Lliteratura De Lliño a Taüll, pasando pel teatru del sieglu XXI by asturnet 1 de mayu, 2006 El pasáu vienres empezaben de manera oficiosa los actos de cellebración de la XXVI Selmana de les Lletres Asturianes cola presentación del llibru ‘En tables. Un teatru pal sieglu XXI’,per parte del so autor Dolfo Camilo Díaz; y col espectáculu poetico-teatral ‘Veus paral.leles-Voces paraleles: de Lliño a Taüll’ qu’axuntó na Capiella de los Dolores de Grao a cuatro poetes asturianos y cuatro poetes catalanes. La Biblioteca Ramón Perez d’Ayala d’Uvieu valió d’escenariu de presentación pa la obra del escritor ayeranu Dolfo Camilo, editada por KRK Ediciones con motivu d’esta Selmana de les Lletres dedicada al teatru. Actu nel que tuvo acompañáu pol director de la Oficina de Política Llingüística, Ramón d’Andres, y pol director xeneral de Política Llingüística, Carlos Madera, que desplicó que la Conseyería de Cultura quier abrir con esta selmana ‘una nueva etapa pal teatru asturianu, dándo-y la mayor difusión posible’. Dolfo Camilo comentó na rueda de prensa que, anque ‘pa la xente de la cai el teatru asturianu ye teatru n’asturianu, la llingua nun ye fundamental anque tengo un papel destacáu’. Tocante a la política de promoción del teatru, Camilo Díaz destacó la esistencia d’un sindicatu d’actor, un circuitu profesional, cierta presencia mediática pero tachó’l condicionamientu del mercáu per parte de la Conseyería de Cultura y los conceyos. ‘Les instituciones son el principal empresariu del teatru asturianu’, sentenció l’escritor y xefe del Serviciu de Promoción Cultural d’Aviles. El llibru ‘En tables. Un teatru pal sieglu XXI’ quier ser, según el so autor, una política de provocación al llector porque ‘nun queremos que sía un elementu pasivu’. Per otra parte, la Capiella de los Dolores de Grao acoyó l’espectáculu poetico-teatral ‘Veus paral.leles-Voces paraleles: de Lliño a Taüll’, reuniendo a cuatro poetes asturianos y cuatro catalanes baxo la dirección del dramaturgu y escritor catalán Albert Mestres, xunta la poeta portuguesa Sofía Fonseca. Nun escenariu nel que primaben los xuegos de lluces y sombres, los poetes catalanes Ponç Pons, Núria Martínez-Vernis, Àngels Gregori y Jordi Cornudella, y los asturianos, Berta Piñán, Xuan Santori (que sustituyía a Xuan Bello, por tar en L’Habana), Vanessa Gutierrez y Xandru Fernández, foron lleendo los sos poemes que, al tiempu, yeren traducíos al asturianu o dramatizaos pola actriz asturiana Eva Vallines, encargada de facer presentación y de conducir un actu que, coordináu pol famosu escenógrafu de danza Jose Menchero, entemecía lo llírico colo teatral. Esta primer representación de Voces Paraleles, pa la que la Institució de les Lletres Catalanes editó un llibru nel qu’axunta los poemes y les traducciones de los ocho autores y que foi repartíu ente’l públicu de Grao, val como ensayu pa les cuatro actuaciones que van tener llugar nel mes de payares en diferentes teatros de Barcelona, Tarragona y Vilafranca del Penedes. 1 de mayu, 2006 0 FacebookTwitterPinterestEmail
Lliteratura Xulio Viejo, Paquita S. Coalla y Pablo San Martín estrenen la colección ‘Trabe Atlántica’ by asturnet 1 de mayu, 2006 Mañana miercoles día 3 de mayu, a les siete la tarde, el Club de Prensa Asturiana de La Nueva España d’Uvieu va acoyer la presentación de la nueva colección ‘Trabe Atlántica’, que presenta a la vez los sos tres primeros títulos: ‘Aquí me tocó escribir (antología de escritores y escritoras latinos en Nueva York’ de Paquita Suárez Coalla; ‘La formación histórica de la lengua asturiana’ de Xulio Viejo; y ‘La nación (im)posible (Reflexiones sobre la ideología nacionalista asturiana)’ de Pablo San Martín