Sociedá Javier Fernández asitia d’equí a un añu la reforma del estatutu asturianu by asturnet 16 de xineru, 2006 El secretariu xeneral de la Federación Socialista Asturiana (FSA) Javier Fernández anunció la intención del so partíu de ver entamada y rematada la reforma del Estatutu d’equí a un añu. El másimu responsable de los socialistes asturianos refugó entamar una ampliación del autogobiernu “dende una idea identitaria” y apuesta por facelo “polo que puede suponer en cuantes a la prosimidá de los ciudadanos a les instituciones”. El cabezaleru de la FSA afirmó en declaraciones a la emisora territorial de Radio Nacional d’España n’Asturies qu’énte la reforma “habrá que evaluar qué competencies son les que nos van permitir meyorar el desarrollu d’Asturies, l’ equilibriu social y territorial, y non cambialo por cambialo o por asumir competencies que, en dalgunos casos, puen tar meyor en manes del Estáu». Respective a los plazos del debate estatutariu Fernández afirmó que “la nuestra intención ye que’l procesu s’abra agora y que pueda tar finalizáu por estes mesmes feches l’añu que vien”. Pal dirixente socialista esta reforma nun supón “nengún tipu d’imposición, nin una urxencia, pero ye razonable tomar la iniciativa nesti tipu de coses». El conteníu de la reforma que defende’l PSOE n’Asturies fue claramente especificáu por Javier Fernández. Pa la FSA hai “dalgunes competencias que pueden ser interesantes” pal Principáu y la reforma sería necesaria nesi sen “non dende la idea identitaria que tienen n’otros territorios d’España, porque la personalidá d’Asturies ye mui marcada pero nun s’enfoca a lo político, sinón polo que puede suponer en cuantes a la prosimidá de los ciudadanos a les instituciones naquelles competencies qu’entendamos que pueden exercese de manera más eficaz dende la proximidá”, dixo Fernández na entrevista que güei reproducen diversos medios escritos asturianos. 16 de xineru, 2006 0 FacebookTwitterPinterestEmail
Sociedá La FSA advierte a IX-BA que nun va asumir la cooficialidá by asturnet 16 de xineru, 2006 La Federación Socialista Asturiana (FSA) nun ta dimpuesta a aceptar la cooficialidá na prósima reforma del estatutu. Asina lo dexó claro’l secretariu xeneral de los socialistes asturianos en declaraciones feches a RNA cuando manifestó que’l so partíu va refugar “cláusules d’imposición a aquellos que nun quieran falar llingua asturiana”. El responsable másimu de la FSA resumió la postura que va caltener la so fórmación ènte les propuestes d’incluir la oficialidá na reforma estatutaria que planteen los sos socios d’Izquierda Xunida-Bloque por Asturies: “protexer l’asturiano, sí; cooficializalo, na medida qu’eso tien un elementu d’imposición, nun va a ser la postura de la FSA-PSOE”, afirmó rotundu énte los micrófonos de Radio Nacional. 16 de xineru, 2006 0 FacebookTwitterPinterestEmail
Sociedá Los decretos pa la igua toponímica d’Avilés y Corvera van dase en mayu by asturnet 16 de xineru, 2006 El director xeneral de Promoción Cultural y Política Llingüística, Carlos Madera anunció esti viernes 13 n’Avilés que los espedientes toponímicos d’esti conceyu y del vecín de Corvera podíen tar aprebaos pal prósimu mes de mayu. Colos espedientes d’Avilés y Corvera son ya cuarenta y ún los conceyos que solicitaron la revisión de los sos nomes de llugar pola Xunta de Toponimia. Madera asistió’l pasáu viernes a la reunión d’esti organismu asesor nel Palaciu de Valdecarzana na villa del Adelantráu y presidió un aconceyamientu nel que tamién tuvo presente l’alcalde avilesín Santiago Vega. Los trabayos fechos hasta agora pola Xunta Asesora de Toponimia del Principáu consiguieron recuperar más de 3.000 nomes de llugar cola so forma tradicional. De los cuarenta y ún conceyos que solicitaron la so revisión toponímica son diez los que ya vieron aprebáu’l decretu correspondiente pa la oficialización de los nomes propuestos pola Xunta toponímica: Llanes, Carreño, El Franco, Gozón, Llangréu, L.lena, Sariego, Cabranes, Bimenes y Villaviciosa. El Conseyu de Gobiernu tien enriba la mesa pendientes d’oficializar los espedientes d’otros ocho conceyos Aller, Colunga, Nava, Ribera d’Arriba, Llaviana, Morcín, Pezós y Salime, a los qu’agora se sumen los d’Avilés y Corvera. 16 de xineru, 2006 0 FacebookTwitterPinterestEmail
Música Elliot Murphy y Carmen París protagonicen los conciertos estrella del fin de selmana by asturnet 13 de xineru, 2006 El rockeru americanu Elliot Murphy actúa esti viernes 13 n’Avilés nun conciertu de la so xira de promoción del so últimu discu “Murphy gets Muddy”, una esbilla de versiones de blues clásicos n’homenaxe al míticu Muddy Waters. Na nueche del sábadu una artista bien distinta, la cantante aragonesa Carmen París llega al Teatru Xovellanos de Xixón colos temes del so últimu trabayu: “Jotera lo serás tú”. El conciertu de Murphy -un vieyu conocíu de los escenarios asturianos y colaborador de grupos del país como los uvieínos The Stoormy Mondays- ye esta tarde a les 20,30 na Casa Muncipal de Cultura d’Avilés. Carmen París actúa esti sábadu 14 a les 20,30 nel Teatru Xovellanos pa presentar les pieces del so segundu trabayu discográficu, una grabación na que xunta los sones tradicionales de la jota aragonesa col flamenco y ritmos de la más diversa procedencia. 13 de xineru, 2006 0 FacebookTwitterPinterestEmail
Sociedá El Conseyu de Ministros apreba’l proyectu que reconoz la ‘oficialidá’ de la llingua de signos by asturnet 13 de xineru, 2006 El Conseyu de Ministros del gobiernu español va dar esti viernes 13 lluz verde al proyectu de llei que reconoz les llingües de signos española y catalana nel estáu. El proyectu que va aprobar el gobiernu quier garantizar el derechu de los alrodiu d’un millón de ciudadanos con discapacidá auditiva a comunicase cola Administración y colos diversos servicios públicos na llingua de signos y a ser respondíu de la mesmamiente. El testu que va ver el vistu bonu del Conseyu de Ministros contempla que cualaquier persona sorda pueda cuntar con un intérprete nes sos relaciones coles diverses administraciones y servicios públicos como los sanitarios o d’enseñanza. La nueva llei va garantizar tamién el derechu a deprender la llingua de signos y el derecho a usala, al través d’intérpretes y otros medios, como’l subtituláu, en determinaos ámbitos. Nel proyectu améstase amás que les administraciones educatives habrán determinar qué centros ufierten enseñanza “billingüe” y facilitar tolos medios a les persones sordes pa que puedan acceder a la comunicación coles distintes instancies públiques. Según los datos que remana’l Ministeriu de Trabayu y de Servicios Sociales nel estáu español hai alrodiu d’un millón de persones sordes, que seríen les que van beneficiase más directamente d’esta nueva llei. El proyectu del gobiernu central contempla la “oficialidá” tanto de la llingua de signos española-castellana como la catalana. 13 de xineru, 2006 0 FacebookTwitterPinterestEmail
Sociedá El Festival d’Aristébano refuga los bodes homosexuales by asturnet 13 de xineru, 2006 L’asociación qu’organiza la fiesta vaqueira del Alto d’Aristébano opónse a que persones del mesmu sexu puedan casar pol ritu folklóricu inspiráu nes bodes tradicionales de los brañeiros asturiano que promociona de cuantayá esta romería añal. Les bases pa la inscripción de los posibles ‘mozos’ recalquen claro que los solicitantes habrán ser heterosexuales y la organización de la folixa afirma que cualaquier solicitú de pareyes gais o lesbianes van refugase dafechu. La presidenta de l’Asociación Amigos del Festival Vaqueiro, responsable d’organizar la romería d’Aristébano, xustificó el non afayamientu de la fiesta a la nueva realidá llegal nel estáu respective a casorios de persones del mesmu sexu que la ‘vaqueirada’ tenta recrear una celebración tradicional y que n’antaño una boda ente dos homes o dos muyeres “yera impensable”. El Festival d’Aristébano celébrase tolos años l’últimu domingu del mes de xunetu y tenta recrear les bodes tradicionales de los vaqueiros del occidente asturianu nuna folixa qu’algama cada branu una gran repercusión mediática. La romería fue entamada pol folklorista Modesto González Cobas en plenu franquismu y abondos colectivos d’investigación etnográfica, asina como los propios vecinos de la zona d’orixe vaqueiru, tienen descalificao la posible fidelidá de la folixa a la tradición y considérenla una falsificación con más enfotu nel espectáculu que nel conteníu cultural. 13 de xineru, 2006 0 FacebookTwitterPinterestEmail
