Música El Pueblu d’Asturies recupera en dos llibros los cantares de L.lena y los repertorios de los Quirotelvos by asturnet 7 de xunu, 2006 La conceyala xixonesa d’Educación y del Pueblu d’Asturies, Carmen Rúa, presentó ayeri la espublización de los llibros ‘¿Xa Chegan os Quirotelvos!’, de Xose Miguel Suárez Fernández, y ‘Música de tradición oral en el concejo de Lena’, de María del Carmen Prieto González, nel que se recueyen dos estudios de campu sobre los cantares y melodíes tradicionales asturianes que, según Rúa, “olvidalos sedría una perdiga mui seria pa la nuestra tradición y el nuestru pueblu”. María del Carmen Prieto, autora del trabayu sobre L.lena, fixo un estensu trabayu de campu a base d’entrevistes, pal que se documentó con más d’un millar de canciones, anque nel llibru sólo se recueyan doscientes. El llibru, nel que se fai análisis y trescripción lliteral de les canciones, va acompáu por DVD coles voces de los propios interpretes. El llibru de Xose Miguel Suárez, ‘¿Xa Chen os Quirotelvos! Gaiteros, cuartetos y outros músicos populares nel estremo occidental d’Asturias’ recupera les dances y repertorios de los quirotelvos, unes bandes que diben pelos pueblos del occidente amenizando les fiestes populares. 7 de xunu, 2006 0 FacebookTwitterPinterestEmail
Música El rock de Burning visita la 43 edición de la Feria Muestres de Vegadeo by asturnet 7 de xunu, 2006 El prósimu sábadu día 10 de xunu a les once la nueche, el Polideportivu antiguu de Vegadeo va acoyer un conciertu de la mítica banda madrilana de rock ‘Burning’, qu’hai malapenes unos meses qu’editaron el so últimu discu que, col títulu ‘Dulces dieciseis’, percuerría los sos meyores temes en versión acústica. La entrada al conciertu de Burning sedrá llibre. El conciertu de la mítica banda Burning ta programáu coincidiendo cola Feria de Muestres de Vegadeo que dende esta tarde abre les puertes a la que ye la so 43 edición, na que van participar más de doscientos expositores d’España y Portugal. 7 de xunu, 2006 0 FacebookTwitterPinterestEmail
Sociedá IAS estudia candidatos y posibles alcuerdos de cara a les elecciones del 2007 by asturnet 7 de xunu, 2006 La Dirección Nacional d’Izquierda Asturiana (IAS) decidió na so última reunión ordinaria’l poner en marcha una dinámica de trabayu, siguiendo’l mandatu del VI Alcuentru Nacional que celebraren el pasáu mes de xineru, de cara a preparar les sos candidatures pa les elecciones autonómiques y locales que van tener llugar nel mes de mayu del añu qu’entra. Pa ello, dende la Dirección Nacional d’Izquierda Asturiana acordóse la creación d’una comisión electoral coordinada por Carlos Fernández Fuentes y presidida pol Secretariu d’Acción Política, que va cuntar con representantes de les distintes agrupaciones d’IAS. Tala comisión, tien previsto trabayar nos prósimes meses de branu ellaborando les llinies básiques de los programes autonómicos y municipales que la formación presentará a les elecciones del 2007, diinamizando d’esta manera los procesos d’ellaboración de les llistes y d’elección de los representantes nes mesmes. Tres d’ello, Izquierda Asturiana va aniciar una ronda de contactos con axentes sociales, colectivos y formaciones polítiques que presenten coincidencies coles llinies programátiques del partíu, de cara a estudiar posibles alcuerdos, asina como pa recoyer les sos aportaciones. 7 de xunu, 2006 0 FacebookTwitterPinterestEmail
Sociedá Fernando Alonso visita Asturies enantes de colar pa Silverstone by asturnet 6 de xunu, 2006 El Campeón del Mundu de Formula 1 2005, Fernando Alonso, visita esti miércoles el so país al qu’aportó ayeri pela nuechi cola so moza, la cantante de El Sueño de Morfeo, Raquel del Rosario. Fernando Alonso tien que colar bien ceo pa Silverstone, Inglaterra, onde va correr otra prueba del campeonatu de Formula 1 esti domingu. El pilotu asturianu y la cantante canaria aportaron a Asturies aprovechando l’últimu día que-yos queda llibre enantes d’entamar otra vuelta les sos respectives actividaes profesionales: Fernando n’Inglaterra pa correr en Silverston y Raquel del Rosario pa tornar colos sos collacios de Xixón y Uviéu colos que forma’l grupu, qu’actúa en Valldolid na Plaza Mayor, mañana a les 22 hores. 6 de xunu, 2006 0 FacebookTwitterPinterestEmail
