Sociedá AI y Nun Tris escenifiquen la denuncia de Guantánamo nel Día Internacional contra la Tortura by asturnet 10 d'avientu, 2005 Amnistía Internacional d’Asturies remembra esti sábadu 10 el Día Internacional contra la Tortura y fai una llamada d’atención sobre los abusos cometíos por dalgunos gobiernos en nome de la llamada “guerra contra’l terror”. Embaxo’l lema “Pesllemos Guantánamo”, la organización humanitaria alerta de que la prixón norteamericana ye “la punta de un iceberg d’abusos” contra los derechos de la persona. La compañía asturiana Nun Tris pon la mázcara histriónica a la denuncia fecha por AI sobre los escesos de la política antiterrorista llevada a fechu por gobiernos como’l de los Estaos Uníos. Un actu na Plaza l’Ayuntamientu d’Uviéu ye’l marcu escoyíu pa llanzar esta denuncia empobinada contra l’adminstración Bush y na que s’afirma que Guantánamo “ye’l símbolu de la ‘guerra contra el terror’ entamada pol gobiernu de los EEXX tres los atentaos del 11 de setiembre”. Según informes recibíos por Amnistía Internacional, Estados Xuníos tien llantao centros de detención secretos en dellos países: Xordania, Pakistán, Exipto, Tailandia, o Afganistán, amás de la base estadounidense Diego García, ubicada nel Océanu Índicu en territoriu británicu, ente otros. 10 d'avientu, 2005 0 FacebookTwitterPinterestEmail
Comunicación La 2 de TVE emite’l documental “Alma rojiblanca” sobre’l Sporting by asturnet 9 d'avientu, 2005 La segunda cadena de Televisión Española va emitir los prósimos díes 12 y 13 d’avientu na so desconexón territorial el documental tituláu “Alma rojiblanca” sobre’l Real Sporting de Xixón. La producción del centru de RTVE n’Asturies va estrenase’l prósimu domingu 11 nun actu nel Pabellón de la Guía tres el partíu contra’l Lorca nel Molinón. El documental repasa’l sieglu d’esistencia del club playu y dalgunes de les sos figures más señeres a lo llargo d’estos cien años de fútbol en toles categoríes deportives. Los momentos hestóricos del club, la so participación en competiciones claves y la señaldá polos colores del equipu son otres de les facetes del Sporting que se contemplen na producción del centru territorial de Televisión Española. La emisión del documental ta programada en dos sesiones los díes 12 y 13 d’avientu a les 19.30 hores pola segunda cadena. 9 d'avientu, 2005 0 FacebookTwitterPinterestEmail
Sociedá IX-BA fai una propuesta d’autogobiernu plenu énte la indiferencia de PSOE y PP by asturnet 9 d'avientu, 2005 La Federación Socialista Asturiana (FSA) y el Partido Popular d’Asturies consideren que’l procesu de reforma del estatutu ha tar acordies colos movimientos de la política autonómica estatal y refuguen poro la posibilidá de que la nuestra comunidá entame un camín propiu d’autogobiernu, talo proponen Izquierda Xunida y el Bloque por Asturies. La propuesta de nuevu estatutu presentada poles dos formaciones coaligaes esti miércoles 7 n’Uviéu nun tien afayao nengún ecu nin nel PSOE nin nel PP. Los másimos cabezaleros de les dos formaciones mayoritaries declararon a diversos medios que’l´fin de la propuesta d’IX-BA “nun ye lo que toca falara agora “, en palabres del popular Ovidio Sánchez, pal que “nun hai nenguna demanda na cai sobre esti tema”, afirmó. En términos asemeyaos pronuncióse’l socialista Javier Fernández que refugó valorar la iniciativa d’Izquierda Xunida-Bloque: “nun vamos facelo en debate públicu sinón cuando s’entame la ponencia parlamentaria” y dixo como robla del so refugue a debatir la propuesta presentada esti miércoles pola coalición d’izquierdes que “ye meyor pensar que correr”. Jesús Iglesias, cordinador xeneral d’Izquierda Xunida d’Asturies y Roberto COlunga, secretariu xeneral del Bloque por Asturies presentaron nuna rueda de prensa conxunta una tabla de propuestes pal nuevu estatutu cola que se pretende dotar a la nuestra comunidá d’un nivel d’autogobiernu asemeyáu al de les comunidaes estatutariamente más avanzaes. Amás de l’inxerimientu d’una serie de derechos ciudadanos non recoyíos específicamente na Constitución, IX-BA proponen un estatutu nel qu’Asturies quede definida como nacionalidá, l’asturianu comparta oficialidá col castellanu y el Principáu cuente con una policía autonómica, ente otres midíes. 9 d'avientu, 2005 0 FacebookTwitterPinterestEmail
