Sociedá Darreu convoca una manifestación esti sábadu en La Felguera pol futuru n’Asturies by asturnet 4 d'ochobre, 2006 Esti sábadu 7 d’ochobre la organización moza Darreu tien convocada una manifestación en La Felguera baxo’l lema Futuru n’Asturies “onde se va protestar pola grave situación de la mocedá asturiana que se ve obligada a emigrar pa poder vivir y los que nun emigren, trabayen n’Asturies en condiciones precaries y d’esplotación”. La marcha organizada por Darreu va salir a les 19:00 hores de la Estación d’Autobuses y cuenta col apoyu de la Corriente Sindical d’Izquierda, Andecha Astur, l’Asociación d’Inmigrantes Residentes n’Asturies y otros colectivos sociales. Darreu busca con esta movilización “la organización de la mocedá pa poder algamar los derechos sociales básicos”, yá qu’esta “tien que ser un protagonista principal de les tresformaciones sociales d’Asturies”. La manifestación tien l’apoyu de delles organizaciones como’l sindicatu asturianu Corriente Sindical d’Izquierda (CSI), la organización política Andecha Astur y otres organizaciones sociales como l’Asociación d’Inmigrantes Residentes n’Asturies (AIRA,) ente otres. 4 d'ochobre, 2006 0 FacebookTwitterPinterestEmail
Sociedá Trento reconoz l’asturianu nun congresu sobre les minoríes llingüístiques by asturnet 4 d'ochobre, 2006 Ente los díes 5 y 7 d’ochobre la provincia de Trento acueye’l Forum Nazionale per le Minoranze Linguistiche que baxo’l lema ‘Comunicar la identidá’ va analizar les minoríes etnico-territoriales-llingüístiques, estableciendo una estratexa de comunicación pa elles y plantegando una revisión de les identidaes. Nel congresu, nel que van participar especialistes de diferentes comunidaes como la italiana, la eslovaca, la vasca o la galesa, l’asturianu tamien va tar presenta na participación de Próspero Morán, director d’Asturnews, que va falar de la comunicación de la identidá nos medios.Na primera xornada. nesti xueves 5, políticos locales aldericaron alrodiu de la definición de minoría llingüística y ficieron una descripción histórica y sociollingüística de les minoríes llingüístiques n’Italia. El director d’esti periódicu, Próspero Morán va participar mañana 6 d’ochobre nun debate sobre la tresmisión de la identidá nos medios de comunicación, que se va celebrar na Sala Rosa del Palazzo della Regione de Trento y nel que tamien van tar espertos d’otros comunidaes del estáu español, como la periodista vasca María González Gorosarri o’l director d’Euskal Telebista, Bigen Zupiria. La identidá va ser especialmente analizada nesti Forum de les minoríes llingüístiques al travies del cine, con películes como ‘Lusern’ de Lia G. Beltrami, ‘La destinazione’ de Piero Sanna o ‘Gioacchino, ricordi com’era roveda?’ de Giorgo Tomasi. 4 d'ochobre, 2006 0 FacebookTwitterPinterestEmail
Música La música tradicional asturiana va tar presente nel IV Encuentru Uruguayu de Música Celta by asturnet 3 d'ochobre, 2006 Montevideo vuelve celebrar l’ ‘Encuentru Uruguayu de Música Celta’, na so cuarta edición, pal que convoca a los principales esponentes del xeneru a nivel local, contando esti añu amás con invitaos especiales de la República arxentina. L’alcuentru que va tener llugar los díes 6, 7 y 8 d’ochobre ta organizáu en collaboración col Centru Asturianu-Casa d’Asturies del Uruguay que participa cola so Banda de Gaites Güestia. En tres nueches siguíes van xubir a escena artistes de diferentes estilos que van representar a toles naciones celtes que marcaron presencia nel Uruguay. El públicu asistente na Sala Alfredo Zitarrosa de la ciudá de Montevideo va poder esfrutar de música tradicional asturiana, gallega, escoesa, irlandesa y galesa, xunto a música folk y fusión celta. La Banda de Gaites Asturiana Güestia del Centru Asturianu-Casa d’Asturies del Uruguay va presentase’l sábadu 7 d’ochobre a les diez de la nueche compartiendo escenariu con Any Adrover (de l’Arxentina), Los Casal (fusión celta) y Montegal (música Folk de Galicia). 3 d'ochobre, 2006 0 FacebookTwitterPinterestEmail
