Sociedá El folclor y la cultura asturiana van ser los exes de les IV xornaes de la Seronda del Colectivu Escontra’l Raigañu by asturnet 17 d'ochobre, 2006 Les xornaes, que se van cellebrar ente’l 27 y 28 d’ochobre nel Palaciu de Valdecarzana d’Avilés, van cuntar cola participación d’Adolfo García Martínez, Roberto González-Quevedo, Ignaciu Iglesias, Fernado Ornosa, Pedro Pangua y Yolanda Cerrada. L’estudiu de la importancia de la tradición na sociedá actual ye l’aria central d’estes Xornaes de la Seronda. Pa poder participar nes actividaes hai que s’inscribir enantes del día 24 d’ochobre. El pieslle de les xornaes va facelu’l grupu Tuenda con un conciertu didácticu’l sábadu 28 dende les 18.30 hores 17 d'ochobre, 2006 0 FacebookTwitterPinterestEmail
Sociedá Empieza la XI Selmana de la Mocedá de la Plataforma de Turón by asturnet 15 d'ochobre, 2006 La Plataforma Moza de Turón vuelve organizar un añu más la so Selmana de la Mocedá con un variáu cartel d’actividaes que van dende una escuela de circu pensada pa los más pequeños, a los talleres d’artesanía, pasando pelos conciertos nos que van participar bandes tan conocíes como Barón Rojo, Adizión Etílika o Escuela de Odio. Nel apartáu lliterariu d’esta XI edición, que se va celebrar ente los díes 16 y 22 d’ochobre, l’escritor turones Xandru Fernández va presentar la so novela ‘La banda sonora del paraísu’, mentes que Miguel Barrero, acompañáu por Laudelino Vázquez, falará del llibru ‘Espejo’. Amás, dientro de les actividaes organizaes con motivu d’esta Selmana de la Mocedá. la Plataforma de Turón tien convocáu un concursu de fotografía con temática rellacionada col valle mierense, cuyu plazu de presentación termina’l próximu día 17, exponiendose toles obres participantes na Casa la Xuventú de Turón. La XI Selmana de la Mocedá va inaugurase esta tarde, a les ocho, nel Nuevu Ateneu de Turón cola participación del Coru Mineru. 15 d'ochobre, 2006 0 FacebookTwitterPinterestEmail
Sociedá Izquierda Xunida afala al PSOE pa que cumpla’l pactu de gobiernu by asturnet 12 d'ochobre, 2006 El coordinador d’Izquierda Xunida y candidatu a les elecciones autonómiques de 2007, Jesús Iglesias, y la conceyala d’Educación y Cultura Asturiana de Xixón, Carmen Rúa, denunciaron públicamente l’incumplimientu sistemáticu de Llei d’Usu y Promoción del Asturianu, razón pola que, nel sen de que ‘la ciudadanía tien derechos’, afalaron al PSOE que cumpla’l pactu de gobiernu enantes de terminar la presente lexislatura. Dende IX criticaron la postura ‘fundamentalista’ de la Federación Socialista Asturiana no tocante a la llingua, llamentando que ‘cuando dalguien queda ensin argumentos fale d’obligatoriedá’. El grupu d’Izquierda Xunida llamó l’atención sobre la imposiblidá per parte de los ciudadanos de dirixise a l’Alministración n’asturianu, pesie a que la Llei d’Usu ye un testu llegal en vigor. ‘Los documentos que se dan pa facer los diferentes trámites tán sólo en castellanu y si se rellenen n’asturianu la so aprobación va depender de la simpatía que tenga pa cola llingua’l funcionariu que los recueye’. No tocante a la toponimia, IX alvirtió que va tar cuidando la so aplicación, por eso soliciten alcuerdos cola alministración del Estáu qu’ayuden a la modificación de los rótulos que dependen del Ministeriu d’Infraestructures. Jesús Iglesias, que pidió respetu hacia los derechos de los asturfalantes, comparecía na rueda de prensa con Carmen Rúa, conceyala nel Ayuntamientu xixones, qu’aseguró que de dase una revisión del pactu nes elecciones del añu que vien ‘va ser muncho más fuerte que l’actual y va tener más desixencies’. Ente elles, Rúa pidió’l desbloqueu de les ordenances municipales del asturianu. 12 d'ochobre, 2006 0 FacebookTwitterPinterestEmail
