Sociedá La Xunta de Toponimia aconceya n’Avilés pa entamar la revisión del nomenclátor municipal by asturnet 13 de xineru, 2006 El palaciu de Valdecarzana acueye esti viernes 13 al meudía l’aconceyamientu de la Xunta Asesora de Toponimia del Principáu con representantes del Ayuntamientu d’Aviles pa entamar la revisión del nomenclátor municipal. La reunión forma parte de les avezaes que l’organismu d’espertos de l’administración autonómica celebra colos responsables de los conceyos solicitantes de la igua de los sos nomes de llugar. El director xeneral de Promoción Cultural y Política Llingüística de la Conseyería de Cultura, Carlos Madera y el responsable de la Oficina de Política Llingüística del Principáu, Ramón d’Andrés asisten al aconceyamientu de la Xunta de Toponimia n’Avilés al llau de la comisión multidisciplinar d’especialistes encargada de la revisión toponímica d’Asturies. Avilés xúntase asina con esti pasu a los conceyos -cásique la mitá del total de la nuestra comunidá- n’entamar l’apertura del so espediente toponímicu. 13 de xineru, 2006 0 FacebookTwitterPinterestEmail
Educación El cursu pa encuestadores de material oral aporta a la fin esti mes by asturnet 12 de xineru, 2006 El cursu pa encuestadores de material oral entamáu pola Oficina de Política Llingüística en colaboración col Seminariu de Filoloxía Asturiana de la Universidá d’Uviéu y que superó toles espectatives de matriculación previstes polos organizadores,superando les 50 places, llega esti mes a la so fin, con unes práctiques de campu que desendolcase esti sábadu 14 y domingu 15, la primera, y la otra, el sábadu 21 y el domingu 23. Nel pasáu mes d’avientu celebróse’l I CURSU D’ENCUESTADORES DE DIALECTOLOXÍA, TOPONIMIA Y CULTURA POPULAR, entamáu pola Conseyería de Cultura (Oficina de Política Llingüística) y el Seminariu de Filoloxía Asturiana (Facultá de Filoloxía), con un bultable ésitu de participación, ya que¡l cursu algmaó los 51 matriculaos. Agora, esti Cursu compleméntase nesti mes de xineru con unes práctiques de campu, dirixíes polos profesores Fernando Álvarez-Balbuena (práctiques de dialectoloxía), Llinu Álvarez Santidrián (práctiques de toponimia) y Xosé Antón Fernández “Ambás” (práctiques de lliteratura oral y música popular). Estes práctiques fadránse en dos rioles: una, el sábadu 14 y domingu 15; y otra, el sábadu 21 y el domingu 23. Los profesores y alumnos desplazaránse a CANGAS DEL NARCEA pa facer visites a distintes parroquies del Conceyu. Collabora la Conceyalía de Cultura del Conceyu de Cangas. A finales de mes, nel día que se comunicará, fadráse un actu d’entrega de Diplomes a los alumnos del I Cursu d’Encuestadores de Dialectoloxía, Toponimia y Cultura Popular, y a los del I Cursu Básicu de Llingua Asturiana pa Profesionales de la Información. El cursu ya entamara n’Ochobre 12 de xineru, 2006 0 FacebookTwitterPinterestEmail
Sociedá Rodríguez Vigil, Tresguerres y Joaquín Fernández son los nuevos miembros del RIDEA by asturnet 12 de xineru, 2006 L’ex presidente del Principáu Juan Luis Rodríguez Vigil, l’hematólogu ya investigador de la tradición oral Joaquín Fernández García y el prehestoriador Juan Fernández-Tresguerres Velasco son los nuevos miembros del RIDEA. La institución escoyó a los candidatos pa ocupar les tres places valeres por mayoría absoluta d’ente un total de seis propuestes. Les otres candidatures a ocupar los escaños del Institutu d’Estudios Asturianos taben representaes por Pilar García Cuetos, Antonio Álvarez Pinilla y Alfonso García Leal. Nengún d’estos últimos candidatos propuestos algamó la mayoría bastante como pa salir elexíos na votación que se celebró esti martes 10 na sé de la institución n’Uviéu. El RIDEA cuenta anguaño con 37 miembros de númberu de los que votaron toos menos ún na reunión del so Conseyu Xeneral. Los nuevos miembros de la institución tienen agora un añu de plazu pa escribir y presentar el discursu d’ingresu que-yos validará dafechu la condición d’integrantes de plenu derechu nel Real Institutu d’Estudios Asturianos. 12 de xineru, 2006 0 FacebookTwitterPinterestEmail