Sociedá Simposiu Internacional na Universidá d’Uviéu pa recordar la obra de Ramón Menéndez Pidal by asturnet 3 d'ochobre, 2006 Con motivu del centenariu de la espublización de la obra de Menendez Pidal ‘El dialecto leones’, estudiu consideráu fundacional pa la filoloxía asturiana, el Seminariu de Filoloxía Asturiana de la Universidá d’Uvieu prepara un simposiu científicu, ente los díes 9 y 11 d’ochobre, coordináu pol profesor Xulio Viejo, nel qu’espertos de la propia Facultá, xunto a especialistes lleoneses, cántabros y portugueses van analizar la obra de Pidal, asina como los sos trabayos d’encuestación per Asturies que quedaren ineditos. Col envís da facer una revisión llingüística a estos cien años, el Seminariu de Filoloxía Asturiana collabora cola Universidá de Lleón que yá celebró un simposiu asomeyáu’l pasáu mes de marzu, cola participación del profesor Ramón d’Andres. Amás, a lo llargo d’esti congresu van dase a conocer unes encuestes dialectales feches por Pidal pel occidente a principios del sieglu pasáu qu’hasta agora taben inedites. El programa previstu pa esti simposiu internacional cuenta con un actu inaugural pal próximu llunes 9 d’ochobre coles autoridaes academiques, tres del que la profesora de la Universidá d’Uvieu, Serafina García, va dar la primer comunicación que lleva por títulu ‘L’asturianu na obra de Menendez Pidal’. A la tarde del mesmu llunes, ta previsto que sía Antonio Viudas Camarasa, de la Universidá d’Estremadura, quien siga coles intervenciones falando del patrimoniu llingüísticu estremeñu, pa que depues el so compañeru d’universidá, Juan Carrasco, fale de la transición ente’l astur-lleones y el gallego-portugues. La tarde del día 9 va terminar cola intervención de la investigadora Carmen Fernández Juncal, de la Universidá de Salamanca, que va analizar la dialectoloxía en Cantabria. El martes día 10 d’ochobre la Universidá d’Uvieu va rindir homenaxe a Ramón Menendez Pidal anantes de dar pasu a la intervención del profesor Xuan Carlos Busto Cortina que falará de la filoloxía asturiana anterior a esti eruditu. ‘El leones medieval’ de Jose Ramón Morala, de la Universidá de Lleón, ‘Dialectoloxía lleonesa actual’ d’Hector García Xil, y ‘L Mirandes: De Codialecto Pertues A Lhengua Oufecial’ por Antonio Bárbolo, de la Fundaçâo Para A Ciência E A Tecnología – Universidade De Trás-Os-Montes-Alto Douro, Portugal, van ser los ponentes del segundu día de les xornaes. L’últimu día del simposiu internacional, el miercoles 11 d’ochobre, va presentase la obra de Pidal referida al asturianu. Tres d’esta presentación, l’espertu del Seminariu de Filoloxía Asturiana, Fernando Alvarez-Balbuena, va falar sobre la dialectoloxía asturiana nel últimu sieglu. De tarde, Alvaro Arias Cabal, de la Universidá d’Uvieu, va estudiar la lexicografía asturiana dende Xovellanos hasta anguaño, Xose Nel Comba Paz fadrá lo propio coles fontes documetnales de la llingua asturiana y el profesor Xulio Viejo Fernández, coordinador d’estos alcuentros, trazará nuna conferencia les perspectives de futuru de la Filoloxía Asturiana. El Simposiu dedicáu a Menendez Pidal va terminar cola participación d’Ines Fernández Ordóñez, de la Universidá Autónoma de Madrid, que va repasar los oríxenes de la dialectoloxía hispánica y les sos perspectives de futuru, partiendo de Menendez Pidal y llegando a lo que sedría la dialectoloxía del sieglu XXI. 3 d'ochobre, 2006 0 FacebookTwitterPinterestEmail
