Sociedá Miles de persones participen nes reivindicaciones del Conceyu Abiertu pola Oficialidá by asturnet 15 de xunu, 2006 El Conceyu Abiertu pola Oficialidá, plataforma qu’axunta yá a cerca de 170 organizaciones polítiques, sindicales, sociales y culturales d’Asturies, col únicu oxetivu de consiguir que na prósima reforma del Estatutu d’Autonomía se reconoza’l calter de llingua oficial a la llingua asturiana, y al gallego-asturianu na so zona, presentó na tarde d’ayeri les valoraciones de les últimes actividaes llevaes a cabu al travies de les caravanes que percorrieron distintos conceyos. Pal CAO, l’alcalce de les cuatro primeres ediciones ‘supera con muncho les espectatives más optimistes’, calculándose la participación ciudadana en ‘miles de persones qu’asistieron a les actividaes programaes’. Dende la so presentación del Conceyu Abiertu pola Oficiaidá en xunu de 2004 vien desarrollando actividaes y campañes bien estremaes: propuestes de diálogu, movilizaciones, campañes didáctiques y de concienciación, recoyida e firmes, etc, siendo la última d’elles la conocida como Caravana pola Oficialidá que yá tien percorrío cuatro conceyos asturianos. Según los representantes del CAO, la valoración del alcance que ta teniendo la Caravana pola Oficialidá nestes cuatro primeres ediciones ‘supera con muncho les espectatives más optimistes’, protagonizando caúna d’elles l’actividá del día nel so conceyu. Mesmo na caravana del Nalón, na de Siero, na del Caudal que na d’Aviles del pasáu día 3 de xunu, foron ‘cientos de persones participaron o collaboraron de manera solidaria na organización de les caravanes, repartieronse decenes de miles de panfletos informativos y miles de persones asistieron a les actividaes programaes nos cuatro conceyos’. El CAO, qu’estima y reconoz la participación de músicos y artistes que participaron solidariamente nes actuaciones de cada caravana, asina como a les persones y organizaciones que tán enfotaes na reivindicación de la oficialidá, valora sobremanera la ‘participación de los propios conceyos’, fechu que, en palabres de la organización, una vez más ‘visualiza la reivindicación de la oficialidá de la llingua asturiana y fai rescamplar l’apoyu mayoritariu que tien na sociedá asturiana’. 15 de xunu, 2006 0 FacebookTwitterPinterestEmail
Sociedá Fernando Lastra amenaza a IX pa que nun torgue l’acción de gobiernu na Xunta by asturnet 15 de xunu, 2006 El portavoz de los socialistes na Xunta Xeneral del Principáu, Fernando Lastra, avisó ayeri a Izquierda Xunida de que nun va pasar por que se ruempa la unidá de votu nes decisiones parllamentaries no que toquen a l’acción de gobiernu. Pesie a que s’amosó confiáu en que la crispación provocada ente los socios del executivu a cuenta de la elección del Procurador Xeneral ‘va volver a la normalidá’, ensin falta de romper el pactu, Lastra echó contra’l conseyeru de Xusticia, Francisco Javier García Valledor, acusándolu de tener ‘afán de protagonismu’. Tres de les declaraciones del dirixente d’Izquierda Xunida, Francisco Javier García Valledor, nes qu’almitía que’l pactu de Gobiernu pasaba pel so pior momentu depues del pactu ente la FSA y el PP nel repartu de cargos del Procurador Xeneral y adxuntu al mesmu, Fernando Lastra, portavoz de los socialistes na Xunta Xeneral, acusó al socio de gobiernu de tener ‘afán de protagonismu’, ironizando con que ‘ún pregúntase si Valledor ye quien a respirar ensin sentir la espectación de la rexón alredol d’el cada día’. Sicasí, xunto a la sorna nes sos declaraciones, Lastra tamien dexaba ver una amenaza hacia García Valledor al asegurar ‘que nun vamos aceptar que se ponga como árbitru moral de la política asturiana’, y critió al conseyeru por querer volvese, según el, ‘protagonista d’una presunta rexeneración democrática, qu’el sabrá de que dexeneración parte’. 15 de xunu, 2006 0 FacebookTwitterPinterestEmail