Antuña. ‘Aquí me tocó escribir (antología de escritores y escritoras latinos en Nueva York)’ de Paquita Suárez Coalla, axunta catorce escritores que, anque son estremaos nes temátiques y estilos de les sos obres, comparten una posición fronteriza que según l’autora ‘dio-yos la llibertá d’escribir lo que seguramente nunca escribiríen nos sos países d’orixe’. L’ampliu y rigurosu estudiu sobre la formación histórica de la llingua asturiana de Xulio Viejo aparez agora n’español, allegando d’esta manera a tol públicu los mecanismos llingüísticos que la tresformaron a lo llargo de los sieglos, a la vez que la dinámica social, económica, política y cultural que sufrió la so comunidá de falantes. El tercer títulu de la colección correspuende a Pablo San Martín Antuña. ‘La nación (im)posible (Reflexiones sobre la ideología nacionalista asturiana)’ analiza los principales fechos históricos y l’actuación de los protagonistes del nacionalistu asturianu. 1 de mayu, 2006 0 FacebookTwitterPinterestEmail
Música IX Alcuentru de bandurrieros en Caliao by asturnet 1 de mayu, 2006 L’Asociación de Folclor Tradicional La Quintana va cellebrar el prósimu sábadu día 6 de mayu del 2006, el IX Alcuentru de bandurrieros, en Caliao (Casu) con un homenaxe a David Caballín, nel que van participar Daniel García de la Cuesta, Rafa San Emeterio ‘Mimi’, músicu cántabru, Miguel Ángel García y Jose Francisco Fernández, de Lleón. Los alcuentros, que se van cellebrar nel salón de les escueles, van empezar a les 6 de la tarde, y van presentanse con un audiovisual a cargu del so autor, Daniel García de la Cuesta, el cd Cantares de bandurria, trabayu onde s’espeyen musicalmente les investigaciones inedites feches alrodiu d’esti instrumentu, el so usu, espardimientu, hestoria, etimoloxía, venceyamientu con otros instrumentos, etc. Darreu habrá un homenaxe al bandurrieru David Caballín, que morrió en 1983, pa depues dar pasu a un conciertu onde intervendrán los músicos, Rafa San Emeterio “Mimi”, de Cantabria, Miguel Ángel García y Jose Francisco Fernández, de LLeón, y otros invitaos. 1 de mayu, 2006 0 FacebookTwitterPinterestEmail
Música Ambás, Pangua y Dolfu R. Fernández recuperen los sones d’Allande by asturnet 1 de mayu, 2006 Los miembros del grupu de folk DRD, Diego Pangua y Dolfu R. Fernández, y el vocalista de Tuenda, Xose Antón Fernández ‘Ambás’ empicen güei martes, día 2 de mayu, a grabar un discu nos estudios Tutu de Los Campos (Corvera) nel que se recueyen les melodíes tradicionales del conceyu d’Allande. El monográficu va cuntar con más d’una doce de pieces inedites del archivu del propiu Ambás, dando asina a conocer el ricu folclore d’esti conceyu del occidente asturianu. Per otra parte, el grupu DRD, formáu por Pangua, R. Fernández y Ruben Bada, tien per delantre una selmana llena de conciertos. Asina’l xueves día 4 a les diez de la nueche van actuar nel Cafe Trisquel de Xixón, mentes que’l sábadu día 6 van facer lo propio n’El Sabil, en Villanueva de Santu Adrianu, onde van compartir escenariu col tríu Tuenda y el duu de Lisardo Prieto y Igor Medio. El vienres día 5 de mayu DRD va tocar nel Teatru Filarmónica d’Uvieu, siendo los encargaos de zarrar esti añu l’actu oficial de l’Academia de la Llingua Asturiana con motivu del XXVII Día de les Lletres Asturianes. 1 de mayu, 2006 0 FacebookTwitterPinterestEmail
