Sociedá Izquierda Xunida amuésase contenta polos presupuestos autonómicos by asturnet 21 d'ochobre, 2005 El coordinador d’Izquierda Xunida d’Asturies Jesús Iglesias amosóse contentu col resultáu de la negociación de la so coalición nel gobiernu asturianu pa rematar el proyectu de presupuestos autonómicos. Pal cabezaleru d’IX les cuentes del Principáu pal prósimua añu “espresen el compromisu de la comunidá autónoma cola sociedá asturiana!. Iglesias indicó que s’empleen “tolos recursos” de los que puede disponer el gobiernu rexonal pa tentar resolver los problemes de los asturianos”, con medíes como’l salariu social, la intervención na contención del preciu de vivienda o iniciatives pa potenciar l’empléu xuvenil. El coordinador d’Izquierda Xunida destacó l’importante porcentaxe destináu a gastu social, el 65 por ciento del presupuestu y el incrementu nes partíes de I+D+i (25 por ciento), les destinaes a la Universidá (11 por ciento), a política social (15 por ciento), a la llucha contra los riesgos llaborales (15,43 por ciento) y a la cooperación al desarrollu (26,24 por ciento). 21 d'ochobre, 2005 0 FacebookTwitterPinterestEmail
Comunicación Radio Llangréu difunde les sos emisiones n’Internet by asturnet 20 d'ochobre, 2005 La emisora Radio Llangréu de la Productora de Programes del Principáu escomienza una nueva etapa cola so difusión al través d’Internet.La programación diaria de la radio pública va poder siguise d’agora pa en delantre dende cualquier llugar del mundu. Nesta nueva etapa los usuarios de la Rede van poder escuchar en tiempu real los conteníos de la programación y sumase a los oyentes que ya sintonicen davezu les emisiones de frecuencia modulada nel 94.9 (comarca del Nalón) y 101.8 (comarca del Caudal). Radio Llangréu emite una programación diaria, de llunes a viernes, de cinco hores de duración, dende les 900h. hasta les 1400h. La ufierta de la emisora inclúi informativos, entrevistes, música y entretenimiento.A esta programación diaria hai d’añadir la emisión de los sábados: dende les 1200h hasta les 1400h. Nesti casu trátase d’una programación na que’l deporte ye protragonista. Radio Llangréu 20 d'ochobre, 2005 0 FacebookTwitterPinterestEmail
Comunicación Los Premios Príncipe d’Asturies convierten Uviéu en centru d’atención mundial by asturnet 20 d'ochobre, 2005 L’ausencia de Letizia Ortiz por mor del so avanzáu estáu de xestación y la presencia del pilotu Fernando Alonso pa recibir el Premiu Príncipe d’Asturies de los Deportes marquen l’interés informativu n’Uviéu de la ceremonia d’entrega de los galardones que lleven el títulu del heriede de la corona y que va asitiar el Teatru Campoamor esta tarde en centru d’atención mundial. Un importante despliegue policial y de seguridá va acompañar esti viernes 21 la celebración del actu d’entrega de los Premios de la Fundación Príncipe d’Asturies. A l’avezada presencia de numberosu públicu nos alrededores del Hotel Reconquista y el Campoamor pa ver de cerca a les personalidaes galardonaes y a los miembros de la familia real española, va sumase esti añu l’interés suscitáu pola figura del pilotu Fernando Alonso, verdaderu ídolu de mases en toa Asturies y sobremanera na so ciudá natal. La ceremonia va retresmitise en directu por Televisión Española y pola canal informativa que tien colgao la Fundación Príncipe d’Asturies n’Internet. Per primer vez, amás del español y l’inglés, la tresmisión va dase n’otros idiomes: francés, italianu, alemán y portugués. 20 d'ochobre, 2005 0 FacebookTwitterPinterestEmail
