Sociedá El CAO da aniciu a les sos actividaes nesta llexislatura pidiendo a los partíos políticos representaos na Xunta Xeneral la oficialidá by asturnet 19 de xunu, 2007 Redacción. El Conceyu Abiertu pola Oficialidá dio aniciu con una rueda de prensa a les sos actividaes na presente llexislatura encamentando a los partíos políticos representaos na Xunta Xeneral del Principáu d’Asturies “a remanar la oficialidá como la única ferramienta posible p’algamar un estatus de llegalidá qu’acabe cola non reconocencia d’un derechu civil democráticu como ye la falta de llibertá d’espresión de los falantes d’asturianu y de gallego-asturianu”. Según espresó’l voceru d’esta organización, Fernando Ornosa “les elecciones autonómiques supunxeron un parentesis pal llabor del Conceyu Abiertu pola Oficialidá porque nos paecía que’l protagonismu correspondía-yos a los partíos políticos”. A lo qu’añadió “dempues d’esi parón, volvemos a l’actividá pública cola movilización, pero tamien cola nuestra llinia de diálogu y esplicación a los representantes políticos buscando’l consensu pa la reconocencia de la oficialidá”. Pal CAO “agora mesmo tenemos enriba la mesa dos cuestiones qu’afecten sobre manera al futuru llingüísticu d’Asturies: el pautu de gobiernu y la reforma del estatutu d’autonomía” y recordó a los parllamentarios que “la oficialidá ye indispensable. Indispensable pa la sobrevivencia de cualesquier llingua en pallabres de la UNESCO”. Ornosa recordó tamien que “la cuestión de la oficialidá tien que tar dientro del Pautu de Gobiernu porque va ser una cuestión central nesta llexislatura cuando entame’l procesu de reforma estatutaria” y recordó a les partes, en clara referencia a Izquierda Xunida-Bloque por Asturies, que “lo contrario entenderíamoslo como un fraude”. Comunicáu completu del Conceyu Abiertu pola Oficialidá 19 de xunu, 2007 0 FacebookTwitterPinterestEmail
Sociedá Un maxistráu anuncia la interposición d’un recursu dinconstitucionalidá contra la Llei dUsu del asturianu por tener vocación doficialidá by asturnet 18 de xunu, 2007 Redacción. L’Aconceyamientu de Xuristes pol Asturianos fizo llegar a los medios de comunicación una providencia del Maxistráu del Xulgáu de lo Contencioso-Alministrativo númberu 3 d’Uvieu, anunciando la interposición d’un recursu d’inconstitucionalidá escontra tres artículos de la Llei del Principáu d’Asturies 1/98, d’usu y promoción del bable/asturianu. Anque “al Aconceyamientu-y abulta nuna primer llectura, que si nun camuden los terminos, el Tribunal Constitucional tendría de nun l’almitir a trámite”. Na providencia, xenerada pol conflictu ente Xurde Blanco y l’Alministación del Principáu pola non aceptación d’un documentu n’asturianu, el maxistráu Miguel Ángel Carbajo Domingo afirma que “vistos los fundamentos de la pretensión del recurrente y de la oposición de l’Alministración demandada, considera que la Llei 1/98, de 23 de marzu, d’Usu y Promoción del Bable/asturianu (BOPA 28/03/98), aplicable al casu, pudiere resultar inconstitucional”. El xuez diz na providencia que esa anticonstitucionalidá pue atopase “nos artículos formulaos en terminos imperativos embaxo los númberos 2, 4 y 7 de la Llei”. Y ello polos motivos qu’espón darreu “a) Por adentrase en materia acutada formalmente al Estatutu d’Autonomía, al disponer la Llei 1/98, de 23 de marzu (llei ordinaria) un rexime con vocación d’oficialidá”, “b) Por adentrase en materia propia de la llexislación alminsitrativa básica y estatutu de los funcionarios en rellación al llinguaxe alministrativu oficial” y “c) Por posible conculcación del drechu d’igualdá de los ciudadanos en rellación a la so actividá ente les Alministraciones públiques”. 18 de xunu, 2007 0 FacebookTwitterPinterestEmail
