Sociedá La policía detién a un militante nacionalista supuestamente relacionáu con fechos investigaos poles fuerces de seguridá by asturnet 14 de setiembre, 2005 Axentes de la Brigada d’Información de Xixón detuvieron na madrugada del martes a Fernando G. R. pola so posible relación colos incidentes del pasáu 10 de setiembre en Cangues, según informen dellos medios informativos, citando fontes oficiales. Tres la so detención, la policía investiga la posible relación del deteníu con otros fechos, ente ellos los ataques a sés de partíos políticos, según los mesmos medios. Fernando G.R. ta deteníu ya incomunicáu nos calabozos de la Comisaría de Xixón n’aplicación de la Llei Antiterrorista. Según informen diversos medios asturianos na so edición de güei, citando fontes de la Delegación del Gobiernu, el deteníu podía pasa a disposición de l’Audiencia Nacional trescurríu’l plazu de 48 hores establecíu na lexilación pa delitos relacionaos col terrorismu. Dende la so detención familiares y amigos de Fernando G. R. concentráronse énte la Comisaría xixonesa pa pidir la llibertá del deteníu. Esti xueves 15 hai convocada una concentración a les 19.00 hores na Plaza’l Parchís de Xixón pa reclamar la so puesta en llibertá. Los familiares del deteníu declararon en dellos medios desconocer les razones del apresamientu de Fernando G. R. y denunciaron la falta d’información de les autoridaes policiales tocante a la situación del deteníu. Nun comunicáu difundíu en medios alternativos los familiares llamen l’atención sobre’l fechu de que nun-y permitieran al deteníu ver al so abogáu y informen que solicitaron pa él l’aplicación del habeas corpus. Fernando G.R. ye miembru activu de diversos colectivos asturianistes y cumplió dos años de prixón nel Centru Penitenciariu de Villabona condenáu por insumisu al serviciu militar obligatoriu. Nel momentu de redactar esta información desonocíase si el deteníu fuera puestu en llibertá o pasara a disposición xudicial. 14 de setiembre, 2005 0 FacebookTwitterPinterestEmail
Sociedá El Bloque pide desplicaciones a Delegación del Gobiernu polos fechos de Cangues by asturnet 13 de setiembre, 2005 Rafael Palacios y Roberto Colunga, portavoz nacional y secretariu xeneral del Bloque por Asturies, respectivamente, ufiertaron esti martes 13 una rueda de prensa pa condenar l’actuación de la Guardia Civil nos incidentes del pasáu 10 de setiembre en Cangues d’Onís y pidir desplicaciones a Delegación del Gobiernu por estos fechos. Los cabezaleros de la organización nacionalista remembraron que díes enantes de celebrase en Cangues un actu del grupu ultraderechista Democracia Nacional, el Bloque advirtió al Delegáu del Gobiernu, Antonio Trevín, de la eventualidá d’incidentes violentos entamaos polos neofacistes y encamentáronlu a nun permitir esti actu convocáu pa una xornada que coincidía cola llegada a la zona d’una etapa de la Vuelta Ciclista a España. Los dirixentes de BA consideren que los sos advertíos nun yeren de baldre en vista de lo sucedío en Cangues el sábadu 10. El Bloque, que sofitaba una convocatoria de refugue a la concentración ultra nel mesmu llugar de la celebración d’aquella, criticó por voz de los sos cabezaleros la intervención de la Guardia Civil: “en Cangues dOnís asistimos a lo que podíemos denominar el mundiu del revés -afirmaron Palacios y Colunga- la Guardia Civil protexendo a los neofacistes y golpeando de forma brutal a los demócrates”. El Bloque calificó de “desmidida” ya “inxustificable” l’actuación de les fuerces de seguridá que se saldó cola detención de doce manifestantes antifascistes. Respective a les agresiones que la Guardia Civil afirmó recibir per parte de los militantes d’izquierda, los dirixentes de