Sociedá L’Academia celebra les sos XXIV Xornaes Internacionales d’Estudiu by asturnet 20 d'ochobre, 2005 El prósimu llunes 24 escomiencen na Facultá de Filoloxía d’Uviéu les XXIV Xornaes Internacionales d’Estudiu de l’Academia de la Llingua. Ente los participantes tán Carmén Alén Garabato que va falar de les asemeyances na minorización del occitano y l’asturiano; Francisco Llera, que va tratar d’aspectos sociollingüísticos y políticos en Xixón, ya Inaciu Llope que da una conferencia sobre’l xuegu d’identidaes na tierra de Navia-Eo. El profesor Xosé Lluis García Arias va ser l’encargáu d’abrir les XXIV Xornaes el llunes 24, a les 16.30, con una conferencia sobre arabismos nel dominiu llingüísticu astur. Diverses comunicaciones sobre fonética y toponimia van siguir a la conferencia de García Arias na primer xornada, que va rematar el profesor Philip Obrist con una ponencia sobre “Filix y los sos derivaos na toponimia asturiana”. El martes 25 ye Carmen Alén Garabato la que va abrir les xornaes a les 16.30 con una conferencia titulada “Dalgunes consideraciones sobre la situación sociollingüística de dos llingües minorizaes: occitano y asturiano”. A les 19.00, después de delles comunicaciones sobre diversos aspectos de la realidá cultural asturiana, Francisco Llera Ramo lleerá la so ponencia “Aspeutos sociollingüísticos y políticos nel conceyu de Xixón”. L’académica Marta Mori va abrir les Xornaes d’Estudiu nel so últimu día, el miércoles 26, a les 16.30 con una conferencia titulada “L’esiliu interior. El sentimientu de la tierra na poesía asturiana contemporánea”. Darréu de les comunicaciones, a les 19.30, Inaciu Llope pieslla les xornaes cola conferencia “Xuegu d’identidaes na tierra del Navia-Eo. Un averamientu críticu”. Programa completu de les XXIV Xornaes d’Estudiu 20 d'ochobre, 2005 0 FacebookTwitterPinterestEmail
Sociedá Xeira y la Xunta pola Defensa de la Llingua refuguen participar nes Xornaes de Ribadeo by asturnet 20 d'ochobre, 2005 La Xunta pola Defensa de la Llingua Asturiana y l’asociación cultural Xeira nun van tar nes xornaes que la prósima selmana se celebren en Ribadeo organizaes pola Universidá de Vigo pa debatir de la normalización llingüística en Galicia y n’Asturies. Les discrepancies y el refugue a les últimes iniciatives provenientes de la comunidá vecina pa la tierra de Navia-Eo paecen tar nel orixe d’estes ausencies nun alcuentru que fue duramente criticáu va unos díes pola Academia de la Llingua. Nel programa de les xornaes, nomaes I Escola Permanente Fermín Penzol, taba anunciada la presencia pal sábadu 29 d’ochobre del filólogu y miembru de la Xunta pol Defensa de la Llingua, Fernando Balbuena al llau de Carlón Callón de la Mesa Pola Normalización Lingüística de Galicia pa debatir alrodiu de “As normalizacións pendentes en Galiza e Asturias”. Pal mesmu día taba programáu el debate “Estandarización e normalización das falas do Eo-Navia” nel que diba participar l’asturianu Xosé Miguel Suárez, miembru de l’asociación Xeira, al llau de Carlos Varela, presidente d’Abertal y representante de l’Academia Galega na tierra de Navia-Eo. A la fin, según pudo saber esti mediu, nin Balbuena nin Suárez van tar presentes. La representación asturiana nes xornaes de Ribadeo queda asina reducida a la participación del escritor Xuan Bello, el profesor de la Universidá d’Uviéu, Xulio Viejo y el responsable de la Oficina de Política Llingüística del Principáu, Ramón d’Andrés. Bello va abrir les xornaes con una conferencia titulada “Historia de dos hermanes y un llobu”, presentáu pol caderalgu de la Universidá de Santiago Francisco Fernández Rei. El profesor Viejo falará de la situación del asturianu na Universidá d’Uviéu y el xefe de la Oficina de Política Llingüística va tratar de les virtúes y deficiencies del actual Plan de Normalización Social de la Llingua Asturiana. Les xornaes de la I Escola Permanente Fermín Penzol van celebrase del 28 al 30 d’ochobre nel Auditoriu Municipal de Ribadeo y tan organizaes pola Vicerrectoría de Relaciones Esteriores de la Universidá de Vigo y col sofitu del conceyu agospiador. 20 d'ochobre, 2005 0 FacebookTwitterPinterestEmail
