Portada Conceyos Nuevu ésitu de la Selmana Máxica de Xixón

Nuevu ésitu de la Selmana Máxica de Xixón

by redacción asturnews
Semeya d'un espectáculu de Maxa

La pasada fin de selmana clausuróse el festival internacional V Selmana Máxica de Xixón con cuatro funciones de la Gala Internacional de Maxa nel Teatru Xovellanos y un ésitu d’asistencia pergrande, llegando a superar, un añu más, los 15.000 espectadores nes sos decenes d’espectáculos.

La cifra algamada ye enforma importante por llograse a pesar de tener que suspender 6 de les sos actuaciones poles males condiciones climatolóxiques.

Ente’l 20 d’avientu y el 4 de xineru, ilusionistes llegaos de distintos países como Francia o Coria y dalgunos de los más importantes d’España invadieron les cais, places, centros culturales y el Teatru Xovellanos pa llevar la maxa a tolos rincones de Xixón. Y la pasada fin de selmana’l Festival despidiose col so actu central que, como n’anteriores ediciones, foi la Gran Gala Internacional de Maxa presentada pol recién ganador del ”Óscar de la Maxa” y na que, amás, actuaron conxuntamente cinco ganadores del Premiu Mundial de Maxa representando ente toos ellos les distintes disciplines del ilusionismu. Pa que pudieren esfrutar d’esta Gran Gala’l mayor númberu de persones posibles, per primer vegada realizáronse cuatro pases nel Teatru Xovellanos, y entá asina escosaronse les 4.400 entraes a la vienta dexando a cientos de persones ensin entrada.

Tamién s’enchieron munches de les actuaciones de cai, llegando a superar los 1.800 espectadores en delles actuaciones del Paséu de Begoña. Con esti festival tamién se treslladó la maxa a les zones de Deva, Moreda o Cimadevilla. Un festival que prueba de nuevu’l so afitamientu n’Asturies y que, a pesar de crecer en programación cada añu, sigui recibiendo en cada edición munchos más espectadores, n’ocasiones veníos d’otres comunidaes autónomes (especialmente Galicia, País Vascu y Castiella y Llión). Dende la organización tan bien agradecíos tantu al públicu de Xixón como al de toa Asturies y turistes que cada añu sofiten cola so presencia’l Festival.

A pesar de que cada añu aumenta’l númberu d’espectáculos, toos y cada unu d’ellos completen los aforos tantu n’actuaciones abiertes como zarraes, dende la primer edición del Festival. Lo que supon tou un retu pa poder tomar n’ediciones futures la creciente y gran cantidá de públicu que recibe la Selmana Máxica de Xixón, que yá toma casi 3 selmanes y que la so gala de clausura en futures ediciones va haber que repitir siquier 5 vegaes.

Tamién te podria gustar