Sociedá La Xunta impugna les ochenta y cuatro places convocaes pal Ente de Comunicación by asturnet 8 d'agostu, 2005 La Xunta pola Defensa de la Llingua Asturiana presentó esta mañana nel Rexistru Xeneral de l’Administración del Principáu impugnaciones contra les ochenta y cuatro places convocaes pa entamar la plantiella del Ente Públicu de Comunicación. Los recursos básense no establecío nel Estatutu d’Autonomía y la Llei d’Usu del Asturianu. La organización cívica considera que tanto l’Estatutu nel so artículu cuartu como’l restu de la lexislación básica del Principáu afalen a la promoción del usu del asturianu nos medios de comunicación y n’Alministración pública. Nesi sen la futura radiotelevisión asturiana, en cuantes empresa pública de comunicación, taría incumpliendo lo encamentao pola lexislación nes bases de la so convocatoria d’empléu. Pa la Xunta los artículos 12 y 13 de la Llei d’Usu nun ufierten duldes a la hora d’encamentar la promociòn del usu del nuestru idioma nos medios de comunicación y sobremanera si l’Administración asturiana tien presencia nellos, como estipula l’artículu 13.2 de la Llei d’Usu. Esta ye la primer impugnación que se fai de la convocatoria d’ochenta y cuatro puestos de trabayu destinaos a integrar la plantiella de la futura empresa pública de radio y televisión. 8 d'agostu, 2005 0 FacebookTwitterPinterestEmail
Comunicación El PP súmase a les crítiques pola puesta en marcha del Ente de Comunicación by asturnet 7 d'agostu, 2005 La diputada del Partíu Popular Alicia Castro sumóse ayer a les crítiques pola manera de poner en marcha l’Ente Públicu de Comunicación del Principáu y el calter de la convocatoria de selección de personal. Castro afirmó que na futura televisión “namás van entrar persones col carnet del PSOE na boca”. La parlamentaria popular criticó la convocatoria publicada nel BOPA con malpenes un mes de vagar pa que los aspirantes preparen el temariu: “Areces paez que tien prieses por tener una televisión al so serviciu”,dixo Alicia Castro que calificó’l modelu escoyíu pol gobiernu del Principáu como “xuguete particular al serviciu d’Areces y un mediu nel que nun va haber llibertá d’espresión”.. La posible falta de tresparencia nel procesu de selección del personal foi otra de les crítiques llanzaes pola diputada del PP: “les 84 places convocaes ya tienen dueñu”, declaró Castro pa quien “nun hai dulda de qu’Areces va meter xente prósimo al so partíu”. La diputada popular tamién criticó l’enfrentamientu por esti motivu ente PSOE ya IX-BA y descalificó a entrambos socios de gobiernu por “tar nuna permanente griesca” y dixo que “nunca tuvo’l Principáu un gobiernu más débil”. 7 d'agostu, 2005 0 FacebookTwitterPinterestEmail
Sociedá L’economista Juan Velarde defende l’inglés escontra l’asturianu y llama aldeanos a los nacionalistes by asturnet 7 d'agostu, 2005 L’economista d’orixe asturianu Juan Velarde declaró esta mañana n’Avilés, onde participa nos cursos de veranu de La Granda, que’l gobiernu del Principáu “había esmolecese más pola enseñanza del inglés envez de la del bable”. Velarde criticó a los que defenden “les llingües antigües” y calificó a los nacionalistes de “aldeanos”. El Premiu Príncipe d’Asturies y miembru de l’Academia de Ciencies Polítiques y Morales truñó contra Izquierda Xunida por “apostar pol bable y escaecese de los probes”, porque afirmó “los ricos lleven a los sos fíos a colexos billingües pa que deprendan inglés”. Juan Velarde fexo estes declaraciones nel cursu sobre les relaciones ente Camoes y Cervantes que se desenvuelve en La Granda. L’economista opinó que’l Gobiernu asturianu había esmolecese por subvencionar la enseñanza del inglés nos centros públicos como prioridá “per delantre de la televisión autonómica y el bable”. Na opinión de Velarde son “aldeanos los nacionalistes y los que defenden l’usu de llingües antigües” y dixo que la visión romántica del nacionalismu talo s’entendía nel sieglu XIX “ta obsoleta y fuera de llugar nel nuestru tiempu”. 7 d'agostu, 2005 0 FacebookTwitterPinterestEmail