Música Dixebra: venti años nos escenarios by asturnet 1 de mayu, 2006 A primeros del añu qu’entra la banda avilesina Dixebra va cumplir la so segunda decada enriba los escenarios; fecha señalada que la formación quier remembrar grabando un discu que recueya, per primer vez na so historia, un directu que va tener llugar el sábadu 3 de xunu na plaza’l Parche d’Aviles y nel que se cunta cola collaboración especial de dalgunos de los músicos que tienen pasao pela banda a lo llargo d’estos venti años. Xose Ambás, Fermín Muguruza, Anabel Santiago o Maxi de Fe de Ratas son dalgunos de los artistes que tienen collaborao con Dixebra nestos últimos venti años. Dalgunos d’ellos podríen aparecer n’escena’l prósimu 3 de xunu nel conciertu que’l grupu ufierte na conocida plaza d’Aviles. La edición del que va ser el novenu discu de Dixebra, que va incluyir un DVD col vídeu del conciertu, ta prevista pa finales d’esti añu. 1 de mayu, 2006 0 FacebookTwitterPinterestEmail
Música José Manuel Tejedor nes clases de gaita de Magistralia by asturnet 1 de mayu, 2006 Magistralia organiza la segunda edición de los cursos de branu pa gaiteros y estudiantes de gaita de toles edaes que se van cellebrar en Xixón ente los díes 13 y 23 de xunetu. Jose Manuel Tejedor va ser el gaiteru encargáu de poner clases, mesmo indivicuales que d’orquesta, nunos cursos cuyu plazu de matrícula va tar abiertu hasta’l 15 de xunu. Amás de los cursos de gaita, Magistralia vuelve a organizar los cursos d’orquesta sinfónica, impartíos por músicos y maestros d’orquestes como Los Virtuosos de Moscú, la OSPA y la OSCO; los cursos de perfeccionamientu orquestal pa neños hasta 2º de grau mediu; les xornaes Magistralia Informática + Composición; y el proyectu d’allegamientu y comprensión artística pa neños d’ente 5 y 12 años. 1 de mayu, 2006 0 FacebookTwitterPinterestEmail
Escéniques La Universidá d’Uviéu sal a escena cola Selmana de les Lletres Asturianes by asturnet 30 d'abril, 2006 Mañana martes la Universidá d’Uvieu sal a escena cola Selmana de les Lletres Asturianes inaugurando un ciclu de conferencies y representaciones teatrales que van repartise a lo llargo de tola selmana y que va traer al Salón d’Actos de la Biblioteca del Campus del Milán al escritor Jon Cortázar, ente otros. Aviles, Mieres y la Casa Cultura da Veiga son otros de los llugares que mañana van remembrar el teatru asturianu. Tres de la presentación oficial d’esta Selmana nel patiu de la Conseyería de Cultura a les once y media la mañana, la Universidá d’Uvieu va presentar les xornaes ‘Universidá n’escena’, que s’abren con una conferencia de la filóloga Inmaculada Urzainqui, directora del Institutu Feijoo d’Estudios del Sieglu XVIII, que va tratar ‘La entremesística asturiana’, pa depues dar pasu a la representación per parte de la compañía Telón de Fondo de ‘L’ensalmador’ d’Antón de Marirreguera. A les ocho la tarde, el Teatru Palacio Valdes d’Aviles va presentar un poema dramático-musical de la Banda de Música de Corvera, dirixida por Jesús Cracio, que lleva por títulu ‘Ente bambalines. El teatru que lleves dientro’. Actu siguío, va inaugurase la escultura ‘Ente bambalines’ del artista Fidel Pena n’homenaxe al teatru asturianu. A la mesma hora, Centru Cultural Caxastur de Mieres va llevar a escena la versión de la pieza de Strindberg ‘Xulia’ que fai la compañía de Teatru Margen. Mentes que la Casa Cultura da Veiga va acoyer la representación d’ ‘Informe pra úa academia’ de Franz Kafka que fai la compañía Bacanal Teatro. 30 d'abril, 2006 0 FacebookTwitterPinterestEmail
Música El percusionista Juanjo Guillém va poner clases na Escuela Internacional de Música by asturnet 29 d'abril, 2006 El percusionista y pedagogu Juanjo Guillem va poner clases maxistrales na Escuela Internacional de Música de la Fundación Príncipe d’Asturies. Esta Escuela, fecha con motivu de la cellebración del XXV Aniversariu de los Premios Príncipe d’Asturies, cuntó ente los sos maestros invitaos con dalgunos de los más destacaos músicos del mundu, como Teresa Berganza, Premiu Príncipe d’Asturies de les Artes 1991, que’l pasáu mes de marzu, punxo clases maxistrales n’Uvieu. El cursu va cellebrase nel Conservatoriu Eduardo Martínez Torner d’Uvieu ente los díes 20, 21 y 22 de mayu y plazu d’inscripción ta abiertu dende esta selmana. Nes clases van trabayase conceptos artísticos d’obres pa solista de percusión (marimba, timbales, vibráfonu, xilófonu, caxa orquestal, platillos, bombu, pandereta y triángulu) asina como repertoriu. 29 d'abril, 2006 0 FacebookTwitterPinterestEmail
