Sociedá Un terciu de los conceyos d’Asturies entamó los trámites pa revisar la so toponimia by asturnet 17 de marzu, 2005 La recuperación de la toponimia asturiana, una de les aspiraciones hestóriques del movimientu pola revitalización de la llingua, ye una realidá cada vez más cerca de cumplise. Venticuatro conceyos, un terciu de los que formen Asturies, solicitaron ya oficialmente l’iniciu de los trámites pa que los nomes de los sos llugares vuelvan a recobrar la so forma tradicional depués de décades de castellanización. Los últimos en sumase a esta llista, los dos conceyos con más población, Uviéu y Xixón. Los primeros que van ver oficializaos los sos topónimos Llanes, Carreño y El Franco. Pocos meses después d’entamar los sos llabores la Xunta de Toponimia del Principáu tien visto llegar a la so mesa de trabayu les solicitúes de revisión de nomes de llugar de la mitá de los conceyos asturianos. Los más madrugadores a la hora de pidir la igua de la so toponimia: Carreño, Llanes y El Franco tienen ya cerráu el so espediente y preparáu pa que’l Conseyu de Gobiernu del Principáu-yos dea’l vistu bonu pa facelos oficiales. Según informaron a Asturnews fontes de la Conseyería de Cultura la oficialiación de la toponimia tradicional d’estos tres conceyos ye inminente y podía ser aprebada pel executivu autonómicu en feches mui prósimes. En puerta pa rematar el so espediente toponímicu ta L.Lena, al que van siguir darréu los conceyos de Gozón, Ayer y Llangréu. Los últimos en xubise al carru de los ayuntamientos que piden una revisión de los sos nomes de llugar fueron Uviéu, que lo solicitó formalmenta va unos díes y Xixón, onde se celebró ya la primer reunión ente’l Conceyu y la Xunta de Toponimia. 17 de marzu, 2005 0 FacebookTwitterPinterestEmail
Comunicación L’ex director de TVE n’Asturies denunciáu tamién en Telemadrid por “manipulación informativa” by asturnet 16 de marzu, 2005 Los trabayadores de Telemadrid denunciaron esti martes 15 de marzu “la manipulación ifnormativa” que supunxo la emisión del reportaxe especial “11-M: un año después” que conduxo l’ex-director del Centru Territorial de TVE n’Asturies José Antonio Ovies. El periodista asturianu ye anguañu subdirector d’informativos y entamaba’l reportaxe nun planu mediu entrugando ente otres coses “Quién foi’l primer periodista que dixo qu’ETA yera la culpable del atentáu, qué políticu entamó a falar d’Al Qaeda, o quién planificó los SMS y a qué hora exactamente”. Los Comités d’Empresa del Ente Públicu de Telemadrid y Onda Madrid asoleyaron un comunicáu nel que rechazaben esta “manipulación informativa”, porla “nidia intencionalidá del caberu reportaxe: ufrir sospeches de que los resultaos ellectorales foron influenciaos intencionadamente pola SER”. Amás de participar na cobertura en directu del incendiu na Torre Windsor -quince hores siguíes d’emisión con puntes d’audiencia del 65 por cientu en Madrid-, José Antonio Ovies presenta’l programa selmanal d’actualidá ‘Madrid 7 días’, según informa la web de la cadena madrilana, y ocupa’l cargu de subdirector d’informativos, lo que lu pon a la tiesta de munchos de los trabayos especiales d’informativos de la canal pública. Ovies salió de la delegación asturiana de TVE en xunu pasáu con mala prensa al llombu. Nun informe ellaboráu por trabayadores del centru de Televisión Española en San Esteban de les Cruces, atribuíense-y al periodista, ente otres manipulaciones, la grabación previa d’un informativu ficticiu sobro la fuelga xeneral del 20 de xunu de 2002 y la emisión d’un falsu asaltu con destrozos a la sé’l PP n’Uviéu tres d’una manifestación contra la guerra d’Iraq, con plena conocencia previa de la falsedá de la noticia. Amás, trabayadores de TVE n’Asturies denunciaron en so día el so ablucamientu al comprobar cómo’l so superior decidía abrir l’informativu territorial asturianu del 27 d’ochobre de 2003 cola noticia -d’ámbitu madrilanu- de la victoria de la candidata’l Partíu Popular, Esperanza Aguirre, nes elecciones de Madrid. Destituyíu del so cargu nel Principáu tres de la llegada’l PSOE al Gobiernu central -cuando lu sucedió Pedro Alberto Marcos- Ovies pasó a trabayar a la cadena pública Telemadrid, cuyes directrices básiques marca’l PP, fuercia política mayoritaria tanto nel Ayuntamientu como na Comunidá autónoma de Madrid. Informe íntegru sobro la xestión d’Ovies en TVE-Asturies (orixinal en castellán) 16 de marzu, 2005 0 FacebookTwitterPinterestEmail
