Sociedá El Conseyu d’Europa demanda nun informe la oficialidá pa la llingua asturiana by asturnet 22 de setiembre, 2005 El Conseyu d’Europa fizo públicu un informe sobre la situación de les llingües minoritaries na Unión que nel capítulu referente al estáu español dedica diverses considerances sobre la llingua asturiana. La falta de cooficialidá y la precaria situación na enseñanza, n’administración y nos medios señálense nel informe como los principales problemes del nuestru idioma. L’informe apunta que’l comité d’espertos del másimu organismu européu detectó na so visita a Asturies una fonda insatisfacción social sobre la situación llegal de la llingua asturiana. Pa los espertos europeos l’ausencia de reconocencia oficial nel Estatutu impide que les midíes conteníes na Llei d’Usu puedan aplicase afayadizamente. Los espertos desautoricen al gobiernu autonómicu por negase a reconocer la oficialidá y resalten el prestixu social que ta algamendo nos últimos años la nuestra llingua gracies al llabor desenvueltu por instituciones como l’Academia de la Llingua y de la lliteratura asturiana. La situación del asturianu na enseñanza tamién ye abordada nel informe. Ende, los espertos, consideen negativa la condición de la nuestra llingua como materia optativa y que “tien de competir con otros materies que por razones práctiques pueden paecer más atractives”. L’informe insta al empar a les autoridaes españoles a desplicar les razones poles que s’impide la creación de la titulación de Filoloxía Asturiana, al pesar de tolos informes académicos favorables de la Universidá d’Uviéu. Los medios de comunicación tienen un papel destacáu na revitalización de la nuestra llingua, pa los espertos europeos, qu’aluden nel so informe a la paradoxa que supón la creación d’un Ente Públicu de Comunicación como’l del Principáu, nel que la llingua asturiana malapenes tien un espaciu protagonista. Informe del Conseyu d’Europa 22 de setiembre, 2005 0 FacebookTwitterPinterestEmail
Sociedá El Gobiernu celebra’l so Conseyu de Gobiernu nel monesteriu de Courias by asturnet 22 de setiembre, 2005 El Conseyu de Gobiernu del Principáu aconcéyase esta mañana nel monesteriu de Courias, en Cangas del Narcea, nuna reunión ordinaria que va servir al final de la mesma pa presentar el proyectu del arquitectu Peridis pa convertir el antigu cenobiu nun Parador Nacional. Xunro al Conseyu de Gobiernu va celebrase un actu con presencia del alcalde del conceyu nel que ta previsto que la Conseyera de Cultura, Comunicación Social y Turismu, dirixa unes palabres, siuíes de la proyección d’ un vídeo colos elementos más destacaos del Monesterio de Courias, y pola presentación del Proyectu por parte del arquitecto, Peridis. L’actu va finar con unes palabras del alcalde de Cangas del Narcea, y del Presidente del Principáu. Por parte del Gobiernu autonómicu, tá prevista tamién l’asistencia del Director Xeneral de Promoción Cultural y Política LLingüística, Carlos Madera, y del xerente de la Sociedá Rexonal de Turismu, José Luis Vega, amás del Director Xeneral de Comercio, Autónomos y Economía Social, Julio González Zapico, y del Director del Institutu de Desarrollu Rural, Eduardo Lastra. 22 de setiembre, 2005 0 FacebookTwitterPinterestEmail
Sociedá El diputáu d’ERC Joan Puig afirma que tocante al gallegu n’Asturies son los científicos y non los politicos los que tienen de pronunciase by asturnet 22 de setiembre, 2005 Joan Puig, diputáu d’Esquerra Republicana de Catalunya nel parlamentu de Madrid, afirma nuna entrevista puhlicada nel semanariu Les Noticies, que “son los científicos y non los políticos” los que tienen de pronunciase tocante a la realidá llingüística de los conceyos del Navia-Eo. Puig acusa de “cinismu” a los políticos asturianos que criticaron la propuesta d’ERC sobre llingües del estáu y encamiéntalos a oficilizar l’asturianu “enantes de falar”. El parlamentariu independentista afirma na entrevista publicada pol semanariu uvieín que “dalgunos que nun quieren