Sociedá Valledor ve más débil l’Executivu tres del alcuerdu ente socialistes y populares by asturnet 14 de xunu, 2006 El conseyeru de Xusticia, Seguridá Pública y Rellaciones Esteriores del Principáu, Francisco Javier García Valledor, aseguró que l’Executivu autonómicu ‘ta más debil’ tres del alcuerdu algamáu ente’l Partíu Popular colos sos socios de gobiernu pal repartu de los puestos de Procurador Xeneral y adxuntu al mesmu, fechu que, en palabres del dirixente d’Izquierda Xunida, dexa ‘baxo mínimos’ el pactu de gobiernu ente la so formación y la FSA. Con estes palabres, el conseyeru de Xusticia mantien la mesma postura amosada ayeri por Noemí Martín, portavoz d’Izquierda Xunida na Xunta Xeneral del Principáu, qu’amenazaba con una nueva epoca nes rellaciones de los grupos parllamentarios, viendose ‘llibres’ d’agora n’adelante pa pactar colos populares en too aquello no que nun tean acordies colos sos compañeros de gobiernu. Mesmo Valledor que Martín ven nel alcuerdu ente socialistes y populares una rotura de la unidá de votu pactada nel pactu de gobiernu cola FSA, amás d’una ‘vulneración de la llei del Procurador Xeneral’, razón pola Izquierda Xunida nunca tuvo a favor d’estos nomamientos alcordaos ente socialistes y populares. Esta ‘desllealtá’ de los socialistes que dexa ‘baxo mínimos’ el pactu, n’opinión de los sos socios de gobiernu, quiciás se materialice la selmana qu’entra na Xunta Xeneral si IX y PP voten a favor del centru de discapacitaos de Llangreu, propuesta de la que ta en contra’l PSOE y a la que tovía ayeri’l presidente Areces tachaba d’ ‘erru’. 14 de xunu, 2006 0 FacebookTwitterPinterestEmail
Sociedá IX considérase llibre pa pactar col PP tres de la propuesta de la Procuradora Xeneral by asturnet 13 de xunu, 2006 La portavoz parllamentaria d’Izquierda Xunida, Noemí Martín, denunció la ‘quiebra de la confianza’ colos socios de Gobiernu tres del pactu algamáu por socialistes y populares pa repartise los cargos de Procueradora Xeneral y adxuntu, que foron pa la ex conceyala del partíu socialista en Xixón, María Antonia Fernández Felgueroso y el popular Noel Zapico. Martín anunció qu’esta actitú de los socialistes ‘inaugura una nueva etapa nes rellaciones de los grupos parllamentarios na Xunta Xeneral’, amenazando con romper la unidá de votu alcordada nel pactu de gobiernu. ‘El grupu socialista inaugura una etapa na que cadún llega a alcuerdos con quien estima oportuno y nosotros constatámoslo’, aseguró la portavoz d’IX na Xunta Xeneral del Principáu. Comportamientu que ‘nos fai más llibres p’actuar cuando nun haiga alcuerdu colos nuestros socios’, según IX. Anque dende’l partíu d’izquierda esta llibertá nun supón la rotura del alcuerdu de gobiernu, sí quiebra la confianza ente entrambes fuerces yá que dende Izquierda Xunida considerase ‘grave que se pacto col PP ensin falar col so sociu de gobiernu’. Poro, dende esti momentu IX nun descarta facer lo mesmo, quier dicise, pactar colos populares, en toes aquelles votaciones nes que nun tea acordies col partíu socialista. 13 de xunu, 2006 0 FacebookTwitterPinterestEmail
Sociedá IAS tacha d’ ‘engañu’ ‘l pactu de gobiernu de PSOE ya IX énte l’empiezu de la TPA by asturnet 13 de xunu, 2006 El portavoz d’Izquierda Asturiana (IAS), Ignaciu Llope, volvió a denunciar ayeri ‘l’engañu y decepción’ que supón el gobiernu d’izquierda ente l’empiezu de les emisiones de la TPA ensin denguna presencia de la llingua asturiana na so programación. ‘Inclumple nuevamente de forma flagrante l’alcuerdu d’IX y PSOE y supón un pasu firme hacia la muerte de la nuestra llingua’, afirmó Llope, que recordó que nel pactu firmáu nel añu 2003 alcordábase l’apueste por ‘un ente públicu modernu tecnicamente, comprometíu cola realidá cultural y llingüística d’Asturies’. Nel pactu de gobiernu firmáu en 2003 pola FSA ya IX-BA roblábase un ‘impulsu de la llingua asturiana nos medios de comunicación apoyando un usu rigurosu y normalizador’ y un prometedor ‘diseñu y usu activu del futuru Ente de comunicació nesi sen’. Según Llope, ‘dende que’l pasáu vienres la TPA empezare les sos emisiones de forma regular, la presencia del asturianu foi nula, lo que vien a confirmar los piores presaxos, confirmando que la burlla del escacarexáu pactu de la izquierda plural algama dimensiones astronómiques’. Pal portavoz d’IAS esti fechu amuesa que ‘si dalguien tenía dalguna duda de la voluntá normalizadora de los responsables de la RTPA y del gobiernu del PSOE-IX-BA yá quedó espeyada’. ‘Esta televisión pagámosla tolos asturianos colos nuestros impuestos, incluyíos los que falamos n’asturianu’, afirmó Llope, que tachó esta actitú de ‘tomadura de pelo, una ironía que’l lema sía ‘Reflexu d’Asturies’ cuando polo que tamos viendo namás que se dedica a reflexar una Asturies monollingüe, ensin personalidá, una Asturies que sólo esiste na cabeza de los responsables de la FSA’. 13 de xunu, 2006 0 FacebookTwitterPinterestEmail
Sociedá IAS de Xixón escueye nueva executiva local de cara a les elecciones del 2007 by asturnet 12 de xunu, 2006 El pasáu sábadu día 10 de xunu los militantes d’Izquierda Asturiana (IAS) en Xixón escoyeron la so nueva executiva local de cara al procesu electoral de mayu de 2007. Pablo Rodríguez Alonso sigue al cargu de la portavocía d’IAS, mentes que la secretaría de la organización ye pa Yolanda González. Carlos Fernández como responsable de les mocedaes del partíu (MIAS), y los vocales Xurde Lluis González, Paula Montes y Daniel Toribios, completen la nueva executiva d’un partíu que nos últimos meses vio aumentada de forma considerable la so militancia na villa xixonesa. Ente los obxetivos de l’agrupación xixonesa d’Izquierda Asturiana ta’l constituyise en referencia asturianista y d’izquierda nel conceyu de Xixón. Y pa ello planteguen la ellaboración d’una llista pa concurrir a los comiciones locales de 2007, cola intención d’ufiertar una alternativa asturianista, d’izquierda y verde nel conceyu. 12 de xunu, 2006 0 FacebookTwitterPinterestEmail
Sociedá Un nuevu portal ufierta ayuda pal aprendizaxe del Euskera by asturnet 9 de xunu, 2006 Los interesaos en conocer l’euskera tienen dende’l pasáu mes de mayu una nueva ferramienta pa sofitar el so aprendizaxe: un portal n’Internet col nome de Ikasbil. El portal foi desenvueltu por HABE, organización pala promoción del aprendizaxe del Euskera como segunda llingua. La dispersión de la xente qu’adeprende un idioma tan difícil como l’euskera (pola so diferencia coles llingües romániques o angloxermániques mayoritaries n’Europa) ye un handicap que xuntar a les dificultaes propies del idioma. Y por mor d’ello xurde esta iniciativa que quier sofitar el trabayu de los “euskaltegis” (centros pala enseñanza del euskera). El portal qu’agora entama ufierta gratuitamente más d’ocho mil items (testos, audiu, vídeos, etc..) catalogaos d’alcuerdu con criterios educativos (nivel de conocimientu del idioma, posibilidaes de dedicación al aprendizaxe, etc..). 9 de xunu, 2006 0 FacebookTwitterPinterestEmail
Comunicación La XPDLLA acusa al Gobiernu de desaniciar l’asturianu énte la puesta en marcha de la RTPA by asturnet 8 de xunu, 2006 Güei empiecen les emisiones regulares de la canal pública de televisión asturiana cola programación, a les ocho, del parte informativu de la tarde. Énte la puesta en marcha de la RTPA y la “presencia marxinal del asturianu nes sos emisiones”, la Xunta pola Defensa de la Llingua Asturiana denunció “‘l despreciu del Gobiernu asturianu pola opinión de los asturianos, que dende hai más de 15 años vien manifestándose mayoritariamente a favor de la esistencia d’emisores públiques de radio y televisión qu’emitan íntegramente n’asturianu” y acusólu d’ “avanzar nel procesu de substitución y desaniciu de la llingua”. La Xunta pola Defensa de la Llingua Asturiana considera inalmisible que la presencia de l’asturianu nes emisiones de la RTPA se solventen cola “especial protección al bable” que figura na llei que dio pie a la creacción del Ente de Comunicación públicu asturianu. “El Gobiernu asturianu demuestra que non solo nun tien intención de trabayar na defensa del patrimoniu llingüísticu d’Asturies, sinon que mantien firme la so voluntá de siguir avanzando nel procesu de substitución y desaniciu de la llingua asturiana”, asegura la organización cívica nun comunicáu públicu. “La esperiencia d’otres comunidaes con llingua propia que yá cunten con organismos de radiotelevisión amuesanos que los medios de comunicación audiovisuales son ferramientes indispensables de normalización social de les llingües amenazaes”, poro l’asociación en defensa de la llingua asturiana considera que quita-y esi usu na televisión pública a l’asturianu ye “imponer el castellanu nun ámbitu nuevu d’usu que-y va dar más puxu na presión qu’exerce pola sustitución llingüística total y apostar pola muerte segura del nuesu idioma autóctonu”. Por ello, la Xunta pola Defensa de la Llingua Asturiana acusa al Gobiernu asturianu “d’actuar d’espaldes a la Constitución, qu’afita como obligación de los poderes públicos «promover les condiciones pa que la llibertá y la igualdá de los individuos y de los grupos nos que s’integra seyan reales y efectives, a la vez que reconoz y garantiza’l derechu a la llibre espresión y al accesu a los medios de comunicación públicos de los grupos sociales significativos, respetando el pluralismu de la sociedá y les demás llingües d’España»; de nun respetar l’Estatutu d’Autonomía d’Asturies, qu’otorga a Asturies les competencies sobre’l desarrollu llexislativu y execución del rexime de tolos medios de comunicación social y sobre’l fomentu y protección del asturianu; y d’incumplir la Llei 1/98, d’Usu y Promoción del Asturianu, qu’obliga a l’Alministración Autonómica a velar por una presencia axeitada del asturianu nos medios de comunicación nos que participe”. 8 de xunu, 2006 0 FacebookTwitterPinterestEmail
Sociedá PSOE y IX-BA ven na reforma del Estatutu la meyor defensa de la integridá d’Asturies by asturnet 8 de xunu, 2006 El plenu de la Xunta Xeneral del Principáu volvió a debatir ayeri la necesidá d’una reforma estatutaria nesta llexislatura, tres de refugar, colos votos a la contra de los parllamentarios de PSOE y IX-BA, una proposición non de llei presentada nel pasáu mes d’avientu pol Partíu Popular pa echar el frenu a les “inxerencies del Bloque Nacionalista Gallegu nel occidente d’Asturies”. PSOE y IX-BA aprovecharon el debate pa pidi-y al PP la so implicación na reforma del Estatutu, considerando qu’ésta “ye la meyor forma de defender la integridá d’Asturies”. El plenu de la Xunta Xeneral debatió ayeri una iniciativa parllamentariapresentada por Ovidio Sánchez en nome del so partíu’l pasáu mes d’avientu cola que se buscaba frenar les “inxerencies” del Bloque Nacionalista Gallegu nes comarques más occidentales d’Asturies. Na defensa de la so proposición non de llei, el parllamentariu popular Marcial González acusó al Gobiernu asturianu de “nun respoder con firmeza la soberanía del territoriu del Principáu”, a lo que’l portavoz del PSOE na Xunta Xeneral, Fernando Lastra dio respuesta asegurando que, pesie a que “la iniciativa del BNG ye desafortunada”, tampoco hai qu’afalar “una discusión que nun existe”. Nel debate celebráu ayeri na Xunta, parllamentarios del Partíu Socialista y d’Izquierda Xunida-Bloque por Asturies aprovecharon pa pidi-y al PP la so implicación na reforma del Estatutu d’Autonomía asturianu, cosa que los populares volvieron a rechazar como vienen faciendo dende los últimos meses. Énte la negativa de los populares, Fernando Lastra, portavoz del grupu socialista, señaló que’l PP “tien d’implicase con rigor y seriedá nuna reforma estatutaria dende dientro porque ye la responsabilidá de tolos grupos”. Pela so parte, la portavoz d’Izquierda Xunida, Paloma Uría, cuestionó l’actitú de los populares asegurando que “ye raro que tean tan interesaos nel estatutu gallegu y nun quieran saber nada del asturianu”. En clara referencia a la iniciativa debatida ayeri nel Parllamentu, Uría afirmó que “‘l meyor instrumentu pa defender la integridá d’Asturies ye, precisamente, la reforma del nuestru estatutu”. 8 de xunu, 2006 0 FacebookTwitterPinterestEmail
Sociedá ‘Asturies, memoria encesa d’un país’ cumple diez años by asturnet 8 de xunu, 2006 El Club de Prensa Asturiana de La Nueva España acueye esta tarde a partir de les ocho una charra titulada ‘Diez años d’una aventura asturianista’, cola que se remembra’l decimu aniversariu de la revista ‘Asturies, memoria encesa d’un país’. Esta revista, recuperadora de tou tipu de documentos, informaciones y noticies hestóriques rellacionaes con Asturies, va ser esta tarde presentada pol antropólogu y academicu de la llingua asturiana, Roberto González-Quevedo. Editada pola Fundación Belenos, que collabora na celebración d’esti actu, ‘Asturies, memoria encesa d’un país’ lleva diez años averando a los asturianos a la conocencia de la hestoria propia, de les sos tradiciones y vezos, asina como a la reconstrucción de la memoria del pueblu asturianu. Nel actu de presentación d’esta tarde van participar los miembros del conseyu de redacción d’esta revista Ignaciu Llope, psiquiatra, escritor y portavoz de partíu Izquierda Asturiana, asina como Xose Nel Riesgo, xeógrafu y escritor tamien. 8 de xunu, 2006 0 FacebookTwitterPinterestEmail