Sociedá La reforma del Estatutu asturianu va entamase el prósimu añu y va ser “prudente y segura” según Areces by asturnet 8 de payares, 2005 La intervención de Vicente Álvarez Areces nel debate sobre les reformes constitucionales y estatutaries del gobiernu de José Luis Rodríguez Zapatero desenvolvióse nos términos que ya adelantrara a los medios asturianos el propiu presidente del Principáu. Areces defendió p’Asturies una reforma estatutaria fecha a pasu “prudente y seguru” y asitióla pal prósimu cursu políticu. L’añu 2006, remataos los trabayos de los espertos del Principáu, va ser el del empiezu de la ponencia estatutaria, según anunció ayer nel Senáu el xefe del executivu autonómicu. El presidente de la comunidá definió a Asturies como “un de los territorios más vieyos de la península, coles mesmes llendes xeográfiques polo menos dende’l sieglu XI” y al empar quiso recalcar que “los asturianos siempre nos sentimos a gustu n’España, ensin por ello renunciar a la nuestra propia identidá”. Areces amosó’l so apoyu a les reformes entamaes pol presidente Zapatero y sumóse a les crítiques de los otros mandatarios autonómicos socialistes contra’l PP. Dende esti partíu n’Asturies, pel so llau Ovidio Sánchez refugó’l discursu del presidente asturianu al que calificó de “auténticu disparate”. 8 de payares, 2005 0 FacebookTwitterPinterestEmail
Sociedá A Caridá acueye un debate sobre la recién polémica del gallego-asturiano by asturnet 8 de payares, 2005 L’alcaldesa de El Franco Cecilia Pérez y l’alcalde de Coaña Salvador Méndez participen esti miércoles 9 nun debate sobre la recién polémica del gallego-asturiano qu’organiza el Club Prensa Asturiana de La Nueva España. Xunta ellos van tar nel alderique el filólogu José Antonio Vior y Santiago Somoza, maestru de Primaria. El periódicu La Nueva España nun quier desaprovechar la oportunidá d’afondar na repercusión mediática que ta teniendo nes últimes selmanes la realidá llingüística de la Tierra del Navia-Eo y entama en El Franco -ún de los conceyos que se pronunciaron oficialmente sobre la polémica- un debate que quier poner enriba la mesa estremaes opiniones sobre un asuntu eleváu de cuantayá a rangu de polémica. La cita ye na tarde del miércoles 9 nel Salón de Plenos del Ayuntamientu de El Franco en A Caridá. 8 de payares, 2005 0 FacebookTwitterPinterestEmail
Comunicación Jean Daniel, Régis Debray y Mario Soares participen nun debate organizáu pola Fundación Príncipe d’Asturies by asturnet 7 de payares, 2005 El fundador del diariu Le Nouvel Observateur Jean Daniel va participar xunto al filósofu francés Règis Debray y l’ex presidente portugués Mario Soares nun debate organizáu pola FPA en conmemoranza del so XXV aniversariu. L’actu va celebrase esti xueves 10 nel Teatru Palacio Valdés d’Avilés y nel van participar tamién Luc Montagnier y Jerónimo López. Los participantes nel debate d’Avilés tienen en común amás de la so proyección internacional l’haber sío premiaos pola Fundación Príncipe d’Asturies con dalgún de los sos galardones. L’ex ministru d’Educación Gustavo Suárez Pertierra va ser l’encargáu de moderar l’alderique, el primeru d’un ciclu organizáu pola fundación asturiana pa xuntar de nuevu nel Principáu a dellos de los premiaos polos galardones que concede añalmente la institución. 7 de payares, 2005 0 FacebookTwitterPinterestEmail
