Sociedá Los gais asturianos reivindiquen el 17 de mayu by asturnet 16 de mayu, 2005 La organización Xente Gai Astur(XEGA)súmase esti 17 de mayu a otres cuarenta organizaciones de diversos países que-y piden a la ONU la declaración de la data de güei como Día Internacional contra la Homofobia y la Transfobia. Los gais y lesbianes d’estes organizaciones quieren membrar que’l diecisiete de mayu de 1990 la Organización Mundial de la Salú (OMS) suprimía nel so llistáu d’enfermedaes mentales la homosexualidá.El director de l’Axencia Asturiana de Cooperación, Rafael Palacios y el coordinador de XEGA, José Manuel González firmen un manifiestu nel que se pide la instauración d’esti Día Internacional y el fin de les discriminaciones inda esistentes. Pa los firmantes del manifiestu del 17 de Mayu celebrar esti día “supón reforzar la solidaridá con toles lesbianes, gais, bisexuales y transexuales (colectivu GLBT) del mundu enteru y reafirmar el compromisu colos qu’en cualquier parte sufren les consecuencies de la Homofobia y la Transfobia”. El manifiestu remembra que si bien “lesbianes, transexuales, gais y bisexuales esfruten güei de más llibertá que nunca: tán presentes y son visibles na cai, nes revistes, na televisión, nel cine… Parez una realidá completamente aceptada, sobre too si se tienen en cuenta los avances lexislativos más recientes en dellos países, nos que se vienen reconociendo los derechos pa les pareyes del mesmu sexu, incluíu en dalgunos el derechu al matrimoniu. Hai una opinión enforma xeneralizada de que, magar seyan necesarios dalgunos axustes pa desaniciar les últimes discriminaciones, la evolución de les mentalidaes y el simple pasu del tiempu van permitir que se llegue a una situación de normalización plena y a consolidar un procesu qu’entamó hai unes cuantes décades”, tamién ye cierto que tovía n’ochenta estaos la homosexualidá ta persiguida como delitu (Arxelia, Senegal, Camerún, Etiopía, Líbano, Xordania, Armenia, Kuwait, Puerto Rico, Nicaragua, Bosnia…); y qu’en varios países esta condena pue llegar a ser superior a diez años de prisión (Nixeria, Libia, Siria, India, Malaisia, Cuba, Xamaica…); a vegaes la llei contempla la cadena perpetua (Guyana, Uganda), y nuna decena de naciones aplícase la pena de muerte (Arabia Saudita, Afganistán, Irán…). N’otros países, recuerden los firmantes del manifiestu, la situación nun ye meyor pa los homosexuales y lesbianes, asina: “Nun va muncho, dellos presidentes d’estaos africanos afirmaron brutalmente’l so determín pa lluchar personalmente escontra una plaga -la homosexualidá- qu’ellos califiquen d’antiafricana. Incluso n’otros países onde la homosexualidá nun ta tipificada nel códigu penal, multiplíquense les persecuciones. En Brasil, por exemplu, los escuadrones de la muerte y los skin heads semen el terror: ente 1980 y 2000 censáronse oficialmente 1.960 asesinatos homofóbicos”. Por toes estes razones, afirmen los firmantes del manifiestu:” celebramos esti 17 de mayu como’l Día Internacional Contra la Homofobia y la Transfobia. Nesti día recordamos que’l 17 de mayu de 1990 l’Asamblea Xeneral de la Organización Mundial de la Salú (OMS) suprimió definitivamente la homosexualidá de la llista d’enfermedaes mentales, onde nunca debió tar. Esta midida acabó con cuasi un sieglu d’homofobia médica y de discriminación sistemática escontra lesbianes, gais y bisexuales”. .La propuesta d’un Día Mundial Contra la Homofobia y la Transfobia ye una iniciativa que cuenta col sofitu de la Asociación Internacional de Lesbianes y Gais (ILGA) y col de munchos colectivos y entidaes presentes en más de 40 países. N’Asturies, el presente añu 2005 celébrase per primer vez esta xornada, empobinada por Xente Gai Astur (XEGA) y l’Axencia Asturiana de Cooperación al Desarrollu (Conseyería de Xusticia, Seguridá Pública y Relaciones Esteriores).Más información 16 de mayu, 2005 0 FacebookTwitterPinterestEmail
