Sociedá Izquierda Xunida reclama un plan de movilidá pal fomentu del usu del tren by asturnet 25 de xineru, 2007 El coordinador xeneral d’Izquierda Xunida d’Asturies, anunció ayeri la so apuesta pola redacción d’un plan de movilidá sostenible. Esti plan habría fomentar y potenciar l’usu del tren n’Asturies. Iglesias reclamó qu’el proyectu forme parte del Plan Estratéxicu d’Infrastuctures y Tresporte estatal. Jesús Iglesias reclamó que se treslladen a Asturies los conteníos del plan estratéxicu, que permitan meyorar les comunicaciones dientro del aria metropolitana del país. Pa ello Iglesias considera qu’el “ferrocarril ha ser un elementu central pa la articulación de los servicios intermodales de tresporte”. El coordinador de la coalición d’izquierdes pidió qu’Asturies nun quede fuera de les inversiones estatales que se tán desenvolviendo pa facilitar l’usu del tresporte públicu. Pela so parte Oscar Sainz, Secretariu Xeneral Estatal del Sector Ferroviariu, reconoció qu’el gobiernu asturiana taba en conversaciones con FEVE pa facer estudios sobre’l proyectu del tren-tran. El tren-tran ye un modelu intermediu ente’l tranvia urbanu y el tren de cercaníes. El proyectu del gobiernu asturianu ye facer una llinia d’esti tipu de ferrocarril que conecte les cuenques col centru d’Asturies. Esti proyectáu foi criticáu y rechazáu polos sindicatos UXT y CCOO que consideren que “nun resolverá los problemes de comunicación de la comarca minera”. 25 de xineru, 2007 0 FacebookTwitterPinterestEmail
Sociedá La Xunta Executiva d’Andecha denuncia l’intentu de secuestru de la organización by asturnet 25 de xineru, 2007 La Xunta Executiva d’Andecha ta acabante emitir un comunicáu nel que denuncia qu’un grupu de militantes de la organización ingresó nel Rexistru de Partíos Políticos una Xunta Executiva diferente de la escoyida nel últimu conceyu nacional. Nel últimu conceyu nacional de la organización Germán Abad foi escoyíu como secretariu d’organización y Roberto Holgado como coordinador de la organización del partíu. Dende dalgunos sectores d’Andecha Astur se ta falando de la esistencia de dos Andeches y que los tribunales habrán decidir cuala ye la válida. La Xunta Executiva encabezada por Germán Abad na carta unviada a la militancia de la organización anunciaba de qu’un grupu de persones, encabezaes por Arturu Bermeyu ente la so incapacidá d’asumir el resultáu del conceyu nacional acababen d’inscrbir una nueva Xunta Executiva. Na carta considérase que l’actuación intenta “mediante’l golpismu, la imposición y la corrupción” apropiase del destín del partíu políticu. Dende la Xunta Executiva considérase qu’esti grupu aplica “métodos fascistes” amás de qu'”entienden la organización como un patrimoniu personal” y nun son capaces de “convivir nuna organización con pluralidá, discrepancia y democracia” El grupu encabezáu por Arturu Bermeyu, y nel que figuraríen persones como Marcos Abel Fernández Marqués o’l representante de Darréu, Mario Arbesú, rexistró un acta d’un conceyu nacional que se cellebrera’l 9 d’avientu, la mesma celebración del conceyu ponse en dulda dende la Xunta Executiva d’Abad. Dende la Xunta Executiva considérase qu’esiste una “falsificación” d’un documentu y qu’amás esta entregóse nel Rexistru de Partíos Políticos. Dende la Xunta Executiva de la organización d’izquierda nacionalista consideren que los movimientos tendríen por finxu “evitar qu’Andecha se presente a les prósimes elecciones”, asina mesmo la Xunta Executiva afirma que salió col 90% de los votos nel Conceyu Nacional fechu en Candás. La Xunta Nacional afítase como la escoyeta “democrática de les bases” contra “la imposición del grupu de Bermeyu”. La executiva pide que los militantes defiendan la organización de los ataques del fascismu y la corrupción”. 25 de xineru, 2007 0 FacebookTwitterPinterestEmail