Lliteratura Preséntase nel Atenéu Obreru de Xixón un llibru sobre les muyeres de la guerra civil by asturnet 7 de payares, 2005 La hestoriadora alicantina y colaboradora del diariu EL Mundo Llum Quiñonero presenta esti martes nel Atenéu Obreru de Xixón el llibru “Nosotras que perdimos la paz”, un volume nel que se reconstrúi la esperiencia personal de cuatro muyeres marcaes pola derrota del bandu republicanu na guerra civil. La presentación va ser a les 20.00 hores nos locales del Atenéu Obreru y va completase cola proyección del DVD “Muyeres del 36”, un documental del que ye tamién autora Llum Quiñonero. 7 de payares, 2005 0 FacebookTwitterPinterestEmail
Sociedá Areces intervién nel Senáu pa definir la postura del so gobiernu ente les reformes estatutaries by asturnet 7 de payares, 2005 El presidente del gobiernu asturianu Vicente Álvarez Areces intervién esti llunes 7 nel Senáu dientro’l debate parlamentariu sobre les reformes d’estatutos puestes en marcha. El mandatariu del Principáu va defender un procesu “basáu na solidaridá interterritorial y non na defensa de les identidaes” y según adelantró a diversos medios va sofitar los sos argumentos en que los asturianos “nun nos sentimos obligaos a entamar una carrera pa definir la nuestra identidá” y en que ” nós sentímonos cómodos n’España”. Areces quier estremar el so discursu del que desenvuelven los dirixentes d’otres comunidaes nel debate del Senáu y énte estes postures va esponer que n’Asturies “entamamos esti procesu con tranquilidá y responsabilidá, como nos demanda la sociedá, convencíos de que’l perfeccionamientu del nuestru autogobiernu tien de redundar directamente en beneficios pa los asturianos y siendo conscientes de que la reforma tien ser afrontada con un importante nivel de consensu». 7 de payares, 2005 0 FacebookTwitterPinterestEmail
Sociedá Escomienza en Llangréu la V Selmana Cultural n’Asturianu by asturnet 7 de payares, 2005 La V Selmana Cultural n’Asturianu de Llangréu escomienza esti llunes en Sama con una conferencia de Pablo Xuan Manzano sobre’l venticincu aniversariu de la creación de l’Academia de la Llingua. La lliteratura nel vai del Nalón, el teatru, les actividaes pa los más mozos y un conciertu de Llan de Cubel completen el programa d’estes xornaes organizaes pola Oficina de Promoción Llingüística del conceyu embaxo’l títulu “A la gueta los oríxenes”. La Casa Cultura de Sama acueye esti llunes a les 20.00 hores la conferencia del académicu Pablo Xuan Manzano titulada “25 años de l’Academia de la Llingua Asturiana. Mañana martes 8, a les 20.30 na Casa Cultura de La Felguera, l’actor y monologuista Carlos Alba “Cellero” va representar dellos monólogos modernos. Les actividaes d’esta Selmana Cultural siguen el miércoles 9 a les 20.00 hores na Casa la Cultura de Sama col III Alcuentru d’Escritores del Valle del Nalón, que nesta ocasión van falar de la torna y van facelo al través de les voces d’Helena Trejo Fombella, Severino Antuña, Anselmo Orviz y Pablo Rodríguez Medina. El xueves 10 nel Centru Cultural de Riañu va haber una llectura de cuentos a cargu de los escritores Xosé R. Martín Ardines, Chechu García y Ana Vanessa Gutiérrez. Los escolinos van ser los protagonistes de l’actividá del viernes 11 nel Teatru Llangréu a les 10.30 de la mañana con una representación de la obra “Un besu por un quesu” a cargu de la compañía Electra y pela tarde a les 19.00 hores van proyectase dellos cortometraxes n’asturianu nel Centru Cultural de Riañu. La Selmana Cultural remata’l sábadu 12 con un conciertu de Llan de Cubel nel Teatru Llangréu a les 20.00 hores. Como actividá complementaria a les programaes pola Oficina de Promoción Llingüística de Llangréu va celebrase la esposición “Alcordanza: 50 años de Reija” nel Centru de Cultura de Riañu, una amuesa que repasa la hestoria del grupu de baile de Reija ente’l 7 y el 21 de payares. 7 de payares, 2005 0 FacebookTwitterPinterestEmail