Sociedá IAS pide una política clara d’afirmación asturiana na tierra del Navia-Eo by asturnet 7 d'avientu, 2005 Izquierda Asturiana (IAS) considera que les pretensiones del Bloque Nacionalista Galego (BNG)nel so proyectu de nuevu estatutu sobre la posible incorporación a Galicia de conceyos limítrofes d’otres comunidaes son el resultáu d’una falta de política clara d’afirmación asturiana nel Navia-Eo por parte del gobiernu del Principáu. Inaciu Llope, portavoz nacional d’IAS afirmó que “la falta del estatus llegal d’oficialidá del asturianu y del gallego-asturianu, asina como d’ una política cultural clara de reafirmación de la cultura y de les señes d’ identidá asturianes en toa Asturies, y n’especial nel territoriu comprendido ente’l Navia y el Eo, constitúin una escusa perfecta pa que ciertos sectores en Galicia intenten imponer polítiques actives n’Asturies teledirixíes dende Galicia, ya incluso, como vemos cola propuesta d’estautu del BNG, la incorporación a Galicia de territorios que dende siempre fueron parte constituyente del nuestru país”. La formación nacionalista considera qu’énte les pretensiones del BNG namás cabe dende Asturies “especialmente dende’l gobiernu y les instituciones”, la defensa “sin prexuicios nin ambiguedaes de la cultura ya identitá de la zona y fomentar económica y socialmente una zona secularmente olvidada, respetando, en tou casu, la palabra y los sentimientos de los sos habitantes que reivindiquen abiertamente la so asturianidá”. 7 d'avientu, 2005 0 FacebookTwitterPinterestEmail
Sociedá Oficialícense los topónimos de Villaviciosa, Bimenes, Cabranes y Sariego by asturnet 5 d'avientu, 2005 p>El Boletin Oficial del Principáu d’Asturies (BOPA) del pasáu 2 d’avientu publicó los decretos de 17 de payares polos que se determinen los topónimos oficiales de los conceyos de Villaviciosa, Bimenes, Cabranes y Sariego. Rematen asina los trámites entamaos por estos conceyos pa la revisión de los sos nomes de llugar. La resolución de la Conseyería de Cultura qu’oficializa los topónimos respuende a la petición previa fecha pola Mancomunidá de la Sidra, a la que pertenecen los cuatro municipios y remata los trámites del so espediente col nomenclátor elaboráu pola Xunta Asesora de Toponimia. De los cuatro conceyos cola toponimia iguada namás nún d’ellos hubo ciertes discrepancies ente la comisión d’espertos del Principáu y los ayuntamientos. Fue’l casu de Villaviciosa nel que la capital, al pesar de la denominación d’usu popular de La Villa, a la fin va siguir llamándose Villaviciosa. 5 d'avientu, 2005 0 FacebookTwitterPinterestEmail
Sociedá La propuesta d’estatutu pa Galicia del BNG inclúi la posible incorporación de conceyos vecinos by asturnet 2 d'avientu, 2005 La propuesta de Nuevu Estatutu pa Galicia qu’elaboró el Bloque Nacionalista Galego (BNG)pa la so convención nacional del prósimu 17 d’avientu inclúi nes sos disposiciones transitories la posibilidá de que conceyos d’otres comunidaes puedan pidir la so incorporación a la comunidá gallega y encamiéntase a los parlamentos d’eses comunidaes a oficializar l’idioma de Rosalía. Les referencies a la llamada Galicia esterior alcuéntrense na disposición transitoria primera que diz: “van poder incorporase a Galicia aquellos conceyos limítrofes de característiques hestóriques, culturales, económiques y xeográfiques análogues, al través de procedimientos democráticos regulaos por llei”. La otra referencia ye la contenía la disposición transitoria segunda qu’afala que’l parlamentu de Galicia reclame “a los parlamentos de les comunidaes autónomes a les que pertenecen les comarques limítrofes de fala gallega a que declaren cooficial nel territoriu de los conceyos d’eses comarques y nos órganos institucionales centrales de les respectives comunidaes autónomes”. Nel testu que tendrá ser ratificáu pola Convención Nacional del Bloque el prósimu 17 d’avientu faise tamién oficial l’usu de la llingua de signos na comunidá de Galicia y defínese a esti país como “nación, explicitada nun fechu hestóricu, llingüísiticu, cultural, socioeconómicu y políticu d’ampliu raigañu y singularidá”. Más información 2 d'avientu, 2005 0 FacebookTwitterPinterestEmail
Sociedá L’Axencia Asturiana de Cooperación presenta’l so Códigu Éticu by asturnet 2 d'avientu, 2005 El responsable de l’Axencia Asturiana de Cooperación Rafael Palacios xunto al represntante de la coordinadora de ONGD d’Asturies, Javier Arjojan, presentaron el Códigu Éticu que va guiar l’aval de los proyectos destinaos a promover el desarrollu n’otros países. El protocolu quier valir pa marcar unes normes de conducta que garanticen el compromisu de los proyectos de cooperación col desarrollu sostenible y el respetu a los derechos humanos, asina como la tresparencia y solvencia de los llabores entamaos en terceros países. Palacios reconoció que nos últimos años produciéronse n’Asturies cambios importantes nel ámbitu de la cooperación al desarrollu, la solidaridá internacional y la defensa y