Sociedá La Escuela de Seronda pide respetu a les ordenances municipales de la llingua by asturnet 7 de mayu, 2006 La Escuela de Seronda en Xixón y los Conseyos de Mocedá pidieron nun comunicáu públicu, el respetu pa los derechos llingüísticos de los falantes d’asturianu y gallego-asturianu asina como pa les ordenances municipales de la llingua nos conceyos. D’esta manera, espresaron tamien el so apoyu a los Conseyos Asesores y a les Oficines de la Llingua que dende los conceyos vienen trabayando nesi sen. Nel comunicáu, invitábase a tolos conceyos asturianos ‘al diálogu constructivu pa entrar ensin prexuicios nel alderique de Normatives y Ordenances Municipales de la Llingua, pa protexer los drechos llingüísticos, d’alcuerdu col sentir de la población y les encuestes sociollingüístiques, nel marcu de la vixente Llei d’Usu y Promoción del Bable/Asturiano y los planes de normalización de les Oficines de Política Llingüística’. 7 de mayu, 2006 0 FacebookTwitterPinterestEmail
Sociedá IAS pide un cambiu radical nel discursu y na política económica del gobiernu d’Areces by asturnet 7 de mayu, 2006 El portavoz d’Izquierda Asturiana (IAS), Ignaciu Llope, desixe un cambiu radical nel discursu y l’actuación de Vicente Álvarez Areces, presidente del Gobiernu del Principáu d’Asturies, no tocante coles ‘lleendes urbanes’ y apunta que, mentes que nel gobiernu gallegu ta considerada una “lacra” la emigración de la mocedá más cualificada, Areces y el gobiernu asturianu aporfien en calificala de “mera movilidá xeográfica de mozos dinámicos” nel contestu europeu. El portavoz d’Izquierda Asturiana (IAS) Ignaciu Llope, señaló güei, a raíz de les nueves declaraciones de Vicente Álvarez Areces sobre la emigración de mocedá asturiana, que el presidente metió dientro ‘d’una Europa na que se fomenta la movilidá’; el contraste ente la visión y el discursu que tienen sobre’l mercáu llaboral, la cohesión social y los intereses de los ciudadanos un gobiernu como l’asturianu, que ye ‘un meru xestor d’una debacle económica y social y otro gobiernu, el gallegu, que tien visión de país y nun tenta xustificar lo inxustificable’. Según Llope, estas declaraciones d’Areces súmense a les que ‘facía hai unes selmanes el Conseyeru d’Industria, Graciano Torre, que comentaba, tocante a les decenes de miles d’asturianos que tolos años tienen que dexar el país pa trabayar fuera, que llonxe de ser un problema o una tendencia a correxir, tábemos ente la mera movilidá xeográfica de mozos con una mentalidá dinámica’. Respetive a esto, Llope fixo comparanza con unes declaraciones del secreatrio xeral de emigración gallegu, Manuel Luis Rodríguez, que nuna intervención nel parllamentu gallegu aseguraba que ‘taben perdiendo más mozos y con meyor formación que los que recibe’ polo qu’aseguró que ‘Galicia ta dexando marchar activos mui importantes’, lo que tachó como una gran lacra pal so desarrollu. Pa Llope, ‘la mera comparanza de les declaraciones pon na so xusta midida la visión de país, de condiciones llaborales, de bienestar y de serviciu a la ciudadanís que tienen los políticos asturianos, y en concretu’l presidente Areces, en comparación colos gallegos’. Razón pola que’l portavoz d’IAS pidió un cambiu radical nel discursu y na política económica asturiana nesi sen. 7 de mayu, 2006 0 FacebookTwitterPinterestEmail
Sociedá Xuan Santori presenta Milenta Voces by asturnet 7 de mayu, 2006 Esti llunes a la una la tarde, el filólogu Xuan Santori presentó dientro de los actos programaos en LlibrUvieu 2006, el so llibru ‘Milenta Voces (Visiones del Surdimientu)’, editáu por Trabe, como resultáu d’un observatoriu pa ver la evolución del procesu de recuperación cultural del asturianu. Xuan Santori (Uvieu, 1968) ye llicenciáu en Filoloxía Inglesa. Tien publicaos tres llibros de poesía: Zunes, 1998; Les inconveniencies de la especie, 2000 y Bis a bis, 2004. Amás de les traducciones Poesía epica anglosaxona (1999) y Una vez n’Europa (2000) de John Berger, ye autor d’Alministrar la tierra. ¿Que ye que ye la ecología? y Mercar pa vivir. ¿Que ye que ye’l consumismo? 7 de mayu, 2006 0 FacebookTwitterPinterestEmail