Música La V edición del conciertu ‘Asturies nun escaez’ trai a los valencianos Obrint Pas by asturnet 2 d'ochobre, 2006 La organización política moza Darreu organiza la quinta edición del so conciertu conmemorativu de la Revolución Asturiana de 1934 que lleva por títulu ‘Asturies nun escaez’ cola participación de los grupos Dixebra, Escuela de Odio, K-Nalón y Testimoniu la Viztima y traen per primer vez a Asturies a la banda valenciana Obrint Pas. El conciertu tendrá llugar esti sábadu 7 d’ochobre a partir de les nueve la nueche nel IES Cuenca del Nalón (Av Reguera nº25) – l’antiguu politecnicu, de La Felguera (Llangreu). Pa esta nueva edición del conciertu ‘Asturies nun escaez’ organizáu por Darreu con motivu del aniversariu de la Revolución Asturiana de 1934, los grupos convidaos pa homenaxear a los revolucionarios d’ochobre van ser: los grupos de la Cuenca’l Nalón K-Nalon y Testimoniu La Víztima, que faen hip hop n’asturianu, asina como Escuela de Odio, grupu referente n’Asturies y a nivel estatal del hard core, con 4 trabayos discográficos a recostines. Xunto a los grupos locales va actuar el yá míticu grupu asturianu Dixebra, referencia nel rock astur, con venti años d’esistendia, ocho trabayos discográficos y un cd/dvd en directu del conciertu XX aniversariu preparáu pa finales d’añu. Con toos ellos y per primer vez n’Asturies, van actuar los valencianos Obrint Paz, grupu que mezcla delles tendencies dende’l folk fasta’l hard core melódicu pasando pol ska, reauge, rock… Obrint Pas ta esti añu cola xira “Internacionalista Tour” que yá los llevaró a tocar n’Alemaña, Francia, Italia, Londres y que, tres de la so visita a Asturies, los va llevar tamien per Chequia, Eslovaquia, Hungría y Llatinoamerica. Los valencianos tán consideraos como un verdaderu fenómenu na parte catalanofablante de la peninsulay col so últimu trabayu en directu, “En movement” tuvieron siete selmanes siguíes ente los 20 dvds más vendíos nel estáu, tou un hitu pa un grupu que canta en catalán y usa la dolçaina (instrumento tradicional) nos sos temes. Les entraes al conciertu ‘Asturies nun escaez’ d’esti sábadu tienen un preciu de 8€ anticipada y 10€ na puerta. 2 d'ochobre, 2006 0 FacebookTwitterPinterestEmail
Sociedá Xixón yá tien la toponimia oficial by asturnet 2 d'ochobre, 2006 El Boletín Oficial del Principáu d’Asturies espublizaba esta mañana’l Decretu pol que se determinen los más de setecientos topónimos oficiales del conceyu de Xixón, faciendo d’esta manera que sían yá doce los conceyos que recuperen oficialmente la so toponimia tradicional. Asina, Xixón, seis meses depues d’aprobala en Plenu, súmase a Carreño, El Franco, Llanes, Gozón, Llangreu, L.lena, Villaviciosa, Sariegu, Bimenes, Cabranes y Nava que yá determinaron la so toponimia. Na busca de terminar coles polemiques que llevantaron dalgunos topónimos como Valdornón o Cimavilla, l’Ayuntamientu xixones anunció que tol trabayu fechu nestos dos últimos años va vese espeyáu nun llibru que va recoyer, non sólo la nueva toponimia del conceyu, sinón tamien la historia de cadún de los nomes, el so orixe y la so razón de ser. 2 d'ochobre, 2006 0 FacebookTwitterPinterestEmail
