Sociedá “Asina foi’l surdimientu” dedicó’l so programa a la comunciación by asturnet 31 de xineru, 2006 L’entamu de la relación ente la xeneración de los 60 y Conceyu bable, l’Academia de la Llingua, los modelos llingüísticos nos medios de comunicación o los problemes calterísticos del movimientu asturianista, foron dellos de los temos sobro los que falaron Próspero Morán, director d’Asturnews, y Naciu Galán esti llunes pela nuechi nel programa de radio “Asina foi’l Surdimientu…”, que s’emite na emisora local lluanquina Onda Peñes nel dial 107.7 FM. Col sofitu de Isabel Muñoz, Naciu Galán fizo tamién un repás de la trayeutoria profesional del periodista y profesor universitariu. Próspero Morán, director d’Asturnews, foi entrevistáu esti llunes a les ocho menos cuartu de la tarde nel programa de radio “Asina foi’l Surdimientu…”, que s’encuentra na so segunda temporada d’emisión y que trata de repasar al traviés de les persones más representatives del Surdimientu los trenta años que pasaron dende’l nacimientu de Conceyu Bable. El programa entrevistó nes últimes selmanes a persones tan signficatives como Xosé Lluis García Arias, Xuan Bello o Pablo Xuan Manzano. Inaciu Galán y González ye’l conductor d’esti espaciu que s’emite quincenalmente, col envís de repasar los últimos trenta años de la mano de los colectivos culturales y políticos que foron naciendo dende 1974 pa trabayar na recuperación llingüística y pol ameyoramientu del país. Xunta Naciu Galán collaboren davezu Isaac de l’Arada, Sabel Tuñón y Xabiel Fernández, amás de cuntar cola participación de los siguidores del programa que previamente unvíen les sos preguntes pal entrevistáu. 31 de xineru, 2006 0 FacebookTwitterPinterestEmail
Sociedá Touriño afirma que l’idioma nunca va ser un problema ente Asturies y Galicia by asturnet 30 de xineru, 2006 L’asuntu de l’idioma centró l’interés mediáticu de la primer xornada del cume astur-galaicu. El presidente de la Xunta de Galicia, Emilio Pérez Touriño declaró que “la llingua nunca fue nin va ser un problema ente Asturies y Galicia”, mientres el so vicepresidente, el nacionalista Anxo Quintana manifestaba’l so contentu de que los conceyos del occidente quieran siguir siendo asturianos “y por munchos años” -recalcó con ironía, Quintana-, al tiempu que dixo que “los que quieran ser gallegos vamos recibilos colos brazos abiertos”. Pal líder del BNG, sicasí “hai asturianos que comparten la llingua gallega y eso contribúi a la bayura cultural d’Asturies”. El vicepresidente de la Xunta fexo estes declaraciones enantes del empiezu del cume de Santiago de Compostela y col ánimu de quitar fierro a les pretensiones del nacionalismu gallegu sobre estayes d’otres comunidaes que consideren culturalmente afines citó al escritor Manuel Rivas pa dicir que “gallego puede ser cualquiera” y que “si falara de poner trabancos a quien quixera incorporase a Galicia o ser gallegu diben acusame de racista o xenófobu”. El del idioma y el de la propuesta de nuevu estatutu del Bloque Nacionalista Gallego colos puntos polémicos sobre los conceyos de comunidaes vecines fueron los únicos sobre los que paeció barruntase dalgo de roceano y el tonu xeneral del alcuentru entre los executivos de Touriño y Areces foi cordial. La vía transcantábrica, la elaboración d’un rexistru telemáticu de les dos comunidaes y la colaboración n’estinción d’incendios, asina como l’intercambiu de distintes esperiencies de xestión fueron otros de los asuntos trataos na primer xornada del cume ente la Xunta de Galicia y el Gobiernu del Principáu que sigue a lo llargo d’esti llunes 30 pa falar d’otros temes d’interés común. 30 de xineru, 2006 0 FacebookTwitterPinterestEmail