Sociedá La prensa clandestina n’Asturies a debate by asturnet 7 de mayu, 2006 Esti miercoles día 10 de mayu a les doce la mañana, el Salón de Grados del Departamentu d’Historia de la Universidá d’Uvieu va acoyer un coloquiu basáu nel llibru recien editáu por Gabriel Santullano y que lleva por títulu ‘La prensa clandestina en Asturias’. Xunta l’autor, van participar nel debate Ruben Vega, del Departamentu d’Historia Contemporánea; Sara Fresno, responsable del aparatu de prensa clandestina del PCE en Xixón nos años setenta; y Javier Ramos, responsable de la publicación ‘Noticias 1973’ y collaborador de ‘Verdad’. L’historiador Gabriel Santullano ye l’autor del volume “La prensa clandestina en Asturias”, editáu pol sellu uvieín KRK embaxo l’agospiu de la Fundación Juan Muñiz Zapico. El llibru estudia les publicaciones de la resistencia antifranquista dende la entrada del exercitu rebelde na seronda de 1937 hasta la muerte del dictador en 1975. Santullano, especialista n’hestoria contemporánea y militante activu de la izquierda antifranquista nos años sesenta y setenta, presenta nesti estudiu un minuciosu trabayu d’investigación sobre la voz de los que nun teníen voz tres la derrota republicana y prosiguíen la so llucha al traves del poder de la palabra. 7 de mayu, 2006 0 FacebookTwitterPinterestEmail
Sociedá Discursu Institucional de la Presidenta de l’Academia nel Día de les Lletres by asturnet 5 de mayu, 2006 Güei ha ser pa nós, y pa tolos asturianos y asturianes, un día de gayola y de contentu, porque ye un día dhomenax a la lliteratura asturiana, a los homes y muyeres que la ficieron vidable, nel pasáu y nel presente; y, darréu dello, un día dhomenax a la llingua na qualita. Gracies al bon facer de munchos de los nuesos escritores podemos dicir con orguyu que la lliteratura asturiana ye yá una realidá bultable, en cantidá y en calidá, que se pue midir ensin rocees coles lliteratures que se faen nes otres llingües del estáu; y ello magar los pilancos quenarten lidioma que-y val de mediu despresión. 5 de mayu, 2006 0 FacebookTwitterPinterestEmail
Música Nacho Vegas y Las Esferas Invisibles actúen esta nueche na Sala Albéniz de Xixón by asturnet 4 de mayu, 2006 Güei a les nueve la nueche, na Sala Albeniz de Xixón, el cantante Nacho Vegas, ex componente de Manta Ray, va dar un conciertu acompañáu pola so banda ‘Las Esferas Invisibles’. Pela so parte, Manta Ray, l’antigua formación de la que Vegas foi vocalista, va tocar nel mesmu escenariu’l prósimu día 12 de mayu. Nacho Vegas trabaya n’actualidá nun discu de romances asturianos, tanto n’asturianu como en castellanu, al tiempu qu’andecha con Enrique Bunbury, el zaragozanu que se fixere famosu como cantante d’Heroes del silencio y qu’agora ye productor d’una bona riestra de grupos d’esitu, n’otru trabayu nel qu’entrambos fusionen los sos gustos y los sos estilos na busca d’un soníu mui personal. 4 de mayu, 2006 0 FacebookTwitterPinterestEmail
Música ‘Semeya de la rabia’ nuevu discu de Skontra by asturnet 3 de mayu, 2006 El grupu Skontra ta acabante d’editar el so últimu discu que lleva por títulu ‘Semeya de la rabia’. Diez nueves canciones d’esta formación xixonesa nacida nel añu 2002 que foron grabaes nos estudios Tutu de Corvera y autoproducíes polos sos miembros, y que pel momentu sólo va poder mercase nos conciertos de la banda o al travies de la internet. ‘Semeya de la rabia’ ta formáu por diez temes que, nel estilu del grupu, se decanten pol punk/hardcore y el ska/reggae, anque ensin escaecer el folklore tradicional asturianu. ‘Son tus puños’, ‘Y agora!’, ‘Llucha!’, ‘Oi! en las calles’, ‘Nun se pue’, ‘Y sigo en pie’, ‘En tu honor’, ‘Gaiteru rude-boy’, ‘Güey ni ayeri’ y ‘Asturies va bien!’ son los títulos de los temes d’esti primer discu de llarga duración editáu por Skontra. Web de Skontra 3 de mayu, 2006 0 FacebookTwitterPinterestEmail