Música Anabel Santiago canta esti fin de selmana en Madrí nun homenaxe a Clara Campoamor by asturnet 28 de setiembre, 2006 La cantante asturiana Anabel Santiago va participar dientro del Macrofestival 75 aniversariu del votu femenín n’España qu’esti domingu en Madrí homenaxea la figura de Clara Campoamor. Santiago va compartir escenariu con otres artistes como Cristina del Valle, Rim Banna, Marina Rossell, María Jose Hernández, Zumba que Zumba, Irene Shams, Piruchi (Ex Hijas del Sol), Mercedes Ferrer, Carmen París, Flamencas en Cuadro, La Negra, Esperanza Fernández, Buika y Amparanoia. L’actu que tendrá llugar nes instalaciones deportives del Paraninfu Norte de la Ciudá Universitaria de Madrí va axuntar en doce hores ininterrumpíes de música, teatru, cuentacuentos, esposiciones, flamencu, cine, dances, tangu y pasacais col nexu común d’espeyar la creatividá femenina. 28 de setiembre, 2006 0 FacebookTwitterPinterestEmail
Sociedá La Xunta pola Denfesa de la Llingua Asturiana presenta agrupación n’Ayande by asturnet 28 de setiembre, 2006 Esti sábadu 30 de setiembre va presentase una nueva agrupación de la Xunta pola Defensa de la Llingua Asturiana n’Ayande, llevando asina la reivindicación llingüística a otru conceyu más del occidente d’Asturies onde nos últimos años ta medrando enforma l’interes por llograr la oficialidá de l’asturianu. A les seis de la tarde de mañana, el filológu Fernando Álvarez-Balbuena, xunta otros militantes de l’agrupación ayandesa, va facer la so presentación oficial nel salón d’actos de la Casa Conceyu de La Puela. Coincidiendo cola celebración del ‘Ruxidoiru’06’, organizáu pola banda gaites El Rapigueiro, la presentación de la Xunta va facer una espicha nel Cafe Centro, a partir de les diez de la nueche, cola música en directu del grupu de rock ‘Nós!!!’. 28 de setiembre, 2006 0 FacebookTwitterPinterestEmail
Música Asgaya presenta en La Pola ‘Escontra’l tiempu’ by asturnet 27 de setiembre, 2006 El grupu de música folk ‘Asgaya’ va presentar a les ocho na Casa Cultura de La Pola un conciertu nel que, dientro de la programación de la Fundación Municipal de Cultura, va presentar los temes del so primer discu tituláu ‘Escontra’l tiempu’. Esta banda, anque como tala ye de recien creación, ta integrada por músicos d’abonda esperiencia como son Roberto Junquera (gaites y percusión), Ross Gala (vigulín y voz), David Adeva (baxu), Rosa Temprano (voz principal), Alberto Rionda (guitarra) y Sergio Álvarez (flauta y percusión). Asgaya naz de la xuntanza de varios músicos apasionaos pola tradición musical asturiana que, dende l’empiezu, trabayaron sobre temes populares, tradicionales, iguándolos y adaptándolos ente tolos componentes p’algamar un soníu personal. A esti garrapiellu de melodíes van añadiendose de seguío composiciones propies pa formar un repertoriu que busca’l mirar p’alantre siempre col máximu respetu a los oríxenes. 27 de setiembre, 2006 0 FacebookTwitterPinterestEmail
Música Roberto Junquera fai sonar la gaita de cine by asturnet 27 de setiembre, 2006 Roberto Junquera ta acabante d’editar el discu ‘Una gaita de cine’ (Grabaciones Pola, 2006), un recopilatoriu de bandes sonores de películes famoses iguaes por el pa la gaita. El discu, que se va presentar a partir del mes d’ochobre en directu, acompañáu nel escenariu por una banda de baxu, batería, teclaos y bouzouki, recueye temes tan conocíos como ‘Dirty Dancing’, ‘La Misión’, ‘Titanic’ o ‘Flashdance’. Amás, ta pensándose en facer un gran conciertu de presentación nel Teatru Campoamor d’Uvieu nel que participen inda más músicos asina como dos bandes de gaites pa tocar a comuña ‘Carros de fuego’ y ‘1492’. 27 de setiembre, 2006 0 FacebookTwitterPinterestEmail