Fiestes La plataforma ciudadana ‘Otres feries son posibles’ manifiéstase contra la organización de les fiestes de L.lena by asturnet 11 d'ochobre, 2006 La plataforma ciudadana de L.lena ‘Otres feries son posibles’, na que participen colectivos culturales, musicales, mozos asina como particulares ‘qu’estimen qu’hai otra forma de xestionar les coses dende l’aspectu cultural, musical y festivu’, nun manifiestu fechu públicu con motivu de Les Feries 2006 llama a la concentración ‘festiva-reivindicativa y pacífica’ n’apoyu de los grupos locales que se ven escluyíos del programa festivu. La manifestación va tener llugar esta tarde a les siete y cuartu ente’l Teatru Vital Aza de L.lena, coincidiendo cola llectura del pregón qu’inaugura les fiestes. Nel manifiestu fechu públicu pola plataforma ‘Otres feries son posibles’ critícase l’actitú de les conceyales de Cultura y Festeyos del Ayuntamientu de L.lena que, recibiendo l’añu pasáu un manifiestu per parte de los artistes locales nel que se les convidaba a falar no tocante al programa festivu de Les Feries, non sólo nun aceptaron esi diálogu, sinón qu’empeoraron la situación, tando dalgún de los artistes locales, según la plataforma, ‘vetaos p’actuar nel so propiu conceyu por espresar llibremente la so opinión no que consideramos una censura política inaceptable nun estáu democráticu’. La Plataforma reprócha-y al equipu de gobiernu de L.lena que diseñare un programa festivu ‘vaciu, ensin interes, poco orixinal y atractivu’ nel que se cobra por asistir a espectáculos que formen parte de l’axenda cultural del Principáu ‘y que, polo tanto, vienen subvencionaos pol gobiernu d’Asturies, como foi’l casu de Tuenda y Toli Morilla, por exemplu’. ‘Otres feries son posibles’ propón otru modelu de xestión pa Les Feries que tea basáu na participación de tolos colectivos culturales, musicales y mozos del conceyu que, xunto a los hosteleros y ciudadanos en xeneral, preparen unes fiestes ‘dignes’ de L.lena. Por esta razón, y sumándose a la protesta fecha pola Xunta Cultural Rebelgu, la plataforma llama a la concentración ‘festiva-reivindicativa y pacífica’ n’apoyu de los grupos locales que se ven escluyíos del programa festivu. Manifestación que va tener llugar esta tarde a les siete y cuartu ente’l Teatru Vital Aza de L.lena, coincidiendo cola llectura del pregón qu’inaugura les fiestes. 11 d'ochobre, 2006 0 FacebookTwitterPinterestEmail
Fiestes La Xunta Cultural Rebelgu convoca una protesta contra la organización de Les Feries de L.lena by asturnet 9 d'ochobre, 2006 La Xunta Cultural Rebelgu tien previsto aconceyar esti llunes con tolos colectivos de La Pola L.lena pa tratar los temes tocantes a la que consideren ‘mui mal organización’ de Les Feries, convocando una concentración de protesta’l proximu día 11, a les ocho la tarde, coincidiendo col pregón de les fiestes. Pa Rebelgu, ye una ‘total falta de respetu’ per parte del alcalde los comentarios que fai nun cartafueyu sobre les feries “nel que vien a dicir que nes fiestes ‘lo importante nun ye gastar en pitos y flautes’ y ‘los que seyan críticos coles feries que beban un poco más de vinu del habitual’ “. La Xunta Cultural Rebelgu considera que la organización de Les Feries va de mal en pior y pa ello, recuerda cómo nes feries del añu pasáu los grupos l.lenizos como La Col.lá Propiden, Adizión Etítilika, Dark la eMe, Ampicoyo y los mokomitas, asina como la banda de gaites Güestia, xunto col grupu de teatru local, sacaron un comunciáu nel que denunciaben que nes feries nun se cuntó con dengún d’ellos. Esta tema, según Rebelgu, llevó al raperu Dark la eMe a facer un cantar llamáu ‘Vox Populi’ nel que criticaba la ‘pesima