Sociedá OFICIALIDÁ: UN DERECHU CIVIL IRRENUNCIABLE by asturnet 19 de xunu, 2007 OFICIALIDÁ: UN DERECHU CIVIL IRRENUNCIABLE El Conceyu Abiertu pola Oficialidá da aniciu con esta Rueda de Prensa, a les sos actividaes na presente llexislatura encamentando a los partíos políticos representaos na Xunta Xeneral del Principáu d’Asturies a remanar la OFICIALIDÁ como la única ferramienta posible p’algamar un estatus de llegalidá qu’acabe cola non reconocencia d’un derechu civil democráticu como ye la falta de llibertá d’espresión de los falantes d’asturianu y de gallego-asturianu. Les elecciones autonómiques supunxeron un parentesis pal llabor del Conceyu Abiertu pola Oficialidá porque nos paecía que’l protagonismu correspondía-yos a los partíos políticos. Dempues d’esi parón, volvemos a l’actividá pública cola movilización, pero tamien cola nuestra llinia de diálogu y esplicación a los representantes políticos buscando’l consensu pa la reconocencia de la oficialidá. Agora mesmo tenemos enriba la mesa dos cuestiones qu’afecten sobre manera al futuru llingüísticu d’Asturies: el pautu de gobiernu y la reforma del estatutu d’autonomía. Queremos volver a recordar la responsabilidá individual de caún de los parllamentarios asturianos escoyíos nestes elecciones: l’asturianu y el gallego-asturianu son patrimoniu común de toos, falemos la llingua que falemos, y ye deber de los nuestros gobernantes garantizar el so futuru. Pa eso, la oficialidá ye indispensable. Indispensable pa la sobrevivencia de cualesquier llingua en pallabres de la UNESCO. Nun falamos de situaciones futures. Falamos de la reforma del Estatutu d’Asturies que prósimamente va tener llugar y del pautu de gobiernu que ta enriba la mesa nestos momentos. Ensin oficialidá taríamos torgando una vegada más un derechu de la ciudadanía y incumpliendo’l mandatu constitucional que fala de que “les demás llingües serán oficiales”. Esti imperativu de la Constitución española incúmplese n’Asturies condenando a los falantes d’asturianu y a tolos asturianos, a la invisibilidá cuando se fala de les llingües del Estáu, por nun ser oficial la nuestra. Y eso por nun falar de la perda de fondos económicos y prestixu social qu’ello implica. La cuestión de la oficialidá tien que tar dientro del Pautu de Gobiernu porque va ser una cuestión central nesta llexislatura cuando entame’l procesu de reforma estatutaria. Lo contrario entenderíamoslo como un fraude. Nun se pue volver a falar de que nun hai oficialidá porque nun s’incluyó nun pautu pa gobernar Asturies. La Oficialidá nun ye un cromo que se pueda cambiar por otres coses, ye un derechu civil qu’hai que conceder y non ye moneda de cambiu, Pidimos a Izquierda Xunida-Bloque por Asturies-Los Verdes firmeza pa non dexar fuera d’un alcuerdu de gobiernu un tema que nun ye negociable: los derechos fundamentales de la ciudadanía. Queremos dexar clara una idea: defendemos cualquier midida de promoción pa la llingua, pero nunca contraponiendolo a la idea d’oficialidá. La “promoción”, la “defensa”, el “apoyu” ensin más nun son abondo si nun van acompañaos d’un marcu llegal qu’iguale en derechos. Eso ye la oficialidá. Por eso se fixeron oficiales les llingües d’otres comunidaes. Sicasí, n’Asturies, onde nun hai oficialidá, trenta años de “promoción”, “defensa” y “apoyu” nun valieron pa da-y la vuelta a una realidá a la que nun se pue retrucar: la mengua imparable de falantes y, polo tanto, el peligru de desapaición de la nuestra llingua. Si los ciudadanos nun tenemos igualdá de derechos, falemos la llingua que falemos, ye imposible que l’asturianu se tresmita y sobreviva. Ensin oficialidá, cualquier avance siempre acaba atopándose cola llei pa torgar los nuestros derechos. El Conceyu Abiertu pola Oficialidá va siguir brindándose pal diálogu con toles fuerces parllamentaries. Nel periodu anterior Izquierda Xunida, que ye favorable a la