Comunicación El Gobiernu da-y la medalla d’oro d’Asturies a Graciano García by asturnet 3 d'agostu, 2005 El Conseyu de Gobiernu del executivu autonómicu decidió por unanimidá conceder la Medalla d’Oro del Principáu al director de la FPA Graciano García. Con esta distinción quier reconocese’l llabor del creador de los premios Príncipe d’Asturies y el so compromisu colos valores democráticos. El Principáu concede-y la so másima distinción a Graciano García nel añu de la celebración del XXV aniversariu de la Fundación que creó en 1980. La Medalla d’Oro va ser entregada al periodista y entamador de la FPA dientro los actos institucionales del prósimu ocho de setiembre. Graciano García nació en Moréa (Ayer) en 1939, diplomáu en Periodismo escomenzó a colaborar nel diariu La Nueva España en 1968; un añu después fundó la revista Asturias Semanal y en 1978 el periódicu Asturias Diario Regional. 3 d'agostu, 2005 0 FacebookTwitterPinterestEmail
Sociedá Los socialistes tenten neutralizar les crítiques d’IX-BA acusando a la coalición de pretender una cuota de poder by asturnet 3 d'agostu, 2005 L’argumentu de Bron volvía apaecer esti xueves na edición d’un periódicu afín a la llinia política del presidente Álvarez Areces y encargábense de difundilu miembros socialistes del gobiernu asturianu. El propiu Areces y la conseyera de Cultura y Comunicación Social, Ana Rosa Migoya, reprendieron ayer na reunión del Conseyu de Gobiernu a Francisco Javier García Valledor por sumase públicamente a les crítiques d’Izquierda Xunida-Bloque. Valledor defendióse al remate del Conseyu afirmando que “les crítiques lloñe de contribuir al francimientu del pautu de gobiernu ayuden a profundizalu”. El rechazu a la manera d’entamar la convocatoria de selección de personal pal Ente de Comunicación y especialmente al incumplimientu per parte del Conseyu d’Administración, presidíu por José Ramón Pérez Ornia, a los alcuerdos algamaos colos conseyeros d’IX-BA pa que l’asturianu tuviera polo menos la mesma consieranza que l’inglés y el francés, foron refugaes por miembros socialistes del executivu autonòmicu con estremaos argumentos: el más pintorescu, el del conseyeru d’Economía qu’atribuyó la marxinación de la llingua asturiana a “la práctica del mercáu y el funcionamientu de la sociedá” y afirmó que “sobre asuntos identitarios caún resérvase la so opinión”. L’últimu argumentu usáu pa refugar les crítiques d’IX-BA ye acusar a la coalición de tar molesta por nun haber consiguío una cuota política de repartu na empresa pública de radiotelevisión, un argumetu barruntáu pol presidente de l’asociación gremial d’informadores d’Uviéu, José Antonio Bron, hasta agora un de los principales defensores públicos de la política siguida por Pérez Ornia al frente del Ente. 3 d'agostu, 2005 0 FacebookTwitterPinterestEmail
Comunicación Tormenta política nel gobiernu asturianu pola TV by asturnet 2 d'agostu, 2005 Nun tien igua. El PSOE ta enfotáu na ruptura del gobiernu sigún amuesa l’acusación ayeri d’Ana Rosa Migoya d’inxerencia pela parte de Valledor por criticar la xestión d’Ornia na convocatoria de prebes de selección del personal. La entruga ye ¿cómo nun va poer criticar un miembru del gobiernu la xestión d’un muérganu independiente al que-y paga’l presupuestu? La rempuesta podría dase esta mañana nel Conseyu de Gobiernu adelantáu col qu’entamente les vacaciones polítiques. Ana Rosa Migoya acusó ayeri al so compañeru Valledor “d’Inxerencia intolerable” nel Ente Público de Comunicación por sofitar les crítiques d’IX-BA al procesu de selección de personal pala televisión autonómica que, sigún afitó Migoya, causaren “un fondu malestar” nel internu del executivu asturianu. El PSOE tamién censuró ayeri, sigún recueyen güei tolos medios impresos asturianos que Valledor y la coalición a la que pertenez “quieren mediatiza” un proceso” de selección “que tá rexíu polos principios de méritos, igualdad y capacidá”, sigún afirmó Migoya, que defendió la figura del presidente del Ente de Comunicación, José Ramón Pérez Ornia, porque siempre actuó con “independencia y obxetividad”. El problema ye que les crítiques d’IX-BA xurden de los compromisos públicos que fizo’l propiu Ornia nel Paralamentu, na prensa y na xunta de l’Asociación de la Prensa na qu’informó