xestión de la conceyala de Cultura, Paz García, que dende esi momentu aplicó una censura contra los grupos locales que tovía ta en vigor’. Rebelgu, qu’esta tarce aconceya con otros colectivos de la zona pa tratar esti asuntu asina como p’afalalos a sumase a la protesta que van facer coincidir col pregón de Les Feries, denuncia que la organización ‘tien el valor de cobrar entrada polos conciertos de l’axenda musical que son subvencionaos pol Gobiernu d’Asturies y amás de metelos nel programa de feries pa facer como si lo organizaren ellos, cuando en realidá nun tien nada que ver coles fiestes’. 9 d'ochobre, 2006 0 FacebookTwitterPinterestEmail
Fiestes Tuenda, Muyeres y Toli Morilla ponen música a Les Feries de L.lena by asturnet 6 d'ochobre, 2006 La principal fiesta de La Pola L.lena conocida como Les Feries va empezar esta tarde, a les ocho, nel teatru Vital Aza cola actuación de los grupos de música folk asturianos Tuenda y Muyeres. El xueves, el cantautor xixones Toli Morilla va ser l’encargáu de poner música a un certame nel que nun van faltar les populares feries de ganao y apicultura, asina como un festival de canción asturiana. Anque los grupos Tuenda y Muyeres van estrenar la programación de Les Feries esta mesma tarde, el pregón inaugural, a cargu del teniente xefe de la Guardia Civil de La Pola nos años 70 y anguaño Xeneral Brigada del cuerpu, Gonzalo Jar Couselo, nun se va lleer hasta’l próximu miercoles día 11. A lo llargo del xueves la localidá va acoyer, amás d’una tradicional verbena, el popular certame de ganao, un concurso d’entibadores y la obra de teatru Les Cartes. Mentes que’l llunes 16, últimu día de les fiestes, el teatru Vital Aza va acoyer un festival de canción asturiana. 6 d'ochobre, 2006 0 FacebookTwitterPinterestEmail
ConvocatoriesFiestes Xixón convoca dos beques pa la Oficina Municipal de la Llingua by asturnet 20 de setiembre, 2006 Xixón ta acabante de convocar dos beques de formaicón especializada pa la traducción al asturianu y el desarrollu d’actividaes de normalización llingüística pa la Oficina Municipal de la Llingua de la Fundación Municipal de Cultura, Educación y Universidá Popular del Ayuntamientu. Ente los llabores a facer na xornada de trabayu de siete hores diaries destaca l’estudiu, planificación y execución de mecanismos de promoción y difusión del asturianu al travies de los servicios públicos. Pa poder solicitar tales beques, que tienen una dotación económica de 2520 euros caduna, desíxese tener una llicenciatura o diplomatura, amás de la titulación universitaria d’Especialista o Espertu en Filoloxía Asturiana sacada nos últimos cuatro años. Información completa sobre les beques 20 de setiembre, 2006 0 FacebookTwitterPinterestEmail
ConvocatoriesFiestes El Centru dArtesanía y Artes Plástiques de Po abre la matrícula de los sos cursos by asturnet 20 de setiembre, 2006 El Centru dArtesanía y Artes Plástiques de Po, en Llanes, abrió la matrícula pa los cursos que van celebrar ente los meses dochobre y avientu. Ente les enseñances ufiertaes ta un cursu de texíu artesanu, otru de serigrafía asina como un tercer cursu dedicáu a la guarnicionería. La ufierta formativa del Centru dArtesanía y Artes Plástiques de Po ye la que vien darréu: – Cursu de texíu artesanu, de 30 hores, a facer nel mes de payares. – Cursu de serigrafía, de 64 hores a facer dochobre a avientu. Horariu: martes y xueves de 16:00 h a 20:00 h, a partir del 24 dochobre. – Cursu de guarnicionería, de 150 hores, repartíes dochobre a avientu. Horariu: Llunes, miércoles y vienres de 16:00 h a 20:00 h, dendel 9 dochobre. Tolos interesaos en consultar más información asina como en facer reserves tienen de plazu hastal 5 dochobre nel Centru dArtesanía y Artes Plástiques de Po o nel teléfonu 985 40 37 59 nhorariu de 10 h a 14 h y de 17 h a 19 h. 20 de setiembre, 2006 0 FacebookTwitterPinterestEmail