Plástiques “Imaxe y Identidá”, diez visiones artísticques sobre l’home contemporáneu by asturnet 24 de xineru, 2007 La Obra Social de “La Caixa” y l’Ayuntamientu de Xixón presenten nel Antiguu Institutu Xovellanos una amuesa sobre la representación de la figura humana nel arte contemporáneu. La Obra Social de “La Caixa” en colaboración cola Fundación Municipal de Cultura de Xixón presenten una selección d’obres de la Colección d’Arte COntemporáneu de la Fundación “La Caixa” al rodiu del conceptu del retratu embaxo 15 semeyes y videointalaciones, una parte mínima de les 800 qu’integren los fondos de la colección d’arte contemporáneu de La Caixa. L’amuesa ye una galaería d’imáxenes creaes por diez artistes que tresformaren el tradicional xérneru del retratu dende puntos de vista bien diferentes. Christian Boltanski, Gillian Wearing, Cindy Sherman, Sam Taylor-Wood, Günther Forg, Craigie Horsfield, Óscar Muñoz, Bruce Nauman, Carlos Pazos y Stefan Hablutzel esploren los medios de representación y les convenciones culturalmente establecíes pa destacar que, a la fin, toda imaxe ye una ficción. L’amuesa aconceya, sobre too, fotografíes y videointalaciones que planteguen una reflexón sobre la natura mesma de la imaxe col obxetivu de romper les barreres que faen de llende ente’l públicu y la creación contemporánea y promover l’accesu de la sociedá al arte. 24 de xineru, 2007 0 FacebookTwitterPinterestEmail
Educación Asoléyase un estudiu sobre les oportunidaes llaborales de los universitarios de la UE by asturnet 24 de xineru, 2007 El Director Xeneral de Rellaciones Esteriores y asuntos Europeos, Darío Díaz, va asistir mañana na Casa dAsturies en Bruseles a la presentación de la publicación Estudiu de les oportunidaes llaborales pa los universitarios nel contextu de la Unión Europea, insertu dientro de les actuaciones del Añu Européu de la Movilidá cellebráu el pasáu 2006. Lestudiu va mostrar les conclusiones dun proyectu de movilidá llaboral co-financiáu pola Unión Europea y que tuvo iguáu pola Universidá y la Cámara de Comerciu dUviéu y nel que participó esta Dirección Xeneral nel marcu del 2006 Añu Europáu de la Movilidá de los Trabayadores. Con esti trabayu tartose de meyorar laccesu al trabayu de los estudiantes universitarios de la Unión Europea proporcionando información a los demandantes sobre les característiques xenerales del mercáu de trabayu de la Unión Europea asina como de les oportunidaes llaborales de les fasteres académiques nos distintos países de la Unión. Tamién se busca poner a disposición de los trabayadores les ferramientas necesaries palgamar dafechu la so movilidá nel marcu de la Unión, prestando una atención diferenciada al colectivu de los universitarios. 24 de xineru, 2007 0 FacebookTwitterPinterestEmail
Educación La Conseyería de Xusticia ufre tres beques de formación by asturnet 24 de xineru, 2007 La convocatoria d’estes tres beques respuende a la política de formación en materia de rellaciones internacionales y europees, que dende la Dirección Xeneral de Rellaciones Esteriores y Asuntos Europeos se vien desarrollando nos últimos años. Les beques tan empobinaes a los estudiantes d’últimu cursu de la Universidá d’Uviéu o del Centru Asociáu de la UNED n’Asturies que cursen les carreres de Derechu, Económiques, Polítiques, Socioloxía, Xeografía e Historia. La xera durante la duración de les beques va consistir na collaboración nel trabayu diariu que se fai na Dirección Xeneral de Rellaciones Esteriores y Asuntos Europeos. Durante diez meses los becarios van tener la oportunidad de trabayar na Dirección Xeneral de Rellaciones Esteriores del Principáu y recibir formación específica rellacionada col so puestu .Los beneficiarios de la beca van recibir una ayuda mensual de 400 euros o la cantidá correspondiente nel casu de que por dalgún motivu la duración de la beca fuese inferior. Todos aquellos estudiantes interesaos en optar a les beques deberán presentar la so solicitú conforme a los requerimientos publicaos nel Boletín Oficial del Principáu d’Asturies del 15 de xineru de 2007 nel Rexistru de la Conseyería de Xusticia, Seguridá Pública y Rellaciones Esteriores del Principáu d’Asturies (c/ Uría, 10, 8.