru llingüísticu d’Asturies: el pautu de gobiernu y la reforma del estatutu d’autonomía.

Queremos volver a recordar la responsabilidá individual de caún de los parllamentarios asturianos escoyíos nestes elecciones: l’asturianu y el gallego-asturianu son patrimoniu común de toos, falemos la llingua que falemos, y ye deber de los nuestros gobernantes garantizar el so futuru. Pa eso, la oficialidá ye indispensable. Indispensable pa la sobrevivencia de cualesquier llingua en pallabres de la UNESCO.

Nun falamos de situaciones futures. Falamos de la reforma del Estatutu d’Asturies que prósimamente va tener llugar y del pautu de gobiernu que ta enriba la mesa nestos momentos. Ensin oficialidá taríamos torgando una vegada más un derechu de la ciudadanía y incumpliendo’l mandatu constitucional que fala de que “les demás llingües serán oficiales”. Esti imperativu de la Constitución española incúmplese n’Asturies condenando a los falantes d’asturianu y a tolos asturianos, a la invisibilidá cuando se fala de les llingües del Estáu, por nun ser oficial la nuestra. Y eso por nun falar de la perda de fondos económicos y prestixu social qu’ello implica.

La cuestión de la oficialidá tien que tar dientro del Pautu de Gobiernu porque va ser una cuestión central nesta llexislatura cuando entame’l procesu de reforma estatutaria. Lo contrario entenderíamoslo como un fraude. Nun se pue volver a falar de que nun hai oficialidá porque nun s’incluyó nun pautu pa gobernar Asturies.

La Oficialidá nun ye un cromo que se pueda cambiar por otres coses, ye un derechu civil qu’hai que conceder y non ye moneda de cambiu, Pidimos a Izquierda Xunida-Bloque por Asturies-Los Verdes firmeza pa non dexar fuera d’un alcuerdu de gobiernu un tema que nun ye negociable: los derechos fundamentales de la ciudadanía.

Queremos dexar clara una idea: defendemos cualquier midida de promoción pa la llingua, pero nunca contraponiendolo a la idea d’oficialidá. La “promoción”, la “defensa”, el “apoyu” ensin más nun son abondo si nun van acompañaos d’un marcu llegal qu’iguale en derechos. Eso ye la oficialidá. Por eso se fixeron oficiales les llingües d’otres comunidaes. Sicasí, n’Asturies, onde nun hai oficialidá, trenta años de “promoción”, “defensa” y “apoyu” nun valieron pa da-y la vuelta a una realidá a la que nun se pue retrucar: la mengua imparable de falantes y, polo tanto, el peligru de desapaición de la nuestra llingua. Si los ciudadanos nun tenemos igualdá de derechos, falemos la llingua que falemos, ye imposible que l’asturianu se tresmita y sobreviva. Ensin oficialidá, cualquier avance siempre acaba atopándose cola llei pa torgar los nuestros derechos.

El Conceyu Abiertu pola Oficialidá va siguir brindándose pal diálogu con toles fuerces parllamentaries. Nel periodu anterior Izquierda Xunida, que ye favorable a la oficialidá y forma parti del CAO, continuó cola so defensa d’esta reivindicación, pero, tamien el Partíu Popular abrió víes de diálogu col Conceyu Abiertu, al travies de numberoses reuniones que llevaron a la redacción nel so programa electoral d’un testu que diz que ye’l momentu d’algamar un gran consensu nel artículu cuartu del Estatutu d’Autonomía, pa da-y un marcu llegal a la llingua que satisfaga a tolos asturianos. Esperamos qu’afonde nesti diálogu col CAO y mantenga’l so compromisu electoral.

Nel periodu que s’abre agora, aguardamos tamien, porque ye de xusticia social pa colos ciudadanos que gobierna, que la Federación Socialista Asturiana-PSOE, nun exerciciu de responsabilidá política y coherencia democrática, dea’l pasu que nun dió hasta’l momentu y solucione un conflictu llingüísticu que yá dura trenta años. Y tien que ser asina porque en democracia esiste’l deber políticu de gobernar pa tolos ciudadanos y ciudadanes, seyan más o seyan menos, como respetu a la pluralidá de la sociedá a la que se representa. Y entá más, el partíu socialista tien que dar los mesmos derechos n’Asturies que reconoz como partíu políticu nos demás territorios que conformen l’Estáu español. Nun val garantizar derechos pa unos ciudadanos y nega-ylos a otros. Toles llingües son patrimoniu común de los ciudadanos y deben protexese por igual.

Faigamos un exerciciu de responsabilidá política y social y abramos la puerta a la oficialidá pa pesllar d’una vez por toes una ferida nel corazón de munches persones . Los asturianos tenemos que ser quien a demostranos a nosotros mesmos que podemos solucionar los nuestros problemes faciendo del estatutu una fonte de derechos pa toos y toes y una garantía pa la convivencia democrática basada nel respetu a los demás.

Tamién te podria gustar