Sociedá “Alcuentros”, la revista cántabra de llingües minoritaries, saca un nuevu númberu by asturnet 13 de xineru, 2006 La revista dixital cántabra dedicada a les llingües minoritaries, “Alcuentros”, asoleya un nuevu númberu cola edición d’iviernu nel que s’analiza l’asturianu oriental y nel que s’entrevisten a los profesores de la Facultá de Filoloxía de la Universidá d’Uvieu, Xulio Viejo Fernández y Xose Lluis García Arias. En sendes entrevistes a Xulio Viejo y Xose Lluis García Arias, los profesores de la Universidá d’Uvieu analicen la formación histórica del patrimoniu llingüísticu cántabru y la gramática histórica, respectivamente. Pela so parte, Jesús González Vizán, miembru de l’Asociación zamorana Furmientu, estudia l’estáu de les fales zamoranes n’actualidá. Rául Molleda García dedica’l so artículu a la toponimia cántabra, mentes que Silvia González Goñi aporta unos apuntes sobre la fala y el lexicu de la Merindad de Sotoscuevas (Burgos). Esti sestu númberu complétase con un artículu sobre l’asturianu oriental, ellaboráu por Francisco García González. Revista Alcuentros 13 de xineru, 2006 0 FacebookTwitterPinterestEmail
Sociedá La Xunta de Toponimia aconceya n’Avilés pa entamar la revisión del nomenclátor municipal by asturnet 13 de xineru, 2006 El palaciu de Valdecarzana acueye esti viernes 13 al meudía l’aconceyamientu de la Xunta Asesora de Toponimia del Principáu con representantes del Ayuntamientu d’Aviles pa entamar la revisión del nomenclátor municipal. La reunión forma parte de les avezaes que l’organismu d’espertos de l’administración autonómica celebra colos responsables de los conceyos solicitantes de la igua de los sos nomes de llugar. El director xeneral de Promoción Cultural y Política Llingüística de la Conseyería de Cultura, Carlos Madera y el responsable de la Oficina de Política Llingüística del Principáu, Ramón d’Andrés asisten al aconceyamientu de la Xunta de Toponimia n’Avilés al llau de la comisión multidisciplinar d’especialistes encargada de la revisión toponímica d’Asturies. Avilés xúntase asina con esti pasu a los conceyos -cásique la mitá del total de la nuestra comunidá- n’entamar l’apertura del so espediente toponímicu. 13 de xineru, 2006 0 FacebookTwitterPinterestEmail
Comunicación L’autonómica va retresmitir el partíu ente’l Sporting y el Murcia dende la Condomina by asturnet 12 de xineru, 2006 La televisión autonómica asturiana va retresmitir el partíu correspondiente a la Liga de la segunda división española ente’l Sporting de Xixón y el Murcia que se disputa’l prósimu 22 de xineru nel estadiu de La Condomina. La programación d’esti alcuentru sigue la política d’emisiones en directu de competiciones deportives puestu en marcha por TPA nel so periodu de prebes. La retresmisión dende l’estadiu murcianu de La Condomina va ser la primer producciòn propia d’un directu fecha pola canal autonómica asturiana fuera de la nuestra comunidá. Un equipu técnicu y periodísticu va viaxar hasta la comunidá levantina pa cubrir la emisión del alcuentru nel que van enfrentase el Sporting y el Murcia. 12 de xineru, 2006 0 FacebookTwitterPinterestEmail
Música Herbert, Klaus & The Happy Amish presenten en directu un clip del so álbum de debú by asturnet 12 de xineru, 2006 Herbert, Klaus & The Happy Amish presenten esti viernes 13 en directu el video-clip ‘Ghost in the River’ de la realizadora Laura Martínez. El tema del clip ta estraíu del primer trabayu discográficu de la banda llangreana “The Smallest Story”. El Forum de Fnac ye’l sitiu escoyíu por esta banda de country alternativu pa facer el conciertu de presentación del so videu musical. L’autora de la filmación de ‘Ghost in the River’ algamó como ganadora l’últimu concursu de videoclips del Institutu Asturianu de la Mocedá y de la cadena 40 Principales-Asturies y rodó esta pieza siguiendo los patrones estéticos del western clásico pa ilustrar el tema de Herbert, Klaus & The Happy Amish. El conciertu y la presentación de ‘Ghost in the River’ ye esti viernes 13 a les 19,00 hores en Fnac de Parque Principado. 12 de xineru, 2006 0 FacebookTwitterPinterestEmail