Portada Política Nun hai polítiques nueves ensin polítiques llingüístiques nueves

Nun hai polítiques nueves ensin polítiques llingüístiques nueves

by redacción asturnews

La Xunta Pola Defensa de la Llingua facía ayer un llamamientu a los partíos políticos asturianos que dicen defender la normalización de la llingua asturiana y sofitar la cooficialidá pa que s’amuese esi plantegamientu nes conversaciones pa escoyer al presidente asturianu, convenzíos como tan de que “nengún cambiu políticu va poder existir n’Asturies si nun se visibiliza al traviés d’un cambiu radical nes polítiques de normalización llingüística”.

Nun comunicáu asoleyáu esti miércoles, la Xunta describe que “estos díes tamos viendo cómo los cambios nos Gobiernos de dellos territorios del Estáu tán xenerando cambios en tolo que tien que ver cola normalización de los sos idiomes. Asina, nel País Valencianu la política llingüística ta visibilizándose como ún de los exes vertebradores del cambiu políticu y de la visión nueva sobre’l futuru d’esa tierra, mentes que n’Aragón va existir pela primer vez na historia una Dirección Xeneral de Política Llingüística, xestionada amás pol ala más aragonesista del Gobiernu autonómicu”.

Sigún la XDLA, “el mesmu camín de meyora na visibilidá y usu del idioma propiu parez que van siguir Navarra y conceyos tan importantes del Estáu como A Coruña, Pamplona o Valencia. Sicasí, nel llau contrariu ta Asturies, un territoriu trillingüe onde los idiomes propios parez que nun tán xugando nengún papel nes negociaciones pa formar un Gobiernu nuevu. Y ye que cada día vemos a los nuestros representantes falar de tiempos nuevos, de polítiques nueves, de buscar consensos, de midíes sociales, etc., mentes dexen de llau un patrimoniu cultural y fonte de derechos tan importante como ye la llingua propia de los asturianos”.

Pala organización asturianista, entá más preocupante ye que “partíos que se comprometieron a defender los nuestros derechos llingüísticos -derechos humanos a la fin- en campaña electoral, agora, depués de les elecciones, falen d’apoyar a candidatos como Javier Fernández, que nun fixo nenguna referencia al idioma nel so discursu d’investidura y que presidió cuatro años de parón na política llingüística, o otros que voten a Mercedes Fernández, que na so intervención la una única referencia que fixo al asturianu foi pa falar de recortar, tovía más, la so presencia nel sistema educativu. Nun podemos entender que se dea carta blanca a persones que mostraron la so intolerancia llingüística y que nes últimes décades vienen faciendo tolo posible por facer desaparecer la llingua asturiana como vehículu de comunicación”.

Esta esmolición xorrez entá más al ver que “nos otros territorios billingües del Estáu, la situación del idioma propiu nel sistema educativu o nos medios de comunicación públicos -estayes fundamentales p’asegurar la vitalidá d’una llingua- convirtiéronse nún de los temes protagonistes de les negociaciones d’investidura o de Gobiernu”.

Na Xunta Pola camiente que “tampoco nun podemos dexar de llau que se ta abriendo un procesu de reformes estatutaries nos territorios nos qu’estos cambios llexislativos quedaren paraos. Un exemplu son les Isles Canaries, que nel mes de marzu pasáu aprobaron una reforma qu’agora tien que llegar al Congresu. Per otru llau, nel País Valencianu yá iniciaron los trámites pa siguir esi camín y desbloquiar la so reforma. Por eso, los partíos comprometíos colos derechos de les persones falantes d’asturianu van poder demostrar que trabayen pola igualdá en derechos fundamentales que trai oficialidá. Y ye que nengún cambiu políticu va poder existir n’Asturies si nun se visibiliza al traviés d’un cambiu radical nes polítiques de normalización llingüística”.

Tamién te podria gustar