Sociedá El Conceyu pola Oficialidá nota un cambiu d’actitú positivu nel PSOE y el PP tres reunise colos sos grupos parlamentarios by asturnet 16 de marzu, 2005 La principal conclusión que’l Conceyu Abiertu pola Oficialidá saca del alcuentru teníu ayer con representantes de los grupos parlamentarios del PSOE y el PP ye qu’anguaño en nengún de los dos partios paez esistir “una posición cerrada” tocante a la reconocencia oficial del asturianu y que nun descarten asumir esta demanda social nun futuru, inda nun consideren que’l momentu pa facelo seya’l de la prósima reforma estatutaria. Nel alcuentru del Conceyu Abiertu col otru grupu presente na Xunta Xeneral, Izquierda Xunida-Bloque, la plataforma ciudadana interesóse pola postura que va defender na discusión de la reforma la coalición y si va ser la mesma que caltién como organización integrada nel propiu CAO. En declaraciones a Asturnews, Fernando Ornosa, ún de los participantes nel alcuentru colos grupos parlamentarios, reconoció haber “percibio per primer vez que’l PSOE nun mantién una posición cerrada respective a la oficialida nin se niega a falar d’ella”, una actitú positiva que se detectó tamién nel alcuentru col Partíu Popular qu’a xuiciu del representante del CAO: “nun momentu dau podía tomar una decisión” favorable a la oficialidá inda “güei estean duldosos”. Nel cursu d’estos alcuentros, tanto’l representante del grupu socialista, el diputáu José Luis Montes, como’l parlamentariu popular Joaquin Aréstegui, amosaron una “actitú receptiva” énte les esmoliciones manifestaes pol Conceyu. Montes admitió qu’ente los miembros del CAO el que cada vez hai más militantes socialistes partidarios de reconocer los derechos llingüísticos asturianos y nun refugo la posibilidá de que nun futuru a mediu plazu el so partíu asuma la oficialidá, inda aclaró que pa ello había aprebase primero como alcuerdu nun congresu de la FSA. Como resultáu d’estos alcuentros colos grupos parlamentarios el Conceyu Abiertu pola Oficialidá tien llograo’l compromisu de los representantes del PSOE y del PP de facilitar entrambes entrevistes coles direcciones d’esos partíos n’Asturies pa que la plataforma unitaria espunxera a los másimos responsables políticos de los partíos mayoritarios la necesidá de solventar el problema llingüísticu con un alcuerdu de mínimos ente fuerces polítiques y sociales alrodiu de la reconocencia oficial del asturianu. Tanto el PSOE como’l Partíu Popular accedieron a que se produzan estes reuniones cola dirección n’Asturies de los sos partíos. L’alcuentru col grupu d’Izquierda Xunida-Bloque, los miembros de la delegación del CAO, llograron tamién el compromisu de la diputada Noemí Martín de concertar una reunión ente’l Conceyu Abiertu y la dirección d’Izquierda Xunida d’Asturies na que la coalición que dirixe Jesús Iglesias aclarase cuála va ser la so postura estratéxica na discusión de la reforma l’Estatutu. Según manifestó el representante del CAO, Fernando Ornosa, bona parte de l’argumentación cola que treslladaron a los grupos de la Xunta Xeneral les demandes de la plataforma cívica basóse na situación “única na que va quedar la llingua asturiana cuando s’apreben les reformes estatutaries pendientes y cuando, Aragón, por exemplu, la otra comunidá que nun tenía reconocida la oficialidá de les llingües que se falen nella, l’aprebe col consensu de tolos partíos políticos d’esa comunidá”. Esta situación, pa Ornosa, non namás va dexar Asturies como una escepción nel mapa autonómicu del estáu “sinón que va suponer importantes perxuicios de toa clase, mesmamente económicos” pal nuestru país,si tenemos en cuenta que munchos posibles