oficialidá y forma parti del CAO, continuó cola so defensa d’esta reivindicación, pero, tamien el Partíu Popular abrió víes de diálogu col Conceyu Abiertu, al travies de numberoses reuniones que llevaron a la redacción nel so programa electoral d’un testu que diz que ye’l momentu d’algamar un gran consensu nel artículu cuartu del Estatutu d’Autonomía, pa da-y un marcu llegal a la llingua que satisfaga a tolos asturianos. Esperamos qu’afonde nesti diálogu col CAO y mantenga’l so compromisu electoral. Nel periodu que s’abre agora, aguardamos tamien, porque ye de xusticia social pa colos ciudadanos que gobierna, que la Federación Socialista Asturiana-PSOE, nun exerciciu de responsabilidá política y coherencia democrática, dea’l pasu que nun dió hasta’l momentu y solucione un conflictu llingüísticu que yá dura trenta años. Y tien que ser asina porque en democracia esiste’l deber políticu de gobernar pa tolos ciudadanos y ciudadanes, seyan más o seyan menos, como respetu a la pluralidá de la sociedá a la que se representa. Y entá más, el partíu socialista tien que dar los mesmos derechos n’Asturies que reconoz como partíu políticu nos demás territorios que conformen l’Estáu español. Nun val garantizar derechos pa unos ciudadanos y nega-ylos a otros. Toles llingües son patrimoniu común de los ciudadanos y deben protexese por igual. Faigamos un exerciciu de responsabilidá política y social y abramos la puerta a la oficialidá pa pesllar d’una vez por toes una ferida nel corazón de munches persones . Los asturianos tenemos que ser quien a demostranos a nosotros mesmos que podemos solucionar los nuestros problemes faciendo del estatutu una fonte de derechos pa toos y toes y una garantía pa la convivencia democrática basada nel respetu a los demás. 19 de xunu, 2007 0 FacebookTwitterPinterestEmail
Sociedá El CAO da aniciu a les sos actividaes nesta llexislatura pidiendo a los partíos políticos representaos na Xunta Xeneral la oficialidá by asturnet 19 de xunu, 2007 Redacción. El Conceyu Abiertu pola Oficialidá dio aniciu con una rueda de prensa a les sos actividaes na presente llexislatura encamentando a los partíos políticos representaos na Xunta Xeneral del Principáu d’Asturies “a remanar la oficialidá como la única ferramienta posible p’algamar un estatus de llegalidá qu’acabe cola non reconocencia d’un derechu civil democráticu como ye la falta de llibertá d’espresión de los falantes d’asturianu y de gallego-asturianu”. Según espresó’l voceru d’esta organización, Fernando Ornosa “les elecciones autonómiques supunxeron un parentesis pal llabor del Conceyu Abiertu pola Oficialidá porque nos paecía que’l protagonismu correspondía-yos a los partíos políticos”. A lo qu’añadió “dempues d’esi parón, volvemos a l’actividá pública cola movilización, pero tamien cola nuestra llinia de diálogu y esplicación a los representantes políticos buscando’l consensu pa la reconocencia de la oficialidá”. Pal CAO “agora mesmo tenemos enriba la mesa dos cuestiones qu’afecten sobre manera al futuru llingüísticu d’Asturies: el pautu de gobiernu y la reforma del estatutu d’autonomía” y recordó a los parllamentarios que “la oficialidá ye indispensable. Indispensable pa la sobrevivencia de cualesquier llingua en pallabres de la UNESCO”. Ornosa recordó tamien que “la cuestión de la oficialidá tien que tar dientro del Pautu de Gobiernu porque va ser una cuestión central nesta llexislatura cuando entame’l procesu de reforma estatutaria” y recordó a les partes, en clara referencia a Izquierda Xunida-Bloque por Asturies, que “lo contrario entenderíamoslo como un fraude”. Comunicáu completu del Conceyu Abiertu pola Oficialidá 19 de xunu, 2007 0 FacebookTwitterPinterestEmail
