Sociedá Xulguen a seis miembros de la Xunta pola defensa de la llingua tres manifestase con La Pita en Llugones. by asturnet 25 d'ochobre, 2006 La Xunta pola Defensa de la Llingua Asturiana convoca una concentranción pal vienres 27 d’ochobre a les 13,30 hores delantre los Xulgaos de La Pola (Siero) pola llibertá d’espresión Seis miembros de la Xunta pola Defensa de la Llingua Asturiana van ser xulgaos esti vienres en La Pola (Siero) depués de ser denunciaos por una concentración fecha’l 14 de xunu por mor de la inauguración d’un centru de salú en Llugones, al qu’asistía el presidente d’Asturies. La concentración convocóse dientro de la campaña de la organización de defensa de los derechos llingüísticos pa denunciar la situación “d’acosu y de falta de llibertaes que sofren los y les falantes d’asturianu”. Depués de la concentración los activistes de la Xunta fueron identificaos y reteníos demientres dos hores pa depués ser denunciaos y recibir la citación xudicial. La Xunta considera qu’estes actuaciones son “intolerables”. “Los derechos de llibertá d’espresión y de crítica política son fundamentales en cualaquier democracia”. La Xunta camienta que’l gobiernu asturianu “ha correxir la so política de marxinación llingüística” y nun “criminalizar la vindicación” espaciu web de la Xunta pola Defensa de la Llingua Asturiana 25 d'ochobre, 2006 0 FacebookTwitterPinterestEmail
Sociedá L’Academia de la Llingua Asturiana pieslló les XXV Xornaes Internacionales d’Estudiu by asturnet 25 d'ochobre, 2006 L’Academia de la Llingua Asturiana peslló ayer les XXV Xornaes Internacionales d’Estudiu depués de tres díes nos que s’abordaren temes venceyaos a la cultura y a la llingüística del dominiu ástur. Na xornada de clausura participaron, ente otros y otres, Eloy Gómez Pellón, Rafel Rodríguez Valdés, Mª Yolanda Magdalena Montes o Leopoldo Tolivar Alas. Nel pieslle de les Xornaes la presidenta de la máxima autoridá llingüística del país, Ana Cano, congratulóse de que la comunicación de Mª Yolanda Magdalena Montes, vetada pol RIDEA, viera la lluz nes Xornaes d’EStudiu; asina como esixió que naide nun fuera discrináu por mor del usu de la llingua asturiana en nengún ámbitu. La conferencia d’Eloy Gómez Pellón, de la Universidá de Cantabria, sobre’l significáu de les pallabres y d’otros signos na vida cotidiana nun valle asturiana -específicamente’l d’Ardisana en Llanes- dio entamu al caberu de los díes de les Xornaes d’Estudiu. Paula Pulgar Alves entamo la xera de les comunicaciones con un estudiu antropolóxicu sobre la importancia de la escanda en dellos llugares del Val.le’l Güerna. La importancia, mesmo símbolica que material, que tien anguaño’l cereal asturianu, asina como los ritos p’algamar un bon pan o bol.lu d’escanda. Darréu l’historiador Rafael Rodríguez Valdés presentó la so comunicación sobre’l tratamientu de la llingua asturiana na historiografía contemporanea. Pa Valdés esiste un “tapecimientu de la esistencia de la llingua dientro del estudiu de la historia d’Asturies” poro plantegó unes llinies d’actuación pal estudiu de la historia, “acordíes cola realidá social d’Asturies”. Rafael Valdés citó que l’ausencia -na historiografía “oficial”- de la llingua ye tán grave qu’hasta 1974 nun aparez una referencia a la cuestión llingüística “polo que d’un día pa otru surdieron 30000 firmes sofitando l’idioma” -en referencia a les camapañes de Conceyu Bable. Nel turnu d’intervención del públicu, el profesor García Arias citó que “nun recién conceyu sobre les llingües nel reinu de Lleón nun se citaba a la llingua asturiana, tampoco la variedá lleonesa del idioma, anque sí al gallego o al castellano”. Yolanda Magdalena Montes presentó la so comunicación, vetada nel Congresu d’Estudios Asturianos del RIDEA, na que espuso’l trabayu desendolcáu como responsable del aria de llingua asturiana nel conceyu de Llangréu. Nicolás Bartolomé Pérez fizo una comunicación sobre la situación del idioma nes provincies de Lleón y Zamora. Na comunicación citó qu’hai un sieglu en bien de llugares averaos a Lleón o Zamora l’asturianu yera la llingua d’usu popular, mientres qu’anguaño nestes zones “queden falantes patrimoniales”. Nicolás Bartolome refirióse a los intentos de dixebra llingüística -con respectu a la norma asturiana- promovíos