ª planta, 33071 Uviéu) a l’atención del Ilmo. Sr. Conseyeru de Xusticia, Seguridá Pública y Rellaciones Esteriores del Principáu d’Asturiaes nel plazu de venti díes hábiles, contaos a partir del día siguiente a aquel nel que tenga llugar la publicación de la presente convocatoria nel BOPA. Procedimientu solicitú de les Beques de Formación 24 de xineru, 2007 0 FacebookTwitterPinterestEmail
Sociedá La UAS presenta a Sánchez Vicente como candidatu a l’alcaldía de Xixón by asturnet 23 de xineru, 2007 La Unión Asturianista presenta a Xuan Xosé Sánchez Vicente como candidatu a l’alcaldía de Xixón. La coalición formada ente PAS y URAs fizo la presentación oficial de so candidatu nun actu’l pasáu 19 de xineru. Los asturianistes llevarán nel so programa la llucha contra la emigración xuvenil y l’accesu a la vivienda como másimes propuestes del so programa electoral. La llista de la Unión Asturianista, al conceyu de Xixón, completaráse ente militantes del Partíu Asturianista y de la Unión Renovadora Asturiana. Asina entovía nun se conoz el nome del segundu de la llista, que correspondería a la URAS. Sánchez Vicente competirá pola alcaldía de la villa de Xovellanos frente a l’actual alcaldesa, Paz Fernández Felguero; la candidata del PP, Pilar Fernández Pardo; el candidatu d’Izquierda Xunida y actual tercer teniente alcalde, Jesús Montes Estrada; asina como col candidatu d’Izquierda Asturiana l’escritor y historiador, Pablo Rodríguez Alonso. 23 de xineru, 2007 0 FacebookTwitterPinterestEmail
Sociedá Conferencia sobre l’arquitectura civil asturiana n’Avilés by asturnet 22 de xineru, 2007 El grupu Escontra’l Raigañu en collaboración cola Oficina de Política Llingüística (Estaya de la Llingua) d’Avilés entama pa esta tarde una conferencia sobre l’arquitectura civil asturiana. Nesta conferencia Germán Rubín falará sobre los horros, paneres y cabazos asturianos. La conferencia entamará a partir de les 19,30 y el llugar de la so imparticipación ye’l Palaciu de Valdecarzana. D’otru llau güei acaba’l cursu de perfeccionamientu d’asturianu d’Avilés. Esti cursu echó a andar el 2 d’ochobre y tuvo puestu por Montserrat Machicado. 22 de xineru, 2007 0 FacebookTwitterPinterestEmail
Sociedá La Xunta pola Defensa de la Llingua entregó’l Pegollu a Felpeyu. by asturnet 22 de xineru, 2007 Xuan Nel Expósito, Ruma Barbero, Lisardo Prieto y Diego Pangua recibieron el Pegollu de los Premios Andrés Solar, qu’añalmente concede la Xunta pola Defensa de la Llingua Asturiana. Ruma Barbero faló en nome de los premiaos ufriendo’l premiu “a tola xente de la música asturiana” y n’especial a Ígor Medio y Carlos Redondo, los músicos de Felpeyu que morrieron nun accidente de tráficu nel mes de xunu pasáu. El madreñazu, categoría negativa d’estos premios, correspondió-y al presidente asturianu Vicente Alberto Álvarez Areces “pola so so trayectoria llamentable de despreciu y agresión constante al patrimoniu llingüísticu y a los derechos de los falantes” en pallabres del acta del xuráu. Como ye avezao’l premiáu nesta categoría nun fizo actu de presencia. L’actu, celebráu nel Antiguu Institutu Xovellanos de Xixón, tuvo dirixíu pol periodista Inaciu Varillas acompañáu por Yolanda González y Lluis Miguel Orviz. Esti últimu exerció de portavoz de la organización de defensa de los derechos llingüísticos dando un discursu nel que se repasaron les diferentes inciatives que dende la Xunta pola Defensa de la Llingua s’entamaren a los llargo de 2006. El portavoz de la Xunta criticó duramente les polítiques de normalización que se vienen faciendo nos últimos años, a les que calificó como “exerciciu de distracción que nun suponxo un esfuerzu planificáu pa normalizar la llingua”. Orviz dedicó bona parte de la so intervención a facer un balance de los diez años de trabayu de la estaya xuvenil de la Xunta pola Defensa de la Llingua Asturiana. Darréu de les intervenciones de los miembros de la Xunta pola Defensa de la Llingua Asturiana, el cantautor de Cangas Pedru Pereira peslló l’actu de le entrega de los Premios Andrés Solar. 22 de xineru, 2007 0 FacebookTwitterPinterestEmail