Sociedá Un maxistráu anuncia la interposición d’un recursu dinconstitucionalidá contra la Llei dUsu del asturianu por tener vocación doficialidá by asturnet 18 de xunu, 2007 Redacción. L’Aconceyamientu de Xuristes pol Asturianos fizo llegar a los medios de comunicación una providencia del Maxistráu del Xulgáu de lo Contencioso-Alministrativo númberu 3 d’Uvieu, anunciando la interposición d’un recursu d’inconstitucionalidá escontra tres artículos de la Llei del Principáu d’Asturies 1/98, d’usu y promoción del bable/asturianu. Anque “al Aconceyamientu-y abulta nuna primer llectura, que si nun camuden los terminos, el Tribunal Constitucional tendría de nun l’almitir a trámite”. Na providencia, xenerada pol conflictu ente Xurde Blanco y l’Alministación del Principáu pola non aceptación d’un documentu n’asturianu, el maxistráu Miguel Ángel Carbajo Domingo afirma que “vistos los fundamentos de la pretensión del recurrente y de la oposición de l’Alministración demandada, considera que la Llei 1/98, de 23 de marzu, d’Usu y Promoción del Bable/asturianu (BOPA 28/03/98), aplicable al casu, pudiere resultar inconstitucional”. El xuez diz na providencia que esa anticonstitucionalidá pue atopase “nos artículos formulaos en terminos imperativos embaxo los númberos 2, 4 y 7 de la Llei”. Y ello polos motivos qu’espón darreu “a) Por adentrase en materia acutada formalmente al Estatutu d’Autonomía, al disponer la Llei 1/98, de 23 de marzu (llei ordinaria) un rexime con vocación d’oficialidá”, “b) Por adentrase en materia propia de la llexislación alminsitrativa básica y estatutu de los funcionarios en rellación al llinguaxe alministrativu oficial” y “c) Por posible conculcación del drechu d’igualdá de los ciudadanos en rellación a la so actividá ente les Alministraciones públiques”. 18 de xunu, 2007 0 FacebookTwitterPinterestEmail
Sociedá Nast reclama a Izquierda Xunida la oficialidá del asturianu que prometió públicamente by asturnet 18 de xunu, 2007 Redacción. Énte les negociaciones del PSOE-FSA ya Izquierda Xunida pa la formación de gobiernu n’Asturies, l’Asociación Cultural ‘N’ast’ emitió un comunicáu nel qu’esixe la oficialidá de la llingua asturiana. Dende N’ast recuerden qu’“IX prometió la oficialidá na campaña electoral” y qu’“esti ye un fechu qu’esperen s’algame”. Nel comunicáu, N’ast diz qu’“esta fuercia política (IX) yá prometiera na anterior llexislatura lo mesmo y qu’a pesar de que nun se cumpliera, gobernó xunto al PSOE y nun cumplió les sos promeses”. Por ello N’ast “vuelve a esixir públicamente’l cumplimientu d’estes promeses electorales y ve inaceptable que nun s’algame d’esta la dignificación del asturianu”. Acordies con esto, l’Asociación Cultural N´ast pídi-y al Conceyu Abiertu Pola Oficialidá “que pida a Izquierda Xunida, ún de los sos miembros, que cumpla l’oxetivu máximu d’esti Conceyu y que tome les midíes afayadices nel casu de que nun lo faiga”. N’ast remata’l comunicáu “esperando qu’IX nun se convierta, una vuelta más, nun responsable directu de la represión llingüística d’esti país y que nun entre nin collabore con un gobiernu que reprima y marxine la llingua de tolos asturianos”. 18 de xunu, 2007 0 FacebookTwitterPinterestEmail
Plástiques Ramón Arias ganal certame de fotografía Ciudá de Cangues dOnís by asturnet 13 de xunu, 2007 Redacción. Ramón Arias Gutierrez, cola semeya ‘Soledá’, fízose col primer premiu nel certame fotográficu Ciudá de Cangue d’Onís, que’l xuráu falló esta mesma selmana. El segundu premiu, con 300 euros, correspondió a la obra ‘Capilla de Santo Toribio’ d’Ángeles Prol y la tercer clasificada foi Mayte Beistegui por ‘Soto de Cangas II’, con 150 euros El xuráu tuvo compuestu pol alcalde de Cangues d’Onís, Alfredo García como presidente, la directora de la Casa la Cultura, Beatriz Valdes, como secretaria y de vocales ficieron el presidente de l’Asociación Cultural Dobra, Luis Salcines, y los fotógrafos, Jose Martínez y Tadeo Pantín. Presentáronse una docena d’autores con más de mediu centenar de semeyes, centraes nel conceyu cangues. El Concursu ye una iniciativa de l’Asociación Cultural Dobra, que fai la Casa la Cultura cola colaboración del Ayuntamientu de Cangues d’Onís y CaxAstur. La primer edición del concursu convocóse nel añu 2004. Pueden participar persones de tol mundiu, la única condición ye que la semeya presentada seya de dalgún llugar del conceyu de Cangues d’Onís. 13 de xunu, 2007 0 FacebookTwitterPinterestEmail