Sociedá Furmientu convoca’l primer concursu de vocabularios tradicionales de Zamora by asturnet 4 de xunu, 2006 L’asociación cultural Furmitentu convoca’l primer Concursu de Vocabularios Tradicionales de Zamora, una iniciativa cola que quieren guardar el patrimoniu llingüísticu, desarrollando y dignificando la fala tradicional de les comarques zamoranes. Al concursu pueden presentase vocabularios ineditos que tegan un mínimu de sesenta terminos de los qu’hai que dar la so definición. Amás del castellán, en dalgunes comarques de Zamora tán vivos el gallego-portugues y l’asturlliones. L’asociación Furmientu, que nació ente l’ausencia d’iniciatives per parte de les instituciones zamoranes a favor del so patrimoniu llingüísticu, entiende que ye precisamente l’asturiana la que ta en mayor grau d’abandonu. Por ello, el llabor de Furmientu ta basáu na conservación, dignificación y desarrollu de les variedaes usaes nes comarques del occidente de Zamora, como son el sanabres o l’alistano. Cola fin d’afalar a los zamoranos nel amor pola so cultura, Furmientu convoca agora esti concursu de recopilación de vocabularios tradicionales nel que se va valorar mesmo’l númberu de vocablos recoyíos como la zona de la vengan, yá que, por exemplu, consideráse más meritorio recoyer cien palabres de la fala tradicional de Tierra de Campos que doscientes de la de Sanabria. De la mesma manera, va tenese en cuenta la información complementaria que se dea, como frases qu’amuesen el so usu popular, información sobre la so vixencia, la descripción d’estructures llingüístiques propies de la fala o una rellación de nomes de la toponimia local. Furmientu 4 de xunu, 2006 0 FacebookTwitterPinterestEmail
Música La música asturiana suena solidaria en Malawi by asturnet 1 de xunu, 2006 Los grupos asturianos DRD, Tuenda, La Bandina y les pandereteres Dulcamara van actuar esti sábadu, día 3 de xunu, a partir de les ocho la tarde, nel Auditoriu Príncipe Felipe d’Uvieu nun conciertu solidariu que, col títulu de ‘Malawi suename’, va recaudar fondos pa llevantar una escuela de música na rezón de Zhezi, en Malawi. La entrada a esti conciertu tien un preciu de 5 euros, existiendo una fila cero en Caxastur onde se pueden ingresar donativos, nel númberu de cuenta 2038 1095 716000438204, especificando que son pa ‘Malawi suename’. 1 de xunu, 2006 0 FacebookTwitterPinterestEmail
Sociedá Choque d’acusaciones ente PSOE y PP pol Plan del llobu by asturnet 1 de xunu, 2006 El conseyeru de Mediu Ambiente, Francisco González Buendía, anunció acciones xuciales contra’l PP, mesmo per parte del Principáu que pela del personal de la guardería rural, por “llevantar falsos testimonios”, al acusar d’irregularidaes na xestión del Plan del llobu. Los populares, sin embargu, solicitaron na mañana d’ayeri l’acción de la Fiscalía “nos probaos graos de corrupción y sospeches más que segures de delitu per parte d’estos departamentos”. Buendía anunciaba ayeri que tanto’l Principáu, en defensa del “bon nome de l’Alministración Pública”, asina como les persones que se vieron afectaes poles “mentires” de los populares, que tacharon a los miembros de la guardería rural de ser personal de confianza de los socialistes, razón pola tán ocupando los sos cargos, van emprender acciones llegales nos tribunales de xusticia. El popular Peláez manifestare na mañana d’ayeri les “irregularidaes, los probaos graos de corrupción y sospeches más que segures de delitu per parte d’estos departamentos que coinciden coles quexes de los ganaderos y de la Guardería del Principáu nesta llexislatura”, razón pola que pidió la intervención de la Fiscalía. Na so defensa, Buendía desplicó que les persones a les que se refería Peláez, “una ye coordinador xeneral de la guardia y l’otru’l responsable xeneral d’espacios naturales, lo que los capacita p’actuar per toa Asturies”. Los pastores avisen del incumplimientu del plan de xestión de Mediu Ambiente 1 de xunu, 2006 0 FacebookTwitterPinterestEmail