promoción de los derechos humanos y que los diferentes axentes que tán xugando dalgún papel nesti campo vieron como la so capacidá d’influencia y la so presencia social aumentaben abondo. Como consecuencia d’ello el responsable de l’Axencia consideró imprescindible atopar un consensu respective a les normes étiques de conducta a siguir poles ONGD nel desenvolvimientu de los sos proyectos, asina como la necesidá d’elaborar un protocolu nel que se recoyeran estos principios. Rafael Palacios afirmó que “la calidá de la cooperación al desarrollu, la solidaridá internacional y la defensa y promoción de los derechos humanos reposen, esencialmente, sobre les imáxenes y mensaxes que se tresmiten a la sociedá, oxetu del nuestru trabayu de sensibilización”. Nesi sen, Palacios dixo que “esti Códigu Éticu de Conducta pretende promover la toma de conciencia, aumentar la voluntá de participación, intensificar la solidaridá y reforzar el compromisu col oxetivu de provocar cambios estructurales a favor de los países más emprobecíos”. 2 d'avientu, 2005 0 FacebookTwitterPinterestEmail
Comunicación El conceyu de Noreña apreba crear una emisora de radio municipal by asturnet 1 d'avientu, 2005 Les asociaciones integrantes de la Plataforma ‘Por una radio’ de Noreña amosaron el so contentu pol alcuerdu aprebáu pel consistoriu en plenu municipal pa poner a funcionar una emisora de radio nel conceyu. La creación de la radio local yera una demanda manifestada por abondos colectivos sociales del conceyu. La decisión de la puesta en marcha de la furura Radio Noreña solventóse por unanimidá nel plenu del pasáu 24 de payares y l’alcuerdu implica’l compromisu del Ayuntamientu en facer realidá el proyectu con una partía presupuestaria específica. Les asociaciones integraes na plataforma popular que pidía la emisora municipal congraciáronse de la iniciativa del consistoriu y amuésense enfotaes en que’l procesu de creación de la radio siga’l so cursu cola mesma “propiedá y naturalidá” cola que se consiguió l’alcuerdu unánime de los grupos presentes nel plenu. 1 d'avientu, 2005 0 FacebookTwitterPinterestEmail
Comunicación Radio Asturias entama una nueva FM y cambia les frecuencies del so dial by asturnet 30 de payares, 2005 El grupu Radio Asturias de la cadena SER cuenta dende esti xueves 1 con cuatro emisores na nuestra comunidá: tres en frecuencia modulada y una n’onda media. L’ampliación del so llabor informativu con una nueva emisora de FM y la reordenación de los espacios esistentes faen que cambien la configuración de les sos frecuencies col empiezu del mes d’avientu. Les emisores de RADIO ASTURIAS OM y RADIO ASTURIAS FM van centrar la so programación nel ámbitu autonómicu dende esti viernes 1 d’avientu, mientres que SER ALTO NALÓN y SER BAJO NALÓN, amás de tresmitir la señal y programación convencional del Grupu, van poner la so atención nes sos comarques d’ influencia na Cuenca del Nalón, nel casu de SER ALTO NALÓN y los conceyos de Grao, Pravia, Candamo, Sotu’l Barcu y Avilés, en el caso de SER BAJO NALÓN. 30 de payares, 2005 0 FacebookTwitterPinterestEmail
Comunicación El Principáu firma un alcuerdu de colaboración de RTVE cola televisión autonómica by asturnet 30 de payares, 2005 El presidente del Principáu Vicente Álvarez Areces y la directora xeneral de RTVE Carmen Carafell firmaron esti miércoles 30 pela mañana un alcuerdu de colaboración ente l’ente públicu español y la radiotelevisión autonómica asturiana. El conveniu vixente hasta 2007 contempla l’accesu del ente autonómicu a recursos ya instalaciones del centru territorial de RTVE, asina como l’intercambiu de conteníos informativos y l’alquiler a precios preferenciales d’equipos técnicos. La radiotelevisión asturiana va poder disponer tres esti alcuerdu del usu de les instalaciones del centru de San Esteban de les Cruces na so planta baxa pal entamu de les sos emisiones de la programación informativa. L’intercambiu de noticies y de cobertura d’actos insitucionales tamién se contempla nel alcuerdu, asina como l’accesu preferencial a equipos d’unidá móvil per parte de l’autonómica asturiana y a los fondos audiovisuales del centru territorial de RTVE. Nel testu del conveniu especifícase que’l Principáu nun fai darréu aportación económica dala, a nun ser nel casu de l’asunción de los pagos prefernciales por usu de recursos ya instalaciones que fixe l’ente públicu español. L’alcuerdu entra en vigor dende la so firma hasta’l 31 d’avientu de 2007, fecha na que va tener que ratificase o propiciar la firma d’un nuevu conveniu de colaboración ente les dos empreses de comunicación. 30 de payares, 2005 0 FacebookTwitterPinterestEmail