Lliteratura Entama la X Selmana de la Xuventú en Turón by asturnet 15 de mayu, 2005 Güei, a les ocho la tarde, va inagurase oficialmente la X Selmana de la Xuventú qu’organiza dende hai diez años la Plataforma Xuvenil de Turón y que va durar hasta’l 22 de mayu. Un ciclu de cortos fechos nel valle del Caudal, conciertos de música asturiana, presentaciones de llibros y diverses meses reondes, completen un programa que nun va defraudar a naide. Entama asina destamiente una de les les cites imprescindibles cola cultura más viva de les cuenques mineres y entamada por una plataforma moza, dende la independencia y la so inquietú pol futuru de los xóvenes de la zona. El martes 17, nel Ateneu de Turón, y cola intención de sirvir de plataforma pa dar a conocer los trabayos de la realizadores más mozos, va presentase un ciclu col títulu “Ata2 en corto”. Nelli van proyectase “El beso de la tierra”, basada nel guión orixinal de Lucinda Torre y que percuerre los paisaxes de la cuenca minera del Nalón; “A la cola”, de los realizadores llangreanos Adrián Castañeda y David Goberna”; y “Nenyure”, del mierense Jorge Rivero. Ésti últimu cortu, premiáu nel Festival de Cine de Xixón nel galardón a los nuevos realizadores, será asina presentáu oficialmente nel valle nel que se rodó. El miercoles 18 de mayu fairase una mesa reonda de máxima actualidá pa la mocedá de les cuenques, que lleva por títulu: “La situación llaboral de los xóvenes ¿precariedá o ficción?”. Nella participarán tres espertos de reconocíu prestixu, como son el maxistráu del Tribunal Superior de Xusticia, Jose Manuel Buján, el profesor d’Economía de la Universidá d’Uvieu, Florentino Felgueroso, y el director xerente de la Ciudá Tecnolóxica Valnalón, Jose Manuel Perez Díaz, “Pericles”. Esti debate complementase col del día siguiente, día 19, que se titula “Xóvenes de les dos cuenques, ¿un futuru común, un futuru posible?” que va ser moderáu pol director de la Fundación Emilio Barbón, Tomás Fernández Antuña. Al actu va invitase a dos mozos de cada valle, y amás cunta cola participación del alcade de Mieres, Luis María García, col historiador Manuel Jesús López, Lito, col presidentez de la Plataforma Xuvenil, Pablo Prieto, y col periodista Jose Luis Argüelles. Con motivu d’esti alderique va emitise un programa especial sobre’l valle de Turón, “En defensa de la verdad”, de Radio Parpayuela. El vienres, día 20, nel Ateneu de Turón va facese presentación del segundu númberu de la revista “Eventual”, por parte del so director, Mauro Díaz. Al actu tán invitaos los collaboradores d’esti exemplar, Pablo Texón Castañón, Nel Amaro, Miguel Barrero, Xandru Fernández y Ricardo Menendez Salmón. Tres de la mesa, el cantautor turones autor del disco “Vida de alquiler”, Alfredo González, dará un conciertu. Y a les once de la nueche, nel Parque, tendrá llugar ún de los conciertos más esperaos. Nel van actuar la Banda Gaites Villa de Mieres, La Col.lá Propinde, Skanda, Dixebra, Tejedor y Nuberu. La Fundación Perruno-Situacionista “Laszlo Kóvacs” fadrá un recital de poesía en acción na Casa la Xuventú, el vienres a les 7 la tarde, que lleva por títulu “Españoleando”. A les diez y media van ser “Vuelta abajo”, “Versión 2.0”, “Lakra”, “Al pie de la letra” y “Dark la eMe” los qu’animarán la nueche mierense. Nel domingu, últimu día de la Selmana Xuvenil, los Renault 5 Turbo concentraránse en La Veguina, na segunda Concentración Tuning. Y como colofón a toos estos actos, a les siete la tarde fadráse’l segundu Alcuentru de Bandes de Gaites d’Asturies nel Parque. Fútbol sala, campeonatos de Playstation, talleres de xardinería y cuero, ping – pong y balonmano femenín, son dalgunes de les otres actividaes que completen el programa del decimu aniversariu de la Selmana de la Xuventú de Turón. 15 de mayu, 2005 0 FacebookTwitterPinterestEmail
Lliteratura Llangreullibru pieslla la so edición más completa by asturnet 15 de mayu, 2005 Llangreullibru 2005 peslló ayer les sos puertes de la que foi una de les sos ediciones más completes en presentación de novedaes y una de les que recibió una asistencia más curiosa de públicu, al pesar de l’ausencia de dalgunes llibreríes habituales nesta cita. Na tarde d’ayer dos debates, uno alrodiu de lliteratura y cine, y un alcuentru d’escritores de la cuenca’l Nalón, centraron les actividaes. Una llectura de poemes d’Ana Rosa Fernández y l’actuación del cuartetu Torner, remataron la feria del llibru de Llangréu, titulada esti añu al “Eloxu de la llectura nel 400 aniversariu del Quixote”. La última xornada de Llangréullibru acoyó pela mañana les presentaciones de los llibros “La vieja música”(Ed.Norte) de Javier García Cellino y el volume “Historias de cine”(CICEES), una recopilación de relatos del caberu taller lliterariu entamáu pola asociación Cauce. Pela tarde el cine volvió ser protagonista nun debate tituláu “Cine y literatura” nel que participaron l’escritor Francisco José Lauriño y el críticu de cine José María Munárriz, presentaos, por Francisco Villar. La última mesa redonda de Llangreullibru tuvo como exe central la lliteratura n’asturianu nel Vai del Nalón , un alcuentru qu’atropó en La Felguera a los escritores Chechu García, Helena Trejo, Xurde Álvarez, Miguel Allende, Pablo Rodríguez Medina, Xulio Arbesú, Xosé Ramón Martín Ardines y Pablo Antón Marín Estrada. Embaxo de distintes perspectives los autores de la mesa espresaron la so visión de la realidá cultural de la cuenca’l Nalón dende la publicación del primer llibru de Manuel Asur y la formación del grupu Nuberu-Camaretá hasta los díes d’anguaño, nos que’l vai acueye una gran vitalidá lliteraria y cultural cola aparición de nuevos autores, tertulies literaries y revistes como la publicada en El Entregu embaxo’l nome de “Reciella Mallory”. Los puntos de vista de los escritores oscilaron ente les interpretaciones fondamente pesimistes de Pablo Rodríguez Medina y Xosé Ramón Martín Ardines, y los que se manifestaron como “abondo optimistes” como Xurde Álvarez, Marín Estrada o Chechu García, que nun duldó en calificar el momentu que vive la lliteratura nel vai del Nalón como “un de los más intensos y ricos n’actividaes y autores, y esto ye una realidá que nos fai ser bien optimistes respective al futuru”. 15 de mayu, 2005 0 FacebookTwitterPinterestEmail
Lliteratura Seis escritores remembraron los sos llibros inescaecibles by asturnet 14 de mayu, 2005 Embaxo la benéfica sombra de don Quixote, nel que Borges vía una representación del escritor qu’enfermu de llectures sal a buscar la so propia aventura lliteraria, seis escritores españoles ya iberoamericanes evocaron ayer nel Antigu Institutu los llibros que-y dieron un vuelcu a les sos vides. Clásicos de la lliteratura contemporánea como “Conversación na catedral” de Vargas Llosa o “Lolita” de Nabokob”, fueron los títulos escoyíos por Rosa Montero y Elsa Osorio como referencies maxistrales pal so propiu aldu de creadores. La escritora y aventurera Chus Lago optó por falar del llibru que la llevó a la so última espedición a l’Antártida. El retu propuestu ayer por Luis Sepúlveda na mesa redonda de la sesión de tarde del VIII Salón del Llibru Americanu encamentaba a seis escritores presentes nel alcuentru a falar non de los sos propios llibros, sinón de les llectures que-y dieron sentíu al so propiu enfotu lliterariu. La primera autora n’intervenir, l’arxentina Elsa Osorio, apostó por una de les referencies fundamentales de la lliteratura hispanoamericana del sieglu XX: “Conversación na catedral”, de Mario Vargas Llosa, una novela qu’en palabres de la so glosadora “condensaba nel horror y l’atmósfera opresiva d’un momentu de la hestoria de Perú, tola hestoria contemporánea d’América Latina. Al otru llau de la mesa, la española Rosa Montero, escoyó otru clásicu de la lliteratura de la nuestra dómina: “Lolita” de Vladimir Nabokov:”una obra d’inxeniería narrativa que lleva a quien la llee a dexase arrastrar pol poder torrencial d’un relatu nel que per momentos, a lo llargo de bona parte de la novela, llegamos a sentinos cercanos al protagonista Humbert & Humbert, pa llegar al final a decatanos de la so verdadera monstruosidá”. Nuria Varela remembró “Caperucita en Manhattan” de Carmen Martín Gaite como “un d’esos llibros que t’abren una ventana hacia lo que te gustaría llegar a cuntar y que güei nun m’atrevo muncho a volver abrir, porque temo que l’encantu de la primer llectura desllumadora nun acuda fiel al mio deséu”. El deséu por siguir la llamada d’una busca “que dura mientres dura el viaxe y que s’asemeya al protocolu pa una cita con un amante” foi el qu’alcontró la escritora y aventurera Chus Lago en “Atrapaos nel xelu” de