Sociedá L’Academia presenta la colección de Cartafueyos normativos by asturnet 1 de xunu, 2006 La presidenta de l’Academia de la Llingua Asturiana, Ana Mª Cano, presentaba ayeri xunto a Miguel Ramos Corrada, Carlos Lastra, Roberto González-Quevedo y los responsables de les Oficines de Normalización Llingüística de los conceyos, los tres primeros númberos de la colección “Cartafueyos normativos”, como “ferramientes necesaries pa la normalización”. La Constitución Española y l’Estatutu d’Autonomía d’Asturies nel primeru de los volúmenes, una serie de documentos y terminos emplegaos pola Alministración y una riestra de propuestes dedicaes a los nomes de persona, son los testos espublizaos pola institución “cola intención d’ufiertar soluciones a problemes concretos”. El testu dedicáu al llinguaxe alministrativu, ta pensáu espresamente nel papel de los conceyos y nes necesidaes de modelos normativos que tienen tanto pa la propia alministración local y los ciudadanos. Instancies, solicitúes, reclamaciones, salutaciones, bandos y certificaciones, son dalgunes de les propuestes qu’apurre esta edición, basada na práctica de l’Academia nos últimos años, mesmo nos sos servicios de traducción que nos cursos de capacitación qu’ella organiza. Amás d’ún volume que recueye la Constitución Española y l’Estatutu d’Autonomía del Principáu, l’Academia presentó ayeri tamien una rellación de nomes propios de persona, por ser una de les demandes más corrientes nos últimos años. Orbayu, Sidra, Oreya, Llara, Lela o Urraca, pa muyer; y Tox, Pelayo, Favila, Enol, Asturín o Xonatán, pa home, son sólo dalgunes de les suxerencies del llistáu de cuasi mil novencientos nomes propios que recueye esti llibru. 1 de xunu, 2006 0 FacebookTwitterPinterestEmail
Sociedá Unión Asturianista presenta la so imaxe institucional by asturnet 1 de xunu, 2006 El Centru d’Empreses de la cai Covandonga d’Uvieu sirvió ayeri como marcu de presentación de la imaxe institucional d’Unión Asturianista, la coalición formada polos partíos URAS y PAS ente les prósimes elecciones locales y autonómiques. Unión Asturianista nacía nel pasáu mes de marzu al travies d’un manifiestu nel que Sergio Marques y Xuan Xose Sánchez Vicente, llíderes d’URAS y PAS respectivamente, decidieren marcar una llinia de trabayu conxunta, con una programación común, qu’axuntare a estos dos partíos asturianistes de cara a algamar representación institucional nes prósimes elecciones autonómiques. Manifiestu d’Unión Asturianista 1 de xunu, 2006 0 FacebookTwitterPinterestEmail
Música Anabel Santiago, una voz con identidá propia en Madrid by asturnet 31 de mayu, 2006 La cantante Anabel Santiago va participar el prósimu día 5 de xunu a les ocho y media la tarde, na Sala Galileo Galilei de Madrid, nel conciertu ‘Voces con Identidad’, nel que tamien van actuar el cantante valencianu Miquel Gil, y Ricardo de Castro, de Contradanza, grupu renovador del romanceru andaluz. Miquel Gil tien ganaos abondos premios en Catalunya y Valencia, representando a España nel últimu WOMEX, mentes que Contradanza fain una música de raigañu y d’autor más allá del flamenco, que busca la renovación del romanceru tradicional andaluz. Anabel Santiago, estrella d’esti conciertu llamáu ‘Voces con Identidad’, ye presentada en Madrid como la gran esperanza musical d’Asturies. 31 de mayu, 2006 0 FacebookTwitterPinterestEmail