recursos que se podíen consiguir dependen de la reconocencia oficial del asturianu” afirma’l miembru del CAO, que treslladó esti esmolecimientu a los parlamentarios de los tres grupos de la Xunta Xeneral. Amás d’estos contactos y de la vía abierta de diálogu colos partíos con representación nel parlamentu autonómicu, el Conceyu Abiertu pola Oficialidá nun descarta nueves movilizaciones como la vivida el 11 de marzu n’Uviéu. Pal CAO “la ocasión pa la oficialidá ye agora, na prósima reforma del estatutu, más alantre diba ser difícil algamalo y nós vamos encarrilar el nuestru llabor a que se llegue a consiguir”. 16 de marzu, 2005 0 FacebookTwitterPinterestEmail
Sociedá Cultura desixirá criterios normalizadores pa les subvenciones by asturnet 16 de marzu, 2005 La Conseyería de Cultura desixirá a los particulares, empreses y instituciones candidates a recibir dalguna de les subvenciones destinaes a la promoción del asturianu y del gallegu asturianu el que nos proyectos presentaos vengan detallaos con rigor y claridá los criterios normalizadores que se persigue en cada casu. Esti procuru por valorar l’interés y utilidá de los proyectos nel ámbitu de la normalización social y l’aumentu de la dotación asignada, la más importante en cuantía hasta la fecha, son les principales novedaes que presenten les ayudes de Cultura pa 2005. El responsable de la Oficina de Política Llingüísitica del Principáu, Ramón d’Andrés Día, presentó les diez llinies d’ayudes y beques que la Conseyería de Cultura tien convocao esti añu pa sofitar proyectos destinaos a la normalización social del asturianu y del gallegu asturianu. Un total de 1.830.395 euros ye la cantidá asignada pal conxuntu d’estes subvenciones, la más importante de les presupuestaes hasta agora por parte de l’administración autonómica. Na presentación de les beques, el responsable de Política Llingüística, resaltó “l’aumentu qu’esperimenten toles llinies d’ayudes, en dellos casos especialmente significativu, como ye’l casu de les subvenciones destinaes a medios de comunicación, un 21,5 por cientu y a los conceyos con iniciatives normalizadores, d’un 108,6 por cientu”.En xunto l’aumentu de la cuantía empobinada a subvenciones ye d’un 56 por cientu respective al añu pasáu. La importancia de la dotación asignada pa les diez llinies de subvenciones ye la novedá más resaltable en cuantes a convocatories anteriores. Al llau del aumentu presupuestariu, Ramón d’Andrés, quiso destacar el que va ser el criteriu fundamental a la hora de valorar los proyectos presentaos: “vamos desixir que los proyectos candidatos a recibir ayudes tengan claramente detalláu y con rigor el so interés pa la normalización social de la llingua asturiana y nel so casu del gallegu-asturianu”. Quedarán asina escluíos de la posibilidá d’acceder a estes ayudes proyectos nos que l’usu de la llingua o les actividaes programaes nun se correspuendan con intenciones normalizadores. Otres novedaes qu’ufierta la convocatoria pa 2005 ye la creación d’una ayuda específica pa la creación lliteraria empobinada directamente a los autores y la supresión de la subvención pa traducir obres orixinales n’asturianu a otres llingües, esta última motivada, según desplicó d’Andrés: “pola escasa acoyida que tenía en cuantes a proyectos presentaos y a la so poca efectividá real”. Les ayudes tan enfocaes pa sofitar económicamente proyectos de particulares, empreses privaes o instituciones, en tolos ámbitos del desenvolvimientu social de la llingua asturiana y del gallegu asturianu: edición y producción cultural, creación lliteraria y artística, medios de comunicación y instituciones d’ámbitu local, como los conceyos y la rede de servicios de normalización. Ente les ayudes a la edición, destaca la dedicada específicamente a la presentación de proyectos de testos d’enseñanza de l’asignatura de llingua y lliteratura asturiana pa 2º y 4º de la ESO. No tocante a los conceyos, Ramón d’Andrés, quiso destacar que se trata del aumentu más curiosu de toles llinies de subvención: un 108,6 por cientu más que l’añu anterior y que va dedicase a caltener la rede ya esistente de servicios y oficines de normalización, asina como pa poner en funcionamientu los servicios qu’inda nun tan abiertos. 16 de marzu, 2005 0 FacebookTwitterPinterestEmail