Sociedá El Ministeriu Defensa ordena a los militares falar namás en castellanu de serviciu by asturnet 12 de xineru, 2006 El Ministeriu de Defensa ordena al través d’una misiva firmada pol subsecretariu del departamentu Justo Zambrana que l’idioma oficial nel que s’espresen los militares tando de serviciu seya’l castellanu “cualquiera que seya la so localización xeográfica dientro’l territoriu nacional”. El departamentu que dirixe José Bono respuende asina a una pregunta formulada nel so discursu de la Pascua Militar pol después sancionáu xeneral Mena alrodiu del Estatut catalán. La misiva de Defensa, difundida pol diariu madrilanu El Mundo, afirma que, teniendo en cuenta el que “la comprensión inmediata de les órdenes y la tresmisión rápida y clara de les informaciones son elementos esenciales pa la eficacia en los trabayos y operaciones militares” considérase que “l’usu d’ un solu idioma nos Exércitos d’España ye un instrumentu d’insustituible valor pal funcionamientu homoxéneu, uniforme y unívocu de les unidaes militares, cualquiera que seya la so localización xeográfica dientro’l territoriu nacional”. El ministeriu especifica asina una norma con calter d’orde énte les espectatives abiertes col nuevu estatutu de Cataluña nel que se recueye la obligació d’emplear la llingua catalana en tolos actos oficiales celebraos dientro la comunidá. La nota unviada pol departamentu del ministru Bono recalca que “el criteriu en vigor sobre usu de la llingua oficial nel ámbitu de los Exércitos y de la Armada ye qu’en tolos actos, actividaes y relaciones de serviciu ha utilizase siempre’l castellano”. Y remata anunciando que :”La Secretaría d’Estáu de Relaciones coles Cortes comunica que nun se tá tramitando proyectu normativu dalgún, nin esiste intención de promovelu o apoyalu, tendente a camudar la situación actual”. 12 de xineru, 2006 0 FacebookTwitterPinterestEmail
Educación La última convocatoria de places d’interinos inda nun contempla bolses pa llingua asturiana by asturnet 11 de xineru, 2006 La última convocatoria de places pa personal interín de la Conseyería d’Educación inda nun contempla l’apertura d’una bolsa específica pa les vacantes de llingua asturiana y gallego-asturiano. Mentantu s’abre una llista específica -anguaño en procesu de baremación- según les bases de la convocatoria cualaquier inscritu nel Rexistru de Capacitación puede solicitar les places de les llingües asturianes. La páxina web oficial de la Conseyería, Educastur, anuncia la convocatoria con fecha 10/01/06 de les nueves places pa personal interín y caltién tovíes colgaes les instrucciones de les anteriores convocatories ente les que ta la qu’afirma testualmente que “les places de LLINGUA ASTURIANA y GALLEGO/ASTURIANO podrán ser solicitaes, amás de polos convocaos de LLINGUA ASTURIANA, por cualaquier aspirante convocáu que estéa inscritu nel Rexistru de Capacitación”. Dellos colectivos d’interinos especialistes en Llingua Asturiana y tamién los mesmos sindicatos d’enseñanza pidieran repetidamente a les autoridaes educatives del Principáu l’apertura de bolses y llistes específiques pa esta asignatura. Darréu de meses de negociación los representantes sindicales llograron d’Educación el comprosimu de l’apertura de bolses específiques pa llingua asturiana, una realidá qu’inda ta en procesu de baremación y que podía concretase nel prósimu mes de febreru, según pudo saber Asturnews. Convocatoria d’interinos 11 de xineru, 2006 0 FacebookTwitterPinterestEmail