nenguna llingua oficial n’Asturies distinta del castellanu tentaron manipular” la propuesta d’Esquerra y que foron “los que fixeron un aaque mui fuerte al proyectu, cuando son ellos los que son incapaces, los que nun quieren, nin tienen nenguna gana de declarar oficial la llingua que se fala n’Aaturies”. Respective a la polémica entamada pola consideranza de los conceyos asturianos del Navia-Eo como territorios de fala gallega, Puig declara que “intentar forciar un debate ente gallegu y asturianu cuando’l gobiernu d’Asturies ye incapaz de dar respuesta a les esixenciaes de los asturianos nun ye de recibu” y compara la situación del nuestru país cola vivida en comunidaes como la valenciana: “onde los que llamen a la llingua valencián son los que nun lo falen, los que nun lo practiquen nin lo piensen falar nunca los que critiquen a los catalanes nel tema del valencián”. El representante parlmentariu d’ERC nel Congresu refierse tamién a la redacción del testu de la so propuesta y de la busca d’una fórmula que nun fiera sensibilidaes n’Asturies. Pa Puig nel fondo de la cuestión tocante al nuestru país “el problema grave ye la falta d’oficialidá” y afirma que nel procesu d’enmiendes “vamos matizalo y atopar la fórmula”, una fórmula na que seya “posible ponese d’alcuerdu, que se pueda cambiar el nome de les variedaes o lo que seya”. 22 de setiembre, 2005 0 FacebookTwitterPinterestEmail
Música Los sones más monteses y combativos xúntense nel Festival Puelles Rock by asturnet 21 de setiembre, 2005 El llugar de Puelles acueye esti viernes 23 un festival de rock nel que participen siete bandes asturianes y una vasca col apueste polos sones más contundentes y combativos como elementu en común. Skama la Rede, La Tarrancha, Sikarios, Kuarentena, Kema Guaje, Desorden, Ásperos y Kaskarreko formen el cartelu del Puelles Rock. La cita ye dende les 20,30 d’esti viernes en delantre con entrada de baldre pa la xente que se desplace hasta esti llugar asitiáu xunta’l Concentu de Valdediós y a siete kilómetros de La Villa. La organización del festivla tien preparada una fastera d’acampada y otra d’aparcamientu nes inmediaciones del prau onde se celebra’l festival. Tamién va haber serviciu d’autobuses dende la capital del conceyu maliayés pa esta, una de les últimes atopaes musicales al aire llibre de la temporada. 21 de setiembre, 2005 0 FacebookTwitterPinterestEmail
Música Trashtornados esti sábadu na Fnac by asturnet 21 de setiembre, 2005 La formación mierense Trashtornados, qu’amesta los sones del swing colos del jazz, actúa esti sábadu día 24 de setiembre a les ocho y media la tarde na Fnac de Parque Principado. El quintetu lideráu pol cantante y guitarrista Bobby González (ex Los Coronados) acaba de sacar el so primer trabayu discográficu, ‘Cool Bop!’, nel qu’inclúin una versión del clásicu del wing ‘Bye, bye blues’, de Louis Armstrong. Esta banda, que lleva más de dos años n’activu y que ta formada por ocho músicos de llarga trayectoria profesional en diferentes formaciones, ta volviendose una de les propuestes musicales más sorprendentes y reveladores del panorama musical español. 21 de setiembre, 2005 0 FacebookTwitterPinterestEmail
Sociedá El Congresu admitió a trámite la iniciativa d’ERC pa oficializar l’usu del catalán, vascu y gallegu by asturnet 21 de setiembre, 2005 La mesa del Congresu de los Diputaos admitió a trámite esti martes 20 la propuesta del diputáu d’Esquerra Republicana de Catalunya Joan Tárda pa que’l catalán, el vascu y el gallegu puedan tener un usu oficial en toles instituciones del estáu. La iniciativa d’ERC ábrese camín cola promesa d’esta formación a los sos socios n’Europa d’Andecha Astur d’esborriar cualaquier referencia a les fasteres del Navia-EO. La propuesta de los independentistes catalanes va discutise nel parlamentu de Madrid na prósima primavera. El primer trabancu, que consistía na so admisión a trámite, ya ta superáu, como consecuencia de les negociaciones entamaes ente ERC y PSOE; queda