Comunicación L’ex director del centru territorial de TVE, acusáu de graves manipulaciones, ‘recolócase’ en Telemadrid by asturnet 15 de febreru, 2005 D’una cadena pública a otra. L’ex director del centru territorial de Televisión Española n’Asturies, José Antonio Ovies, al que trabayadores de TVE achacaron graves y regulares manipulaciones informatives, integróse nel equipu d’informativos de Telemadrid, cadena na que presenta un programa selmanal y na que se destacó’l pasáu domingu na cobertura en directu del incendiu de la Torre Windsor. Ovies salió de la delegación asturiana de TVE en xunu pasáu con mala prensa al llombu. Nun informe ellaboráu por trabayadores del centru de Televisión Española en San Esteban de les Cruces, atribuíense-y al periodista, ente otres manipulaciones, la grabación previa d’un informativu ficticiu sobro la fuelga xeneral del 20 de xunu de 2002 y la emisión d’un falsu asaltu con destrozos a la sé’l PP n’Uviéu tres d’una manifestación contra la guerra d’Iraq, con plena conocencia previa de la falsedá de la noticia. Amás, trabayadores de TVE n’Asturies denunciaron en so día el so ablucamientu al comprobar cómo’l so superior decidía abrir l’informativu territorial asturianu del 27 d’ochobre de 2003 cola noticia -d’ámbitu madrilanu- de la victoria de la candidata’l Partíu Popular, Esperanza Aguirre, nes elecciones de Madrid. Destituyíu del so cargu nel Principáu tres de la llegada’l PSOE al Gobiernu central -cuando lu sucedió Pedro Alberto Marcos– Ovies pasó a trabayar a la cadena pública Telemadrid, cuyes directrices básiques marca’l PP, fuercia política mayoritaria tanto nel Ayuntamientu como na Comunidá autónoma de Madrid. Amás de participar na cobertura en directu del incendiu na Torre Windsor -quince hores siguíes d’emisión con puntes d’audiencia del 65 por cientu en Madrid-, José Antonio Ovies presenta’l programa selmanal d’actualidá ‘Madrid 7 días’, según informa la web de la cadena madrilana. 15 de febreru, 2005 0 FacebookTwitterPinterestEmail
Comunicación La Universidá amplía’l plazu de matrícula pa cubrir toles places del cursu de llingua pa periodistes by asturnet 14 de febreru, 2005 Trece díes más. La Universidá d’Uviéu amplía nesos términos el plazu d’inscripción pal cursu especializáu d’asturianu empobináu a periodistes, depués que nel tiempu ordinariu de matrícula se cubrieren 38 de les 45 places disponibles. El nuevu plazu ta yá abiertu y acabará’l prósimu 23 de febreru, dos díes antes del aniciu’l cursu. La Conseyería de Cultura, Comunicación Social y Turismu, que participa na organización del cursu al traviés de la Oficina de Política Llingüística, comunicó esti mediudía la prórroga nel plazu de matrícula pal cursu, qu’afondará nes singularidaes de la comunicación nun contestu de convivencia de les llingües castellana y asturiana. Con un preciu d’inscripción de 81 euros, el cursu d’Estensión Universitaria ‘Comunicación audiovisual en situaciones de minorización llingüística’ desendolcaráse hasta’l 9 d’abril con dos clases selmanales -vienres y sábados- na Facultá de Filoloxía d’Uviéu y nel Antiguu Institutu Xovellanos de Xixón. La llista de profesores ta encabezada por Xuan Busto en calidá de director ya inclúi, ente otros docentes, al director d’Asturnews y profesor na Universidá Carlos III de Madrid, Próspero Morán. El pasáu mes de payares, la Universidá completó un primer cursu especializáu d’asturianu pa periodistes que se desendolcó baxo la dirección de Xulio Viejo y en cuya presentación la conseyera de Cultura, Ana Rosa Migoya, aseguró que “ye una obviedá” que la llingua asturiana tará presente na nueva radiotelevisión autonómica. 14 de febreru, 2005 0 FacebookTwitterPinterestEmail