BA manifestaron que fueron los propios ultres los qu’entamaron estos incidentes: “tenemos conocimientu de la esistencia dultres y neofacistes que, mezclaos ente la población, llanzaron piedres y botelles contra la Guardia Civil col oxetivu estudiáu de provocar la so actuación”, aseguraron Rafael Palacios y Roberto Colunga. El Bloque por Asturies pidió al Delegáu del Gobiernu, Antonio Trevín, l’apertura d’una investigación polos sucedíos de Cangues, la depuración de les posibles responsabilidaes internes y l’archivu de los tramites sancionadores puestos en marcha contra los militantes antifascistes deteníos tres los incidentes. Pa la organización nacionalista “nun s’entiende cómo ye posible quel Delegáu en el Gobiernu nAsturies nun autorice manifestaciones por tar redactada la solicitú en Llingua Asturiana y ensin embargu autorice una concentración en Cangues dOnís dun conocíu grupu neofacista y pronazi, racista, xenófobu, y violentu por definición”. 13 de setiembre, 2005 0 FacebookTwitterPinterestEmail
Sociedá Andecha va aconceyar con ERC pa tratar de la so propuesta sobre llingües del Estáu by asturnet 13 de setiembre, 2005 Andecha Astur va aconceyar colos sos socios na coalición Europa de los Pueblos d’Esquerra Republicana de Catalunya (ERC) pa pidi-y a la formación de Josep Lluis Carod Rovira qu’elimine la referencia al Navia-Eo na so propuesta nel Congresu pa que gallego, catalán y eusquera seyan oficiales nes administraciones del estáu. La organización nacionalista asturiana informa na so web oficial que prósimamente van reunise con representantes d’Esquerra col fin d’advertilos del “erru grave” de considerar na so iniciativa parlamentaria ala estaya más occidental d’Asturies como territoriu de fala gallega. Andecha asegura tener el comencimientu de qu’esti erru namás puede debese “a la desconocencia de la realidá llingüística asturiana”. Los socios asturianos de la coalición Europa de los Pueblos consideren “d’una gravedá inusitada el “que se pretenda dar esti avance irreversible nel procesu de colonización al que ta sometíu l’occidente asturianu” y advierte a los sos coaligaos d’ERC que de llevase a fechu la so iniciativa nos términos actuales “condicionaría perdafechu les rellaciones con esa formación”. Web d’Andecha Astur 13 de setiembre, 2005 0 FacebookTwitterPinterestEmail
Sociedá Distritu Oeste entama un ciclu de conferencies nel Atenéu de La Calzada by asturnet 11 de setiembre, 2005 Mañana martes 13 de setiembre de 2005 a les 19:30 hores escomienza un ciclu de charres y conferencies nel Ateneu de La Calzada, qu’entama’l Distritu Oeste de l’Agrupación Socialista de Xixón,con un coloquiu presentación del Centru d’Atención Integral a muyeres víctimes de la violencia que se va facer en Montevil. Ta previsto que Serxu Solares(coordinador del Distritu Oeste), Dulce Gallego (conceyala de Polítiques d’Igualdá) y Maria Jose Ramos(conseyera de la Presidencia) participen mesmo nesti coloquiu que nes que se van cellebrar nos meses de setiembre, ochobre y payares. Siendo toes elles gratuites y d’accesu llibre pa tol públicu. El martes 20 de setiembre, nel mesmu local del Ateneu de La Calzada, a les siete y media la tarde, tendrá llugar el siguiente coloquiu con tema ‘Socialismu nel movimientu vecinal’. 11 de setiembre, 2005 0 FacebookTwitterPinterestEmail