Comunicación TV4 será la televisión más barata d’Europa, según Pérez Ornia by asturnet 15 de marzu, 2005 El director del ente públicu de comunicación del Principáu José Ramón Pérez Ornia compareció ayer na Xunta Xeneral pa informar del desarrollu del proyectu y les característiques que va tener la radiotelevisión autonómica. Ornia afirmó que diba ser el mediu públicu más baratu d’Europa con un coste de malpenes 1,17 euros al mes por ciudadanu. Tamién informó del volume de la plantilla llaboral, qu’asitió nunos cien trabayadores y dixo que TV4-Asturies va tar emitiendo a finales de 2007 la so programación diaria de 18 hores. Cuatro d’eses dieciocho hores van ser pa programes de conteníu informativu, desplicó el director del ente qu’anunció la primer emisión de la radiotelevisión asturiana pal prósimu 8 de setiembre, con motivu de la fiesta de la nuestra comunidá. José Ramón Pérez Ornia aprovechó la so comparecencia na comisión de control del ente públicu de la Xunta Xeneral pa facer una defensa del proyectu informativu del Principáu argumentada alrodiu de los dos exes sobro los que va funcionar el mediu públicu, según el so director: la calidá de conteníos y el baxu coste, “el más baxu d’Europa, malpenes 1,17 euros por habitante”, especificó Ornia. Tocante a la plantiella del ente de comunicación Pérez Ornia cuantificóla nunos cien trabayadores, ente técnicos, periodistes y personal directivu. De los 15 millones d’euros añales que van destinar los presupuestos del Principáu a la radiotelevisión asturiana unos 3 millones van empobinase a los costes salariales de la plantilla. El director del ente, qu’engloba una radio, una televisión y un portal dixital, refirióse a los planes que se contemplen no referente a los conteníos de programación, onde lo informativo y la produción propio van primar sobro otros conteníos. Ornia faló d’algamar un 50 por cientu de produción propio cuando s’emita la parriella de dieciocho hores diaries a finales de 2007. 15 de marzu, 2005 0 FacebookTwitterPinterestEmail
Comunicación Stephen Hawking abre los actos del aniversariu de la FPA con una conferencia el 12 d’abril by asturnet 14 de marzu, 2005 El científicu Stephen Hawking va inaugurar los actos de celebración del venti aniversariu de los Premios Príncipe d’Asturies el prósimu 12 d’abril con una conferencia nel Auditoriu d’Uviéu. La Fundación que dirixe Graciano García confirmó la presencia del astrofísicu británicu nel actu d’apertura del aniversariu que va tar presidíu polos príncipes d’Asturies. Hawking pronunciará la so conferencia con delles de les personalidaes que comparten col autor de la teoría del Big-bang los galardones que concede añalmente la institución asturiana. La cita d’esti importante eventu ye’l día 12 d’abril a les 19.00 hores nel Auditoriu Príncipe Felipe d’Uviéu. L’astrofísicu británicu pronunciará la conferencia inaugural de los actos de comemoración del XXV aniversariu de los premios concedíos pola Fundación que lleva’l nome del heriede de la corona española. Hawking recibió el Premiu a la Concordia en 1989 “pol so trescendental llabor investigador sobre los fundamentos del tiempu y del espaciu, allegando al conocimientu de los homes les últimes aportaciones científiques sobre l’orixen y destín del universu, y pol exemplu de la so respuesta a les dificultaes que l’adversidá puede oponer a la condición humana, contribuyendo asina a la llucha en favor del progresu y contra la ignorancia”, tal como reflexó l’acta del xuráu, presidíu por Pedro de Silva. Más información 14 de marzu, 2005 0 FacebookTwitterPinterestEmail