Sociedá El Cao califica d’esitu la manifestación del sábadu n’Uviéu by asturnet 6 de payares, 2005 El Conceyu Abiertu pola Oficialidá algamó una respuesta masiva de la sociedá a la manifestación convocada pal sábadu 5 al meudía n’Uviéu embaxo’l lema: “La oficialidá ye la solución”. Sigún los organizadores, la segunda gran movilización que fexo la plataforma esti añu superó a la primera que se celebró’l 5 de marzu y algamó una participación penrriba les 10.000 persones. Personalidaes de la vida pública asturiana como’l ciclista Chechu Rubiera, l’actor Maxi Rodríguez, l’escritor Xuan Bello o les decanes de Filoloxía y Ciencies de la Educación Ana Cano y Aquilina Fueyo van encabezar la marcha sofitada por una amplia nómina d’organizaciones polítiques y sociales. Los organizadores de la manifestación afonda nos caberos díes nos llabores de difusión de la convocatoria y amosábense convencíos de que diba ser una de les manifestaciones más multitudinaries polos derechos llingüísticos de los asturianos. Los apoyos que recibiere la marcha d’esti sábadu n’Uviéu fueron aumentando dende’l primer anunciu de la celebración de la protesta cívica y llegaron dende tolos llaos. Ún de los últimos aportaba’l caberu fin de selmana dende Ribadeo onde la polémica Escuela Fermín Penzol sofitaba nun comunicáu la manifestación pola oficialidá del asturianu. La marcha escomenzó a la una del meudía dende’l sitiu avezáu de les manifestaciones pola oficialidá, la estación central de trenes d’Uviéu, y finó na Plaza La Catedral, onde Lisardo Lombardía, de la Fundación Belenos, y l’actor de Teatro Margen José Antonio Lobato dieron llectura al manifiestu de la organización. Después de la manifestación desendolcóse un conciertu cola participación de Skama la Rede, Mari Luz Cristobal Caunedo y dellos otros músicos. Tamién a les 14.30 na Casa Posafuelles de la Xunta pola Defensa de la Llingua entamóse una espicha popular. 6 de payares, 2005 0 FacebookTwitterPinterestEmail
Comunicación El cursu d’asturianu pa periodistes de la Conseyería inda nun cubrió toles sos places by asturnet 4 de payares, 2005 El cursu de llingua asturiana pa profesionales de los medios d’información qu’organiza la Conseyería de Cultura inda nun cubrió les trenta y cinco places que s’ufiertaben pa participar nél. El modulu formativu va empobináu a la capacitación llingüística de periodistes y la so matriculación ye gratuíta. La Oficina de Política Llingüística del Principáu y el Seminariu de Filoloxía Asturiana de la Universidá d’Uviéu son los organizadores d’esti cursu coordináu pol profesor Xulio Viejo y empobináu a profesionales de la información, ya seyan llicenciaos en Periodismu o que desenvuelvan el so llabor en medios de comunicación. El prósimu 10 de payares ye la fecha final pa matriculase nesti cursu que se va impartir ente’l 11 de payares y el 17 d’avientu, con una duración de 30 hores distribuíes en xornaes de viernes y sábadu. 4 de payares, 2005 0 FacebookTwitterPinterestEmail