por ver agora si el sofitu del primer grupu parlamentariu va siguir hasta l’aprebación de la llei. Mentantu, el Partíu Popular, per voz del so repreentante nel Congresu, Eduardo Zaplana, anunció la so intención de recurrir énte’l Tribunal Consitucional esta llei si sal alantre, porque a xuiciu de los populares, diba suponer “una reforma encubierta de la Carta Magna”. El testu de la iniciativa d’Esquerra provocara l’alarma en sectores del movimientu de recuperación llingüística d’Asturies énte la referencia esplicitada nel testu orixinal de la propuesta a les fasteres del Navia-Eo como territorios de fala gallega. La intervención d’Andecha Astur pidiendo a los sos socios de la coalición Europa de los Pueblos consiguió el compromisu d’ERC de retirar cualaquier referncia nominal a conceyos asturianos. 21 de setiembre, 2005 0 FacebookTwitterPinterestEmail
Tecnoloxía La comunidá llingüística y cultural catalana va tener un dominiu propiu n’Internet by asturnet 20 de setiembre, 2005 ICANN (Internet Corporation for Assigned Names and Numbers), l’organismu internacional que concede’l resxistru de dominios na Rede, acepta la propuesta formulada por varies entidaes de Cataluña, ente elles el Gobiernu de la Generalitat, de que la identificación .cat pueda utilizase pa nomar sitios web de la comunidá llingüística y cultural catalana. La decisión de ICANN sienta un precedente pa que d’agora n’adelantre cualaquier comunidá idiomática, non necesariamente con estáu propiu, pueda disponer d’una identificación de los dominios perteneciente a ella. Hasta agora los identificadores nacionales limitábense a países independientes y col so corrspondiente organismu de rexistros de sitios web. La propuesta agora aprebada ye una iniciativa de PuntCat, una entidá ensin ánimu de lucru que de cuantayá fai campaña pa consiquir que la comunidá de llingua catalana tenga un nome de dominiu propiu. ICANN acepta esta posibilidá con una fórmula alternativa a les hasta agora más corrientes: l’identificador .cat va ser un dominiu patrocináu por un esponsor, que se fai responsable de tolos nomes rexistraos. El Gobiernu de la Generalitat va ser l’esponsor del nuevu dominiu llingüísticu, al través d’una fundación creada pa tal fin y na que van participar entidaes públiques y privaes. puntCat 20 de setiembre, 2005 0 FacebookTwitterPinterestEmail
Sociedá La inmigración centra los 23 Alcuentros de la Mocedá de Cabueñes by asturnet 19 de setiembre, 2005 Xixón va ser un añu más sé de los Alcuentros Internacionales de Mocedá qu’organiza l’INJUVE, en colaboración col Institutu Asturianu de la Mocedá, l’Ayuntamientu de Xixón y los Conseyos de la Mocedá d’España, Asturies y Xixón. Cabueñes 2005 va debatir alrodiu d’inmigración, integración y ciudadanía. La edición númberu ventitrés de los Alcuentros de Mocedá va celebrase ente los díes 26 y 30 de setiembre nel Antigu Institutu de Xixón. Los derechos de los inmigrantes, el so accesu al mundu del trabayu y la so discriminación llaboral, asina como el so inxerimientu na vida ciudadana son los exes alrodiu de los que van articulase los debates y conferencies de los alcuentros. Como actividaes complementaries a les sesiones d’alderique ufiértase l’espaciu Arenes Movedices que nesta ocasión van protagonizar la compañía de teatru Digo Digo col so espectáculu “Quijotadas” y el Centru de Nuevos Creadores con “El privilegio de ser perro”, dirixía por Juan Diego Botto. Los participantes en Cabueñes 2005 van poder tamién asistir al musical “We will rock you” de Queen. Cabueñes 2005 19 de setiembre, 2005 0 FacebookTwitterPinterestEmail