Caroline Alexander, un llibru “qu’envez de ser el que diba llevar a una isla desierta, foi él quien me llevó a una isla desierta, a l’Antártida”, ironizó la gallega. El descubrimientu d’esa obra que recrea la espedición del esplorador británicu Ernest Shacleton pa entamar el primer viaxe a pie pel continente de xelu, afaló a l’autora de “Una mujer en la cumbre” y “Fuera de la tierra” a camudar “l’aventura vertical”, que la llevó a coronar l’Everest ensin ayuda d’oxíxenu y a algamar otres cumes como’l míticu Poveda pola “aventura horizontal, porque la tierra ye tan estensa como fonda y en cualquier llugar d’ella puede tar l’oxetivu de la nuestra busca”. Per último, la guatemalteca Victoria Standford, profesora d’antropoloxía de los derechos humanos n’America Llatina en delles universidaes estadounidenses, faló de les diverses llectures d’obres documentales y testimoniales que la ficieron dende los sos díes d’estudiante afondar nel asuntu que tiempu después diba convertise nel oxetu d’investigación del so llabor académicu. El moderador de la mesa Luis Sepúlveda aportó la so contribución particular a la puesta en común de los llibros que sescudieron la vida de les sos compañeres d’alderique, nel so casu, dos sobremanera: “L’amor ye un cazador solitariu” de Carson McCullers, de cuxa traducción al español por parte del escritor chilenu Jaime Silva foi testigu a los empiezos de la so carrera lliteraria y que pasáu’l tiempu “sigue a ser ún d’esos llibros que medren en cada nueva llectura”; l’otru títulu referencial del autor de “El viejo que leía novelas de amor” foron los “Bocetos Californianos” de Hart Brane, “otru llibru sólidu, desllumante, construíu col material duraderu de les obres grandes”. El VIII Salón del Llibru Iberoamericanu de Xixón sigue güei les sos sesiones con una mesa redondan a les 12 del meudía na que la escritora Rosa Regás, Mercedes Álvarez, conceyala de Cultura del Conceyu y el director xeneral de Promoción Cultural y Política Llingüística, Carlos Madera, van falar de “España, Europa, Iberoamérica, la necesidad de tender puentes”, nun coloquiu moderáu por Luis Sepúlveda.A les 13.00 Nuria Varela presenta na Casa del Libro la so última obra: “Feminismo para principiantes”. Pela tarde, a les 17,00 hores el patiu central del Antigu Institutu acueye una llectura de poetes asturianos na que van intervenir Lurdes Álvarez, Miguel Rojo, Javier Almuzara, Bernardette García Menéndez y Pablo Antón Marín Estrada. Una mesa redonda embaxo’l títulu “50 años de Pedro Páramo” cola presencia de Reina Roffé(Arxentina), Antonio Sarabia(México), Tabajara Ruas(Brasil) y José Manuel Fajardo(España), cerrará la xornada del domingu nel salón d’actos del Antigu Institutu. 14 de mayu, 2005 0 FacebookTwitterPinterestEmail
Lliteratura Xixón convirtióse per una nueche na ciudá de les palabres by asturnet 13 de mayu, 2005 Una de les idees alrodiu les que xiren la VIII edición del Salón del Llibru Iberoamericanu de Xixón, la de que’l poder de les palabres ye quien a franquear y destruir toles fronteres, convirtióse na ayer nuna realidá nes cais de Xixón.”La nueche de les palabres” espardió les voces diverses de la poesía d’entrambes orielles del Atlánticu a lo llargo de diversos espacios públicos de la ciudá y n’actividaes simultanies nes que les voces de los propios escritores, la música, el teatru y les intervenciones artístiques tresformaron la villa playa per unes hores nun festival de la palabra viva. El Salón del Llibru Iberoamericanu quiso ayer poner en práctica dos de les idees nes que quier sofitar la so propia identidá como alcuentru lliterariu: amosar la bayura de la diversidá cultural como una seña que xune a los pueblos al traviés del poder tresformador de la palabra y consiguir implicar a la ciudá que l’acueye como sé nel desenvolvimientu de les actividaes d’un eventu que quier ser dalgo más qu’una cita ente autores y editores. Música de la Orquesta del Conservatoriu de Xixón, de cantadores de tonada como Mari Luz Cristobal Caunedo o Horacio Huerta, veteranos del nueu canciu astur como Xulio Ramos, sonó en distintos puntos de la ciudá como una espresión manifiesta del puxu de la poesía pa despertar emociones. N’otros