Sociedá La Estaya de Llingua Asturiana d’Avilés recibió 6.567 consultes en 2006 by asturnet 22 de xineru, 2007 Juan José Fernández, Conceyal de Cultura d’Avilés, y Montse Machicado, reponsable del Seriviciu de Normalización d’Avilés (EStaya de la Llingua) presentaron la memoria añal del serviciu de normalización llingüística del conceyu. A lo llargo de 2006 el Serviciu recibió 6.567 consultes llingüístiques. Na memoria añal del Serviciu de Normalización destaquen les actividaes, venceyaes a la promoción del usu, y la incidencia de les mesmes en xeres como la educación. Nesti sen Fernández apuntaba que nel añu pasáu les cifres d’escolinos matriculaos n’asturianu medraren un 6% na educación primaria y un 2% na secundaria. En base a estes cifres deduzse que más del 60% de los rapacinos de la enseñanza primaria tienen al asturianu como una de les sos asignatures. Na enseñanza secundaria el porcentaxe de matriculaciones ta nel 18%. El conceyal de Cultura d’Avilés desglosó les diferentes consultes recibíes, destacando que más de 2000 ficiéronse nes mesmes oficines del Serviciu. Les aiciones que desendolcó la Estaya de la Llingua d’Avilés abarcaron xeres que van dende les informatives a les venceyaes al entretenimientu. D’esta forma a lo llargo de 2006 el Serviciu de Normalización desenvolvió más de trenta actividaes diferentes como teatru, presentaciones de llibros o amueses. Un de los puntos principales de l’actividá de los Servicios de Normalización ye’l de la traducción de la documentación municipal. Nesti sen el Serviciu avilesín desenvolvió la so xera amás de pa la propia Alministración del Conceyu pa les diverses entidaes sociales y culturales que solicitaron la torna al asturianu de cartafueyos o materiales publicitarios de les sos actividaes propies. 22 de xineru, 2007 0 FacebookTwitterPinterestEmail
Sociedá Izquierda Xunida de Samartín denuncia la paralización del Serviciu de Normalización Llingüística Municipal by asturnet 22 de xineru, 2007 Izquierda Xunida de Samartín acusa al gobiernu del conceyu de paralizar l’actividá de la Oficina de Política Llingüística del conceyu. La coalición d’izquierdes considera que dende’l gobiernu municipal nun se fizo una previsión presupuestaria pal Serviciu de Normalización municipal. El grupu municipal d’Izquierda Xunida en Samartín del Rei Aurelio denunció la “falta de previsión” del gobiernu municipal socialista de cara a presupuestar los costes d’actividá del Serviciu de Normalización Llingüística del conceyu. Esta falta de previsión supón, pa IX de Samartín, un frenu a l’actividá d’esti organismu que ye consideráu fundamental pa la normalización del usu alministrativu del idioma nel conceyu del Nalón. La situación presupuestaria del Serviciu de Normalización de Samartín nun ye una escepción dientro de la Rede de Servicios de Normalización Llingüística. Los Servicios dependen financieramente, principalmente, de la subvención concedida pol gobiernu asturianu a esta aportación autonómica, y en dalgunos casos d’una aportación municipal que complementaría a l’autonómica. Les subvenciones autonómiques pa estos Servicios anque avecen concedese nel primer trimestre del añu, por mor de los trámites alministrativos conlleven una demora nel cobru de varios meses. Esta situación provoca que munchos de los Servicios detengan la so actividá durante dalgunos periodos del añu, pola imposibilidá financiera de facer frente a los costes llaborales del personal de los Servicios. 22 de xineru, 2007 0 FacebookTwitterPinterestEmail