Sociedá La XDLLA vuelve convocar la manifestación del Día de les Lletres by asturnet 3 de mayu, 2006 La Xunta pola Defensa de la Llingua Asturiana convoca un añu más la so tradicional manifestación del Día de les Lletres cola que demanda’l reconocimientu llegal qu’oficialice esta llingua, equiparando asina los derechos de los falantes d’asturianu colos de los falantes de castellán. La manifestación que, mesmo que n’anteriores convocatories, va salir a les siete y media la tarde de la estación de la Renfe d’Uvieu, va acabar a les puertes del teatru Filarmónica onde l’Academia de la Llingua Asturiana cellebra’l so actu institucional nel qu’esti añu Manuel García Galano va tomar posesión como Miembru d’Honor. Arriendes del discursu institucional de la Presidenta de l’Academia de la Llingua Asturiana, l’actu va abrise cola actuación del gaiteru Iñaki Sánchez Santianes y la cantante de tonada Bibiana Sánchez García; y va pesllase col grupu folk DRD. L’Academia de la Llingua Asturiana, siguiendo’l facer entamáu la edición pasada, fai un brinde a los asistentes pa que, na midida de les sos posibilidaes, lleven traxe asturianu de mou qu’esti puea, pasu ente pasu, dir asitiándose nos actos más solemnes. Hai que dicir que la sesión academica podrá siguise en tol mundu en tiempu real al travies d’Internet, darreu que l’ALLA quier festexar con Radio Sele’l fechu de llevar 20 años nes ondes, nun inequívocu compromisu cola normalización social de la llingua asturiana. Como vien socediendo tolos años, llueu del actu academicu habrá una espicha, abierta a la participación de tola xente, nel restaurante La Gruta, con bailles y música asturiana. 3 de mayu, 2006 0 FacebookTwitterPinterestEmail
Sociedá Inaciu Galán y Humberto González presenten en Xixón el Diccionariu Básicu Asturianu-Inglés, Inglés-Asturianu by asturnet 3 de mayu, 2006 Güei a les ocho la tarde Inaciu Galán y González va presentar na Llibrería Ítaca de Xixón, na cai Marques de Casa Valdes, 80, el Diccionariu Básicu Asturinu-Ingles, Ingles-Asturianu. L’actu va ser introducíu pol escritor Humberto González, presidente del Conceyu d’Escritores Asturianos. Na presentación va facese una llectura de poemes traducíos del asturianu al ingles y del ingles al asturianu por dellos poetes. 3 de mayu, 2006 0 FacebookTwitterPinterestEmail
Música Les gaites asturianes van participar nel Festival de Regent Street de Londres by asturnet 2 de mayu, 2006 Esta mañana, el director de la Oficina de Turismu en Londres, Ignacio Vasallo, anunció que’l Festival de Regent Street que se va cellebrar el prósimu 4 de setiembre va tar dedicáu nesta edición a España, ‘siendo esta la primer vez qu’esti certame se dedica a un país’. Pa tal eventu, nel que se corta’l tráficu de la conocida cai londinense, les comunidaes asistentes amuesen lo meyor del so folclore y de la so gastronomía, cuntándose pa esti añu cola presencia de dalgunes bandes de gaites asturianes. Esti eventu nel que ta previsto que participen representantes de toles comunidaes españoles, en palabres de Vasallo, ‘representa una plataforma enorme de publicidá, yá que l’añu pasáu foron unes 300.000 persones, amás de tener una gran cobertura na prensa y na televisión’; poro ésta ye una bona oportunidá pa presentar la cultura asturiana ente la comunidá británica. 2 de mayu, 2006 0 FacebookTwitterPinterestEmail