Sociedá “Asina foi’l Surdimientu…” entrevista a Próspero Morán by asturnet 30 de xineru, 2006 Próspero Morán, director d’Asturnews, va ser entrevistáu güei a les ocho menos cuartu de la tarde nel programa de radio “Asina foi’l Surdimientu…”, presentáu por Naciu Galán, y que s’emite na emisora local lluanquina Onda Peñes nel dial 107.7 FM. Esti programa, que s’encuentra na so segunda temporada d’emisión y que trata de repasar al travies de les persones más representatives del Surdimientu los trenta años que pasaron dende’l nacimientu de Conceyu Bable, entrevistó nes últimes selmanes a persones tan signficatives como Xose Lluis García Arias, Xuan Bello o Pablo Xuan Manzano. Inaciu Galán y González ye’l conductor d’esti espaciu que s’emite quincenalmente, col envís de repasar los últimos trenta años de la mano de los colectivos culturales y políticos que foron naciendo dende 1974 pa trabayar na recuperación llingüística y pol ameyoramientu del país. Xunta Naciu Galán collaboren davezu Isaac de l’Arada, Sabel Tuñón y Xabiel Fernández, amás de cuntar cola participación de los siguidores del programa que previamente unvíen les sos preguntes pal entrevistáu. 30 de xineru, 2006 0 FacebookTwitterPinterestEmail
Sociedá Amnistía Internacional presentó n’Uviéu un informe sobre la política esterior de Zapatero by asturnet 27 de xineru, 2006 La Unidá Territorial d’Amnistía Internacional n’Asturies presentó esti xueves 26 n’Uviéu l’informe “Política Exterior y Derechos Humanos del Gobierno español: ¿Una política de gestos?” qu’analiza el períodu comprendíu ente xineru de 2004 y setiembre de 2005. Nél la organización critica que’l compromisu cola defensa de los derechos humanos espresáu pol Gobiernu de Rodríguez Zapatero,nel so programa electoral y en múltiples foros internacionales, nun se concreta en medíes efectives na práctica. Francisco Javier Fernández , responsable de comunicación de Amnistía Internacional n’Asturies afirmó na presentación del informe que “Ye mui negativo que la defensa de los derechos humanos nun sea un aspectu visible, relevante y con impactu concretu na axenda política de les relaciones billaterales d’España con países del so entornu o del so área d’influencia como Marruecos, Colombia, Cuba o Guinea Ecuatorial; y qu’estos mesmos derechos se obvien nes relaciones con Estados Uníos, China o Rusia”, aseguró. Como un aspectu positivu, l’informe congráciase de la política del gobiernu español d’apoyu al marcu de Naciones Uníes y l’apuesta pola llegalidá internacional, y un discursu contra’l terrorismo vinculáu al respetu po los derechos y llibertaes fundamentales de les personas, asina como a la llucha contra la probeza. 27 de xineru, 2006 0 FacebookTwitterPinterestEmail
Sociedá La Xunta entrega el Pegollu y el Madreñazu de los sos premios Andrés Solar by asturnet 27 de xineru, 2006 El salón d’actos del Antigu Institutu de Xixón acueye esti viernes 27 la entrega de los Premios Andrés Solar que concede añalmente la Xunta Pola Defensa de la Llingua a aquelles persones o entidaes que se distinguieran bien pol so apoyu a la normalización o bien polo contrario. Una llectura de poesía y una actuación musical del grupu Dual van ilustrar l’actu. Na convocatoria d’esti añu la Xunta decidió conceder el premiu negativu: Madreñazu, al director xeneral del Ente Públicu de Comunicación del Principáu, José Antonio Pérez Ornia. El premiu Pegollu, positivu, fue nesta ocasión pa la empresa informática Araz S.L. La entrega va escomenzar a les 19.30 y amás del tradicional discursu de la Xunta faciendo resume del añu en materia de derechos llingüísticos y desplicando les razones que llevaron a la concesión d’un y otru premiu, los poetes Pablo Texón y Pablo Rodríguez van lleer dellos de los sos versos. El grupu Dual, formáu por Ígor Medio y Lisardo Prieto, va poner el pieslle al actu. Darréu la Xunta organiza la so tradicional espicha nel Llagar Cabrales de Xixón. 27 de xineru, 2006 0 FacebookTwitterPinterestEmail