Sociedá Uviéu pide oficialmente la normalización de la so toponimia by asturnet 11 de marzu, 2005 La Oficina de Política Llingüística de la Conseyería de Cultura recibió esti viernes 11 la solicitù formal del Ayuntamientu d’Uviéu pa que s’inicie l’espediente de revisión de la so toponimia. El conceyu qu’agospia la capital administrativa d’Asturies conviértese asina nel primeru de la so importancia en sumase a la cada vez más amplia lista d’ayuntamientos que ponen en manes de la Xunta toponímica la correción de los sos nomes de llugar. Uviéu, el conceyu más importante que gobierna’l Partíu Popular, ye dende esti viernes 11 ún más de los que quieren ver iguaos los sos topónimos. Asina lo anunció la Oficina de Política Llingüística el mesmu día nel que se recibió nel rexistru de la Conseyería de Cultura la solicitú del consistoriu carbayón pa entamar l’espediente toponómicu del conceyu. Una vez recibía la solicitú del Ayuntamientu que preside Gabino de Lorenzo la Xunta de Toponimia entamará l’espediente de revisión de los nomes de llugar d’Uviéu col fin de satisfaer la pitición del conceyu y una vez concluíu el so llabor unviará l’espediente resueltu al Conseyu de Gobiernu del Principáu pa la aprebación y oficialización de les denominaciones igüaes. 11 de marzu, 2005 0 FacebookTwitterPinterestEmail
Comunicación El Principáu adxudica a Telefónica, Auna y Telecable los sos servicios de telecomunicaciones by asturnet 9 de marzu, 2005 La mesa de contratación del concursu pa l’adxudicación de los servicios avanzaos de telecomunicaciones de l’administración autonómica asturiana decidió proponer les ufiertes presentaes por Telefónica pal lote de telefonía fixa y tresporte de datos, por Aúna Grandes Clientes pa la telefonía móvil y por Telecable pal lote d’accesu a Intenet. La mesa técnica de l’adminstración del Principáu resolvió la contratación de los nuevos servicios de telecomunicaciones ente les ufiertes presentaes, optando poles que amosaben una meyor relación ente coste económicu y calidá de la prestación. Asina pa los dos lotes de telefonía fixa y tresporte de datos, el primeru pa les zones d’Avilés, Xixón, oriental y occidental; y el segundu pa Uviéu, centru d’Asturies, Madrid y Brueleses, l’adxudicataria ye Telefónica, que ya se tien comprometío a facer les inversiones necesaries p’adecuar los sos servicios a les necesidaes d’estos lotes y que se calculen nunos nueve millones d’euros pa los prósimos dieciocho meses. La empresa a la que se va contratar los servicios de telefonía móvil, Aúna, tamién se tienc comprometío a realizar la inversión necesaria pa esparder la so rede per Asturies, nesti casu cifrada en diez millones d’euros. Los servicios d’accesu a Internet queden a cargu de la empresa asturiana Telecable en xunto con BT-Aúna. Esti serviciu ufierta dos accesos a la rede de 34 Mb cadaún al través d’operadores diferentes col fin d’aumentar la capacidá y calidá del serviciu. 9 de marzu, 2005 0 FacebookTwitterPinterestEmail
Sociedá El grupu socialista refuga les ordenances elaboraes pola Oficina de la Llingua de Xixón by asturnet 9 de marzu, 2005 El testu de les ordenances pa la normalización del usu del asturianu nel Ayuntamientu de Xixón elaboráu pola Oficina Municipal de la Llingua y el so Conseyu Asesor nun cuenta col preste del grupu socialista que gobierna en coalición con Izquierda Xunida-Bloque por Asturies. Los representantes del PSOE nel gobiernu del conceyu manifestaron a los sos socios de pactu el so desalcuerdu con un testu qu’a xuiciu de los socialistes “implicaría la oficialidá de fechu”. En declaraciones a Asturnews, Roberto Colunga, secretariu xeneral del Bloque por Asturies y representante na Fundación Municipal de Cultura de Xixón, amosó el so disgustu y el so desconciertu ente la negativa del PSOE n’admitir unes ordenances “que tán calcaes de les que sí admiten los sos compañeros de partíu n’otros conceyos como Uviéu y L.lena”. El grupu municipal socialista al través de la propia alcaldesa treslladó a la conceyal de llingua y cultura asturianes Carmen Rúa l’encamientu de que se camudaran dalgunos artículos d’estes ordenances p’admitiles y recordó-y que la iniciativa de la Oficina nun taba contemplada nel pactu de gobiernu. Pal representante del Bloque nel grupu municipal