Sociedá El 70 por cientu de los alcuerdos llingüísticos del pactu de Gobiernu permanez na ‘nevera’ 19 meses depués by asturnet 11 de febreru, 2005 Lo esencial permanez nel ‘conxelador’ alministrativu. Siete de les diez principales midíes de política llingüística afitaes nel pactu de Gobiernu ente PSOE ya Izquierda Xunida-Bloque por Asturies inda nun s’acometieron o siguen ensin resultaos patentes 19 meses depués de la firma l’alcuerdu, ente elles el desendolcu de la Llei d’Usu, l’aprobación y aplicación del plan de normalización y el puxu de la llingua asturiana nos medios de comunicación. Sólo tres puntos del decálogu de midíes principales se llevaron por agora a la práctica: La propia creación de la Dirección Xeneral y la Oficina de Política Llingüística, l’impulsu de la toponimia tradicional y, nuna llectura xenerosa, la definición de los criterios de normalización del gallego-asturianu nel Navia-Eo, esto cabero al traviés de la edición de guíes con orientaciones pa la normalización d’esa variante nos municipios y del llanzamientu d’una campaña qu’alitaba a la matriculación en gallego-asturiano nos colexos ya institutos del occidente. Pero en términos globales y na llende l’ecuador de la llexislatura autonómica, el vasu ta enforma más vaciu qu’enllenu: El plan de normalización sigue siendo sometíu a caberos “axustes” a la espera de la so aprobación nel Conseyu de Gobiernu, el desendolcu por reglamentu de la Llei d’Usu y Promoción del Asturianu nin siquiera se plantegó formalmente, el panorama de la presencia del asturianu nos medios de comunicación nun rexistró avances notables debíos a l’acción del Principáu y la “presencia efectiva” del asturianu en toles estayes educatives, asina definida nel pactu, ye más que discutible a los güeyos de los integrantes de la comunidá educativa. Nueva política editorial Na llista de xeres pendientes del pactu de Gobiernu, robláu a primeros de xunetu de 2003, inclúinse amás la puesta en marcha d’una nueva política pública pa la edición que -sacante la innovadora promoción de llibros de testu n’asturianu- finalmente nun tien visos d’aplicase como tal, al marxe d’un comprometíu adelantu na fecha de la convocatoria, y la formación xeneralizada de funcionarios pa garantiza-yos a los ciudadanos l’usu del asturianu, sólo abordada d’un mou mui discretu dende dalgún Ayuntamientu. No que cinca al “sofitu y reconocencia” especiales plantegaos nel pactu de Gobiernu pa l’Academia de la Llingua, al marxe de consideraciones formales esa entidá mantién postures distantes cola propia Oficina de la Llingua y sigue reivindicando, mesmo qu’hai cuatro años, unes instalaciones qu’acaben coles “absolutes” limitaciones d’espaciu que diz tener la institución. 11 de febreru, 2005 0 FacebookTwitterPinterestEmail
Sociedá Izquierda Xunida-Bloque defenderá en soledá la coficialidá na negociación política del nuevu Estatutu by asturnet 9 de febreru, 2005 Ún de tres na Xunta Xeneral. Sólo Izquierda Xunida-Bloque por Asturies defenderá la inclusión de la coficialidá de la llingua asturiana na inminente reforma del Estatutu d’Autonomía, según confirmó ayeri’l cordinador d’IX nel Principáu, Jesús Iglesias, no que cinca a la so formación política. Los otros dos partíos con representación parlamentaria, PP y PSOE, que sumen 41 de los 45 diputaos autonómicos, empezarán a negociar cola oficialidá fuera de les sos propuestes. Yera notorio, pero Jesús Iglesias ratificólo ayeri: Izquierda Xunida insistirá en pidir la inclusión de la reconocencia l’asturianu como llingua coficial nel nuevu testu del Estatutu d’Autonomía porque, entiende’l responsable de la coalición, l’idioma d’Asturies afronta esa negociación como l’últimu tren pa evitar la so desapaición. El compañeru d’IX nel Parlamentu autonómicu, el Bloque por Asturies, secundará esa demanda. No que cinca a la parte llingüística de les conversaciones polítiques pa renovar l’Estatutu, el repartu de fuercies sedrá desigual: A los cuatro diputaos que marquen el pesu políticu d’IX-Bloque na Xunta Xeneral del Principáu enfrentaránse-yos los 45 diputaos autonómicos de PSOE y PP, partíos