espacios urbanos de Xixón artistes como Maite Centol o Román Torre contribuyeron con una instalación caleyera y un tendíu poéticu a encesar “La nueche de les palabres”. Poemes escritos n’arena pa que la llingua del mar los lleere y los llevare alluende los sos caminos ensin fin o dichos na voz de los sos propios autores nel patiu del Antigu Institutu en doblando la medianueche, foron delles de les munches palabres coles que la nueche de Xixón se fizo blanca y abierta a la seducción íntima de la lliteratura. Güei el Salón sigue’l so programa d’actividaes con una mesa redonda a les 12 del meudía titulada “La lliteratura hispanoamericana más alló de les sos fronteres”, moderada por Ulpiano Lada Ferreras y na que van participar José Carlos Rovira Soler, Mª Carmen Bobes, Giuseppe Bellini y Miguel Ángel Garrido Gallardo. A les 13,00 hores Blanca Rosa Roca y Luis Sepúlveda presenten la novela de Dante LIano “El hombre de Montserrat”. Pela tarde el Salón ufre tres nueves presentaciones de llibros: a les 17,00 “Manual del Caníbal” de Carlos Balmaceda na Llibrería Central y a les 18,00 na Casa del Libro, “Calle Habana, esquina Obispo” de Sonsoles Ónega y “Parte de postguerra” de Luis Arias-Argüelles. A les 19,00 hores nel Antigu Institutu va entamar una mesa redonda titulada “Un libro inolvidable” na que les escritores Rosa Montero, Chus Lago, Victoria Sanford, Nuria Varela y Elsa Osorio, falarán de los llibros que les marcaron y perduren nelles como referencies d’estímulu y emoción creatives. 13 de mayu, 2005 0 FacebookTwitterPinterestEmail
Lliteratura Berta Piñán presenta venticinco años de poesía na escoyeta billingüe “Noches de incendio” by asturnet 12 de mayu, 2005 Berta Piñán presentó ayer nel Foru Abiertu de la Llibrería Cervantes d’Uviéu el so volume de poesía selecta “Noches de incendio”, publicada pola editorial xixonesa Trea n’edición billingüe asturianu-español. Arropiellada pol escritor Xuan Bello y la periodista Pilar Rubiera, la poeta de Cañu, quiso compartir la ufierta d’esta amplia selección retrospectiva de la so obra poética “col trabayu desenvueltu al mio empar por tolos otros compañeros y compañeres de xeneración, si la poesía en llingua asturiana tien güei dalgún interés por parte de los llectores ye un méritu común de tolos que m’acompañaron nesti camín”. El volume “Noches de incendio” recopila dalgo más de mediu centenar de poemes de los cuatro llibros publicaos hasta agora por Berta Piñán: “Al abellu les besties”(1986), “Vida privada”(1991), “Temporada de pesca”(2000) y “Un mes”(2004). La selección y traducción de los testos al español ye de la propia autora, qu’afirmó “sentise un poco estraña a lo primero, pa escoyer una amuesa significa de los cuatro llibros y más segura al poner una cifra fixa en cincuenta y dos poemes” tamién al sentir los sos propios versos nuna llingua na que nun s’escribieran “siguen sonándome dalgo raros, tovía nun acabo de da-yos tol significáu a la hora de lleelos, sicasí agora mesmo siéntome mui cómoda al ver la so versión española, cuido que ya nun lo lleo con nengún prexuiciu”. Aludiendo a la so presentadora, la periodista uvieína Pilar Rubiera -que compartió los llabores de glosa del llibru col escritor Xuan Bello-, la poeta canguesa evocó “aquellos díes tan llonxanos nos que Pilar me fexo la primer entrevista de la mio vida y amás nun mediu de gran tirada, yo pensaba qu’aquello yera lo más, la consagración absoluta, quedábame y quedábamonos a toos inda munchu camín por andar y munches lleciones que deprender”. Piñán quiso reconocer el llabor de difusores de la lliteratura contemporánea asturiana como la periodista Rubiera “que dende un principiu acoyónos y apostó por nós, ensin saber ónde diba llegar el nuestru trabayu lliterariu, el so apoyu foi fundamental nun momentu nel que naide creía nuna posible lliteratura moderna en llingua asturiana”. Xuan Bello, nuna esposición que combinó la emoción y la cercanía cola poeta presentada col rigor nel análisis de la so obra, manifestó que “Berta Piñán ye una autora de validez universal porque escribió siempre dende la periferia que se sabe periferia y por eso nun tien d’inventar nengún referente ayenu a la