Sociedá El CAO espera una respuesta masiva a la manifestación d’Uviéu by asturnet 4 de payares, 2005 El Conceyu Abiertu pola Oficialidá espera una respuesta masiva de la sociedá a la manifestación convocada pa esti sábadu 5 al meudía n’Uviéu embaxo’l lema: “La oficialidá ye la solución”. Personalidaes de la vida pública asturiana como’l ciclista Chechu Rubiera, l’actor Maxi Rodríguez, l’escritor Xuan Bello o les decanes de Filoloxía y Ciencies de la Educación Ana Cano y Aquilina Fueyo van encabezar la marcha sofitada por una amplia nómina d’organizaciones polítiques y sociales. Los organizadores de la manifestación afondaben estos díes nos llabores de difusión de la convocatoria y amosábense convencíos de que va ser una de les manifestaciones más multitudinaries polos derechos llingüísticos de los asturianos. Los apoyos que bien recibiendo la marcha d’esti sábadu n’Uviéu fueron aumentando dende’l primer anunciu de la celebración de la protesta cívica y lleguen dende tolos llaos, ún de los últimos aportaba esti últimu fin de selmana dende Ribadeo onde la polémica Escuela Fermín Penzol sofitaba nun comunicáu la manifestación pola oficialidá del asturianu. La marcha escomienza a la una del meudía dende’l sitiu avezáu de les manifestaciones pola oficialidá: la estación central de trenes d’Uviéu. Después de la manifestación va celebrase un conciertu cola participación de Skama la Rede, Mari Luz Cristobal Caunedo y otros músicos. Tamién a les 14.30 na Casa Posafuelles de la Xunta pola Defensa de la Llingua va entamase una espicha popular. 4 de payares, 2005 0 FacebookTwitterPinterestEmail
Sociedá El Bloque lleva’l debate sobre l’Estatut al terrenu de la reforma asturiana by asturnet 4 de payares, 2005 El Bloque por Asturies desmarcóse esti xueves 3 nuna rueda prensa de la posición defendida polos sos coaligaos d’Izquierda Xunida na Xunta Xeneral nel alderique sobre’l nuevu estatutu catalán. Pa la formación nacionalista los partíos presentes nel parlamentu asturianu esmolecen por Cataluña y son “incapaces de diseñar un proyectu propiu de país p’Asturies”. El Bloque afirma que la polémica estatal sobre l’Estatut respuende a “la identificación con un nacionalismu español históricamente incapaz de respetar la esistencia d’otres identidaes nacionales dientro l’Estáu español, asina como la defensa de privilexos ya intereses lligaos a la continuidá del modelu d’Estáu actual” y que la iniciativa del parlamentu de Catalunya ye una oportunidá p’afondar nel reconocimientu de la realidá plurinacional del estáu. Al empar dende BA señálense delles de les discrepancies qu’esta formación caltién col proyectu catalán, ente elles la definición que nel se fai de l’autodermín, l’establecimientu de cupos d’inmigrantes, les cesiones a la Iglesia y al sector priváu na xestión de los servicios sociales y la propuesta de sistema de financiación autonómica. Pal Bloque el discutiniu sobre’l proyectu estatutariu catalán había traducise n’Asturies nun comprosimu de toles fuerces polítiques p’algamar un estatutu nuevu “frutu del más ampliu diálogu y consensu ente les diferentes fuerces polítiques, con un debate participativu y abiertu a la ciudadanía, na busca d’un marcu de convivencia nel que coyamos toes colos nuestros propios proyectos”. El Bloque caltién que’l nuevu estatutu asturianu ha basase nos principios de la reconocencia de los mesmos derechos políticos, económicos, sociales, culturales y llingüísticos que se-yos reconocen a les demás comunidaes del Estáu español, “sin más limitaciones que los que marque la constitución vixente anguañu y los nuestros intereses como Pueblu”. Tamién había garantizar los siguientes principios pal Bloque: la suficiencia financiera d’Asturies, la solidaridá de la UE, la sanidá y la educación públiques, la Caxa Única de la Seguridá Social, el derechu a vivir y trabayar n’Asturies y el reconocimientu de tolos derechos humanos a tolos ciudadanos y ciudadanes sin esclusión, ente ellos, la Oficialidá de la Llingua Asturiana y del Gallego-Asturiano nel so territoriu.”. 4 de payares, 2005 0 FacebookTwitterPinterestEmail