que sentarán na mesa de negociación cola oposición a la coficialidá como primer argumentu. Nel casu de los socialistes, que lleven el pesu del Gobiernu autonónicu y qu’ostenten el mayor pesu políticu a la hora de tomar decisiones finales, la vocera l’Executivu y conseyera de Cultura, Ana Rosa Migoya, dexó claro a finales d’avientu, nuna entrevista radiofónica, que “los socialistes nunca fuimos partidarios de la coficialidá y mantendremos esa postura porque asina lo dicten les nueses resoluciones congresuales”. Archivu. Migoya avanza que los socialistes opondránse a incluyir la coficialidá na reforma del Estatutu 9 de febreru, 2005 0 FacebookTwitterPinterestEmail
Sociedá La Fundación ‘Príncipe’ pon en marcha l’almisión de candidatures pal premiu al Pueblu exemplar by asturnet 9 de febreru, 2005 Hasta’l 19 d’agostu. Esi ye’l plazu nel que permanecerá abierta l’almisión de candidatures pal premiu al Pueblu exemplar d’Asturies, que ta acabante convocar na edición de 2005 la Fundación ‘Príncipe de Asturias’ y ta dotáu con 25.000 euros. El galardón quier distinguir a pueblos, aldegues o grupos humanos que destaquen la defensa’l so entornu y patrimoniu o na fechura d’obres n’andecha. Acordies col reglamentu’l premiu, que la Fundación ‘Príncipe’ reparte yá por corréu a personalidaes, collectivos y medios de comunicación del Principáu, les candidatures podrán ser unviaes por corréu ellectrónicu o certificáu, o bien presentaes físicamente na sé social de la Fundación, allugada na cai Xeneral Yagüe d’Uviéu. El premiu entregaráse nel prósimu mes d’ochobre, nel marcu de la entrega de los premios ‘Príncipe de Asturias’, qu’esti añu cumplen el so 25 aniversariu, y otorgaráse a un núcleu de población o humanu destacáu nel so llabor collectivu por caltener los raigones del so propiu territoriu. Amás de la llocalidá de Vil.lar de Vildas, en Somiéu, que resultó premiada na edición de 2004, na nómina de ganadores del premiu al Pueblu exemplar d’Asturies figuren, ente otros, los Pastores de los Picos d’Europa, la comunidá vecinal y educativa d’Ibias y les poblaciones de Tuña (Tinéu), Paredes (Valdés), Nava y Castropol. Web de la Fundación ‘Príncipe de Asturias’ 9 de febreru, 2005 0 FacebookTwitterPinterestEmail
Sociedá Areces pide por carta la oficialidá del idioma español nos Xuegos Olímpicos by asturnet 8 de febreru, 2005 Oficialidá de la llingua castellana. El presidente autonómicu, el socialista Vicente Álvarez Areces, solicitó-y por carta al Comité Olímpicu Internacional que la llingua castellana pase a ser el tercer idioma oficial nos Xuegos Olímpicos, xunta los yá oficiales francés ya inglés. Areces defende que l’apueste pol castellán sedría una amuesa “d’adaptación a los nuevos tiempos”. Na misiva -empobinada al presidente’l Comité Olímpicu Internacional, Jacques Rogge-, Álvarez Areces argumenta que la inclusión del español na llista de llingües oficiales de los Xuegos Olímpicos supondría un “ésitu” pal propiu Comité al da-y puxu a un idioma que ye’l terceru más faláu del mundu, tres del chinu y l’inglés. Nesti sen, el presidente’l Principáu precisa que’l castellán ye la llingua materna’l 6 por cientu de la población mundial, perbaxo’l 9 por cientu de ciudadanos del planeta que falen inglés nativu pero bien penriba’l porcentaxe mundial de falantes de francés como idioma maternu, que nun algama’l 2 por cientu. Areces, que secunda cola so carta una iniciativa’l Comité Olímpicu español, destácase cola misiva nuna defensa al más altu nivel de la llingua castellana que’l presidente autonómicu refuga de forma sistemática pal idioma asturianu. 8 de febreru, 2005 0 FacebookTwitterPinterestEmail