de la convocatoria de les prebes de selección. Nella dixo que la so intención yera que l’asturianu puntuara talamente igual que cualaquier otru idioma estranxeru, pero a lo postrero, sigún fontes de la coalición “l’ingles (y nes places nes que parez que los candidatos afayadizos nun saben inglés el francés tamién val) tien una prueba subxetiva (casualmente) y non obxetiva, una entrevista sin temariu y una preba escrita que nun se sabe si va esistir o non, colo que non se pue preparar”. El temariu, sigún critica IX-BA, ye confusu y poco nidiu, porque nun matiza nin bibliografía pa preparalu nin nada asemeyao, colo que queda al albor del tribunal lo que se vaya entrugar, lo que supón una indefensión imposible d’aceptar nuna convocatoria pública. El fechu amás de que la preba d’idiomes seya obligatoria ya eliminatoria ye un casu únicu, ya que nes úniques places nes que se piden prebes d’idiomes son obligatories, pero non eliminatories. ¿La TV pertenez al gobiernu? No fondero de la polémica alcuéntrase tamién la visión del pautu de gobiernu y de la dependencia de la TV d’esi gobiernu que se tien dende les files socialistes. Per un llau, la falta d’esperiencia de cogobiernu fai que se plantée ‘gobiernu pueda cesar a Valledor o a Rafa Palacios peles sos crítiques, cuando quien noma rialmente a los conseyeros d’IX-BA ye la propia coalición, como nun podía ser d’otramiente. Y per otru lláu, les declaraciones d’estos díes sobro la pertenencia de la TV al executivu ponen en dubies la so independencia, anque esti día ya entamra a falase d’Ornia non como fizo la selmana pasada Fernando Lastra (como un miembru más del executivu d’Areces) sinon como un “proyeutu” del executivu. No fondero alcuéntrase la posibilidá espuesta a lo llargo de munchu tiempu por medios como La Nueva España de que la TV asturiana seya una “Teletini” controlada pol presidente del gobiernu. Daqué que los miembros socialistes del Gobiernu tan afitando coles sos declaraciones de que naide nun pue criticar a un xestor contratáu pa un muérganu en teoría independiente. Dende la xunta del Conseyu de Gobiernu de güei, la tema va camín de convertise na serpiente informativa d’esti branu n’Asturies. IX-BA desixe que Ornia rectifique 2 d'agostu, 2005 0 FacebookTwitterPinterestEmail
Comunicación Rabanal afirma que la marxinación del asturianu nes prebes pa l’Autonómica ye cuestión de la práctica del mercáu y la sociedá by asturnet 2 d'agostu, 2005 El conseyeru d’Economía Javier Rabanal refugó ayer les crítiques vertíes contra’l presidente del Ente Públicu de Comunicación, José Ramón Pérez Ornia por IX-BA y sofitaes pol conseyeru de Xusticia y Esteriores, Francisco Javier García Valledor. Rabanal pidió-y a Valledor “más prudencia” y defendió la marxinación del asturianu nes prebes de selección del Ente asegurando que se trataba de “la práctica establecida pol mercáu y el funcionamientu de la sociedá”. El conseyeru d’Economía afirmó tamién que tocante “a cuestiones identitaries caún tien la so propia opinión”, aludiendo a les crítiques llanzaes dende IX-BA énte la convocatoria de les bases pa selección de personal de la radiotelevisión autonómica. Al empar la conseyera de Cultura y de Comunicación Social, Ana Rosa Migoya, sumóse a los reproches a Valledor, al que-y afeó “que a pesar de les advertencies siga criticando proyectos del gobiernu”. Tocante al conteníu de les crítiques del so compañeru de gobiernu y d’Izquierda Xunida-Bloque, Migoya dixo que tres les crítiques de la coalición d’izquierdes “hai un intentu de mediatizar” un procesu de selección que calificó de rexíu polos criterios de “igualdá, méritu y capacidá”. Pel so llau l’Asociación de la Prensa d’Uviéu, per voz del so presidente José Antonio Bron, salió en defensa del responsable del Ente autonómicu, José Ramón Pérez Ornia y acusó a IX-BA de que “dalgunos sectores políticos más desuníos qu’uníos fomenten l’intrusismu col únicu oxetivu de “colar” la so cuota política nes redacciones de los medios de comunicación». Ye la segunda vez na que l’asociación colexada presidida por Bron sal en defensa d’Ornia. N’anterior ocasión el motivu foi la reunión privada que’l másimu responable de la radiotelevisión autonómica caltuvo con miembros de l’Asociación de la Prensa d’Uviéu a los qu’informó del procesu de selección de personal pal ente públicu enantes de facelo nel Conseyu d’Administración y nel parlamentu asturianu. 2 d'agostu, 2005 0 FacebookTwitterPinterestEmail