ConvocatoriesFiestes El conceyu de L.lena convoca la plaza de responsable del Serviciu de Normalización Llingüística by asturnet 19 de setiembre, 2006 El conceyu de L.lena convoca por concursu-oposición la plaza de responsable del Serviciu de Normalización Llingüística, al que que pueden presentase tolos titulaos superiores que sían especialistes en filoloxía asturiana. El plazu de solitú a esta convocatoria termina a les 14 hores del próximu 22 de setiembre. Los esámenes de la oposición van tratar de dos exercicios de calter obligatoriu y eliminatoriu. Asina, el primeru d’ellos va consistir nuna exposición oral n’asturianu, que va tener que ver col tema qu’escueya’l tribunal, bien sobre la normalización llingüistica nel ámbitu municipal, la Llei d’Usu y Promoción del asturianu, el decretu pol que se determinen los topónimos oficiales del conceyu de L.lena o’l propiu Estatutu d’Autonomía. La segunda parte de la prueba va tratar de la traducción d’un testu del castellanu al asturianu, nun plazu máximu de noventa minutos. El seleccionáu va ser contratáu en rexime de derechu llaboral, a xornada completa, na modalidá d’obre o serviciu determináu, de manera que la duración del contratu queda vinculada a la del serviciu mentes se mantenga la financiación del mesmu pol Principáu, inicialmente, ensin perxuiciu de la terminación del contratu si’l serviciu se creare col calter permanente, momentu nel que se diría a la provisión defenetiva de la plaza. Les funciones de la persona encargada del Serviciu de Normalización Llingüística van consistir nel serviciu de traducción de tola documentación alministrativa del ayuntamientu, asina como’l desarrollu de tou tipu d’actividaes destinaes a la normalización del asturianu nel conceyu de L.lena. Bases completes de la convocatoria 19 de setiembre, 2006 0 FacebookTwitterPinterestEmail
ConvocatoriesFiestes Caltiense abiertu’l plazu pal certame de poesía Casa d’Alcuentru de les Muyeres de L.lena by asturnet 18 de setiembre, 2006 L’ayuntamientu de L.lena caltien abiertu hasta’l próximu 1 d’ochobre’l plazu de participación nel concursu de poesía de la Casa d’Alcuentru de les Muyeres. A esti certame pueden participar toles muyeres que quieran con un poema en castellanu o asturianu que tenga ente 50 y 200 versos. La dotación del premiu pal poema ganador ye de 600 euros. 18 de setiembre, 2006 0 FacebookTwitterPinterestEmail
ConvocatoriesFiestes Ábrese’l plazu d’inscripción pal Cursu Básicu d’Historia Contemporánea d’Asturies by asturnet 18 de setiembre, 2006 El plazu d’inscripción pal Cursu Básicu d’Historia Contemporánea d’Asturies, que se va a celebrar nos locales de Conceyu Abiertu tolos xueves de 7 a 9 la tarde ente los meses d’ochobre y avientu, va tar abiertu hasta’l próximu 4 d’ochobre. El cursu, impartíu n’asturianu polos profesores Faustino Zapico, Rafael Rodríguez Valdes y Jose Luis Carmona, va repasar la situación social, política y económica de la historia más recien d’Asturies. Empobináu a toles persones interesaes en conocer delles de les claves que despliquen la situación social, política y económica d’anguaño, el Cursu Básicu d’Historia Contemporánea d’Asturies cuesta una cuota de 20 euros, a pagar en La Casa Posafuelles antes del día 4 d’ochobre, a la hora de la inscripción. Los historiadores encargaos de poner les clases van ser Faustino Zapico, autor del trabayu ‘El discursu de la periferia: corrientes federalistes y autonomistes na Asturies decimonómica’, entre otros estudios; Rafael Rodríguez Valdes, responsable d’estremaos artículos d’investigación, como’l cuadernu ‘Llingua asturiana y movimientu obreru, 1899-1937’; y Jose Luis Carmona, autor de ‘Cien años de socialismo en Langreo’ y ‘Historia militar de Asturias’. 18 de setiembre, 2006 0 FacebookTwitterPinterestEmail