Sociedá La Oficina de la Llingua de Xixón prepara la segunda edición de ¡Ruempi la mollera! by asturnet 13 de xunu, 2007 Redacción. Esti martes 11 de xunu fízose la entrega de premios del concursu ‘Ruempi la Mollera’, organizáu pola Oficina Municipal de la Llingua, y na que participaron 17 centros d’educación primaria del conceyu de Xixón. El concursu fízose col envís de que los escolinos conocieren y afondaren na hestoria y personaxes del conceyu al tiempu que practiquen la llingua asturiana. Asina fueron formulándose dende xineru a mayu ocho entrugues distintes, ente les que los neños teníen 15 díes p’aldovinar. La vieya fábrica de tabacos, el tranvía, la Lloca, Magnus Blikstad o les mil quinientes, yeren dalgunes de les rempuestes que fueron apurriendo los participantes dempues de ‘rompese la mollera’. La escuela ganadora foi’l Colexu Públicu Jacinto Benavente, de La Camocha. Más de 500 neños participaron nesta primer edición de ¡Ruempi la mollera!. Nun comunicáu emitíu polos responsables de la Oficina comenten qu’“El concursu tuvo una perbona acoyida, polo que ya se ta trabayando nes entrugues de la Segunda Edición de ¡Ruempi la Mollera!”. 13 de xunu, 2007 0 FacebookTwitterPinterestEmail
Sociedá LAxencia Europa Press entama un serviciu de noticies en llingua asturiana by asturnet 11 de xunu, 2007 Redacción. La prestisoxa axencia de noticies Europa Press entamó ayeri un serviciu de noticies en llingua asturiana pa los sos clientes y pa los llectores de la so web. La propia empresa fala de que la nueva canal ñaz “col enfotu de sofitar l’espardimientu y promoción de la llingua nos medios de comunicación y nos estremaos ámbitos de la sociedá”. El serviciu inclúi la traducción de les noticies, non namás d’Asturies, sinón estatales ya internaciones, qu’en munchos casos van dir acompangaes de material gráficu. El Serviciu ye gratuitu pa los medios de comunicación que yá tean apuntaos aboanos al Serviciu Autonómicu d’Europa Press. El serviciu de noticies actualízase de les nueve la mañana a les 21 hores, de llunes a vienres. Este ya la primer vegada qu’un mediu de comunicación d’ámbitu estatal ufierta un serviciu de noticies en llingua asturiana. La llingua asturiana súmase asina a les canales esistentes hasta’l momentu en catalán, vascu, gallegu y valencianu. Canal de noticies n’asturianu d’Europa Press 11 de xunu, 2007 0 FacebookTwitterPinterestEmail
Sociedá La Xunta pola Defensa de la Llingua Asturiana fai balance de los resultaos eleutorales nAsturies by asturnet 4 de xunu, 2007 Redacción. La Xunta pola Defensa de la Llingua Asturiana (XPDLA) emitióestos díes un comunicáu nel que fai balance de los resultaos de les eleiciones y les perspeutives del asturianu na reforma del Estatutu d’Autonomía d’Asturies. La XPDLA señala nel comunicáu qu’“el del asturianu ye un asuntu que nun s’acaba de solucionar políticamente”. “La posibilidá de reforma del Estatutu -diz el comunicáu- nesta próxima llexislatura y la necesidá d’incluyir nel la oficialidá punxeron la cuestión nel centru del debate anque dellos nun la quixeren tocar na campaña electoral”. Asina mesmo, la XPDLA reclama al Partíu Popular que siga dando pasos, yá qu’opinen “l’usu del asturianu pol alcalde d’Uvieu namás que pa facer chistes, por poner namás un casu, nun ye’l meyor camín pa dignificala si al llau nun hai usos serios como na documentación, na toponimia, na vida diaria del conceyu…”. En cuantes a la posición de la FSA-PSOE, la XPDLA diz que “bona parte de los sos militantes nun ven nengún problema a la reconocencia de los derechos llingüísticos” y qu’“hai un congresu pendiente de la FSA y tamos seguros de qu’esos plantegamientos predemocráticos d’una minoría tienen que desapaecer”. La XPDLA remata’l comunicáu diciendo que van siguir trabayando “ensin maximalismos de nengún tipu: valorando tamien los avances, por pequeños que sían, pero reclamando la oficialidá como únicu marcu llegal”. 4 de xunu, 2007 0 FacebookTwitterPinterestEmail