por dalgunos grupos lleonesistes nos que se lleguen a proponer gramática y ortografíes propies pa les variedaes lleoneses del la llingua asturiana. Asina mesmo destacó que la prósima reforma del estatutu d’autonomía la llingua asturiana, denominada lleonés, sedrá incluyida nel mesmu con una redacción asemeyada a la del anguaño vixente n’Asturies. González Riaño dio anuncia de que l’estudiu sociollingüísticu del norte de Lleón va ampliase darréu a tola provincia asina como a los conceyos zamoranos que mantienen l’usu del asturianu. Xabiel García presentó los datos d’una encuesta sociollingüística fecha ente los meses de setiembre y ochobre de 2006 a estudiantes de filoloxía de les Universidaes de Santiago, Uviéu y Valencia. Na encuesta ponse de manifiestu’l sofitu de los estudiantes a la oficialidá del idioma asturianu. Leopoldo Tolivar Alas, profesor de la Universidá d’Uviéu, peslló les comunicaciones esplicando los conceptos xurídicos de la supraterritorialiedá y la extraterritorialiedá. Tolivar reconocío que “si bien esisten vies d’amparu” pa iguar la situación llegal del asturianu via Tribunal Constitucional la poca repercusión d’Asturies fadría qu’estes vies nun tuvieren una rempuesta fayadiza, o qu’inclusu acabaren archivaes. La profesora Aurélia Merlan, de la Universidá de Constanza, dio la conferencia final de les Xornaes d’Estudiu con estudiu comparativu sobre les tres llingües minorizaes del noroeste peninsular, gallegu, mirandés y asturianu; si bien esplicó que’l mirandés y l’asturianu. L’estudiu afitó les similitues, y peculiaridaes, de los sistemes llingüísticos. Toles conferencies y comunicaciones d’estes Xornaes d’Estudiu de l’Academia de la Llingua Asturiana van asoleyase nos próximos númberos de la revista Lletres Asturianes. 25 d'ochobre, 2006 0 FacebookTwitterPinterestEmail
Sociedá L’Arribada llega’l so cuartu día by asturnet 25 d'ochobre, 2006 Güei xueves, 26 d’ochobre, a les 17hores, entama na Sala Conferencies del C.C .Antiguu Institutu de Xixón, la cuarta xornada de l’Arribada 2006, cola presentación sobre los “Cuentos curtios de la Tertulia Cultural El Garrapilellu”, que contará cola presencia de Tino Lozano, ex-presidente de l’asociación, y con Milio Rodríguez Cueto, escritor y representante de Vtp, qu’editara la segunda edición de los Cuentos Premiaos nel concursu lliterariu de la Tertulia Cultural. A les 18 hores, dientru del marcu Nuevos rumbos de la lliteratura asturiana: el cine, fadrá llectura de la so ponencia La palabra filmada l’escritor y cineasta Ramón Lluis Bande y a les 19 hores, habrá una mesa redonda con Ramón Lluis Bande, José Braña, Rubén Cienfuegos y José Luis Ruiz. A les 20 hores, y nel mesmu llugar, presentaráse la coleición Tiempu de cristal del Atenéu Obreru de Xixón, nun actu con Antón García, Vicente García Oliva y Paz Fonticiella. 25 d'ochobre, 2006 0 FacebookTwitterPinterestEmail
Sociedá El Centru Asturianu de Madrid celebra’l so día de les Lletres Asturianes by asturnet 25 d'ochobre, 2006 El Salón Príncipe d’Asturies del Centru Asturianu de Madrid va cellebrar güei’l Día de les Lletres Asturianes cola entraga de Diplomes a los Alumnos del Cursu de Llingua 2006. Daráse a conocer, tamién, el fallu del V Concursu de Relatu curtiu en Llingua Asturiana 2006 y se presentará’l Cuentu ganador de la edición 2005 “Amores ya desencantos” de Xosé María Rodríguez. Daráse un exemplar d’esti cuentu a tolos asistentes. 25 d'ochobre, 2006 0 FacebookTwitterPinterestEmail
Educación Entama “Cine na enseñanza”- Educación pa la salú by asturnet 24 d'ochobre, 2006 El Programa “Cine na Enseñanza-Educación pa la Salú” pa esti cursu escolar entama en Xixón cola proyección de la película nos cines Centro. Esti programa de calter gratuitu, enmárcase nes actividaes preventives que ta promoviendo la Fundación Municipal de Servicios Sociales de Xixón nel marcu del Plan Municipal sobre Drogodependencies del Ayuntamientu de Xixón. L’obxetivu d’esti programa, que yá se vien faciendo n’otros conceyos del país, ye emplegar el cine como un preséu lúdicu y motivador pa depués analizar les actitues y los conflictos que se presenten en caun de los llargometraxes mediante delles actividaes didáctiques tutelaes pol profesoráu, cola fin d’estimular la so reflexón crítica. La idega ye sofitar a la mocedá a afrontar los sos problemes, activar soluciones creatives a les mesmes y facilitar el so desenrrollu integral como persones independientes. 24 d'ochobre, 2006 0 FacebookTwitterPinterestEmail
