Nueve de los diez meyores universidaes españoles son públiques

Nueve de los diez meyores universidaes españoles son públiques
07 xunetu 08:57 2020 Imprimir

Nueve de les diez universidaes españoles que meyor combinen les actividaes docentes coles d’investigación ya innovación son públiques, según la octava edición del informe O-Ranking, ellaboráu pol BBVA y l’Institutu Valencianu d’Investigaciones Económiques (IVIE).

Nesta clasificación, la primera ye la Universidá Pompeu Fabra, siguida pola Carlos III de Madrid, la Autònoma de Barcelona, la Politècnica de Catalunya y la Politècnica de València. La primer universidá privada ye la Universidá de Navarra, que forma parte d’un grupu que completa los diez primeres posiciones cola Autónoma de Madrid, les universidaes de Cantabria y de Barcelona y la Rovira y Virgili. Polo xeneral, les universidaes públiques superen la media n’investigación, un ámbitu nel que se queden bien tras les universidaes privaes, que sicasí, tán percima de la media en rendimientu docente.

Los autores del estudiu, que se presentó hai una selmana, constaten que tres les posiciones de les universidaes nos rankings atópense dos elementos qu’estes instituciones pueden controlar «por aciu una xestión fayadiza»: la especialización de cada universidá y la calidá de les sos resultancies docentes ya investigadores por cañes y titulaciones. «Les meyores universidaes suman ventayes especializándose n’árees nes que son capaces de llograr bones resultancies, de manera que la so especialización reforzar», sostien l’informe.

L’O-Ranking ufierta delles conclusiones interesantes. Asina, anque la variable más relevante pa la empleabilidá ye’l tipu d’estudios cursaos, la titularidá de los centros importa tamién nel insertamientu. Los titulaos nes universidaes privaes presenten meyores indicadores medios d’afiliación a la Seguridá Social, bases de cotización y porcentaxe de contrataos en puestos que riquen titulación universitaria.

En toles cañes, sacante en Ciencies de la Salú, les universidaes privaes superen a les públiques nos promedios d’indicadores disponibles d’insertamientu llaboral. Les ventayes son más importantes, sobremanera, en Ciencies Sociales y Xurídiques, la especialización qu’atrai más alumnos y na que les universidaes privaes concentren el 62% de los sos egresados. Sicasí, les cinco titulaciones con meyor insertamientu son Medicina, Podoloxía, Óptica y Optometría, Farmacia y Enfermería (que pertenecen a l’área de Salú), precisamente aquelles nes que destaquen les universidaes públiques. El ranking d’empleabilidá por titulaciones sigue hasta’l puestu númberu 15 con estudios rellacionaos coles inxenieríes. Otra manera, les carreres con menos salíes llaborales son les de Turismu, Xestión y Alministración Pública y Belles Artes.

Según l’O-Ranking, la empleabilidá d’un tituláu potenciase por aciu l’alquisición de conocencies, competencies, habilidaes y capacidaes, que faciliten l’aprovechamientu de la so formación para exercer afechiscamente l’oficiu para la qu’un títulu habilita». L’estudiu sorraya que l’insertamientu llaboral de los titulaos depende de la contribución de les universidaes a la so empleabilidá, pero tamién d’otros factores que la universidá nun controla directamente, como la redolada sociolaboral de los egresados, la localización de la universidá o’l momentu del ciclu económicu.

Con datos de la situación en 2018 de los egresaos cuatro años antes (cursu 2013-2014), les universidaes privaes superen en casi toles rames a les públiques nos indicadores disponibles d’insertamientu llaboral. Les ventayes son mayores en Ciencies Sociales y Xurídiques, pero tamién n’Inxeniería y Arquitectura y n’Artes y Humanidaes, anque nésta, l’insertamientu ye problemática en toes. Nes universidaes públiques les resultancies d’insertamientu llaboral solo son meyores que nes privaes en Ciencies de la Salú.

Les ventayes nel insertamientu de les universidaes privaes son, polo xeneral, mayores un añu dempués del fin de la carrera, pero la diferencia va desapaeciendo pasu ente pasu. Aun así, a los cuatro años, la tasa d’afiliación de los egresaos d’universidaes privaes ye 4,5 puntos porcentuales cimeru (al añu de titulase yera de 14 puntos), el porcentaxe de cotizantes en grupos compatibles con una titulación universitaria ye 15,4 puntos cimeru (al añu, 20,8 puntos) y les sos bases medies añales de cotización son 3.547 euros más elevaes (frente a 4.895 euros el primer añu).

 

  Categories: