Lliteratura Miguel Allende y Héctor Pérez algamen el Teodoro Cuesta de poesía by asturnet 18 d'avientu, 2007 “Güelgues de gallón” de Miguel Allende y “Como crecieres tu” d’ Hector Perez foron los poemarios que algamaron el primer premiu na edición d’esti añu del Teodoro Cuesta. El premiu, un de los más ponderaos polos escritores, ta organizáu pol Conceyu de Mieres y reparte 4.000 euros ente los dos ganadores, Miguel Allende ñació en Llaviana nel añu 1960 y ye filólogu. Tien nel mercáu el llibru “Pallabres de payaso”, una esbilla de poemes de tola carrera. Hector Perez Iglesias (Llanera, 1978) foi’l ganador del premiu Asturies Moza de poesía en castellanu nel 2003 pola obra “Las tardes baldías”. Otres obres suyes son “Prisión de náugrafu” y dalgunos cuentos en castellanu y asturianu, dellos premiaos nel concursu Art Nalón. 18 d'avientu, 2007 0 FacebookTwitterPinterestEmail
Lliteratura Javier Marinas presenta la edición castellana del so cómic “Domno” en Lluanco by asturnet 18 d'avientu, 2007 El debuxante moscón Javier Marinas García presenta, esta tarde na Casa de Cultura de Lluanco (18:30 hores), la segunda edición en castellanu del cómic DOMNO (la historia de Gonzalo Peláez), que editara n’asturianu Trabe. El cómic xira alredor de les las aventures de Gonzalo Peláez y los sus enfrentamientos escontra Alfonso VII nel primer terciu del sieglu XII. Cunta col prólogu del catedráticu de Hestoria Medieval de la Universidá d’Uvieu, Javier Fernández Conde. Javier Antonio Marinas collabó en revistes como EEl Llapiceru” y “Tapón”. En 1996 espublizó “Ballenas”, un interesante libro de cómic sobre la caza de ballenes nel sieglu XVI. Amás tien algamao dellos premios pol so llabor, ente ellos: el Urriello d’Ilustración del Principáu en 1991 y en 1992 ya’l Universidá Popular de Castuera en Badajoz. Tamien salió premiáu en dellos festivales de carteles como’l del Descensu folklóricu del Nalón en 1996 o el de La Regalina en 2002. Blog del cómic 18 d'avientu, 2007 0 FacebookTwitterPinterestEmail
Sociedá L’Ayuntamientu d’Uviéu acusa al director de la Fundación Príncipe d’enguedeyar la relación ente les dos instituciones by asturnet 18 d'avientu, 2007 La teniente alcalde del Conceyu d’Uviéu, Isabel Pérez Espinosa, acusó güei al director de la Fundación Príncipe d’Asturies, Graciano García, de “enredar” y tentar de “presionar” al consistoriu uvieín al llanzar a los medios de comunicación la posibilidá de que dalgunes de les árees de la Fundación s’asitien fuera d’Uviéu, sigún recoyía Europa Press. Espinosa fizo estes declaraciones nuna rueda prensa, dempués de qu’ayeri, fontes del patronatu de la Fundación plantegaren la posibilidá d’estudiar ufiertes d’Uviéu y d’otros conceyos, tres recibir la comunicación del Conceyu de que tien d’abandonar el palaciu de Villa Magdalena, onde taben dalgunes de les sos árees. La teniente d’alcalde del Conceyu atribuyó en tou momentu a Graciano García eses manifestaciones “anque tente de camuflales atribuyéndoles a ‘fontes autorizaes'”. De fechu, dixo qu’eses consideraciones del director de la Fundación tán “fuera llugar”. 18 d'avientu, 2007 0 FacebookTwitterPinterestEmail
Lliteratura Antón García presenta una esbilla de la so obra poética en Xixón by asturnet 17 d'avientu, 2007 L’escritor Antón García, fundador d’Ediciones Trabe, va presentar esti martes en Xixón el llibru “La mirada aliella”, una esbilla poetica que recueye la produdicción del ator dende 1981 a 2006. L’actu de presentación va tener llugar a les 20:00 hores na sade del Ateneu Obreru de Xixón (C/Cuadonga, 7) y nel mesmu va tar presente’l profesor de lliteratura de la Universidá d’Uvieu Leopoldo Sánchez Torre. Antón García ye poeta, narrador, ensayista, traductor y críticu. Ente les sos obres destaquen les noveles “Díes de muncho” y “El viaxe”, coles que algamó’l premiu Xosefa de Xovellanos en 1998 y en 1986. Como poeta tien espublizao tres llibros de poemes, “Estoiru”, “Los díes repetíos” y “Venti poemes” que son los que se recueyen agora en “La mirada aliella”. Como investigador de la lliteratura asturiana recuperó y editó la obra de diversos autores, ente los que destaquen los narradores (asoleyando dos antoloxíes del cuentu n’asturianu), y poetes como Xuan González Villaro Xuan María Acebal.. Fizo la torna al asturianu de obres d’Álvaro Cunqueiro, Federico García Lorca y dellos poetes gallegos, catalanes, brasileños o ingleses. 17 d'avientu, 2007 0 FacebookTwitterPinterestEmail
Lliteratura Olvido García Valdés llee los sos poemes nun actu na Universidá by asturnet 17 d'avientu, 2007 Esti llunes continuen los actos de cellebración del 400 cabudañu de la Universidá d’Uvieu con una llectura poetica al cargu de la escritora asturiana Olvido García Valdes, Premiu Nacional de Poesía del añu 2007. L’actu va entamar a les 19:30 hores nel Edificiu Hestóricu que la Universidá d’Uvieu tien na cai San Francisco de la capital asturiana. Amás de la llectura la escritora va dar una conferencia. Olvido García Valdes, ñació en Santianes de Pravia en 1950. Poeta, ensayista y traductora ye co-directora de la revista “Los Infolios” dende 1987 y miembru del conseyu editor de “Hablar/Falar de Poesia” dende la so creación en 1996; asimesmu foi fundadora de la revista “El signo del gorrión”. Ente les sos obres destaquen llibros como “El tercer jardín”, de 1986; “Exposición”, de 1990; “Caza nocturna”, de 1997, ya’l reciente “Y todos estábamos vivos”, de 2006. 17 d'avientu, 2007 0 FacebookTwitterPinterestEmail
