‘O Breizh, ma Bro’ pieslla la cabera nueche máxica de Lorient 2018

10 agostu 12:39 2018 Imprimir

O Breizh, ma Bro, me ‘gar ma Bro…  L’himnu de Bretaña punxo la emoción y el puntu final a la cabera nueche intercéltica de Lorient, la máxica nueche que sirvió pa homenaxear a Philippe Renard que dexa la Bagad de Lann-Bihoué depués de ocho años de memorable direición, arguyu de Lorient. Y los grupos asturianos tuvieron al altor de la celebración.

Como asocede cada añu, la cabera de les nueches máxiques afitaba na madrugada del segundu vienres del Festival l’ésitu d’esta fórmula veterana de Lorient. Pasen los años y caltiense l’ésitu de públicu, garantizáu en cuantes nun llueve, y participación importante pala economía del festival. Y cada añu hai dalgún elementu que fai destacar un eventu per sí destacable. Esti añu, la cuarta de les nueches máxiques, como se llamaben de siempre, dexaba afitáu l’ésitu del modelu y remembraba la so constante reinvención. La emoción de sentir l’himnu bretón y una puesta en escena amañósa con una bandera xigantesca de Bretaña punxo puntu final a un espectáculu, pol que nun paecen pasar los años y que cada edición incorpora nuevos matices, detalles fotográficos y audiovisuales, d’illuminación…

La nueche máxica ye ensin dubies y dende l’aniciu del Festival hai cuarenta y ocho años la más importante de les cites de la programación. El martes y el miércoles pudo siguise un espectáculu braeramente impresionante que ye obligáu pa cualaquier que venga per primera vegada a Lorient nestes feches d’agostu, pero’l xueves pela nueche comprobose otru añu más la maurez d’esti espectáculu ensin competencia.

La cadarma del espectáculu ye siempre la mesma, dende va munchos años, ameyorada hai un llustru con nueves imáxenes y aderezos de diseñu, pero paez nun repetise en cada ocasión. Un sólu de metal, un canciu galés que ye tan averáu al de nueso que paez que temos nun concursu de tonada, ya inclusu un coru, son escoyíos davezu pa entamar y dar pasu darréu a una banda de gaites, seya irlandesa o bretona. Porque ye a la banda escocesa a la que siempres se-y dexa la parte central pa qu’interprete “Verdes montañes” y esos grandes hits de la música scottish que tanto presten equí en Lorient dende siempre y que ún nun cansa de sentir.

El casu ye que la nueche máxica cuntó con eses interpretaciones clásiques y cola presencia de grupos que repiten añu tres añu, como el Keltika Highland Dance Team. Y xunta ellos tuvieron los representantes asturianosque salieron una nueche más en comuña a danzar nel estadiu de Lorient, onde se cellebren cada festival estes nueches máxiques: La Banda de Gaites El Gumial, dende tierres ayeraes, y la d’El Gaitero dende Villaviciosa, faciendo danzar al grupu San Félix de Candás de baille tradicional.

Tres d’una actuación perfecha de los asturianos y enforma apludida pol públicu de Lorient va desenvolviéndose’l mesmu programa de tolos años con pequenes variaciones. Hasta qu’aporta’l momentu de la traca final: van allugándose nel centru l’estadiu la totalidá de les bandes y grupos participantes que tres desfilar y colocase en formación tornen mirar pala gran pantalla na que dende’l primer momentu van viéndose motivos de cada país participantes, dende castiellos d’Escocia a imáxenes de la Bretaña más tradicional, ensin escaecer los escudos y banderes de cada país celta participante. Pero esti añu, la emoción espardiose pel estadiu en cuantes que entamó a sonar l’himnu de Bretaña pa homenaxear a Philippe. Y nesi mesmu instante, apagase la proyeición y entamaron los fuegos artificiales colos que se fina cada nuechi. Hasta la siguiente que sedrá na primer fin de selmana d’agustu del añu 2016, añu de Galicia, como s’arpovecho pa facer anuncia na pantalla de proyeición del Estadiu. Un añu más, nueches máxiques pa nun escaecer.

Loading Facebook Comments ...