Escéniques El Vital Aza convoca certame y presenta dos obres pola Selmana de les Lletres by asturnet 28 d'abril, 2006 El teatru Vital Aza de La Pola L.lena va sumase a los actos de cellebración de la Selmana de les Lletres Asturianes con una programación específica cola que, al travies del área de Cultura del so Ayuntamientu, quier promocionar el teatru n’asturianu, faciendolu llegar a públicos de diferentes edaes. ‘Interditu o Pleitín d’Aldea’ de la Compañía Asturiana de Comedies y ‘Mitología Asturiana’ de Mari Luz Pontón van ser les dos pieces a representar a lo llargo de la selmana qu’entra, na que l’Ayuntamientu de L.lena tamien presenta’l so Certame de Teatru Popular Asturianu ‘Vital Aza’. El miercoles 3 de mayu a les ocho la tarde la Compañía Asturiana de Comedies presenta la pieza costumbrista ‘Interditu o Pleitín d’Aldea’, mentes que los neños van tener el sábadu día 6 a les siete la tarde una actuación espresamente pensada pa ellos que va tener como protagonistes a los personaxes mitolóxicos de Mari Luz Pontón, cola obra ‘Mitología Asturiana’. Pero otra parte, dientro del marcu de los actos de cellebración de la Selmana de les Lletres Asturianes, la estaya de Cultura del Ayuntamientu de L.lena aprova pa dar anuncia a la convocatoria del IV Certame de Teatru Popular Asturianu ‘Vital Aza’. Nesti certame únicu n’Asturies van poder participar toles persones interesaes con obres inedites de temática llibre siempre y cuando s’adapten a les característiques del teatru popular y tean escrites n’asturianu. El plazu de presentación d’exemplares termina’l 15 d’ochobre. 28 d'abril, 2006 0 FacebookTwitterPinterestEmail
Lliteratura Empiecen los actos de la Selmana de les Lletres Asturianes by asturnet 27 d'abril, 2006 Esti vienres a les ocho la tarde, la Capiella de los Dolores de Grau acoyó un espectáculu poeticu-teatral, programáu dientro de los actos de la Selmana de les Lletres Asturianes, que lleva por nome ‘Voces paraleles’ y qu’axuntó nel escenariu a cuatro poetes catalanes, Ponç Pons, Núria Martínez Vernis, Àngels Gregori y Jordi Cornudella, y a cuatro poetes asturianos, Berta Piñán, Xuan Bello, Vanessa Gutierrez y Xandru Fernández. Empieza asina la Selmana de les Lletres Asturianes, que s’abría cola presentación a les doce la mañana, na Biblioteca Pérez d’Ayala d’Uviéu del llibru ‘En tables. Un teatru pal sieglu XXI’ d’Adolfo Camilo Díaz. ‘Veus paral.leles’ (Voces paraleles) ye un proyectu fechu a inciativa d’Albert Mestres y Sofia Fonseca y acoyíu pola Institució de les Lletres Catalanes que consiste nun espectáculu nel que s’alternen les voces de cuatro poetes en llingua catalana y cuatro poetes d’otra cultura, que reciten conxuntamente los sos poemes a partir d’una selección fecha polos propios poetes. L’oxetivu d’esti espectáculu, según los organizadores, ye descubrir mundos poeticos y cultures que nun-yos llegaríen d’otra forma y poner en contactu la poesía catalana cola de los poetes de cultures invitaes, nesti casu los asturianos. Los testos del espectáculu, que va ser representáu más alantre per diferentes llugares de Cataluña, son recoyíos pola Institució nuna edición impresa. 27 d'abril, 2006 0 FacebookTwitterPinterestEmail