Sociedá Nast reclama a Izquierda Xunida la oficialidá del asturianu que prometió públicamente by asturnet 18 de xunu, 2007 Redacción. Énte les negociaciones del PSOE-FSA ya Izquierda Xunida pa la formación de gobiernu n’Asturies, l’Asociación Cultural ‘N’ast’ emitió un comunicáu nel qu’esixe la oficialidá de la llingua asturiana. Dende N’ast recuerden qu’“IX prometió la oficialidá na campaña electoral” y qu’“esti ye un fechu qu’esperen s’algame”. Nel comunicáu, N’ast diz qu’“esta fuercia política (IX) yá prometiera na anterior llexislatura lo mesmo y qu’a pesar de que nun se cumpliera, gobernó xunto al PSOE y nun cumplió les sos promeses”. Por ello N’ast “vuelve a esixir públicamente’l cumplimientu d’estes promeses electorales y ve inaceptable que nun s’algame d’esta la dignificación del asturianu”. Acordies con esto, l’Asociación Cultural N´ast pídi-y al Conceyu Abiertu Pola Oficialidá “que pida a Izquierda Xunida, ún de los sos miembros, que cumpla l’oxetivu máximu d’esti Conceyu y que tome les midíes afayadices nel casu de que nun lo faiga”. N’ast remata’l comunicáu “esperando qu’IX nun se convierta, una vuelta más, nun responsable directu de la represión llingüística d’esti país y que nun entre nin collabore con un gobiernu que reprima y marxine la llingua de tolos asturianos”. 18 de xunu, 2007 0 FacebookTwitterPinterestEmail
Sociedá La Oficina de la Llingua de Xixón prepara la segunda edición de ¡Ruempi la mollera! by asturnet 13 de xunu, 2007 Redacción. Esti martes 11 de xunu fízose la entrega de premios del concursu ‘Ruempi la Mollera’, organizáu pola Oficina Municipal de la Llingua, y na que participaron 17 centros d’educación primaria del conceyu de Xixón. El concursu fízose col envís de que los escolinos conocieren y afondaren na hestoria y personaxes del conceyu al tiempu que practiquen la llingua asturiana. Asina fueron formulándose dende xineru a mayu ocho entrugues distintes, ente les que los neños teníen 15 díes p’aldovinar. La vieya fábrica de tabacos, el tranvía, la Lloca, Magnus Blikstad o les mil quinientes, yeren dalgunes de les rempuestes que fueron apurriendo los participantes dempues de ‘rompese la mollera’. La escuela ganadora foi’l Colexu Públicu Jacinto Benavente, de La Camocha. Más de 500 neños participaron nesta primer edición de ¡Ruempi la mollera!. Nun comunicáu emitíu polos responsables de la Oficina comenten qu’“El concursu tuvo una perbona acoyida, polo que ya se ta trabayando nes entrugues de la Segunda Edición de ¡Ruempi la Mollera!”. 13 de xunu, 2007 0 FacebookTwitterPinterestEmail
Sociedá LAxencia Europa Press entama un serviciu de noticies en llingua asturiana by asturnet 11 de xunu, 2007 Redacción. La prestisoxa axencia de noticies Europa Press entamó ayeri un serviciu de noticies en llingua asturiana pa los sos clientes y pa los llectores de la so web. La propia empresa fala de que la nueva canal ñaz “col enfotu de sofitar l’espardimientu y promoción de la llingua nos medios de comunicación y nos estremaos ámbitos de la sociedá”. El serviciu inclúi la traducción de les noticies, non namás d’Asturies, sinón estatales ya internaciones, qu’en munchos casos van dir acompangaes de material gráficu. El Serviciu ye gratuitu pa los medios de comunicación que yá tean apuntaos aboanos al Serviciu Autonómicu d’Europa Press. El serviciu de noticies actualízase de les nueve la mañana a les 21 hores, de llunes a vienres. Este ya la primer vegada qu’un mediu de comunicación d’ámbitu estatal ufierta un serviciu de noticies en llingua asturiana. La llingua asturiana súmase asina a les canales esistentes hasta’l momentu en catalán, vascu, gallegu y valencianu. Canal de noticies n’asturianu d’Europa Press 11 de xunu, 2007 0 FacebookTwitterPinterestEmail
