Nuevu Serviciu d’Asesoramientu Tecnolóxicu del Conceyu d’Uviéu

Nuevu Serviciu d’Asesoramientu Tecnolóxicu del Conceyu d’Uviéu
18 ochobre 09:00 2021 Imprimir

UnnNuevu Serviciu d’Asesoramientu Tecnolóxicu nel Conceyu d’Uviéu vieno acabante ponese en marcha dirixíu a aquelles persones que tengan dificultá col usu del ordenador o teléfonu móvil, o bien con dalguna aplicación en concretu, p’ayudar nel manexu dixital de la so vida cotidiana.

El serviciu emprestase mientres tola selmana tantu presencial como telefónica y electrónicamente (whatsapp, email, videoconferencia…), de 09:00 a 14:00 y de 16:00 a 21:00 sacantes la tarde de los vienres, y alcuéntrase nos equipamientos de Villa Madalena y el Telecentro y Centru Xuvenil de La Corredoria. Pueden aportar a esti asesoramientu tou tipu de públicos, anque con especial tratu preferente a les persones de mayor edá.

La orientación y asesoramientu tomen ensame de temátiques: dende la conocencia básica de los dispositivos electrónicos hasta’l manexu d’internet (alministración electrónica, comerciu electrónicu, busca de recursos, empléu de los teléfonos móviles, instalación y usu de les aplicaciones más habituales…).

Les consultes tamién pueden realizase pela vía dixital,  al traviés de whatsapp, corréu electrónicu o videoconferencia, y en delles ocasiones estes sesiones pueden entamase en grupos amenorgaos d’usuarios colos mesmos intereses, moliciones o dificultaes tecnolóxiques.

Dientro del abanicu d’acciones del proyectu, los profesionales responsables tamién s’encarguen de sofitar y dar soporte técnicu a los usuarios del Centru Social Virtual d’Uviéu (https://centrosocialvirtualoviedo.es/), a la de tramitar les sos solicitúes electróniques nel Campus Virtual dende onde s’imparten estes actividaes, según realizar el siguimientu de tolos cursos virtuales de calter informáticu que se realicen por aciu videoconferencia, o resolver incidencies técniques de too tipu que puedan dir surdiendo a los alumnos de les clases on line.

Pa reforzar l’aprendizaxe y ufiertar pautes y conseyos, dende esti serviciu ellabórense dacuando materiales didácticos y tutoriales facilitaos a demanda del públicu y que tamién tán disponibles en delles canales y plataformes (páxina web, redes sociales..).

Amás, dende esti Serviciu d’Asesoramientu Tecnolóxicu realícense otres ufiertes de formación básica más puntuales, llamaes Píldores Formatives. Les píldores formatives son cursos presenciales bien específicos y de curtia duración pensaos para afondar nuna temática concreta que forma parte del conteníu d’un cursu más estensu. Antes del empiezu de los cursos virtuales va dedicase una Píldora formativa al funcionamientu de Zoom, pa toos aquellos que nun apoderen dicha plataforma.

Pa poder inscribise, hai qu’allegar presencialmente a les instalaciones de Villa Madalena o’l Centru Xuvenil y Telecentro de La Corredoria, o bien contactar colos teléfonos del Programa.

Información y contactu col Serviciu:

Villa Madalena (Callle Avda. de Galicia, 36)
Tfno: 984 287 076  | 648806607
Centru Xuvenil y Telecentro de La Corredoria (Calle José Requejo, 16)
Tfno. 984 282 523  | 690053471

  Categories: