Comunicación Colectivos culturales xixoneses organicen la Semana del Aula Popular José Luis García Rúa by asturnet 3 de febreru, 2006 La Semana del Aula Popular José Luis García Rúa escomienza esti viernes 3 en Xixón embaxo’l títulu de “La utopía aplazada”. L’alcordanza y pervivencia de los ideales llibertarios ye un de los asuntos alrodiu de los que van xirar les actividaes programaes nesta Selmana polos colectivos culturales y sociales qu’organicen les xornaes. L’Atenéu Obreru, la Sociedá Cultural Xixonesa, Radio Krass, el centru social Sextaferia y l’Equipu de Teatru La Máscara son los colectivos organizadores de los actos qu’escomiencen esti viernes cola so presentación y siguen el domingu 5 cola proyección a les 19.00 hores de la película “Sacco & Vanzzeti” nel centru social Sextaferia. El llunes 6 Pilar Sampedro ufierta una conferencia titulada “El mito del amor” nel salón d’actos del Antigu Institutu. El colectivu teatral La Máscara representa el martes 7 nel Teatru Xovellanos la obra “Las abarcas de Miguel Hernández”. Les actividaes d’esta selmana cultural siguen el miércoles 8 con una conferencia de Manel Aissa titulada “El anarquismo hoy” nel Antigu Institutu y el xueves 9 nel mesmu sitiu Gregorio Morán va falar sobre “Rafael Barret o la invención del anarquismo”. La última conferencia va pronunciala el filósofu del que cueyen el nome estes xornaes, José Luis García Rúa, que va esplayase el vienres 10 sobre “Los cortos veranos del anarquismo”. Les xornaes rematen el sàbadu con una cena de confraternización nel Hotel Tryp Pelayo. 3 de febreru, 2006 0 FacebookTwitterPinterestEmail
Sociedá Los profesionales de la normalización xúntense nuna asociación reivindicativa by asturnet 3 de febreru, 2006 El Conceyu Abiertu d’Uviéu va acoyer esti sábadu 4 al meudía la presentación de l’Asociación de Trabayadores de la Normalización Llingüística, un colectivu formáu pol personal de les oficines municipales de promoción del asturiano que tenta meyorar les condiciones llaborales d’estos profesionales y tamién el desenvolvimientu afayadizu del so trabayu. Llograr que la normalización sea efectiva y visible nos conceyos onde desarrollen les sos xeres los trabayadores de los departamentos municipales dedicaos a la promoción del idioma ye otru de los oxetivos de l’asociación naciente. Ente los finxos del colectivu ta arriendes el de consolidar la rede de normalización pa consiguir una continuidá de les oficines esistentes y del personal que trabaya nelles. Anguaño esisten Servicios de Normalización Llingüística nes mancomunidaes de la Sidra y de Peñes, asina como nos conceyos de Xixón, L.lena, Siero, Avilés y Cangas del Narcea. 3 de febreru, 2006 0 FacebookTwitterPinterestEmail
Sociedá La Xunta súmase a les crítiques del CAO a la conseyera de Cultura by asturnet 3 de febreru, 2006 La Xunta pola Defensa de la Llingua sumóse ayer a les crítiques feches pol Conceyu Abiertu pola Oficialidá (CAO) a les declaraciones de la conseyera de Cultura Ana Rosa Migoya nun canal local de televisión nes qu’afirmaba que la oficialidá diba ser una imposición pa los ciudadanos. L’asociación polos derechos llingüísticos calificó de “cínica” la posición del PSOE por defender coses distintes n’Asturies y en Madrid. La Xunta denunció les contradicciones esistentes nos socialistes asturianos a la hora d’afrontar la diversidá idiomática del estáu cola cita de la proposición non de llei presentada pol PSOE nel Congresu de los Diputaos de la que dio conocenciaAsturnewsna so edición d’esti miércoles 1 y na que’l partíu nel que milita Ana Rosa Migoya consideraba que la cooficialidá favorez la convivencia llingüística. La Xunta pola Defensa de la Llingua animó a los socialistes favoratibles a la oficialidá a “salir del armariu” pa consiguir que les sos tesis avancen nel senu de la FSA énte la reforma estatutaria. 3 de febreru, 2006 0 FacebookTwitterPinterestEmail
Educación Educación saca les bolses d’interinos pa llingua asturiana y gallego-asturiano by asturnet 2 de febreru, 2006 La Conseyería d’Educación del Principáu, al través de la so web institucional educastur vien de publicar les bolses d’interinos de les especialidaes de llingua asturiana y de gallego asturiano. La contratación de docentes d’estes especialidaes pol sistema avezáu de llistes yera una reivindicación de colectivos d’interinos y sindicatos qu’agora vese algamada. La resolución del departamentu de Recursos Humanos de la Conseyería lleva fecha de 30 de xineru y puede consultase ya xunta la llista d’admitíos ya escluíos bolsa tanto pa profesores d’Educación Secundaria como pal cuerpu de maestros, especialistes en llingua asturiana y en gallego asturiano. Nos últimos cursos Educación discriminaba a los interinos d’estes especialidaes con un sistema distintu al siguíu pal restu de les contrataciones y un grupu d’interinos organizáu en colectivu llevo a fechu diverses protestes pa reivindicar l’apertura de llistes específiques. Bolsa d’interinos de llingua asturiana y gallego asturiano 2 de febreru, 2006 0 FacebookTwitterPinterestEmail
Sociedá Dirixentes d’Izquierda Xunida nun dan por sentao que’l PSOE refugue la oficialidá by asturnet 2 de febreru, 2006 Izquierda Xunida nun da por sentao que los sos socios de gobiernu del PSOE refuguen incluir la cooficialidá nel nuevu estatutu. Asina lo manifestaron el responsable de Xusticia y Esteriores, Francisco Javier García Valledor, y el responsable d’IX n’Asturies, Jesús Iglesias, pa los que declaraciones reciéntes como les feches por dirixentes de la FSA o pola conseyera de Cultura, Ana Rosa Migoya, nun amuesen que los socialistes se cierren en banda a tratar un asuntu que’l conseyeru de Xusticia calificó de “central nel nuevu estatutu. Pa Valledor la posición espresada por Migoya “nun representa al gobiernu porque ende ye un asuntu que nun se debatió” y cuida que la conseyera falaba a títulu personal o como militante del PSOE, inda “ella conoz perfectamente que nel propiu gobiernu hai miembros que defendemos la oficialidá”. El responsable de XUsticia y Esteriores aspira a convencer a los cabezaleros socialistes de la necesidá d’asumir esti asuntu, empezando pola propia conseyera de Cultura: “espero qu’esi espíritu de defensa de la llibertá qu’ella manifiesta habíen llevar a los socialistes asturianos precisamente a defender la cooficialidá, porque ésta garantiza a munchos asturianos el derechu cívicu d’usar la llingua que queremos, cosa que agora nun podemos facer”, dixo Valledor en declaraciones que recueye’l diariu El Comercio na so edición d’esti xueves 2. Pel so llau el dirixente d’Izquierda Xunida d’Asturies, Jesús Iglesias, rechazó que’l so grupu defenda la imposición de la oficialidá: “nós siempre tuvimos contra cualquier imposición y de xuro qu’hai fórmules pa consiguir un alcuerdu sobre la oficialidá”, afirmó. 2 de febreru, 2006 0 FacebookTwitterPinterestEmail
Sociedá El CAO considera un contrasentíu que’l PSOE defenda la diversidá llingüística fuera y n’Asturies non by asturnet 2 de febreru, 2006 El Conceyu Abiertu pola Oficialidá (CAO)salió al pasu de les últimes declaraciones de la conseyera de Cultura, Ana Rosa Migoya, sobre la oficialidá del asturianu, calificándoles de “impropies d’una portavoz de gobiernu y faltes de sentíu cuando se fala en nome de la llibertá pa negar el derechu de los falantes a usar la so llingua”. La plataforma considera “un contrasentíu la postura que’l PSOE defende en Cataluña o en Madrid tocante a la diversidá llingüística y la que caltién n’Asturies, contraria a reconocer los derechos de los asturfalantes”. El portavoz del CAO, Fernando Ornosa, calificó de “pergraves” les declaraciones de Migoya y manifestó a Asturnews que nun se trata de dalgo aislao: “el PSOE ta manteniendo últimamente una posición de cerrar files alrodiu de la oficialidá y cuidando de recalcar determinaes palabres como imposición, obligatoriedá, etc.”. Pal voceru del Conceyu esta posición “ye totalmente contradictoria nun partíu que defende la obligatoriedá pal catalán nel nuevu Estatut o que presenta una proposición nel Congresu na que diz que la cooficialidá de les llingües favorez la convivencia”. Respective a la descalificación fecha por Migoya de les encuestes del equipu de Llera Ramo, el CAO califícales de “falta de respetu al sentir mayoritariu de los asturianos que reflexen eses encuestes y otres de manera continuada nel tiempu”. Pa Fernando Ornosa: “hai una mayoría de ciudadanos que ta a favor de la oficialidá y eso ye dalgo que tien de tener en cuenta el PSOE, tien que gobernar pa tolos asturianos”. El Conceyu Abiertu pola Oficialidá quiso tamién retrucar al presidente del Principáu, Vicente Álvarez Areces, nes sos declaraciones sobre la realidá llingüística d’Asturies y Galicia, con motivu del recién cume ente los gobiernos d’entrambes comunidaes: “el presidente emponderó el gallego como llingua de cultura, con una tradición hestórica y un prestixu indudables, y pola contra refirióse a ‘los bables’ d’Asturies, dalgo que nós consideramos inaceptable y una manera insólita de facer de menos a la propia comunidá onde gobierna pa emponderar a otra”, dixo el portavoz del CAO a Asturnews. Ornosa calificó de “falta de respetu a los asturianos” les declaraciones d’Areces. 2 de febreru, 2006 0 FacebookTwitterPinterestEmail
Comunicación Una web recueye firmes pa restituir Vientos de agua’ al so horariu orixinal by asturnet 1 de febreru, 2006 El cambiu d’horariu de la teleserieVientos de aguaa la madrugada fechu pola cadena Telecinco ta siendo retrucáu por una iniciativa de recoyida de firmes na que se pide a la canal privada que restituya la producción del arxentín Juan José Campanella a la so emisión n’hora de prime time. Alrodiu de dos mil firmes avalen esta solicitú de siguidores de la serie. La producción na que se narra la hestoria d’una saga d’emigrantes orixinarios d’Asturies y rodada en parte n’esteriores del nuestru país tuvo nes sos primeres emisiones unos índices d’audiencia que Telecinco nun consideró bastantes pa caltener ‘Vientos de agua’ nel so horariu orixinal, a les 22.00 hores. Aurora Vergara, una avilesina afinancada en A Coruña, ye l’autora de la iniciativa qu’al través de la páxina web www.petitiononline.com pide al equipu directivu de la cadena española la reposición de la serie de Juan José Campanella al horariu nel qu’escomenzó emitise porque a xuiciu de los firmantes “la serie, tanto pola so calidá como pola so temática de gran interés, nun ha ser relegada a la madrugada de los viernes, como ocurrió el día 20 de xinero”. La solicitú ta recibiendo alrodiu de dos mil solicitúes que l’apoyen. Más información 1 de febreru, 2006 0 FacebookTwitterPinterestEmail
Sociedá Asturies encabeza les cifres en visites de turismu cultural by asturnet 1 de febreru, 2006 Asturies encabeza la llista de comunidaes autónomes en recibir viaxes turísticos en busca d’interés hestóricu o patrimonial y ye la octava en consumu de productos culturales, según recueye un anuariu estadísticu del Ministeriu de Cultura. El consumu cultural nel Principáu ye de 238,9 euros por habitante, una de les cifres más altes del estáu. Nel informe del ministeriu amuésase que’l 18 por cientu de los turistes que viaxaron a Asturies ficiéronlo por motivos culturales, la cifra más alta ente les comunidaes. Estremadura, Cantabria y Galicia son les comunidaes que siguen a la nuestra nesta modalidá de turismu. En cuantes al gastu por habitante en consumu cultural son la Comunidá madrilana con 306 euros y la vasca con 293 les qu’encabecen la llista na qu’Asturies ta n’octavu puestu con 238,9 euros por persona. Como datos xenerales l’Anuariu d’Estadístiques Culturales señala que nos últimos años el númberu d’empléu xeneráu na industria de la cultura medró un venti por cientu y anguaño hai más de 60.000 mil empreses dedicaes específicamente a esti sector en tol estáu. Anuariu d’Estadístiques Culturales del Ministeriu de Cultura 1 de febreru, 2006 0 FacebookTwitterPinterestEmail
Sociedá Migoya afirma que la oficialidá lleva a una imposición y que los ciudadanos apuesten pola voluntariedá by asturnet 1 de febreru, 2006 La conseyera de Cultura Ana Rosa Migoya afirmó esti martes 31 que la recoyida de la oficialidá nel nuevu estatutu diba ser “una imposición pa munchos ciudadanos” y que dende’l PSOE “trabayamos pola llibertá y la pola opción de poder elexir”, una posición que la portavoz del gobiernu asturianu dixo compartir “personalmente”. Migoya descalificó les encuestes del equipu de Llera Ramo porque “ya se sabe que les encuestes dependen de los items que recueyan”, afirmó. La titular de Cultura fexo estes declaraciones nel cursu d’una entrevista nel Canal 10 del grupu Vocento na que fue especialmente contundente respective a la posibilidá de reconocer l’asturianu como idioma oficial de la nuestra comunidá: “la mayoría de los ciudadanos opten pola llibertá y la voluntariedá” y que al pesar de que los asturianos «sienten amor pola so cultura y pola so llingua», eso nun significa «que demanden la oficialidá». Ana Rosa Migoya declaró en Canal 10 que respective al tratamientu llegal del asturianu “El PSOE siempre fue mui claru” y qu’ella compartía “personalmente” esa posición. 1 de febreru, 2006 0 FacebookTwitterPinterestEmail
Sociedá El PSOE presentó n’avientu una proposición nel Congresu na que se defende que la cooficialidá de les llingües favorez la convivencia by asturnet 1 de febreru, 2006 El grupu parlamentariu socialista presentó el pasáu 9 d’avientu nel Congresu de los Diputaos una proposición non de llei en defensa de la diversidá llingüística del estáu na que se caltién que la esperiencia de cooficialidá de los distintos idiomes “non namás nun supunxo un menoscabu pa la llingua común sinón que xeneró una dinámica de convivencia llingüística”. La declaración y l’espíritu d’esta iniciativa parlamentaria contasta cola actitú del PSOE n’Asturies. La posición que los socialistes asturianos caltienen respective a la posibilidá de recoyer la cooficialidá de la nuestra llingua y del castellano nel nuevu estatutu remembróla la conseyera de Cultura y portavoz del executivu autonómicu, Ana Rosa Migoya nunes declaraciones a Canal 10 que reproduz Asturnews na so edición d’esti miércoles 1. Nelles la titular de Cultura afirma que la oficialidá “llevaría a la imposición a muchos ciudadanos”. La proposición non de llei presentada pol PSOE nel Congresu, firmada polos diputaos Ramón Jáuregui y Daniel Fernández, felicítase polos llogros democráticos algamaos dende la entrada en vigor de la Constitución y concretamente los consiguios en materia de reconocencia de la pluralidá llingüística del estáu. La esperiencia d’estos años, dizse na proposición “amosó que la protección y el puxu de les llingües propies de les diferentes comunidaes autónomes nes que rixe un réxime de cooficialidá llingüística non namás nun se produció en menoscabu de la llingua común sinón que xeneró una dinámica de convivencia llingüística que ye la característica principal de la vida cotidiana nos pueblos y ciudaes”. Esta convivencia ye calificada na iniciativa parlamentaria de “bien valiosu del que concierne a tolos poderes públicos la so protección”. Frente a la posibilidá de que se produciere una imposición como la barruntada pola conseyera Migoya la realidá amosó, según la proposición non de llei del grupu parlamentariu socialista nel Congresu, que l’ésitu de la convivencia algamada pola cooficialidá “radica en que en diches COmunidaes Autónomes los ciudadanos tienen derechu a usar, acordies cola so llibre elección, y con plena validez xurídica, cualquiera de les llingües oficiales en tolos ámbitos y tipu de relación,y polo mesmo nes sos relaciones con cualquier poder públicu radicáu nel correspondiente territoriu”. La iniciativa manifiesta nesi sen: “entendemos que l’usu de les llingües ye un derechu de los ciudadanos y que correspuende al Estáu garantizar esi derechu y esa llibertá”. 1 de febreru, 2006 0 FacebookTwitterPinterestEmail