Sociedá Areces considera ‘llamentable’ que’l PP refugue sumase a la reforma l’Estatutu by asturnet 27 de xineru, 2006 El presidente del Principáu, Vicente Álvarez Areces, calificó esti xueves 26 na feria FITUR de Madrid, de “llamentable” la negativa del PP a participar na reforma l’estatutu. Respective a l’aplicación p’Asturies del términu nacionalidá, Francisco Sosa Wagner, un de los padres de l’autonomía de la nuestra comunidá, afirma que “ta na Constitución y nun plantea mayores problemes”. Nun alcuentru colos medios desplazaos a cubrir la presencia d’Areces en FITUR, el cabezaleru del executivu autonómicu, manifestó la so sorpresa énte la posición caltenida pol partíu d’Ovidio Sánchez énte’l procesu de reforma: “cuando va unos meses reclamaba p’Asturies un estatutu de máximos, como’l catalán”. El presidente recalcó el so deséu de que la reforma pueda tar solventada na presente lexislatura. Per otru llau, el caderalgu de derechu administrativu Francisco Sosa Wagner, ún de los redactores del actual estatutu, declara nuna entrevista concedida al diariu El Comercio qu’Asturies “había reclamar un estatutu igual que’l de Cataluña al día siguiente de que les Cortes apreben l’Estatut” y respective a la denomación de la nuestra comunidá col términu de nacionalidá: “ye una denomación que tá incluida na Constitución y que nun plantea mayores problemes”, ya que “esti tipu de calificación nun tien nengún efectu xurídicu nin competencial”. Sosa Wagner manifiéstase dotramiente contrariu a la oficialidá pal asturianu: “sería una auténtica barbaridá que gravitaría enriba la educación de los neños”, diz l’ex conseyeru del primer gobiernu autonómicu. 27 de xineru, 2006 0 FacebookTwitterPinterestEmail
Sociedá Nueve meses de trabayu sobre asuntos comunes centren el cume astur-galaicu del domingu by asturnet 27 de xineru, 2006 El cume ente los gobiernos d’Asturies y Galicia que va celebrase los prósimos díes 29 y 30 en Santiago de Compostela va centrase n’asuntos comunes y refugar aquellos otros que puedan ser motivu de polémica o discrepancia. Nueve meses de trabayu van entamase pa falar, ente otros asuntos de les comunicaciones ente les dos comunidaes. Nel cume de Compostela la Xunta y el Principáu van falar de modernización y meyora de l’administración, polítiques d’igualdá, infraestructures y territoriu, mediu ambiente y desarrollu sostenible; cultura y turismu, educación y universidades; investigación, desarrollu tecnolóxicy ya anovación; mediu rural y pesca y asuntos marítimos. Fuera d’estos asuntos queden les pretensiones d’instituciones gallegues sobre’l patrimoniu llingüísticu del Navia-Eo o la propuesta de nuevu estatutu pa Galicia que propón el BNG cola posibilidá abierta pa que conceyos d’otres comunidaes se sumen al so proyectu nacional. El presidente asturianu Vicente Álvarez Areces declaró esti xueves 26 en Madrid a diversos medios que’l cume en sí ye “positivu” y que busca “xuntar y compartir esfuerzos sobre temes d’interés común”. El xefe del executivu autonómicu refugó entrar a valorar les declaraciones reciéntes del vicepresidente de la Xunta y cabezaleru del Bloque Nacionalista Galego, Anxo Quintana, que refiriéndose al cume qu’empieza’l prósimu domingu manifestó que “nun vamos formar parte de nengún frente común porque Galicia tien identidá nacional propia y si tien de negociar dalgo va facelo de manera billateral col gobiernu de Madrid”. Un de los asuntos que quier perfilar el cume ye la futura vía ente La Espina y Lugo per A Fonsagrada, un tramu col qu’avanzaría la meyora de les comunicaciones per carretera del noroeste peninsular. 27 de xineru, 2006 0 FacebookTwitterPinterestEmail