Sociedá La presidenta’l CMPA denuncia’l desmantelamientu de les polítiques públiques de mocedá by asturnet 2 d'agostu, 2005 La presidenta del Conseyu de Mocedá del Principáu d’Asturies(CMPA)Rebecca Rodríguez ofreció ayer una rueda prensa pa llamar l’atención sobre la falta d’interlocución ente esti organismu independiente y l’Institutu Asturianu de la Xuventú(IAX). Rodríguez afirmó que se vive “un desmantelamientu de les polítiques públiques de mocedá ensin precedentes dende la prsidencia de Pedro de Silva”. La presidenta del Conseyu de Mocedá denunció na rueda de prensa el recorte de programes y acciones per parte del IAX, lo que calificó de “la falta absoluta de interlocución” col organismu del gobiernu asturianu, al qu’acusó d’incumplir los sos compromisos y de “falta de lideralgu políticu ya institucional”. Rebecca Rodríguez pidió’l cese o la dimisión de la responsable del Institutu Asturianu de la Xuventú, Carmen Barrera y anunció la puesta en marcha d’una campaña del Conseyu de Mocedá pa informar de la situación que viven les polítiques nesta materia n’Asturies, una situación que calificó de “el mayor desmantelamientu de les polítiques públiques de mocedá dende los tiempos de la presidencia de Pedro de Silva”. La campaña informativa del Conseyu escomienza cola edición d’un folletu tituláu “Contra-Informa Joven, edición especial: desmantelamiento IAJ. Va unos díes la presidenta del CMPA llamara l’atención sobre la vienda de locales públicos per parte del Institutu Asturianu de la Mocedá nuna reunión caltenida na Xunta Xeneral col grupu parlamentariu d’Izquierda Xunida-Bloque. La denuncia de Rebecca Rodríguez recibió entós el respaldu d’IX-BA per voz de la so diputada Diana Camafeita. 2 d'agostu, 2005 0 FacebookTwitterPinterestEmail
Sociedá Los míticosThe Yardbirds d’Eric Clapton actúen en Xixón nel empiezu del Euroyeyé by asturnet 2 d'agostu, 2005 El festival Euroyeyé escomienza cola presencia en Xixón d’unos invitaos de luxu: la mítica banda británica The Yardbirds. El grupu pel que pasaron músicos como Eric Clapton o Jeff Beck actúa na Plaza Mayor cola so formación actual tres volver a xuntase después de tres décades inactivos. La cita ye a les 22.00 hores nun conciertu de baldre y va ser la ocasión de ver en directu a una banda que darréu la so remanecencia apocayá vien a Xixón con un discu “Birdland” nel que colaboraron artistes como G. Mayo (Dr. Feelgood), Slash, Steve Vai, Joe Satriani y Brian May. The Yardbirds fueron una referencia fundamental del rock psicodélicu de finales de los sesenta y escomienzos de los setenta, xermen de grupos como los non menos míticos Led Zeepelin. La so actuación esta nueche da empiezu a la onceana edición del festival Euroyeyé, una cita irrefugable del veranu xixonés y de tolos apasionaos de la cultura “sixtie” del mundu enteru. 2 d'agostu, 2005 0 FacebookTwitterPinterestEmail
Sociedá Celébrense n’Avilés los V Alcuentros Culturales de El Cafetón by asturnet 2 d'agostu, 2005 Esti miércoles 3 y hasta’l prósimu día 15 d’agostu van celebrase n’Avilés los V Alcuentros El Cafetón, unes xornaes culturales con una amplia y variada ufierta d’actividaes. Güei el colectivu Telaraña pon n’escena la obra Woyzeck y mañana nel Palaciu de Valdecarzana entama’l primeru de los alcuentros con Adolfo Camilo Díaz, l’actor y monologuista Carlos Alba y Carlos Rubio. Mañana inaugúrase tamién nel local hosteleru qu’organiza estos alcuentros la esposición de cerámica y artesanía “El Cafefón”. A les 21.30 actúa el Coru Melsos y a les 12 la nueche va haber una proyección de cortometraxes escoyíos por Saúl Fernández. Amueses, debates, conferencies, monólogos, actuaciones musicales y proyecciones componen el programa d’estos V Alcuentros dedicaos a dar cuenta directa de les espresiones culturales más vives de la realidá asturiana. 2 d'agostu, 2005 0 FacebookTwitterPinterestEmail