Sociedá Glayiu.org estrena estaya editorial cola espublización de ‘Carlos Marighella, el deber del revolucionariu’ by asturnet 12 d'ochobre, 2006 El portal Glayiu.org estrena un nuevu proyectu col que debuta nel panorama editorial na busca de recuperar ‘obres escaecies o ignorades pol mercáu que puedan contribuyir a enriquecer el conocimientu y l´alderique na nuestra tierra’. La primer obra editada por Glayiu ye ‘Carlos Marighella, el deber del revolucionariu’, el primer estudiu del pensamientu del que fuere carismáticu políticu y teóricu revolucionariu nel Brasil de finales de los años 60. La edición inclúi torna’l asturianu del ‘Manualín del guerrilleru urbanu’ y ‘Carta a los revolucionarios europeos’ de Carlos Marighella. 12 d'ochobre, 2006 0 FacebookTwitterPinterestEmail
Sociedá El Teatru Xovellanos reparte mañana 800 entraes pal encuentru ente Auster y Almodóvar by asturnet 12 d'ochobre, 2006 El Teatru Xovellanos de Xixón va repartir mañana, a partir de les diez, 800 entraes de baldre p’asistir al encuentru ente Paul Auster y Pedro Almodóvar, que va ser moderáu pol editor Jorge Herralde’l próximu día 19 d’ochobre nel mesmu escenariu. El coloquiu ta programáu dientro de les actividaes de la XXVI edición de los Premios Príncipe d’Asturies que se van entregar al día siguiente nel Teatru Campoamor d’Uvieu. 12 d'ochobre, 2006 0 FacebookTwitterPinterestEmail
Sociedá El conceyu del Franco organiza un cursu básicu de gallego-asturianu pa trabayadores municipales y periodistes by asturnet 8 d'ochobre, 2006 El conceyu del Franco organiza cola collaboración de la Oficina de Política Llingüística de la Conseyería de Cultura, Comunicación y Turismu del Principáu d’Asturies un Cursu Básicu de Gallego-asturianu de 30 hores de duración que ta destináu a los trabayadores municipales y los periodistes. El cursu, que se va desenvolver del 23 d’ochobre al 15 de diciembre y que ta dividíu en tres meteries, estremando la parte gramática de la práctica asina como la sociollingüística del gallego-asturianu, va dase los llunes y vienres nel Salón de Sesiones del conceyu del Franco (A Caridá) de 6 a 8 de la tarde, o a les 9, según los díes. Esti cursu, d’inscripción gratuita, tien abiertu’l plazu hasta’l próximu 23 d’ochobre. Los interesaos pueden apuntase nel conceyu del Franco (A Caridá) o na Oficina de Política Llingüística el Principáu, afincada na Conseyería de Cultura, na Plaza del Sol d’Uvieu, siendo válida la inscripción per telefonu. Al terminar el cursu los alumnos van recibir un certificáu del conceyu y de la Conseyería de Cultura, qu’acredite la so participación y los sos conocimientos. 8 d'ochobre, 2006 0 FacebookTwitterPinterestEmail
Sociedá Empieza na Universidá d’Uviéu’l Congresu sobre la obra de Menéndez Pidal by asturnet 8 d'ochobre, 2006 El simposiu científicu organizáu pol Seminariu de Filoloxía Asturiana, baxo la coordinación del profesor Xulio Viejo, alrededor de la obra ‘El dialecto leones’ del llingüista Ramón Menendez Pidal ente los díes 9 y 11 d’ochobre, va ser inauguráu esta mañana poles autoridaes academiques, tres de les que la profesora de la Universidá d’Uvieu, Serafina García, va dar la primer comunicación que lleva por títulu ‘L’asturianu na obra de Menendez Pidal’. A la tarde, ta previsto que sía Antonio Viudas Camarasa, de la Universidá d’Estremadura, el que siga coles intervenciones falando del patrimoniu llingüísticu estremeñu, pa que depues el so compañeru d’universidá, Juan Carrasco, fale de la transición ente’l astur-lleones y el gallego-portugues. Esta tarde va terminar cola intervención de la investigadora Carmen Fernández Juncal, de la Universidá de Salamanca, que va analizar la dialectoloxía en Cantabria. Mañana van seguir el restu d’espertos de la propia Facultá, xunto a especialistes lleoneses, cántabros y portugueses, analizando la obra de Pidal, asina como los sos trabayos d’encuestación per Asturies que quedaren ineditos, col envís de facer una revisión llingüística a estos cien años de Filoloxía Asturiana. 8 d'ochobre, 2006 0 FacebookTwitterPinterestEmail