Educación El Principáu propunxo a los escolinos viaxar en llingua asturiana na so campaña de matriculaciones by asturnet 3 de xunu, 2007 Redacción. Les Conseyeríes de Cultura, Comunicación Social y Turismu, al travies de la Oficina de Política Llingüística y la d’Educación y Ciencia dieron por rematada la Campaña de matriculación en llingua asturiana pal cursu 2007-2008. Con esti, son cuatro años de campaña consecutiva nos colexos ya insitutos asturianos. Bien ceo van pocer conocese los datos de matriculaos pal próximu cursu. La camapaña desenvolvióse ente fines d’abril y principios de mayu cola distribución de cartelos y folletos informativos a tolos centros d’enseñanza. El lema d’esti añu foi ‘Viaxar ye conocer el mundu. ¿Y si viaxes na to llingua? Apúntate a Llingua Asturiana’ y apaeció tamien con anuncios na prensa y cuñes radiofóniques. Los niveles de matriculación en llingua asturiana vienen xubiendo cada añu y nesti cursu que va finar agora tán matriculaos un total de 18.701, espardíos ente 292 centros nos que ponen clas d’asturianu 196 profesores. D’ellos, 14.999 correspuenden a educación primaria, una xuba d’unos 150 escolinos con respeutu al cursu anterior, 3.652 tán en secundaria, 50 más que nel cursu anterior y la escasa cifra de 238 en bachilleratu, magar qu’esti añu hai 137 que l’anterior. 3 de xunu, 2007 0 FacebookTwitterPinterestEmail
Sociedá Aceutada una ponencia nasturianu nel IV Alcuentru Internacional sobre Desenrrollu Caltenible y Población by asturnet 30 de mayu, 2007 Redacción. El Comite Direutor del ‘IV Alcuentru Internacional sobre Desenrrollu Caltenible y Población’ aceutó estos díes la ponencia sobre estratexes europees de caltenibilidá a David M. Rivas, miembru de l’Academia de la Llingua Asturiana y de l’asociación L’Arribada. El fechu llama l’atención por tar la ponencia escrita n’asturianu. Mientres los documentos n’asturianu atopen problemes nos rexistros del Gobiernu del Principáu, esti alcuentru, coordináu pola Universidá de Málaga (Andalucia) y la de Luján (L’Arxentina) y la Rede Iberoamericana de Desenrrolu Llocal-Global nun punxo nengún problema. L’eventu –celebráu cada dos años- ye ún de los principales aconceyamientos científicos nestes materies. Nesta ocasión cunta tamien con un simposiu sobre la crisis del agua y les estratexes pa evitala. Cola aceutación d’esta ponencia l’asturianu da un pasís más na so presencia internacional. L’autor de la ponencia, David M. Rivas, ye doctor n’economía y profesor titular d’estructura económica na Universidá Autónoma de Madrid. Ye miembru del Comite científicu de la Rede pa una Estratexa Europea de Desenrrollu Caltenible y de la Rede Europea de Desenrrollu Llocal, dependientes de la Comisión Europea, nes que trabaya con profesionales d’universidaes de Polonia, Inglaterra, Eslovenia, Alemaña, Italia, Escocia, Luxemburgo y Austria. Ye tamien profesor invitau d’universidaes de L’Arxentina, Perú, Uruguai y Guatemala, y miembru del Club de Roma. Tien publicada una ventena de llibros sobre estes materias n’ingles y castellán, asina como un llibru de rellatos n’asturianu ‘Xente de casa’. Tamien participó na política asturiana como candidatu d’Andecha Astur en dellos comicios, hasta que la xuntura d’una parte d’Andecha na coalición Unidá y la división interna del partíu lu llevaron a abandonar a principios d’esti añu. 30 de mayu, 2007 0 FacebookTwitterPinterestEmail