Comunicación La canal n’Internet de la Fundación Príncipe d’Asturies recibe más de doce mil visites by asturnet 19 d'ochobre, 2005 La Fundación Príncipe d’Asturies punxo en marcha el pasáu 15 d’ochobre y por tercer añu consecutivu una nueva canal web informativa pal siguimientu de tolos actos que se desarrollen nos díes previos a la celebración de la ceremonia d’ entrega de los Premios Príncipe d’Asturies nel so XXV Aniversario. Hasta la fecha contabilizáronse, tres los primeros cuatro díes de funcionamientu de la canal, más de 12.000 visites. Los conteníos d’esta canal informativa adicional actualícense constantemente y ofrecen al usuariu diferentes artículos, vídeos y cróniques. Amás, nel portal inclúise una amplia galería d’imáxenes de caún de los galadonaos, asina como de los distintos actos que se desarrollen alrodiu los Premios. www.canalfpa.com / www.fpachannel.com 19 d'ochobre, 2005 0 FacebookTwitterPinterestEmail
Sociedá Rafael Palacios condena les inxerencies en Navia-Eo y pide la defensa de la fala by asturnet 19 d'ochobre, 2005 El director de l’Axencia Asturiana de Cooperación y portavoz nacional del Bloque por Asturies Rafael Palacios pronúnciase nun comunicáu unviáu a los medios informativos sobre la polémica remanecida nes últimes selmanes alrodiu de la realidá llingüística del Navia-Eo. Palacios pide un esfuerzu conxuntu en defensa del gallegu-asturianu per parte de toles instituciones del Principáu “especialmente la Oficina de Política Llingüística y la Academia de la Llingua Asturiana”. El responsable de Cooperación de la Conseyería de Xusticia y Esteriores ye, después de que lo ficiera’l presidente Areces, un de los pocos miembros del executivu autonómicu que se pronuncia sobre’l casu de la fala d’Entrambasaguas y les pretensiones nesa zona del gobiernu de Galicia o les conteníes na iniciativa parlamentaria d’Esquerra Republicana de Catalunya (ERC) sobre llingües del estáu. Respective a les inxerencies esternes nel Navia-Eo, Rafael Palacios afirma que “el Gobiernu de Galicia nun tien nenguna atribución pa tomar iniciatives qu’ afecten a los Conceyos del Eo-Navia y a la so lengua, y menos tovía sin contar n’asoluto coles instituciones asturianes y col Gobiernu d’ Asturies”. Nesi sen manifiesta que “nun se pueden tolerar los intentos d’inxerencia del Gobiernu de Galicia o d’Ezquerra Republicana de Catalunya (ERC) nos asuntos llingüísticos, culturales o políticos que competen a Asturies y a les sos instituciones, y condénolos con toa enerxía”. Nel escritu remitíu a los medios Palacios diz que “dende’l nivel de responsabilidá que tengo nel Gobiernu d’Asturies voi trabayar pa que les instituciones asturianes se fagan valer, tanto nes sos declaraciones públiques como nes iniciatives de defensa de la personalidá llingüística, cultural y política del gallego-asturiano o fala y de los asturianos y asturianes de los Conceyos del Eo-Navia”. El director xeneral de Cooperación reafirma nel so comunicáu “indudable e incuestionable asturianidad cultural y política” de les fasteres d’Entrambasaguas y recalca que la competencia de la política llingüística nesos conceyos “tienla n’esclusiva el Gobiernu d’Asturies”. Palacios remata’l so comunicáu con un encamientu na defensa del gallego-asturiano, qu’al so xuiciu “necesita del esfuerzu conxuntu de los movimientos sociales, del Gobiernu d’Asturies y de les instituciones asturianes competentes na materia, especialmente la Oficina de Política Llingüística y l’Academia de la Llingua”. 19 d'ochobre, 2005 0 FacebookTwitterPinterestEmail