Sociedá El gallego podía ser oficial nel Navia-Eo si prospera la iniciativa nel Congresu d’ERC sobre llingües oficiales by asturnet 11 de setiembre, 2005 La propuesta pa esparder per tolea administraciones del estáu l’usu del catalán, el vascu y el gallegu d’ERC nel Congresu propón qu’esta última llingua sea oficial en parte del territoriu d’Asturies y de la comunidá de Castiella-Lleón. La Mesa del Congresu estudia esta selmana la iniciativa d’Esquerra. Na proposición non de llei pendiente d’aceptar la so tramitación parlamentaria deféndese no tocante a la llingua gallega qu’esta pueda tener tener usu administrativu en territorios galaicofalantes de fuera la comunidá autónoma onde ye idioma cooficial y cítase esplícitamente les comunidaes asturiana y castellano-lleonesa. Fontes d’ERC manifestaron nos díes pasaos en distintos medios que’l so grupu negocia col PSOE la salida alantre de la iniciativa como una de les condiciones pal sofitu de los independentistes a los presupuestos del gobiernu de José Luis Rodríguez Zapatero. Hasta agora namás el Partido Popular manifestó de manera clara el so refugue a la propuesta d’Esquerra, que podía salir alantre si a la fin el grupu socialista la sofita. 11 de setiembre, 2005 0 FacebookTwitterPinterestEmail
Sociedá IAS pidi-y a Delegación del Gobiernu que se depuren responsabilidaes poles actuaciones del pasáu sábadu en Cangues dOnís by asturnet 11 de setiembre, 2005 Izquierda Asturiana condena les detenciones d’un grupu de mozos que protestaben pola celebración ‘fascista’ del pasáu sábadu en Cangues d’Onís y tacha d’’indignante qu’una delegación del Gobiernu democráticu de permise pa la celebración d’actos qu’esplícitamente promueven la xenofobia dende postulaos neofascistes’. Nel comunicáu emitíu por IAS, denúnciase, ente los testimonios qu’aseguren que la Guardia Civil ‘cargó de manera desproporcionada contra los manifestantes antifascistes mentes protexía a persones qu’esibíen simboloxía neonazi illegal y facíen xestos de cortes fasticista’. Por esta razón, dende Izquierda Asturiana esíxen-y al delegáu del gobiernu, Antonio Trevín, que dea esplicaciones y depure responsabilidaes cuanto primero meyor. IAS considera estos fechos especialmente sangrinos, si se tien en cuenta que la llegalización d’esa manifestación vien d’una delegación de gobiernu ‘que nunca nun tien autorizao una concentración o manifestación que fuere solicitada en llingua asturiana’. 11 de setiembre, 2005 0 FacebookTwitterPinterestEmail
Sociedá Diversos actos remembraron n’Uviéu y Xixón el Día de la Nación Asturiana by asturnet 8 de setiembre, 2005 Alrodiu de mediu millar de persoens participaron ayer na manifestación convocada por Andecha Astur n’Uviéu embaxo la llienda “Futuru p’Asturies, Futuru n’Asturies”. Un númberu asemeyáu de participantes llograron xuntar en Xixón Izquierda Xunida, Bloque por Asturies y Lliberación, nun actu que cuntó cola presencia de Gaspar Llamazares. Les otres celebraciones reivindicatives del Día de la Nación Asturiana llevaron a unos trescientos militantes y simpatizantes d’URAS y PAS a xuntase énte la estátua del rei Alfonso II na Plaza la Catedral d’Uviéu. Izquierda Asturiana (IAS)pel so llau entamó un actu cívicu na Plaza’l Parchís de Xixón onde varies decenes de militantes d’esta organización rindieron homenaxe al Conseyu Soberanu d’Asturies y Lleón énte l’edificiu que fue la so sé mientres la guerra española. La manifestación d’Andecha cuntó col sofitu del sindicatu Corriente Sindical d’Izquierda (CSI) y de colectivos sociales como l’AIRA (Asociación d’Inmigrantes d’Asturies) o la organziación moza Darréu. Encabezaben la marcha dirixentes de la organización nacionalista como David Rivas o Ezequiel García. Nel actu conxuntu celebráu nel Parque los Pericones de Xixón por Izquierda Xunida, Bloque por Asturies y Lliberación, mientres les intervenciones el portavoz nacional de BA, Rafael Palacios, advirtió a lo socios de gobiernu de la coalición que la so organización nun va volver participar nun alcuerdu políticu con fuerces qu’escluyan la oficialidá de la reforma estatutaria. 8 de setiembre, 2005 0 FacebookTwitterPinterestEmail