Sociedá El CAO va entamar una caravana pola oficialidá per toa Asturies by asturnet 26 de xineru, 2006 El Conceyu Abiertu pola Oficialidá (CAO) va organizar prósimamente una caravana per toa Asturies en favor de la reconocencia oficial de los derechos llingüísticos. Na corredera pol asturianu oficial van participar músicos y artistes que tamién van tar nun actu públicu nel Teatru Filarmónica d’Uviéu el día 7 d’abril. Estes son delles de les actividaes qu’alcordó entamar el Conceyu Abiertu na so reuníón d’esti miércoles 25 nel Auditoriu d’Uviéu. Al aconceyamientu asistieron representantes de les más de ciento venti organizaciones que sofiten la plataforma unitaria. Na reunión alcordóse tamién celebrar una nueva asamblea dientro dos selmanes pa concretar les actividaes reivindicatives propuestes pal añu 2006, un añu nel que se va poner en marcha la reforma l’Estatutu y con ella la posibilidá d’incluir la cooficialidá nél. 26 de xineru, 2006 0 FacebookTwitterPinterestEmail
Sociedá El PP refuga participar na reforma del estatutu asturianu by asturnet 26 de xineru, 2006 El Partido Popular refuga participar nel debate de la reforma estatutaria pa la nuestra comunidá. El presidente de la formación conservadora n’Asturies, Ovidio Sánchez, recalcó la negativa a sofitar un nuevu Estatutu esti miércoles 25 en Madrid, tres la reunión de les agrupaciones territoriales con Mariano Rajoy. Sánchez afirmó que el debate sobre l’autogobiernu “nun-y interesa a naide n’Asturies”. El cabezaleru del PP asturianu acusó al PSOE de querer “desviar l’atención hacia lo sucedío col Estatut catalán” y amosó la intención del so partíu de nun entrar en nengún posible diálogu sobre la reforma estatutaria na nuestra comunidá “mientres nun se vea en que queda l’asuntu del Estatut”. Ovidio Sánchez manifestó esta posición del Partido Popular nun momentu nel que destacaos miembros de la so formación y dende agrupaciones locales cuestionen la so candidatura a les prósimes elecciones autonómiques. La oposición a la figura del actual presidente del PP asturianu medra dientro esi partíu onde hai voces que piden la convocatoria del comité electoral cuanto primero pa valorar al prósimu candidatu autonómicu. 26 de xineru, 2006 0 FacebookTwitterPinterestEmail
Sociedá El CAO celebra una asamblea pa valorar el momentu actual de la reivindicación llingüística by asturnet 25 de xineru, 2006 El Conceyu Abiertu pola Oficialidá (CAO) celebra esti miércoles 25 pela tarde una asamblea nel Auditoriu d’Uviéu pa valorar la última movilización ciudadana de payares, analizar la situación actual de la reivindicación llingüística y camentar nueves actividaes. Ye’l primer aconceyamientu de la plataforma unitaria nel añu en que va entamar el debate de la reforma estatutaria. Representantes de les ciento venti organizaciones que participen nel CAO van xuntar n’Uviéu pa facer una valoración de la estratexa unitaria que defende la plataforma alrodiu de la oficialidá de la llingua asturiana. Les xestiones feches ente los tres grupos políticos presentes na Xunta Xeneral (cola negativa del socialista a recibir al Conceyu) enfotaos n’abrir calces permanentes de diálogu énte la inminente reforma l’estatutu asturianu de xuro van ser un de los asuntos a tratar nel aconceyamientu d’esta tarde xunta los siguientes pasos a siguir agora que’l partíu mayoritariu nel gobiernu autonómicu quier escomenzar los trámites pa elaborar un nuevu testu estatutariu. Amás del discutiniuy la valoración de les prósimes actuaciones del CAO n’asamblea del Auditoriu va ratificase una nueva estructura organizativa empobinada a meyorar la eficacia de la plataforma unitaria. 25 de xineru, 2006 0 FacebookTwitterPinterestEmail