Portada Sociedá Nuevu ciclu de conferencies y talleres de la Escuela Municipal de Salú y el Teléfonu de la Esperanza

Nuevu ciclu de conferencies y talleres de la Escuela Municipal de Salú y el Teléfonu de la Esperanza

by redacción asturnews

Dende esti 18 d’abril al 17 de xunu van celebrase 6 conferencies y 4 talleres que van tratar sobre “el mundu de les emociones, l’ansiedá, la forma de rellacionase pa tener una vida sana, el mindfulness y tou lo que tien que ver cola intelixencia emocional.

Esti martes, 18 d’abril, arrincaba una nueva edición de les conferencies y talleres en redol a la salú qu’entama’l Teléfonu de la Esperanza y el Conceyu d’Uviéu al traviés de la Escuela Municipal de Salú.  La conceyala d’esta área, Merced  González, indicó que la esperiencia repitese debío “a la gran demanda de la xente, lo qu’amuesa que la población tien ganes de conocese a sigo mesma”. Según esplicó, nesti nuevu ciclu van tratase temes como “el  mundu de les emociones, l’ansiedá, la forma de rellacionase pa tener una vida sana, el mindfulness y tou lo que tien que ver cola intelixencia emocional”.

Pela so parte, el presidente del Teléfonu de la Esperanza, Hilario Paz, estimó la collaboración del Conceyu pa poner en marcha “esti gran serviciu que tien una gran respuesta per parte de la población”.  Según esplicó, nesti nuevu ciclu tituláu “A vueltes cola vida apurriránse los “recursos oportunos” por que la población pueda “afaese a los continuos cambeos de la vida, qu’en munchos casos xeneren tracamundiu y ansiedá”.

El ciclu componse de seis conferencies que se van celebrar, a partir de mañana y hasta el 23 de mayu, tolos  martes nel Auditoriu Príncipe Felipe d’Uviéu de 19:30 a 20:30 hores. L’accesu va ser llibre hasta completar l’aforu. Les cites van ser les siguientes: “A vueltes conmigo mesmu: Yo / Non yo” al cargu de Samikannu Peter, espertu en Mindfulness y desenvolvimientu Personal  (martes, 18 d’abril). “A vueltes colos sicofármacos: Enfermedá/Salú”  que va impartir el psiquiatra José Mª Uncal Jiménez de Cinsneros (martes, 25 d’abril). “A vueltes colos años: Dependencia/Independencia” al cargu de la psicóloga Rosa de Arquer Pulgar (martes, 2 de mayu). “A vueltes col cambéu: Querer/ Poder” que va impartir el psicólogu Daniel López (martes, 9 de mayu).  “A vueltes cola soledá: Familia de origen/Familia afeutiva” a cargu del psicólogu Fernando Albuerne (martes, 16 de mayu) y “A vueltes cola vida: Permanencia/Camudo” que va dar la psicóloga Azucena Farcía Portiellu.

Per otra parte nesti ciclu inclúyense cuatro talleres que se van desenvolver na biblioteca de La Granxa (Campo San Francisco) los sábados de 11:00 a 13:00 hores.  Pa poder participar ye necesariu inscribise primeramente unviando un email al corréu: emsoviedo.es. El primer cursu, tituláu “Nuevos enfoques sobre l’ansiedá” al cargu de la psicóloga Marta Alonso, va celebrase’l sábadu 6 de mayu. La psicóloga, nutricionista y naturópata Azucena García Portiellu va ser la encargada del segundu taller tituláu “Rellacionanos cola comida sanamente ye posible” que va tener llugar el sábadu 13 de mayu. El día 3 de xunu, la psicóloga Ladis García va impartir  el taller “Escontra una nueva intelixencia emocional”, y al siguiente sábadu, el día 17 de xunu, Sanikannu Peter va dirixir un cursu sobre mindfulness.

Tamién te podria gustar