Sociedá Osoro truña contra la diversidá ideolóxica, nacional y llingüística nel so sermón de Cuadonga by asturnet 8 de setiembre, 2005 L’arzobiespu d’Uviéu, Carlos Osoro, criticó ayer en Cuadonga na so homilía pola festividá de la Santina a los que, al so xuiciu, tenten “absolutizar unas ideas, una tierra, un modo de hablar o unas costumbres es una manera de imponer a la larga a los demás lo que es relativo y generar elementos totalitarios”. Pal cabezaleru de la diocesis asturiana estos son los principales peligros a los que s’enfrenta la sociedá, xunto a la secularización de les costumes. Osoro fexo públiques les sos crítiques a los nacionalismos identitarios nun día nel que diverses organizaciones polítiques celebraben el Día de la Nación Asturiana. N’anteriores ocasiones, l’arzobiespu ya espresara públicamente la so rocea a la realidá llingüística d’Asturies y la identidá propia como pueblu de la diócesis al so cargu. 8 de setiembre, 2005 0 FacebookTwitterPinterestEmail
Sociedá El Bloque por Asturies pide la suspensión d’un actu ultraderechista by asturnet 8 de setiembre, 2005 El Bloque por Asturies pide-y al delegáu del Gobiernu Antonio Trevín la prohibición d’un actu d’homenaxe a Pelayo que tien convocáu pa esti sábadu en Cangues d’Onís el grupu ultraderechista Democracia Nacional. Al empar dellos colectivos d’izquierdes tienen previsto entamar en Cangues una concentración antifascista. El Bloque considera que l’actu convocáu polos ultres españoles ye de conteníu xenófobu y racista al revivindicar la figura del primer rei asturianu como personaxe hestóricu qur s’enfrentó a los musulmanos pa espulsalos de la Península. Pa BA “un Gobiernu estatal que se considera de progresu nun debería permitir la cellebración dactos comol que se va llevar a cau esti sábadu”, ya que según recuerda’l comunicáu del Bloque, el grupu convocante del actu: ” caracterízase por tener una política agresiva de refuga a la llegada de población foránea al Estáu español, que nun casa cola tradición hestórica dacoyida a inmigrantes que tuvo dende siempres Asturies”. Pel so llau dellos colectivos d’izquierda tienen convocada una concentración antifascista nel mesmu sitiu de celebración del actu de Democracia Nacional. Colectivos como FUSOA, AIRA (Asociación d’Inmigrantes d’Asturies)y Darréu sofiten la convocatoria d’esta concentración de rechazu. 8 de setiembre, 2005 0 FacebookTwitterPinterestEmail
Lliteratura Alcuentru de poetes asturianos y llioneses by asturnet 6 de setiembre, 2005 Esti sábadu, día 10, la localidá ayerana de Santibanez de Murias va acoyer el primer alcuentru de poetes asturianos y llionenses nel que ta previsto que participen ocho escritores. Esta iniciativa surdió d’una propuesta del poeta lliones Manuel Alonso, cola intención d’allegar les creacciones de los escritores de les dos rexones. La conceyalía de cultura ayerana sofita esti alcuentru d’escritores nel que cada poeta fadrá llectura d’una selección de testos propios, pa depues entamar una tertulia lliteraria. Nel actu, amás de los poetes invitaos, van tar presentes el conceyal de cultura ayeranu, Santos Fernández, el director xeneral d’Arvichos y Biblioteques del ministeriu de Cultura, Rogelio Blanco, y el director de la revista ‘Rey Lagarto’, Julio Jose Rodríguez. Ente los poetes llioneses qu’acudirán a la cita encuentrense Jose Antonio Reñones, Carmen Busmayor, Angel Casado y Manuel Alonso. Pela parte asturiana van dir Baristo Lorenzo, Ricardo Labra, Jose Antonio Perez Gutierrez y Javier Almuzara. Les actividaes empiecen a les siete la tarde d’esti sábadu, con una intruducción a cargu de Jose Antonio Reñones. 6 de setiembre, 2005 0 FacebookTwitterPinterestEmail