Sociedá Madera afirma que queden “detáis” p’aprobar el plan de normalización y felicítase pol procesu na toponimia by asturnet 8 de febreru, 2005 Nun hai grandes inconvenientes que frenen l’aprobación del Plan de Normalización Sociollingüística, sinón que queden “detáis” y el testu definitivu validaráse en Conseyu de Gobiernu nes prósimes selmanes. Asina lo afirmó güei el director xeneral de Política Llingüística’l Principáu, nun alcuentru con representantes del Observatoriu de política llingüística. Según los miembros d’esti collectivu qu’acudieron a la xuntanza col altu cargu de Cultura -los escritores Taresa Lorences ya Ismael González Arias-, Madera convino en que ye necesario tomar midíes concretes lo más aína posible pa que la política llingüística’l Principáu cuaye en resultaos concretos. Ente eses midíes, destaquen dos: L’aprobación del plan de normalización y la oficialización, tamién en Conseyu de Gobiernu, de los primeros topónimos tradicionales en llingua asturiana. Nesti sen, Madera felicitóse de la bona marcha’l procesu de recuperación de los nomes de llugar -nel que yá tán implicaos 21 de los 78 conceyos d’Asturies- y especuló con que la definitiva lluz verde a les primeres llistes de topónimos podría llegar incluso antes que l’aprobación del plan de normalización. Nel alcuentru de Carlos Madera col acabante constituyir Observatoriu de política llingüística plantegóse amás la necesidá de que la llingua asturiana seya declarada oficial pa evitar tou tipu de discriminaciones, a lo que’l director de Política Llingüística respondió qu’urxe aplicar midíes concretes, afitar “bases difíciles de desenraigonar” por Gobiernos posteriores, p’asegurar la pervivencia del asturianu. L’Observatoriu de política llingüística presentóse en públicu’l pasáu sábadu como una plataforma impulsada por quince personalidaes vinculaes a la cultura. L’aprobación inmediata’l plan de normalización, la presencia “inescusable” del asturianu na radiotelevisión autonómica y l’apoyu al “intensu, rigorosu y positivu” llabor de la Xunta de Toponimia son tres de les sos reivindicaciones fundacionales. Archivu. L’Observatoriu de política llingüística urxe l’aprobación del plan de normalización 8 de febreru, 2005 0 FacebookTwitterPinterestEmail
Sociedá Les muyeres representen un 52 por cientu de la población, según l’Institutu Nacional d’Estadística by asturnet 7 de febreru, 2005 Más muyeres qu’homes. La población d’Asturies ta integrada por un total de 558.000 habitantes femenines, frente a 515.000 varones, según los datos del padrón municipal que ta acabante validar l’Institutu Nacional d’Estadística (INE). L’estudiu del organismu estatal conclúi que les muyeres suponen un 52 por cientu de la población total del Principáu. Con datos referíos al 1 de xineru de 2004, l’Institutu d’Estadística alluga a Asturies ente les comunidaes autónomes con mayor presencia femenina, en términos mui asemeyaos a la media estatal: Les cifres del padrón afiten una población total pa España de 21,9 millones de muyeres que conviven con 21,2 millones d’homes. Por ciudaes, la tasa de repartu de la población por sexu mantiénse en niveles paecíos: Les muyeres son mayoría en 52 de los 78 conceyos qu’esisten n’Asturies, y la población femenina supón el 53 por cientu sobro’l total nel casu d’Uviéu, mientres que representa un 52 por cientu en Xixón. Datos íntegros na web del INE 7 de febreru, 2005 0 FacebookTwitterPinterestEmail
Sociedá L’Observatoriu de política llingüística urxe l’aprobación del plan de normalización by asturnet 5 de febreru, 2005 Aprobación inmediata’l plan de normalización, presencia “inescusable” del asturianu na radiotelevisión autonómica y apoyu al “intensu, rigorosu y positivu” llabor de la Xunta de Toponimia. Con eses reivindicaciones echó a andar güei l’Observatoriu de política llingüística, una plataforma impulsada por quince persones vinculaes a la cultura, la docencia y la política que naz pa sacar el máximu provechu de la política llingüística “qu’agora ye posible”. Como principiu xeneral, l’Observatoriu defende que la normalización de la llingua asturiana “nun ye un problema, sinón la solución a un problema”, según