propia realidá”. L’autor de “Paniceiros” y “La vida perdida” confesó que “en munchos poemes de Berta hai bastante de la mio propia vida, porque esa ye la virtú de cualquier poeta auténticu el de facer que nós tamién tengamos vivío nos sos versos”. Ente’l públicu asistente a la presentación de “Noches de incendio” había escritores compañeros de xeneración de Berta Piñán como Esther Prieto o Taresa Lorences, tamién autores asturianos en llingua española como Javier Almuzara, José Antonio Mases o Francisco Álvarez Velasco. Ente los asistentes a la presentación na llibrería Cervantes tamién taben, ente otros, el responsable de la Oficina de Política Llingüística del Principáu Ramón d’Andrés, l’ilustrador Pablo Amargo o el realizador José Braña, autor del cortometraxe “Una casa” sobro’l poema homónimu de Piñán na serie de televisión “Cinco poemes”. 12 de mayu, 2005 0 FacebookTwitterPinterestEmail
Lliteratura El Conseyu de Comunidaes Asturianes entamal Día de Les Lletres en Buenos Aires by asturnet 11 de mayu, 2005 El Conseyu de Comunidaes Asturianes que preside Manuel Fernández de la Cera, tien entamada una programación pa celebrar los díes 16 y 18 de mayu, el Día de les Lletres Asturianes 2005 nel Centru Asturianu de Buenos Aires na que va ser la primer celebración d’estes calterístiques nel continente americanu. Estos actos van tener llugar na sé del Centru Asturianu de Buenos Aires, na cai Solis, 475. Dientro de los actos previstos destaca pal día 16, a les ocho la tarde, una conferencia sobre poesía asturiana y emigración a cargu de Pablo Manzano Rodríguez, miembru de lAcademia de la Llingua Asturiana. Tres de la charla va facese un recital poéticu que finará cola actuación del maestru gaiteru Flavio Rodríguez Benito, col Conxuntu Pelayo. El miércoles 18, lantropólogu Roberto González Quevedo va disertar sobre la cultura asturiana, zarrando tamién lactu con un conciertu per parte de Flavio R. Benito. Ta previsto tamién que nos actos intervengan el presidente del Conseyu de Comunidaes Asturianes, Manuel Fernández de la Cera, y el Presidente del Centru Asturianu de Buenos Aires, Manuel Cardín. 11 de mayu, 2005 0 FacebookTwitterPinterestEmail
Lliteratura La sesta edición de Llangréullibru abre les sos puertes emponderando al Quixote by asturnet 11 de mayu, 2005 La VI edición de “Llangreullibru” entama güei col lema: “Elogio de la lectura en el cuarto centenario de El Quijote”. La feria que durará hasta’l 15 de mayu y que se fai tradicionalmente nel Parque Dolores F. Duro de La Felguera sirvirá pa presentar, ente otres novedaes, el poemariu “Noches de incendio” de Berta Piñán. Presentaciones, recitales, alderiques, representaciones teatrales y conciertos completen un programa que cada añu confirma esta feria como una cita imprescindible na vida cultural de les cuenques. Col lema “Elogio de la lectura en el cuarto centenario de El Quijote” ábrese un programa cargáu d’actos y que va dende güei hasta’l día 15 d’esti mes. Cola obra cervantina como argumentu los actores del grupu de teatru “Kumen” fadrán dos actuaciones: a les diez y a les doce, mesmo güei que mañana. Na programación prevista pa esta mañana destaca’l debate sobre “La aventura de la lectura con El Quijote”, na qu’intervendrá Javier García Cellino, Benigno Delmiro Coto, Araceli Fernández Rojo y los profesores de los diferentes centros de secundaria participantes y pa los que ta pensada esta actividá. Esti actu realizaráse na biblioteca de Riañu, de la que ye bibliotecaria Fernández Rojo, y que fue Premiu Fomentu de la llectura. A les ocho y media la tarde Aaron Zapico de Forma Antiqua dará un conciertu de clave. La tarde del vienres 13 destaca poles presentaciones de llibros mui esperaos polos llectores. A les seis y media la tarde presentarase’l llibru “En tiempos de Antoñita la Fantática” (editorial Foca) de Paloma Uría, que va ser presentada por Ana Arbesú del grupu Les Filanderes. A les siete de la tarde Yolanda Magdalena Montes, responsable del Área de Política Llingüística del Ayuntamiento de Llangreu, presentará l’Antoloxía “Noches de incendio” (Editorial Trea) de Berta Piñán, una de les autores más seguíes y reconocíes de la poesía asturiana