Lliteratura Tomás Sánchez Santiago presentó la so primer novela n’Uviéu by asturnet 17 d'avientu, 2007 Tomás Sánchez Santiago presenta esti llunes 17 d’avientu n’Uvieu la última de les sos obres, “Calle Feria”: premiu XI de Novela Ciudad de Salamanca y volumen col que’l poeta zamoranu fae la so primer incursión nel terren de la novela. L’actu va entamar a les 19:00 hores nel Club Prensa Asturiana y nel mesmu va oficiar de presentador l’escritor avilesín Jose María Castrillón. “Calle feria”, ufre en 500 páxines un retratu bien averáu a lo que yera la vida na España provinciana dende los años 30 a los años 50, dende la república a la dictadura. 17 d'avientu, 2007 0 FacebookTwitterPinterestEmail
Sociedá Llaranes celebró les sos xornaes sobre cultura y patrimoniu asturianu by asturnet 17 d'avientu, 2007 LAsociación de Vecinos El Camín, de Llaranes y El Pozón, pente medies del so colectivu xuvenil Llarizón, desendolcó les xornaes culturales «Xoranes 07» los pasaos díes 14 y 15 davientu, centrándose na cultura asturiana y la defensa del patrimoniu cultural y ambiental. Les xornaes ficiéronse nel Salón dActos de La Toba cola participación nes conferencies del historiador Rafael Rodríguez y la poetisa Vanessa Rodríguez ente otros. 17 d'avientu, 2007 0 FacebookTwitterPinterestEmail
Sociedá L’Ayuntamientu de Cangas edita un mapa cola toponimia tradicional by asturnet 17 d'avientu, 2007 El Conceyu de Cangas editara hai poco un mapa del conceyu con tolos nomes de parroquies y llugares na so forma tradicional del que son los Fernando Álvarez-Balbuena, María Cueto Fernández ya Ignacio González Fernández. El mapa yel resultáu del trabayu de campu fechu pola Xunta de Toponimia pa recuperar los nomes tradicionales del conceyu y ta repartiéndose de baldre per establecimientos comerciales y na Oficina de Política Llingüística, na Casal Conceyu de Cangas. 17 d'avientu, 2007 0 FacebookTwitterPinterestEmail
Sociedá L’Aconceyamientu de Xuristes pol Asturianu estrenó nuevu espaciu n’internet by asturnet 17 d'avientu, 2007 “Aconceyamientu de Xuristes pol Asturianu” (AXA) ta acabante d’estrenar un nuevu espaciu n’internet coincidiendo cola cellebración del añu y media d’esistencia de la asociación. La nueva web contien información y asesoramientu no que finca a cuestiones llegales, una estaya d’actualidá alredor de la realidá de los derechos de los asrurfalantes y la propia actividá d’AXA y una estaya d’epinión na que van tener cabida artículos didaáuticos y críticos. La web tamien cunta con una base de datos, Llingualex, sobre l’asturianu y tamien sobre’l dominiu llingüísticu ástur-lleones AXA ye una asociación formada por más de mediu centenar de xuristes interesaos na dafensa del asturianu y de los derechos de los sos asturfalantes. “Aconceyamientu de Xuristes pol Asturianu” tamien anunció la creación d’un Observatoriu de Derechos Llingüísticos y un Serviciu d’Orientación Xurídica pa la Defensa de los Derechos Llingüisticos. 17 d'avientu, 2007 0 FacebookTwitterPinterestEmail
Sociedá Un informe diz que la emancipación tardía de los asturianos dase por causes culturales by asturnet 17 d'avientu, 2007 Un informe asoleyáu pol Conseyu de la Mocedá del Principáu d’Asturies esplica les baxes tases d’emancipación de los xóvenes de les tres grandes ciudaes asturianes (Uvieu, Xixón y Aviles) en base a circunstancies socioculturales. Pa Enrique Alonso, coautor de l'”Informe sobre la mocedá urbana n’Asturies”, que se presentó esti llunes, les causes del problema nun son namái económiques sinón que tamien ta causáu poles construcciones morales y los valores culturales propios de la sociedá de la rexón. Pal sociólogu, los pas nun sofiten la emancipación de los sos fíos hasta qu’estos algamen lo que elli noma “triada seguritaria”, ye dicir, la seguridá afectiva, la económica y la residencial. Amás, l’informe señala que los asturianos de la zona urbana prautiquen un modelu d’emcipación nel que valoren muncho’l vivir cerca de la casa los proxenitores, lo que’l autor llama un modelu de familia estensa flexible. Alonso tampoco quiso escaecer que los condicionantes económiquis xueguen un papel perimportante n’estes altes tases d’emancipación tardía. “El mercáu de trabayu diba tener de cambiar p’algamar mayores niveles d’emancipación”, destacó’l sociólogu. L’informe, prensentáu esti día pol presidente del Conseyu de la Mocedá, Paulino Feito, recueye datos de 111persones, muyeres y homes, distribuyíos n’edaes de 20 a 27 años y de 28 a 34 d’Uvieu, Xixón y Aviles. 17 d'avientu, 2007 0 FacebookTwitterPinterestEmail