Sociedá Dos de cada tres xixoneses demanden la oficialidá según la encuesta de Llera Ramo by asturnet 10 de xineru, 2006 La primer encuesta sociollingüística municipal de Xixón amuesa datos perfavorables a la normalización del asturianu en tolos ámbitos de la vida pública. Nel estudiu del profesor Francisco Llera Ramo -que se presentó esti llunes 9 en formatu de llibru- dos de cada tres xixoneses manifiéstense partidarios de la oficialidá, más d’un ochenta por cientu afirmen entender la llingua asturiana y una amplia mayoría demanda el so empléu polos políticos y l’aumentu de les midíes de promoción. El caderalgu de Ciencies Polítiques de la Universidá del País Vascu presentó l’estudiu que firma xunto a Pablo San Martín y el restu del equipu Euskobarometro que “la realidá de Xixón ye un reflexu de la d’Asturies” y que “nun son los ciudadanos los que ven un problema nel asuntu llingüísticu sinón les élites y los políticos, dellos de los cualos carecen una mestura d’alerxa y de neurosis énte l’asturianu”, afirmó’l profesor Llera. L’autor de la Primer Encuesta Sociollingüística Municipal de Xixón y d’anteriores estudios d’ámbitu autonómicu destacó la paradoxa de qu’Asturies “ye la comunidá na que hai más información sobre la realidá llingüística y la única onde los ciudadanos siguen sin ver reconocíos los sos derechos constitucionales nesa materia”. Llera responsabilizó a los políticos de la situación y tuvo guiños hacia los responsables asturianos del partíu onde milita na federación del País Vascu: “nun entiendo qu’un socialista pueda negase en redondo a reconocer derechos ciudadanos tan elementales como son los llingüísticos y menos cuando s’argumenta alrodiu del costu económicu d’esa reconocencia”, afirmó pa preguntase en voz alta: “¡dende cuando se puede falar de costu económicu en tratándose de derechos!”. Pa Llera los políticos asturianos “amás de gobernar tienen el deber de facer pedagoxía social” y por eso dixo “tan obligaos a reconocer los derechos llingüísticos de los asturianos cola oficialidá y a facer un llabor intensu de normalización social”. El caderalgu de la Universidá del País Vascu reivindicó el factor llingüísticu como “elementu fundamental pa recuperar l’autoestima de los propios asturianos” y p’activar “l’enorme potencial cultural de la nuestra comunidá”. N’otru sen l’autor del estudiu sociollingüísticu quiso resaltar que de los datos obteníos na so encuesta como nos de los anteriores trabayos fechos sobre esti asuntu “hai perbones condiciones pa entamar polítiques normalizadores como reflexen les actitúes positives de los ciudadanos hacia esta posibilidá y el so mesmu grau de conocencia activa o pasiva de la llingua” y arriendes d’ello consideró necesario “entamar l’alfabetización d’adultos, amás de la escolarización”, porque, según dixo “ye l’entornu familiar el que garantiza la cadena de tresmisión llingüística y el que-y da’l conteníu emocional a les llingües, porque una llingua ye emoción énte too”. 10 de xineru, 2006 0 FacebookTwitterPinterestEmail
Sociedá Los ciudadanos suspenden a los políticos en materia de promoción llingüística by asturnet 10 de xineru, 2006 Si los datos de la Primer Encuesta Sociollingüística Municipal de Xixón son estrapolables al conxuntu de la sociedá asturiana, talo afirma l’autor del estudiu, Francisco Llera Ramo, la ciudadanía suspende a l’administración política en materia llingüística y demanda mayoritariamente midíes normalizadores. Na valoración de l’actuación de les instituciones autonómiques y municipales xixoneses na promoción de la llingua asturiana los encuestaos pol equipu dirixíu por Llera Ramo un 10,0 por cientu afirma que’l Principáu nun fai nada y un 8,8 que tampoco l’Ayuntamientu fai dalgo; un 35,3 consideren que’l Principáu fai “más bien poco”, un datu que ye casi hermanu al de la valoración del conceyu con un 34,2 %. Namás un 30% considera que l’administración autonómica “fai dalgo” y un 32 % que lo fai l’Ayuntamientu. Los anteriores son dellos de los datos obteníos pol equipu Euskobarometro nel so trabayu de campu en Xixón, un estudiu fechu al través de seiscientos cuestionarios personales distribuíos pelos distintos barrios y fasteres del conceyu playu. De les conclusiones xenerales, los autores de la encuesta destaquen per un llau la importante actitú positiva de los xixoneses hacia la normalización y la enseñanza como les señes d’alarma que se detecten nel retrocesu social y xeneracional del idioma. 10 de xineru, 2006 0 FacebookTwitterPinterestEmail
Sociedá Ramón d’Andrés afirma que namás la reconocencia oficial del asturianu puede garantizar la normalización by asturnet 10 de xineru, 2006 El responsable de la Oficina de Política Llingüística del Principáu, Ramón d’Andrés afirmó esti llunes 9 nel actu de presentación de la Primer Encuesta Sociollingüística de Xixón que “sin oficialidá nun ye posible garantizar l’ésitu de la normalización llingüística” y detectó nes instancies de poder y en ciertos ámbitos decisorios de la sociedá asturiana “una clara voluntá de nun facer” respective a la llingua asturiana. D’Andrés punxo d’exemplu l’actitú de los xixoneses que reflexa l’estudiu del equipu Euskobaròmetro como “muestra de que la xente ye bastante razonable y namás una parte de les élites tien una relación problemática non cola normalización sinón cola propia llingua”. El xefe de la Oficina de Política Llingüística llamó l’atención sobre la “inercia repetitiva en delles instancies” hacia la llingua y afirmó que “namás la oficialidá garantiza completamente la normalización”. Ramón d’Andrés emponderó’l trabayu dirixíu por Francisco Llera Ramo y defendió la utitilidá de les encuestes como “ferramienta útil pa conocer meyor la realidá y l’entornu sociolóxicu sobre’l que trabayar”. L’estudiu de Xixón “marca un modelu a siguir por otros conceyos” en materia de conocencia de la realidá sociollingüística, afirmó’l responsable de la Oficina de Política LLingüítica del Principáu. 10 de xineru, 2006 0 FacebookTwitterPinterestEmail
Sociedá El RIDEA escueye a tres nuevos miembros de la institución by asturnet 10 de xineru, 2006 El Conseyu Xeneral del Real Institutu d’Estudios Asturianos (RIDEA) escueye esti martes 10 los nomes de los candidatos pa ocupar tres places vacantes na institución. Ente les persones propuestes ta l’ex presidente del Principáu Juan Luis Rodríguez Vigil, xunto a otros cinco candidatos. Amás de Vigil, aspiren a ocupar un sitiu como nuevos miembros del RIDEA la historiadora del Arte Pilar García Cuetos, el prehistoriador Juan Fernández Tresguerres Velasco, l’economista Antonio Álvarez Pinilla, l’hematólogu y recopilador de tradiciones orales Joaquín Fernández García y el profesor de Filoloxía latina Antonio García Leal. 10 de xineru, 2006 0 FacebookTwitterPinterestEmail
Educación Publícase un llibru-xuegu n’asturianu pa rapacinos de 0 a 4 años by asturnet 9 de xineru, 2006 “Animalinos” ye’l títulu d’un llibru-xuegu n’asturianu empobináu a rapacinos de 0 a 4 años qu’acaba de publicar la editorial Ámbitu. Les ilustraciones cuerren a cargu del dibuxante Enrique Carballeira alrodiu d’una idea orixinal de Lourdes Álvarez y Sabel Tuñón. El cuentu recién editáu ye’l primeru d’esti calter que se fai en llingua asturiana y tenta que los neños se familiaricen col idioma escritu al empar qu’enrieden y se divierten. Les ilustraciones de Carballeira, a páxina entera, van acompañaes por un testu breve n’asturianu de pregunta-rempuesta sobre’l soníu que fain los animales domésticos más comunes. El llibru editáu por Ámbitu cuenta con una sobvención de la Conseyería de Cultura. 9 de xineru, 2006 0 FacebookTwitterPinterestEmail