Sociedá La Xunta pola Defensa de la Llingua Asturiana fai balance de los resultaos eleutorales nAsturies by asturnet 4 de xunu, 2007 Redacción. La Xunta pola Defensa de la Llingua Asturiana (XPDLA) emitióestos díes un comunicáu nel que fai balance de los resultaos de les eleiciones y les perspeutives del asturianu na reforma del Estatutu d’Autonomía d’Asturies. La XPDLA señala nel comunicáu qu’“el del asturianu ye un asuntu que nun s’acaba de solucionar políticamente”. “La posibilidá de reforma del Estatutu -diz el comunicáu- nesta próxima llexislatura y la necesidá d’incluyir nel la oficialidá punxeron la cuestión nel centru del debate anque dellos nun la quixeren tocar na campaña electoral”. Asina mesmo, la XPDLA reclama al Partíu Popular que siga dando pasos, yá qu’opinen “l’usu del asturianu pol alcalde d’Uvieu namás que pa facer chistes, por poner namás un casu, nun ye’l meyor camín pa dignificala si al llau nun hai usos serios como na documentación, na toponimia, na vida diaria del conceyu…”. En cuantes a la posición de la FSA-PSOE, la XPDLA diz que “bona parte de los sos militantes nun ven nengún problema a la reconocencia de los derechos llingüísticos” y qu’“hai un congresu pendiente de la FSA y tamos seguros de qu’esos plantegamientos predemocráticos d’una minoría tienen que desapaecer”. La XPDLA remata’l comunicáu diciendo que van siguir trabayando “ensin maximalismos de nengún tipu: valorando tamien los avances, por pequeños que sían, pero reclamando la oficialidá como únicu marcu llegal”. 4 de xunu, 2007 0 FacebookTwitterPinterestEmail
Educación El Principáu propunxo a los escolinos viaxar en llingua asturiana na so campaña de matriculaciones by asturnet 3 de xunu, 2007 Redacción. Les Conseyeríes de Cultura, Comunicación Social y Turismu, al travies de la Oficina de Política Llingüística y la d’Educación y Ciencia dieron por rematada la Campaña de matriculación en llingua asturiana pal cursu 2007-2008. Con esti, son cuatro años de campaña consecutiva nos colexos ya insitutos asturianos. Bien ceo van pocer conocese los datos de matriculaos pal próximu cursu. La camapaña desenvolvióse ente fines d’abril y principios de mayu cola distribución de cartelos y folletos informativos a tolos centros d’enseñanza. El lema d’esti añu foi ‘Viaxar ye conocer el mundu. ¿Y si viaxes na to llingua? Apúntate a Llingua Asturiana’ y apaeció tamien con anuncios na prensa y cuñes radiofóniques. Los niveles de matriculación en llingua asturiana vienen xubiendo cada añu y nesti cursu que va finar agora tán matriculaos un total de 18.701, espardíos ente 292 centros nos que ponen clas d’asturianu 196 profesores. D’ellos, 14.999 correspuenden a educación primaria, una xuba d’unos 150 escolinos con respeutu al cursu anterior, 3.652 tán en secundaria, 50 más que nel cursu anterior y la escasa cifra de 238 en bachilleratu, magar qu’esti añu hai 137 que l’anterior. 3 de xunu, 2007 0 FacebookTwitterPinterestEmail
Sociedá Aceutada una ponencia nasturianu nel IV Alcuentru Internacional sobre Desenrrollu Caltenible y Población by asturnet 30 de mayu, 2007 Redacción. El Comite Direutor del ‘IV Alcuentru Internacional sobre Desenrrollu Caltenible y Población’ aceutó estos díes la ponencia sobre estratexes europees de caltenibilidá a David M. Rivas, miembru de l’Academia de la Llingua Asturiana y de l’asociación L’Arribada. El fechu llama l’atención por tar la ponencia escrita n’asturianu. Mientres los documentos n’asturianu atopen problemes nos rexistros del Gobiernu del Principáu, esti alcuentru, coordináu pola Universidá de Málaga (Andalucia) y la de Luján (L’Arxentina) y la Rede Iberoamericana de Desenrrolu Llocal-Global nun punxo nengún problema. L’eventu –celebráu cada dos años- ye ún de los principales aconceyamientos científicos nestes materies. Nesta ocasión cunta tamien con un simposiu sobre la crisis del agua y les estratexes pa evitala. Cola aceutación d’esta ponencia l’asturianu da un pasís más na so presencia internacional. L’autor de la ponencia, David M. Rivas, ye doctor n’economía y profesor titular