Sociedá El Conseyu de la Mocedá d’Asturies entama la campaña “Da-y un euru al Institutu Asturianu de la Mocedá” by asturnet 5 d'ochobre, 2006 Ente’l desenrollu de la convocatoria de subvenciones, que’l CMPA camienta dañina pal asociacionismu xuvenil, entama esta protesta que va tar presidida por un gochín. El Conseyu de la Mocedá fai un llamáu a los colectivos xuveniles pa quingresen un euru pa devolve-ylu al Institutu Asturianu de la Mocedá. Dende la espublización nel BOPA de la presente convocatoria de subvenciones del Institutu Asturianu de la Mocedá dirixida a les asociaciones y entidaes xuveniles, el Conseyu de la Mocedá del Principáu d’Asturies vieno denunciando que’l modelu escoyíu pola institución podía trayer problemes al movimientu asociactivu. Paulino Feito , presidente del CMPA considera que “la convocatoria d’esti añu amestó delles novedaes que dificulten los procesos de xestión y xustificación de les subvenciones, pudiendo llevar en dalgunos casos a la quiebra a dalgunes asociaciones”. El CMPA esixe’l mesmu tratu qu’al restu pa les asociaciones xuveniles, según Feito l’Institutu de la Mocedá “diz amparase na Llei de Subvenciones, pero otros departamentos de l’Alministración convoquen subvenciones ensin esixir tanto a los sos destinatarios”. L’organismu de representación xuvenil camienta que la Conseyería de Cultura, de la que depende l’Institutu de la Mocedá nun conoz les “trabes al movimientu asociativu xuvenil” polo que Paulino Feito llega incluso a reflexonar sobre si “paga la pena siguir participando nuna Comunidá au les polítiques de mocedá siguen tando a la cola”. El Conseyu denunció que nes últimes comunicaciones del Institutu de la Mocedá esti “perenriba de cualesquier otra consideración, la comunicación basóse nos supuestos nos que les asociaciones habríen devolver los eventuales remanentes de perres que pudieren dase. El CMPA ente esi interés decidió entamar una campaña na que les asociaciones xuveniles devuelvan la cantidá simbólica d’un euru metíu nuna hucha gochín. Más información Conseyu de la Mocedá d’Asturies Institutu Asturianu de la Mocedá 5 d'ochobre, 2006 0 FacebookTwitterPinterestEmail
Sociedá Llangréu retula’l conceyu cola toponimia oficial by asturnet 5 d'ochobre, 2006 L’ayuntamientu de Llangreu va retular los pueblos del conceyu cola toponimia oficializada pol Gobiernu del Principáu d’Asturies en xunetu del añu 2005. Esti cambiu, cuya revisión va tar preparada pa dientro quince díes, afecta a un total de noventa poblaciones de les trescientes que formen el conceyu, yá que bona parte d’ellos teníen corrixida la toponimia dende hai tiempu. 5 d'ochobre, 2006 0 FacebookTwitterPinterestEmail
Sociedá Darreu convoca una manifestación esti sábadu en La Felguera pol futuru n’Asturies by asturnet 4 d'ochobre, 2006 Esti sábadu 7 d’ochobre la organización moza Darreu tien convocada una manifestación en La Felguera baxo’l lema Futuru n’Asturies “onde se va protestar pola grave situación de la mocedá asturiana que se ve obligada a emigrar pa poder vivir y los que nun emigren, trabayen n’Asturies en condiciones precaries y d’esplotación”. La marcha organizada por Darreu va salir a les 19:00 hores de la Estación d’Autobuses y cuenta col apoyu de la Corriente Sindical d’Izquierda, Andecha Astur, l’Asociación d’Inmigrantes Residentes n’Asturies y otros colectivos sociales. Darreu busca con esta movilización “la organización de la mocedá pa poder algamar los derechos sociales básicos”, yá qu’esta “tien que ser un protagonista principal de les tresformaciones sociales d’Asturies”. La manifestación tien l’apoyu de delles organizaciones como’l sindicatu asturianu Corriente Sindical d’Izquierda (CSI), la organización política Andecha Astur y otres organizaciones sociales como l’Asociación d’Inmigrantes Residentes n’Asturies (AIRA,) ente otres. 4 d'ochobre, 2006 0 FacebookTwitterPinterestEmail