La Nueche blanca n’Uviéu axunta más de 100 actividaes del 7 al 8 d’ochobre

La Nueche blanca n’Uviéu axunta más de 100 actividaes del 7 al 8 d’ochobre
03 ochobre 08:50 2016 Imprimir

La programación de la Nueche Blanca d’Uviéu va estendese esti añu dende les 18:00 hores del vienres 7, hasta la madrugada del sábadu 8 d’ochobre. Les actividaes van desenvolvese en  50 escenarios distintos sigún el conceyal de Cultura, Roberto Sánchez Ramos y Roberto  Sancifrián, técnicu responsable de la programación, que presentaron la selmana pasada una nueva edición d’esta cita, na que 50 espacios del conceyu van acoyer más de 100 actividaes.

Según el conceyal, ésta va ser la “nueche más llarga: porque va dir dende les 18:00 hores del vienres 7, hasta altes hores de la madrugada del sábadu, 8 d’ochobre”. Una programación, que cuntó “col sofitu unánime de tolos grupos políticos” y que “va amosar la diversidá del conceyu” en relación al ampliu abanicu de disciplines artístiques que se van representar, según  los escenarios nos que se van desenvolver.  Nesti sentíu Sánchez Ramos indicó que “Uviéu nun  ye namá la ciudá” polo que la Nueche Blanca va tar presente “dende Tudela Veguín a Trubia, pasando per Cualloto y la Corredoria”.

Programación vienres 7 ochobre

Dientro de la programación del día 7, Sancifrián quixo sorrayar la visita al Muséu de Belles Artes que va ufiertar la escritora Ánxeles Casu y el conciertu del Coru El Llión d’Oru na Ilesia de Santa María La Real de la Corte. Destacó tamién el ciclu ‘Cine Negru pa una Nueche Blanca’ que, so la dirección de Pablo de María y la collaboración de SACU, va ufiertar na Filarmónica un total de 6 títulos clásicos (2 el vienres y 4 el sábadu) del meyor cine negru norteamericanu. Pela so parte, el Campoamor va acoyer esi vienres l’ensayu xeneral de la ópera Faust, al que podrá asistise con invitación. van partise dos per persona, el día 6, a partir de les 16:00 hores, nes taquilles del teatru.

Programación sábado 8 d’ochobre

Sancifrián empezó la so repasada a la programación del día 8 sorrayando’l trabayu y collaboración de les 10 sales d’arte que van abrir les sos puertes por cuenta de la Nueche Blanca. Ente les novedaes y grandes cites d’esa nueche mentó l’espectáculu interdisciplinar que so la dirección d’Ignacio Martínez Lloreo, va desenvolver na Plaza del Paragües, y nel que vamos poder esfrutar mientres cinco hores, d’árees creatives como la fotografía, arquitectura, diseñu , vídeu y música.  La programación d’esta nueche tamién inclúi una intervención de l’Asociación de les Artes Visuales d’Asturies nel llateral de la fachada del Campoamor, según un recital poéticu nel Muséu Arqueolóxicu. Nel Edificiu Históricu de la Universidá d’Uviéu, el diseñador Toño Velasco va realizar semeyes instantánees al públicu asistente que van conformar ‘una gran familia’ nun exerciciu de dibuxu improvisáu sobre un gran mural. Nesti mesmu escenariu, el músicu Pablo Moru va dar un conciertu especial nel que va repasar los cinco discos qu’editó nestos diez años de carrera. Per otru llau, el monesteriu de San Pelayo volverá abrir les sos puertes a los visitantes pa que puedan la ilesia, el coru, el claustru y el claustrillo.

Los más pequenos tamién van poder esfrutar de la Nueche Blanca: pa ellos va haber mientres los dos díes actividaes infantiles na plaza de Trascorrales entamaes pola Asociación Vecinal Uviéu Redondo, y el sábadu programáronse dos  representaciones de títeres nel edificiu del Pavu Real y l’obra de teatru ‘Tiempu de pirates’ al cargu de Teatru Marxe, nel Paséu del Bombé. Pa esta edición recuperóse una de les actividaes con mayor ésitu del pasáu añu: les rutes per Uviéu. Asina se programaron dos visites de la Revolución d’ochobre del 34′ per día, otra ruta teatralizada de Rexentar, y l’Uviéu  de “Nós, los Rivero”.

Toles actividaes son gratuites, y namái va precisar inscribise la ruta “Revolución del 34″ (fundación.jmzasturias.ccoo.es) y les  visites a la colección pictórica de la Fundación Princesa d’Asturies (hasta’l 6 d’ochobre en www.fpa.es) y a la central de Telefónica en Buenavista (telefónica.nocheblancaoviedotelefonica.com, apurriendo nome, apellíos y DNI, que se va deber enseñar antes d’empecipiar el percorríu).

Esta edición de la Nueche Blanca tien una última novedá: ye la convocatoria d’un concursu de fotografía en Instagram. Hasta les 12 hores del día 9 d’ochobre podrá participase, publicando nesta rede social fotografíes de les intervenciones artístiques o de los enclaves nos que se desenvolvió esta cita cultural. Toles publicaciones tendrán de contener los dos hashtags: ovdnocheblanca2016 y ovdnocheblancafoto. La fotografía ganadora va ser premiada con dos localidaes pa una de les obres de teatru programaes dientro del ciclu Escena Contemporanea.

Descargar programa completu de la Nueche Blanca

  Categories: