Sociedá Ramón d’Andrés defende un modelu de cooficialidá propiu p’Asturies by asturnet 10 de marzu, 2006 El responsable de la Oficina de Política Llingüística del Principáu, Ramón d’Andrés, defendió un modelu propiu de cooficialidá p’Asturies nel cursu d’una conferencia que pronunció esti xueves 9 en Xixón na Casa del Pueblo de l’agrupación local del PSOE. D’Andrés punxo como exemplu espardible a tolos conceyos l’espediente toponímicu xixonés aprebáu nel plenu municipal d’esti viernes y apostó por superar prexuicios énte la normalización social de la llingua asturiana. Na so conferencia énte los socialistes de Xixón el responsable de Política Llingüística del gobiernu asturianu afirmó que “nun hai un modelu únicu de oficialidá, sinón que caún respuende a la so propia realidá” y defendió pa la nuestra comunidá una fórmula de validación xurídica “que nun tien por qué ser calcada a la d’otres comunidaes”. Una de les característiques de la cooficialidá n’Asturies había ser pa Ramón d’Andrés la conocencia del asturianu pa tolos ciudadanos y el so inxerimientu en tolos niveles de la enseñanza ensin qu’ello representare un principiu d’obligatoriedá, talu lu contemplen los marcos xurídicos d’otres comunidaes. Respective al papelu de la Televisión del Principáu d’Asturies (TPA) na normalización llingüística, D’Andrés amosóse esperanzáu de que l’asturiano va dir entrando a poco a poco y afirmó que lo importante ye que s’escomience “con bon pie”. L’espediente toponímicu que’l plenu del Ayuntamientu de Xixón aprebaba esti viernes 10 ye pal xefe de la Oficina de Política Llingüística “un modelu a siguir polos otros conceyos”, tanto en cuantes a la so minuciosidá y procuru como al consensu social ufiertáu na so elaboración. Pa Ramón d’Andrés el fechu de qu’esti nomemclátor oficial tenga’l vistu bonu d’un equipu de gobiernu municipal como’l de Xixón ye tamién una amuesa de que les coses pueden facese namás con entamales bien dende un principiu. D’Andrés tamién espresó el so enfotu en que la sociedá asturiana sepa superar situaciones pasaes y trabayar activamente na normalización de la llingua en tolos niveles. 10 de marzu, 2006 0 FacebookTwitterPinterestEmail
Música Dark la Eme presenta el so últimu discu “Chigre y dragón” by asturnet 9 de marzu, 2006 El raperu l.leniegu Dark la Eme presenta esti viernes 10 nel Forum de Fnac en Siero el so últimu trabayu discográficu “Chigre y Dragón”(Santo Grial, 2006)acompañáu por una formación de tres músicos habituales nos sos directos: Antón Ceballos al baxu, Nacho García a la batería y Sergio García a les percusiones. L’autor de “Un asturiano en Madrid” (versión autorizada de Englisman in N.Y. de Sting que se convirtió nel himnu oficial de los nuevos emigrantes asturianos) vuelve a la so tierra después de la esitosa presentación de “Chigre y dragón” nel últimu antroxu n’Uviéu, nun conciertu al qu’asistieron más de cuatro mil persones. Nel discu que va presentar esti viernes a les 20.00 hores en Fnac colaboren músicos y cantantes asturianos como Anabel Santiago, Héctor Braga, Alberto Rionda (Avalanch) o Andreas Priwitz. 9 de marzu, 2006 0 FacebookTwitterPinterestEmail
Música La Complutense noma a Serrat ‘honoris causa’ por defender la convivencia llingüística by asturnet 9 de marzu, 2006 La Universidá Complutense de Madrid va nomar ‘honoris causa’ al cantautor catalán Joan Manuel Serrat nun actu que va celebrase’l prósimu 15 de marzu na sé de la institución académica. Ente los méritos de la distinción, fecha a propuesta del rector Carlos Berzosa, destácase la contribución del músicu barcelonés a la convivencia ente les llingües castellana y catalana. Otros méritos que se resalten de la trayectoria artística de Serrat son el so llabor de difusión de la poesía española y latinoamericana, asina como’l so puxu a la nomada canción d’autor tanto en catalán como en castellán. Joan Manuel Serrat remata estos díes el so nuevu discu, un trabayu grabáu en Menorca con un repertoriu íntegramente en catalán tituláu “Mo” (la pronunciación del topónimu Maó polos naturales de la isla balear). El reconocimientu de la Universidá Complutense destacando la contribución del cantautor a la convivencia llingüística produzse nun momentu de másima cripación ente los sectores más conservadores del nacionalismu español dica la diversidá idiomática del estáu y especialmente en Cataluña, y puede intepretase como un xestu del Madrid cultural ya intelectual al papelu desenvueltu por artistes como Serrat nel afitamientu democráticu del estáu español dende la so filiación a la diversidá pluricultural. 9 de marzu, 2006 0 FacebookTwitterPinterestEmail
Sociedá El Conceyu de Xixón lleva al Plenu el so espediente toponímicu by asturnet 9 de marzu, 2006 El Plenu del Ayuntamientu de Xixón va tratar esti viernes 9 l’aprebación del espediente de revisión de la toponimia del conceyu elaboráu pola Xunta Asesora del Principáu. L’informe ye’l resultáu d’un llargu y pormenorizáu trabayu nel que los espertos estudiaron nomes de llugar de tolos núcleos de población menores y mayores, urbanos y rurales. L’espediente xixonés va ser el primeru d’una de les tres ciudaes con más población d’Asturies. La Xunta de Toponimia, organismu multidisciplinar de l’administración asturiana, estudió a lo llargo de meses los topónimos de les venti parroquies rurales de Xixón y de los seis distritos urbanos pa iguar el nomenclátor final al que’l Plenu va dar el so vistu bonu na so sesión d’esti viernes. Va ser la primer vez nel que parroquies importantes como Xove, Valdornón, Ciares o Montiana recuperen oficialmente los sos nomes tradicionales.L’espediente toponímicu del conceyu playu fue ún de los que cuntaron con una participación ciudadana más amplia de tolos que se vienen entamando hasta agora, llegando en munchos casos al debate detalláu ente vecinos y espertos sobre la correción de los topónimos estudiaos. 9 de marzu, 2006 0 FacebookTwitterPinterestEmail
Sociedá La conceyal del PP n’Uviéu Isabel Pérez Espinosa afirma que Graciano García pactó con Areces el muséu d’Avilés by asturnet 9 de marzu, 2006 La conceyal del Partido Popular (PP) d’Uviéu, Isabel Pérez Espinosa, manifestó esti miércoles 8 en declaraciones a diversos medios que l’equipu de gobiernu municipal entiende que’l futuru Muséu de los Premios Príncipe d’Asturies y el centru cultural diseñáu por Oscar Niemeyer pa la ría d’Avilés son proyectos distintos o pueden selo, según la interpretación que da’l Consistoriu carbayón de lo espresao pol Patronatu de la FPA tres la so reunión en Brasil col arquitectu. Pérez Espinosa citó tamién les palabres del presidente Areces calificando’l futuru centru cultural de la ría avilesina como “muncho más que l’equipamientu d’un muséu” y recalcó la idea de que la batalla uvieína por ser la sé del Muséu de los Premios Príncipe “nun ta perdida y puede ganase si los ciudadanos siguen sofitando la campaña del Ayuntamientu”. La edil popular dirixó les sos crítiques al director de la Fundación, el periodista Graciano García, al qu’acusó de pactar col presidente del Principáu l’afayamientu del proyectu de muséu n’Avilés “d’una manera que él tendrá de desplicar alcuando”, dixo Espinosa. L’Ayuntamientu que preside Gabino de Lorenzo lleva recoyíes más de diez mil firmes dende que va unos díes escomenzó la so campaña p’allugar el muséu de la FPA na ciudá del carbayón. Isabel Pérez Espinosa declaró que la recoyida de firmes y la campaña van siguir “hasta que sea oficial que’l muséu queda n’Uviéu”. 9 de marzu, 2006 0 FacebookTwitterPinterestEmail
Música Rafael Lorenzo celebra trenta años dedicaos a la música popular asturiana by asturnet 8 de marzu, 2006 L’agrupación n’Occidente de la Xunta pola Defensa de la Llingua entama esti sábadu 11 en Tinéu una folixa d’homenaxe a Rafael Lorenzo cola que se quier remembrar la dedicación a la música popular del cantautor a lo llargo de trenta años. La Bandina’l Tombo, Xosé Ambás, Pedru Pereira y La Banda Gaitas ‘Rapigueiro’ de La Puela, ente otros, van tar arrodiando al músicu tinetense. El cine Marvi de la villa occidental acueye’l conciertu en recordanza de la treintena d’años que lleva Rafael Lorenzo cantando en llingua asturiana. La cita ye esti sábadu 11 a les 19.30. De siguío’l conciertu la Xunta organiza un filandón-folixa na Plaza las Campas onde podrá degustase la gastronomía del conceyu y beber vino del país. Rafael Lorenzo pertenez a la xeneración de músicos que se dio en nomar Nueu Canciu Astur. Los sos últimos trabayos discográficos tuvieron dedicaos a la figura d’Alfonso Camín y al folklor vaqueiru. 8 de marzu, 2006 0 FacebookTwitterPinterestEmail
Sociedá Diversos actos conmemoren el Día Internacional de la Muyer by asturnet 7 de marzu, 2006 Diversos actos van conmemorar esti ocho de marzu, Día Internacional de la Muyer. Una concentración n’Uviéu convocada por colectivos feministes, actividaes reivindicatives y lúdiques, xunta les celebraciones institucionales igüen el programa de la xornada na que se remembra la llarga llucha de les muyeres pola so llibertá. La primer organización en celebrar un actu relacionáu col 8 de Marzu fue la formación moza Darréu qu’esti sábadu 4 entamó una concentración cívica en Candás na que se lleó un comunicáu sobre la necesidá de xunir la llucha polos derechos de les muyeres a la llucha polos derechos populares. Esti miércoles 8 va ser la Mocedá d’Izquierda Asturiana (MIAS) la encargada de protagonizar un actu na sala polivalente del Campus del Milán a les 17,00 hores con una conferencia titulada “Rellaciones patriarcales n’estremaos ámbitos sociales”. Al pieslle de la conferencia de MIAS va actuar el grupu de pandereteres Dulcamara, alrodiu de les 19.30. Pel so llau el Conceyu de Xixón aprovecha la celebración del 8 de Marzu p’abrir una cai dedicada a la científica asturiana Margarita Salas y entama, al través de la Fundación Municipal de Cultura, la esposición “Mujeres en la ciencia”, que va poder visitase hasta’l 31 de marzu nel Antigu Institutu de Xixón. 7 de marzu, 2006 0 FacebookTwitterPinterestEmail
Sociedá La Generalitat valenciana promueve la Ciudá de les Llingües pa difundir l’español by asturnet 7 de marzu, 2006 L’anunciu del presidente de la Generalitat de Valencia, Francisco Camps, de crear en Castelló la Ciudá de les Llingües, destinada a convertise nun centru internacional de difusión del español, provoca’l refugue de grupos defensores de la identidá cultural valenciana pa los que’l proyectu del gobiernu autonómicu “distorsiona la realidá llingüística” de la comunidá llevantina. El más activu d’estos colectivos Acció Cultural del País Valenciá calificó de “burla y menospreciu sin precedentes contra la cultura y la llingua propies del País Valencianu”, el proyectu del presidente Camps y considera “inaceptable” la propuesta de la Ciudá de les Llingües. La hestórica asociación cultural manifestó que “mientres la demanda de munchos padres valencianos por llevar a los sos fíos a programes d’enseñanza na nuestra llingua alcuentra dificultaes por escasa, el Gobiernu valencianu pretende dar toles facilidaes a alumnos estranxeros pa deprender español en Castelló”. El presidente de la Generalitat valenciana, el ‘popular’ Francisco Camps aprovechó la última convención nacional del PP pa presentar y promocionar el so proyectu de la Ciudá de les Llingües, una iniciativa que busca, según les sos palabres: “Facer d’España una marca que se conoza nel mundu enteru y del idioma español una fonte d’ingresos pal nuestru país, como ya la vien siendo de cuantayá”. El futuru centru de deprendizaxe del español va tar empobináu a estudiantes estranxeros que quieran perfeccionar el conocimientu del castellano. 7 de marzu, 2006 0 FacebookTwitterPinterestEmail
Música El Pericote de Fardaxu escoyíu nel Irish & Celtic Music Podcast by asturnet 6 de marzu, 2006 L’Irish & Celtic Music Podcast ta acabante d’escoyer el tema “El Pericote” del grupu Fardaxu pal so númberu de marzu del mismo. Hasta agora Fardaxu yera un grupo recomendáu por esti sitiu asturianu-americanu de EEUU. Dende güei entama la difusión de la so versión de El Pericote nos Estaos Xuníos. Fardaxu comparte’l Podcast de marzu xunta Karen Mal de New England, Seamus Keneddy de Belfast, Kevin Beham de New Jersey y los Brother 3 de Dallas ente otros.Los discos de Fardaxu viéndense na Arxentina en Tamaba, Adolfo Alsina 1994, tf: 4952-9803 (sede de Fardaxu) y en Musimundo, Yenni’s, Deep Blue (Paseo La Plaza) ente otres disqueríes y na web www.piramily.com . 6 de marzu, 2006 0 FacebookTwitterPinterestEmail
Música Niundes saca a la cai el so primer trabayu discográficu by asturnet 6 de marzu, 2006 “Enxamás ye pa siempre” ye’l títulu del primer trabayu discográficu de Niundes , una banda formada por seis músicos con raigaños en Llanes qu’al pesar del so breve bagaxe vien apurrir aires de frescura al panorama folk asturianu. La producción artística del discu ta a cargu de Xel Pereda, que tamién colabora en dellos temes xunto al so compañeru de Llan de Cubel Elías García. Publicáu pol sellu Lloria Discos , grabáu nel estudiu Mundo Sonoro y mezcláu en Stereofolk Studios, “Enxamás ye pa siempre” ufierta un conxuntu d’once temes, dalgunos de composición propia y el restu d’inspiración popular, amás d’una pieza escrita pol desapaecíu Pedro Bastarrica. El primer discu de Niundes apuesta por un folk de llinia clara interpretáu con fonda llimpieza instrumental y magnetizáu pola suxerente voz de la solista Belén García. La grabación impecable y la mano minuciosa del productor Xel Pereda (Llan de Cubel, Nacho Vegas…) faen de “Enxamás ye pa siempre” una de les novedaes más interesantes de les últimes fornaes de la música asturiana. Niundes fórmenlo amás de Belén García a la voz y a los teclaos, Ramón González al vigulín, Omar Ceballos na percusión, Isidro Suárez a la flauta travesera, Jonathan Ward a la guitarra acústica y Roberto Tarano a la gaita y xiblates. 6 de marzu, 2006 0 FacebookTwitterPinterestEmail