Sociedá El Conseyu de Gobiernu apreba’l proyectu de presupuestos autonómicos by asturnet 19 d'ochobre, 2005 El Conseyu de Gobiernu del Principáu aprebó esta mañana na so reunión avezada de los xueves el proyectu de presupuestos autonómicos presentáu pol conseyeru d’Economía Jaime Rabanal. Los miembros d’Izquierda Xunida nel executivu valoraron positivamente l’aumentu del gastu social nes cuentes pa 2006. El responsable económicu del gobiernu asturianu presentó esta mañana’l so proyectu presupuestariu con un sesenta y cinco por cientu de la so cuantía dedicada a gastos sociales. L’aumentu nesti capítulu, especialmente en materia d’empléu y vievienda yera una de les desixencies de los socios de coalición d’IX-BA, que valoren positivamente sti incrementu, aseguró’l conseyeru Rabanal. La puesta en marcha del Ente Públicu de Comunicación contémplaee nes nueves cuentes: diecisiete millones d’euros, dos millones más de los previstos por mor, según el conseyeru de la carga del IVA. 19 d'ochobre, 2005 0 FacebookTwitterPinterestEmail
Sociedá La Selmana de Cultura Astur de Candás inclúi una Feria del Llibru y del Discu by asturnet 19 d'ochobre, 2005 La III Selmana de Cultura Astur de Candás inclúi na so edición d’esti añu la celebración d’una Feria del Llibru y del Discu n’Asturianu, amás de numberoses actividaes relacionaes cola realidá cultural del nuestru país. La villa carreñesa va acoyer dende’l prósimu llunes 24 d’ochobre y hasta’l prósimu 4 de payares diversos actos entamaos nel marcu d’estes xornaes organizaes pol grupu de Baile San Félix y l’Ensame Xuvenil Trisquel, y na que colaboren otros colectivos ya instituciones como la Xunta pola Defensa de la Llingua Asturiana, la Mancomunidá del Cabu Peñes y l’asociación Enredar Carreño. El llunes 24 inaugúrase na Casa de Cultura de Candás la esposiciòn “Asturies n’otra dómina” y esa mesma nueche va celebrase un conciertu de música tradicional. El 4 de payares escomienza nel Parque les Conserveres de la villa carreñesa una Feria del Llibru y del Discu Asturianu y al día siguiente, nel mesmu sitiu, celebraráse un amagüestu popular. Na nueche del sábadu 5 nel Parque les Conserveres va entamaee un conciertu con Gueta na Fonte, La Bandina’l Tombo y Skama la Rede. Meses redondes, alderiques, talleres de bailes y xuegos tradicionales componen el programa que va desenvolver esta III Selmana de Cultura Astur. 19 d'ochobre, 2005 0 FacebookTwitterPinterestEmail
Sociedá El conceyu de Cangas organiza dos cursos de llingua asturiana by asturnet 19 d'ochobre, 2005 La conceyalía de Cultura del Ayuntamientu de Cangas organiza por quintu añu consecutivu los sos cursos de llingua asturiana y que nesta edición van cuntar con dos niveles: ún d’iniciación y otru d’afondamientu. El plazu de matriculación ta abiertu hasta’l prósimu 28 d’ochobre. Los interesaos nos cursos habrán dir a la Oficina d’Información Xuvenil de Cangas pa formalizar la matricula eos niveles d’iniciación o perfeccionamientu. Como cada añu, les clases, de sesenta hores cada módulo, van desarrollase a partir del mes de payares n’ horariu de tarde a convenir polos interesaos. Con esta ya son cinco les ediciones convocaes d’unos cursos a los que l’añu pasáu acudieron cerca de mediu cientu de persones. 19 d'ochobre, 2005 0 FacebookTwitterPinterestEmail