Sociedá Avilés va acoyer un alcuentru de servicios municipales de normalización by asturnet 18 de setiembre, 2005 Avilés, l’últimu conceyu n’abrir un serviciu de normalización llingüística, va ser la sé el prósimu 8 d’ochobre d’un alcuentru de responsables de les oficines de normalización nel que va elaborase’l Plan pel que se guíen estos departamentos nun futuru. La xornada va ser tamién la presentación pública de la oficina avilesina y va cuntar como pieslle cola actuación del cantante Chus Pedro. ELLICTA ye’l nome del nuevu serviciu municipal, un acrónimu de Estaya Llingüística d’Avilés, que coordina dende va unes selmanes el filólogu Cesáreo García. La última oficina de normalización abierta nun conceyu va ser tamién la qu’organice esti alcuentru de tolos servicios integraos na rede de normalización nel que se pongan en común les estremaes esmoliciones y propuestes de los técnicos responsables de los mesmos. La oficina d’Avilés empobina tamién dende la so creación un grupu de discusión en Yahoo.com nel que se pueden conocer y valorar distintes aportaciones al funcionamientu de los servicios de normalización municipal. Coincidiendo cola celebración del alcuentru el prósimu 8 d’ochobe la oficina avilesina va ampliar el so actual horariu d’atención al públicu y les sos actividaes. Anguaño esisten n’Asturies seis oficines de normalización en conceyos qu’abelluguen al 60 por cientu de la población de la nuestra comunidá y ún de los enfotos del alcuentru que va celebrase n’Avilés ye’l d’afalar la creación de nuevos servicios. Grupu de discutiniu d’ELLICTA 18 de setiembre, 2005 0 FacebookTwitterPinterestEmail
Sociedá Colectivos políticos y sociales critiquen a Trevín pol casu del militante nacionalista deteníu en Xixón by asturnet 18 de setiembre, 2005 Diversos colectivos políticos y sociales de la izquierda asturiana firmen un comunicáu conxuntu nelq que piden la dimisión del Delegáu del Gobiernu n’Asturies, Antonio Trevín, pola so actuación nel casu de la detención del militante nacionalista Fernando G.R. y nos recientes sucesos de Cangues. Los firmantes del comunicáu acusen a Trevín de conculcar los derechos de presunción d’inocencia del deteníu y de desvelar los sos datos personales nes informaciones ufiertaes a los medios, asina como de tentar criminalizar a colectivos y a idees. Andecha Astur, Corriente Sindical d’Izquierda, Darréu, FUSOA y COSAL d’Uviéu y Xixón critiquen nel so comunicáu l’actitú d’Antonio Trevín al permitir la celebración d’un actu ultraderechista en Cangues el pasáu 10 de setiembre y de lo que califiquen de “violenta represión de les persones movilizaes pa denunciar la convocatoria antidemocrática”, asina como de la falta d’axilidá pa resolver casos como’l de la recién agresión n’Uvièu a una militante del Sindicatu d’Estudiantes. Tocante al casu del nacionalista deteníu la otra selmana en Xixón y qu’anguaño ta recluíu en réxime de prisión incondicional na cárcel madrilana de Navalcarnero, los colectivos firmantes del comunicáu, darréu de considerar que l’actuación del Delegáu del Gobiernu, nun respetó los derechos fundamentales del deteníu, caltienen “desproporcionada l’aplicación de la Llei Antiterrorista” y afirmen que midíes como éstes “nun respuende como se pretende a garantizar la seguranza de la ciudadanía sinón a la necesidá d’aparar les crítiques polos comportamientos enantes denunciaos y sobre too pola falta de resultaos policiales na solución d’estos sucesos”. Estos colectivos acusen nel so comunicáu a la Delegación del Gobiernu de orquestar “una campaña mediática que namás tien por oxetu la criminalización d’idegues, persones, organizaciones y movimientos sociales de la izquierda asturiana”. Los firmantes afirmen que nel casu de Fernando G.R., ésti “ya careció un xuiciu previu al través de los comunicaos de Delegación del Gobiernu y de los medios de comunicación”. Por último, los colectivos autores del comunicáu, defenden la trayectoria personal y ideolóxica del militante nacionalista deteníu al que califiquen de “persona con un indiscutible compromisu social y políticu, fondamente enraigonáu na sociedá asturiana y d’una calidá humana fuera de toa dubia”. Fernando G.R. alcuéntrase anguaño presu nel centru penitenciariu de Navalcarnero, na comunidá de Madrid y esti fin de selmana recibiò la visita de los sos familiares. 18 de setiembre, 2005 0 FacebookTwitterPinterestEmail