Sociedá Continúen los actos de l’Arribada 2006 by asturnet 24 d'ochobre, 2006 La tercera xornada de L’Arribada 2006 va tener, a les 18,00 hores na sala de conferencies del Antigüu Institutu de Xixón, un alcuentru de les Voces poétiques de la mar de San Llorienzo que va cuntar cola presencia de los poetes L.luis Fernández, Inaciu Galán, Aurora García Rivas y Helena Trejo Fombella. Darréu, a les 19,00 hores, na Escuela d’Hostelería y Turismu de Xixón, habrá una intervención d’Hasier Etxebarria y David de Jorge nel marcu del ciclu “Nuevos rumbos de la lliteratura asturiana: la gastronomía”. A les 20,00 hores fadráse una mesa redonda na que van participar David de Jorge, Lluis Nel Estrada, Hasier Etxeberria y Serxu Solares Reseña biográfica d’Hasier Etexeberria y David de Jorge HASIER ETXEBERRIA Periodista y escritor d’una veintena de llibros de lliteratura, foi pioneru en televisión en cuestión de programes gastronómicos, onde cocineros como Karlos Arguiñano dieron con él los primeros pasos. Lo más granao de la cocina vasca pasó poles emisiones: Arzak, Arbelaitz, Berasategui, Pildaín, etc.Anguaño presenta una emisión lliteraria, unu de los ocos oasis en televisión, Satúrela, y publica, sobre too narrativa, amás de collaborar en diversos periódicos y medios de comunicación. Ganador del Premio Antena de Oro de Televisión y otros, y solu o acompañáu, espublizó dellos llibros de conteníu gastronómicu. DAVID DE JORGE cocineru profesional, nos fogones hasta los treinta años, hoi dedícase a llabores mui diverses de xestión y promoción con Martín Berasategui (Restarantes Guggenheim-Bilbao, Kursaal, Kukuarri, Bodegón Alejandro y Martín Berasategui) y con Andoni Luis Aduriz (Restaurante Mugaritz), trabayando amás en suculentos proyectos pa la industria de l’alimentación. Deprendió a cocinar con José Ignacio Celaya, Félix Altolagirre, Pedro Subijana, Hilario Arbelaitz, Michel Guérard, Jacques Chibois y Martín Berasategui, ente otros.Foi nomáu hai unos años Mejor Cocinero Joven de España. 24 d'ochobre, 2006 0 FacebookTwitterPinterestEmail
Sociedá Ayande acueye’l VII Seminariu d’Estudios de Belenos by asturnet 24 d'ochobre, 2006 Los díes 11 y 12 de payares cellebraráse na Puela d’Ayande el Seminariu d’EStudios Asturianos de la Fundación Belenos, qu’algama la so séptima edición. Esti añu dedicaráse a la música tradicional y la so evolución nos últimos años. Pa ello la Fundación Belenos va cuntar con especialistes na materia como ye’l casu de Xosé Ambás, José Ángel Hevia o Ismael González Arias. El sábadu 11 de payares presentaráse’l discu colectivu “Homenaxe a Aires de Palo”, nel Café Centro de La Puela y, darréu habrá un Filandón nel mesmu llugar. 24 d'ochobre, 2006 0 FacebookTwitterPinterestEmail
Sociedá Finen les XXV Xornaes d’Estudiu n’Uviéu by asturnet 24 d'ochobre, 2006 Les XXV Xornaes d’Estudiu de l’Academia de la Llingua Asturiana finen na tarde d’esti miércolesdepués de dos díes de conferencies y comunicaciones del más altu nivel. Una conferencia d’Eloy Gómez Pellón abre’l caberu día de les XXV xornaes d’Estudiu de l’Academia de la Llingua Asturiana. Eloy Gómez Pellón, de la Universidá de Cantabria, va dar esta tarde dende les 16,30 hores nel Campus del Milán, una conferencia “Sobre el significado de las palabras y de otros signos en un valle asturiano”. A les 17,45 entamarán les comunicaciones. La primer d’elles ye la de Paula Pulgar Alves col títulu “La tradición de la escanda en dellos l.lugares d’El Val.le’l Güerna: historia, costumes y vocabulariu”. Siguirá “El tratamientu de la llingua asturiana na historiografía contemporánea n’Asturies” del historiador Rafael Rodríguez Valdés. “Un exemplu d’aplicación de la llingua asturiana nel ámbitu municipal: El Conceyu Llangréu” de Yolanda Magdalena Montes, que fuere vetada del Congreso de Estudios Asturianos del RIDEA. Siguirá la comunicación “Ente ASturies y Miranda. La recuperación de la llingua en Lleón y Zamora” de Nicolás Bartolomé Pérez. “Billingüismu y cooficialidá n’Asturies, Galiza y Valencia. Encuesta d’opinión ente llicenciaos d’humanidaes” de Xabiel