ConvocatoriesFiestes Cursos d’alfabetización de l’Academia de la Llingua Asturiana n’Uviéu y Llugones by asturnet 18 de setiembre, 2006 L’Academia de la Llingua Asturiana participa na celebración de dos cursos d’asturianu pa los prósimos meses nos conceyos d’Uvieu y Siero. Los dos cursos, que van empezar el próximu 2 d’ochobre, tán destinaos a l’alfabetización n’asturianu y van reconocer la participación de los asistentes con un diploma acreditativu. En collaboración col Ayuntamientu de Siero l’Academia de la Llingua Asturiana va organizar un cursu d’alfabetización nel Centru de Día de Llugones. Con una duración de 36 hores y 15 places, el cursu, que tien un preciu de 20 euros, va celebrase los llunes y los miercoles de 19.30 a 21.30 hores. Les persones interesaes nesti programa pueden llamar, mesmo pa informase que p’apuntase, a los telefonos 654 728 973 – 985 723 085. Per otra parte, l’Academia tamien va impartir un cursu d’alfabetización nel local Cambalache d’Uvieu. De caracteristiques iguales al anterior, el cursu tendrá llugar los llunes y miercoles de 17 a 19 hores. 18 de setiembre, 2006 0 FacebookTwitterPinterestEmail
ConvocatoriesFiestes Concentración n’apoyu de los militantes de la Xunta denunciaos por pidir la oficialidá by asturnet 15 de setiembre, 2006 Seis miembros de la Xunta pola Defensa de la Llingua Asturiana tán llamaos a xuiciu de faltes pa esti 25 de setiembre, por participar nuna acción reivindicativa, en defensa de la oficialidá del asturianu, el pasáu día16 de xunu, coincidiendo cola inauguración del Centru de Salú de Llugones, onde s’alcontraba’l presidente del Gobiernu asturianu, Vicente Álvarez Areces. La “pita” y dellos miembros de la organización de defensa de los derechos llingüísticos taben reclamando la oficialidá nel momentu nel que fueron reteníos poles fuerces de seguridá, pa facer la identificación de los militantes. Énte la denuncia a los seis miembros de la organización de defensa de los derechos llingüísticos de los asturianos, representantes de la Xunta manifestaron que “si al presidente Areces-y molesta que les crítiques tresciendan a la opinión pública, la via pa evitales nun ta na criminalización sinon na corrección de la política de marxinación llingüística que ta llevando alantre’l so gobiernu”, por eso, la Xunta, qu’aclarió que na manifestación de los sos militantes nun hebo disturbios nin engarradielles, sinón que simplemente se fizo actu de presencia con pancartes d’apoyu a la llingua, “quier denunciar qu’estes actuaciones son contraries al exerciciu del derechu a la llibertá d’espresión y a la crítica política. Ye evidente qu’esto, qu’en distintos graos llevamos careciendo dende va muncho tiempu, namás persigue callar les voces crítiques cola xestión d’esti gobiernu”. Por esa razón, la Xunta pola Defensa de la Llingua afirma que pela vía xudicial nun van abandonar la denuncia pública de la situación de “marxinación y falta de derechos que carez la llingua asturiana y les persones falantes d’asturianu”. Per parte de la Xunta pola Defensa de la Llingua Asturiana, los militantes encausaos “van cuntar cola solidaridá y l’apoyu de la organización”, que tien convocada una concentración a la una la tarde del día 25 de setiembre ente los xulgaos de la Cai Parroco Fernandez Pereda de Siero. 15 de setiembre, 2006 0 FacebookTwitterPinterestEmail