d’anguañu. L’actu cuntará cola presencia de l’autora. Actu siguíu, a les siete y media, Rosa Lorenzo del grupu Les Filanderes presentará’l llibru “Dinero, Amor e Individualismo” (editorial KRK) de les autores Capitolina Díaz y Sandra Dema. Mentes qu’a les ocho la tarde, Ludi González, fadrá lo propio cola novela “La Isla” (editorial Madú) de María Esther Álvarez. La mañana del sábado 14 entamará cola presentación del llibru “Visita a los Picos de Europa” (editorial Everest) de Bernardo Canta. Esti actu tará dirixíu pol Presidente del Grupu de Montaña ENSIDESA de La Felguera, Felix García Peláez. A la una tendrá llugar un debate sobre los grandes autores de la novela negra anguañu. Intervendrán na mesa Justo Vasco que va ser presentáu pol escritor Alejandro Martínez Gallo. El programa de mañana completase con dos nueves presentaciones: a la una y media Antón Saavedra acompañará a Pedro Fandos y Marino Iglesias na presentación de “Dejaron hu(e)lla”; y a les dos y diez presentarase la “Nueva guía de turismo de la Mancomunidad”. Pela tarde será Alberto Vega l’encargáu de presentar “Poesía para los que leen prosa” de Miguel Munárriz. Tres d’ella, Alberto Piquero presentará “El amor inútil” de Javier Lasheras, presidente de l’Asociación d’Escritores d’Asturies. A les ocho, l’escritor Ricardo Menendez Salmón falará de “Contraterceros”, poemariu de Guillermo del Pozo que fue finalista nel Ateneu de Sevilla. L’últimu día de la Feria la Banda de Música de Llangreu ofrecerá un conciertu tres del que Javier García Cellino y Juan Ignacio González, presentaos por Fernando Fernández Tamargo, presentarán el so llibru “La vieja Música”, editáu por Grupu Norte. Benigno Delmiro Coto y Miguel Areces, n’homenaxe a Camporro, miembru de la tertulia Cauce recientemente fallecíu, presentarán el llibru de relatos cortos “Historias de cine”, frutu del últimu cursu de dicha asociación. L’actu tará presidíu por Francisco Villar. A les siete la tarde van ser Jose María Munárriz y Francisco J. Lauriño, presentaos por Joaquín González Torre, los que falarán sobre cine y lliteratura. Y a les ocho menos cuartu, Yolanda Magdalena Montes moderará un alderique sobre la lliteratura n ‘asturianu nel valle del Nalón nel qu’intervendrán los escritores Pablo Antón Marín Estrada, Helena Trejo Fombella, Xurde Álvarez, Pablo Rodríguez Medina, Chechu García, Xulio Arbesú, Xose Ramón Martín Ardines y Severino Antuña.Como cierre de los actos, la poeta sotrondina Ana Rosa Fernández, presentada por Javier García Cellino y Noelí Puente, dará un recital con poemes del so llibru ineditu “Los nombres de la lluvia”. La clausura correrá a cargu del cuartetu Torner. 11 de mayu, 2005 0 FacebookTwitterPinterestEmail
Lliteratura La diversidá cultural énte la globalización centra’l VIII Salón del Llibru Iberoamericanu by asturnet 11 de mayu, 2005 El VIII Salón del Llibru Iberoamericanu inauguróse esta mañana en Xixón nun actu nel que sonaron les voces en defensa de la diversidá cultural y del poder de la palabra énte les pretensiones apobrecedores de la globalización. Per primer vez nesti alcuentru lliterariu un de los discursos institucionales, el que pronunció’l director de l’Axencia Asturiana de Cooperación, Rafael Palacios foi íntegramente n’asturianu, una llingua que xunta otres peninsulares, tamién ta presente ente les propuestes editoriales del Salón. Luis Sepúlveda, director d’esti alcuentru ente autores y editores d’entrambos llaos del Atlánticu defendió nel actu d’apertura el poder de la palabra pa lluchar contra la inxusticia y la globalización del mundu actual: “tenemos de globalizar la esperanza, la xusticia, el respetu a los derechos humanos y esi ye un papel qu’alcuando tien la lliteratura”. Pa Sepúlveda el Salón xixonés “ye un llugar onde vienen y van idees, idees qu’arriquecen la cultura iberoamericana y la europea” y enfotóse en que la diversidá cultural “espresada equí na xuntanza de la nuestra llingua española xunta la llingua hermana portuguesa y toles otres llingües, pequeñes o grandes, locales y universales, equí amosaes, llogren vencer un mundu nel que namás una forma de pensamientu quier somorguiar a les idees de llibertá”. Nel mesmu sen