Fernández García. Y pa finar coles comunicaciones el profesor de la Universidá d’Uviéu, Leopoldo Tolivar Alas, cola comunicación “Supraterriorialidá de les llingües y perimetros llingüísticos”. A lo cabero entamrá la conferencia d’Aurelia Merlan, de la Universidá de Costanza, sobre “Las lenguas minoritarias del noroeste peninsular concordancias y divergencias”. Les Xornaes d’EStudiu de l’Academia d’esti martes xiraron en tornu al feminismu na lliteratura, la importancia de los medios dixitales pa la sobrevivencia de la llingua, cuestiones lliteraries, la poética de les esqueles. Darréu úfrense unes notes sobre lo que foi la xornada d’ayer. Na primer conferencia del día Xosé Ramón Iglesias Cueva desenvolvió les sos tesis sobre la Lliteratura Asturiana y la modernidá nel periodu de 1903 hasta 1924. Darréu d’esta conferencia entamaron les comunicaciones emprincipiando Xosé Lluís Campal falando sobre’l papel de la muyer na poesía asturiana d’entamos del sieglu XX, darréu d’elli Aurelio González Ovies presentó la so comunicación sobre “la poética de les esqueles” au desarrollo un estudiu sobre l’aparición de la llingua asturiana nes esqueles. Depués Mar Martín presentó la so comunicación “Eva fuera’l paraísu” onde criticó les actitues machistes de la lliteratura y n’especial na infantil o nos comics, qu’avecen arrequexar a la muyer como un simple elementu del escenariu que tien falta d’un home pa salir alantre. Isabel Jardón López presentó una comunicación sobre la lliterartura na variedá occidental del asturianu nos años 50, onde destacáronse les distintes normes ortográfiques p’asoleyar un poema de Fermín Coronas publicáu en delles vegaes dende los años venti del sieglu pasáu. Miguel Ramos Corrada presentó una comunicación sobre’l narrador y el personaxe na lliteratura asturiana. José Arsenio Coto presentó una comunicación au se refirió a la necesidá d’un estandar llingüísticu pal software n’asturianu, amuesando comparaciones colos países del entornu. Pa finar Próspero Morán, director d’Asturnews, dio una comunicación sobre la comunicación dixital en llingua asturiana, na que subrayó la importancia a cortu plazu de los medios dixitales ente la sociedá. 24 d'ochobre, 2006 0 FacebookTwitterPinterestEmail
Educación La Universidá asturiana recibe un aumentu del 7,6% na aportación económica del Principáu by asturnet 23 d'ochobre, 2006 Los presupuestos autonómicos de 2007 contemplen 138 millones d’euros pa la financiación de la Universidá asturiana. El rector de la Universidá asturiana, Juan Vázquez, valoró positivamente l’asiganción económica a la que se llegó depués de delles selmanes de negociación con José Luís Iglesias Riopedre, Conseyeru d’Educación y Ciencia. La partida que más medra ye la de los gastos corrientes y de personal que medra más de 9 millones d’euros hasta situase en 114,5 millones. Sicasí’l rector echó en falta una partida pa cubrir el patiu de la sé histórica de la institución académica. 23 d'ochobre, 2006 0 FacebookTwitterPinterestEmail
Sociedá La XII edición de la Bolsa de Contratación Turística entama güei nel Palaciu de Congresos de Xixón by asturnet 23 d'ochobre, 2006 El Principáu d’Asturies organiza la XII edición de la Bolsa de Contratación Turística d’Asturies , que se va facer ente güei y mañana nel Palaciu de Congresos del Recintu Ferial de Xixón. Nesti alcuentru empresarial van participar 45 mayoristes de viaxes, y 213 empresarios y asociaciones profesionales asturianes, que proceden de dellos subsectores como hoteles, apartamentos, ases d’aldea y empreses de turismu activu. L’aciu d’estes xornaes ye potenciar l’intercambiu comercial ente’l sector turísticu del país y les empreses mayoristes de viaxes, de forma que cada operador tenga un espaciu priváu de trabayu, onde podrá facer contactos individualizaos coles empreses mediante cites previamente concertaes. La Bolsa de Contratación consolidóse a lo llargo d’estos 12 años como un preséu de valir y accesible pal afitamientu d’un foru añal de contactos empresariales nel sector turísticu. Asina mesmo, configuróse como un útil indispensable pa la promoción global d’Asturies como Destín Turísticu. Durante les Xornaes de Trabayu prevéese llevar a bon puertu unes 2000 entrevistes. 23 d'ochobre, 2006 0 FacebookTwitterPinterestEmail