d’IX-BA, Roberto Colunga, la situación agora ye “difícil d’entender, nun hai una negativa en redondo del PSOE, pero refuguen aceptar tal como tán estes ordenances que tan aprebaes pol Conseyu Asesor de la Oficina municipal. Con esta negativa de los socialistes les ordenances pal usu del asturianu n’administración del conceyu xixonés vuelven a la vía muerta onde tán desque fueron entregaes pola Oficina de la Llingua a tolos grupos municipales pal so estudiu. La conceyala Carmen Rúa manifestó a Asturnews que la negativa de los socialistes espresada pola alcaldesa Paz Fernández Felgueroso ye “a les ordenances en xeneral,acepten lo referío a publicidá y usu del asturianu en publicaciones pero tolo que se refier al drechu de los ciudadanos a comunicase y recibir comunicación nel conceyu en llingua asturiana recházase de plano”. Al igual que’l so compañeru de grupu municipal Roberto Colunga, Rúa señaló la incoherencia de los socialistes en refugar unes ordenances que “los sos propios compañeros nel Ayuntamientu d’Uviéu nos pidieron pa presentales ellí y que tán negociando col alcalde Gabino de Lorenzo”. La conceyala encargada de la Oficina Municipal de la Llingua señaló qu’hai una entrevista solicitada cola alcaldesa pa tratar de desbloquear la situación y entamar una negociación pa buscar soluciones al empantanamientu de les ordenances. 9 de marzu, 2005 0 FacebookTwitterPinterestEmail
Sociedá La Xunta apuesta por afondar nel trabayu entamáu pol Conceyu Abiertu pola Oficialidá by asturnet 8 de marzu, 2005 La Xunta pola Defensa de la Llingua Asturiana valoró perpositivamente la respuesta ciudadana a la convocatoria unitaria en demanda de la oficialidá celebrada esti sábadu 5 y considérala un exemplu “del camin a siguir sumando más voluntaes” a la llucha pola reconocencia de los drechos llingüísticos del pueblu asturianu. La organización cívica fexo esta valoración nuna reunión celebrada ayer n’Uviéu na que s’alcordó tamién potenciar el trabayu de la Xunta nel Conceyu Abiertu pola Oficialidá en vista del ésitu de la so primer movilización social. El portavos de la Xunta pola Defensa de la Llingua, Xulio Casado reconoció que delles voces dientro’l movimientu pola reivindicación llingüística “yeren pesimistes y duldaben de que la manifestación del 5-M fuere a tener l’apoyu social qu’al final se consiguió”, por eso la importante respuesta d’organizaciones y persones a la convocatoria (más de cinco mil, según les estimaciones más realistes) supón pa la Xunta “una reconocencia del trabayu desenvueltu pol Conceyu Abiertu pola Oficialidá” y la confirmación de que la plataforma unitaria “ta nel camín acertáu, y nesi ye nel qu’hai de siguir en vista del ésitu de la manifestación del sábadu”. Otra de les valoraciones positives que fai la organización en defensa de los drechos llingüisticos “foi el fechu de que se xuntaran detrás de la mesma pancarta xente y organizaciones estremaos, en dellos casos completamente estremaos y esa ye una de les razones que nos enfota nel camín entamáu dende’l Conceyu Abiertu”. La repercusión mediática de la manifestación del sábadu, que consiguió se portada de los principales diarios impresos d’Asturies,tamién foi valorada prestosamente na reunión de la Xunta celebrada ayer. Tocante al mensaxe dirixíu a los partíos políticos con responsabilidá na prósima reforma del estatutu que se quiso tresmitir cola movilización del 5-M, el portavoz de la Xunta pola Defensa de la Llingua resúmelu afirmando que “esos partíos tienen de tomar bona nota de qu’hai una voluntá clara y mayoritaria na sociedá asturiana que respalda la oficialidá”. Dientro d’unos diez díes el Conceyu Abiertu pola Oficialidá va reunise pa facer la so propia valoración de la convocatoria del 5 de marzu y decidir les prósimes llinies d’acción de la plataforma. Pela so parte la so organización matriz, la Xunta trabaya ya na preparación de les cites reivindicatives del conciertu pola oficialidá del 23 d’abril y la manifestación del Día de les Lletres. 8 de marzu, 2005 0 FacebookTwitterPinterestEmail