manifestóse’l director de l’Axencia Asturiana de Cooperación, Rafael Palacios, nun discursu lleíu n’asturianu nel qu’afirmó: “Somos munchos los que cuidamos qu’otru mundu ye posible, onde toos podamos falar na nuestra llingua y onde toles llingües puedan falar, un mundu nel que nun s’impongan les idees, nin se sometan les cultures y los pueblos al peligru globalizador”. Palacios terminó les sos palabres recurriendo a una cita de Federico García Lorca “voi dicila en castellano, una llingua na que tamién tengo la suerte de poder falar”, afirmó y na que se caltenía’l valir de los llibros como espresión de lo meyor del ser humanu: “cuando lleo un llibru afayo tol dolor y tol enfotu del ser humanu que lu escribió”. Na inauguración intervinieron tamién el director xeneral de Promoción Cultural y Política Llingüística, Carlos Madera, que remembró’l compromisu que’l gobiernu del Principáu tien col Salón del Llibru Iberoamericanu y con tolos eventos que “como esti arriquecen la cultura d’Asturies y del mundu”. Cerró les intervenciones l’alcaldesa de Xixón, Paz Fernández Felgueroso, que resaltó’l calter de Xixón como “ciudá vivamente comprometía cola cultura, una ciudá abierta, cosmopolita y mestiza” y quiso destacar la celebración de la Fiesta de les Palabres, una de les novedaes d’esta edición que va convertir mañana viernes 13 a Xixón nun festival lliterariu y multidisciplinar con más d’una cincuentena d’actividaes repartíes per otros tantos puntos de la ciudá. Cincuenta y dos escritores peninsulares y del continente americanu, xunta una veintena d’editores, participen nesti VIII Salón del Llibru Iberoamericanu dedicáu a la diversidá cultural. Una amuesa d’esa diversidá puede atopase nos stands editoriales distribuíos pol patiu del Antigu Institutu de Xixón y nos que se presenten llibros n’español, portugués, italianu, asturianu, aragonés y otres llingües d’una y otra oriella del Atlánticu. 11 de mayu, 2005 0 FacebookTwitterPinterestEmail
Sociedá Grupos reintegracionistes clamien pol gallego “so administración asturiana y castellano-lleonesa” by asturnet 10 de mayu, 2005 Catorce asociaciones culturales de distintos llugares de Galicia y partidaries del reintegracionismu tienen convocada una manifestación pal prósimu domingu 15 de mayu en Santiago embaxo’l lema: “Na Galiza vamos viver em galego”. La convocatoria entamada al través de la Cordenadora de Centros Sociaes defende’l monollingüismu del gallegu y programes de promoción d’esti idioma “nes comarques so administración asturiana o castellano-leonesa”. La manifestación de los colectivos reintegracionistes celébrase por segundu añu consecutivu y nesta ocasión la convocatoria pide un plan de normalización llingüística “real” pal gallegu. Los grupos atropaos alrodiu de la Cordenadora de Centros Sociaes tienen elaborao un decálogu reivindicativu pa la so manifestación nel que se pide l’establecimientu de la enseñanza monollingüe en gallegu, la creación d’escueles p’adultos nesti idioma, la galleguización íntegra de les instituciones y administraciones públiques y lexislación pa la galleguización integral de les entidaes privaes. La Coordenadora tamién pide’l puxu del texíu asociativu en llingua gallega, la reformulación de la RTVGA “como verdaderu mediu galleguizador” y la desixencia “efectiva” del idioma pal desempeñu de cargos públicos. Los puntos reivindicativos más polémicos de los reintegracionistes son los que se refieren a la reconocencia de la unidá “llinguística y cultural” gallego-portuguesa, el fomentu de les relaciones colos países de la Lusofonía, amás del ya citáu puntu nel que se clamia pola defensa y promoción de la llingua gallega “nes comarques so administración asturiana o castellano-leonesa”. La convocatoria de la manifestación “En Galiza vamos viver en galego” fírmenla los colectivos AGAL (Galicia), Alto Minho(Lugo),Artabria(Trasancos),Atreu (A Coruña),A Esmorga(Ourense),A Fouce de Ouro (Bertamiráns), Fala Ceive (El Bierzo), Galeguiza (Condado), A Gentalha do Pichel, C.S. Henriqueta Outeiro (Santiago), Revira (Pontevedra), Revolta (Vigo), SCD Condado y A.C. Treme a Terra(Pontedeume). Más información 10 de mayu, 2005 0 FacebookTwitterPinterestEmail