ún de los promotores del collectivu, l’escritor Xuan Bello, y promete un asesoramientu “atentu, constructivu, independiente y críticu” del trabayu desendolcáu pola Oficina de Política Llingüística’l Principáu, dirixida por Ramón D’Andrés. Con eses blimes, la nueva plataforma ciudadana albidra prioritaria la oficialización ensin demora de la toponimia tradicional, mesmo que l’usu del asturianu na publicidá institucional del Gobiernu, una meyor presencia d’esi idioma na enseñanza y el sofitu “políticu, técnicu y económicu” a la Rede de Normalización Llingüística nos Conceyos. Na axenda inmediata del Observatoriu, qu’esti mediudía se presentó al públicu n’Uviéu, figuren entrevistes colos másimos responsables de la Conseyería de Cultura, Comunicación Social y Turismu, la primera d’elles con fecha prevista pal prósimu martes. A esos alcuentros acudirán representantes d’una plataforma na que participen, ente otros, el caderalgu Francisco Llera Ramo; el presidente’l Conseyu de Comunidaes Asturianes, Manuel Fernández de la Cera; y los escritores Berta Piñán, Vanessa Gutiérrez, Ramón Lluis Bande, Adolfo Camilo Díaz, Xandru Fernández, Taresa Lorences ya Ismael González Arias. Completen la primer llista de miembros del observatoriu, abiertu a nueves incorporaciones, la diputada d’Izquierda Xunida-Bloque por Asturies Noemí Martín, el conceyal socialista n’Uviéu Gonzalo Olmos, el periodista Francisco Álvarez, el profesor José Uría y el catalán Ignasi Vila, miembru’l Comité Internacional pa la Salvaguarda de los Drechos Llingüísticos d’Asturies. Archivu. Personalidaes vinculaes a la cultura echen a andar un “observatoriu” pa impulsar la política llingüística 5 de febreru, 2005 0 FacebookTwitterPinterestEmail
Sociedá Un estudiu pioneru analiza la pervivencia del asturianu nes comarques del norte de Lleón by asturnet 4 de febreru, 2005 Investigación pionera sobro l’asturianu fuera de les llendes alministratives del Principáu. Los profesores de la Universidá d’Uviéu Xosé Antón González Riaño y Xosé Lluis García Arias rematen la recoyida de datos pa determinar la pervivencia de la llingua asturiana nes comarques del norte de Lleón, nun estudiu sociollingüísticu cuyes conclusiones tarán llistes en tornu al mes de xunu. A partir d’una amuesa de 400 persones, los autores de la investigación centren la so atención en cinco estayes: Quieren analizar el sentimientu d’identidá que tienen los habitantes de la zona, la conciencia qu’estos tienen d’usar una o otra llingua, y el prestixu, la validez cultural y les perspectives de futuru del idioma. Pa ello, García Arias y González Riaño finen la primer fase del estudiu -la del atropamientu de datos- nes llocalidaes de Candín, Peranzanes, Páramu del Sil, Palacios del Sil, Vil.lablinu, Cabril.lanes, Santumichanu, Sena de L.luna, Villamanín, Cármenes, Valdellugueros, Puebla de Lillo, Maraña, Acebedo, Oseya de Sayambre, Posada de Valdeón y Burón, toos ellos prósimos a la llende alministrativa con Asturies y con una población global de 23.000 habitantes. De sutaque remate la recoyida de datos, los autores de la investigación abrirán la segunda fase’l so llabor y entamarán entós el procesu d’interpretación científica d’esos datos, una xera que va prollongase varios meses y que, según les previsiones de dambos filólogos, cuayará nes conclusiones finales poco antes del prósimu veranu. Nel casu de González Riaño, l’estudiu sobro les actitúes llingüístiques nes fasteres de Lleón que llenden con Asturies sucede a una investigación centrada nos alumnos de Maxisteriu que foi presentada’l pasáu 13 de xineru y qu’asoleya qu’un 73 por cientu de los futuros mayestros cree necesaria la oficialidá pa regular l’asturianu nel sistema educativu, mientres qu’un altu porcentaxe reconoz que’esi idioma tien un altu valir cultural. Archivu. Conclusiones del estudiu en Maxisteriu 4 de febreru, 2005 0 FacebookTwitterPinterestEmail