d’estructura económica na Universidá Autónoma de Madrid. Ye miembru del Comite científicu de la Rede pa una Estratexa Europea de Desenrrollu Caltenible y de la Rede Europea de Desenrrollu Llocal, dependientes de la Comisión Europea, nes que trabaya con profesionales d’universidaes de Polonia, Inglaterra, Eslovenia, Alemaña, Italia, Escocia, Luxemburgo y Austria. Ye tamien profesor invitau d’universidaes de L’Arxentina, Perú, Uruguai y Guatemala, y miembru del Club de Roma. Tien publicada una ventena de llibros sobre estes materias n’ingles y castellán, asina como un llibru de rellatos n’asturianu ‘Xente de casa’. Tamien participó na política asturiana como candidatu d’Andecha Astur en dellos comicios, hasta que la xuntura d’una parte d’Andecha na coalición Unidá y la división interna del partíu lu llevaron a abandonar a principios d’esti añu. 30 de mayu, 2007 0 FacebookTwitterPinterestEmail
Educación La Casa Cultura de Cangues dOnís acueye una esposición de trabayos descolinos del conceyu by asturnet 28 de mayu, 2007 Redacción. La Casa Cultura de Cangues d’Onís acueye estos díes una esposición na que se pueden ver delles obres seleiciones nel cuartu Concursu d’Artes Plástiques, convocáu pol Departamentu d’Artes del Institutu Rey Pelayo, embaxo l’epígrafe de “L’arte nes cultures del mundiu”. L’amuesa foi inaugurada’l xueves pasáu, día 24, a les siete la tarde, y va tar abierta hasta’l día 8 de xunu. Na mesma alncuentrense a la vista, tanto los trabayos premiaos como los seleicionados. La esposición ta organizada, de forma conxunta, pol Departamentu d’Artes del Institutu Rey Pelayo y la Casa Cultura. Na inauguración, que cuntó cola asistencia de numberosu públicu, tamien se procedió a la entrega de premios d’esti certame, entregaos pol Xefe d’Estudios del Institutu, Benjamín Argüelles y pola direutora de la Casa Cultura, Beatriz Valdes Sobrecueva. Dalgunos de los premiaos fueron Marta del Valle, Cristina Trespando y Marta Tuñón. Toes elles recibieron un diploma y un llote de material escolar y celebraron el premiu na inauguración de la esposición colos sos compañeros. 28 de mayu, 2007 0 FacebookTwitterPinterestEmail
Sociedá Lasturianismu políticu fracasa nes eleiciones autonómiques y nos conceyos by asturnet 27 de mayu, 2007 Redacción. Los partíos que llevaben la oficialidá nel so programa consiguen en total 79.141 votos y un 13,42% de los votos una baxada de más de cinco puntos y de más de ventidós mil votos frente a los resultaos totales de 2003, onde’l conxuntu d’estes fuercies algamó los 101.534 votos con un 18,9% de votos. Sicasí, Izquierda Xunida-Bloque por Asturies-LV, única fuercia que lleva la oficialidá nel programa, caltien los cuatro diputaos que yá tenía na Xunta Xeneral. La Unión URAS-PAS, que presentaba per primer vegada a los dos partíos en coalición dexa unos resultaos mui negativos, baxando de los 28.928 votos que sumaben nes eleiciones de 2003 a los 13.255 d’estes. Sicasí, la Unión caltien bonos resultaos en dalgunos conceyos y saca en total 11 conceyales. Destaquen Villaviciosa, onde pasen d’unu a tres conceyales y Ponga. Amás consigue un conceyal en Tineu, Noreña, Illas, Llaviana, Cabrales y Carreño. Siendo llave de gobiernu en Villaviciosa, Ponga, Cabrales y Carreño. En cuantes a les a la esquierda nacionalista, los resultaos nun son meyores, la coalición Unidá, que se presentaba como la fuercia que diba axuntar el votu de la esquierda nacionalista asturiana nun consigue pasar a los resultaos d’esti sector (representaos en 2003 por Andecha Astur en solitariu) por más que ventisiete votos, quedando Andecha Astur con 2.726, unos mil menos que nes anteriores eleiciones. Sicasí, les formaciones d’esquierdes caltienen los cuatro conceyales que teníen nes anteriores eleiciones. Dos d’Asturianistes por Nava, unu d’Izquierda Asturiana en Piloña, onde van ser llave gobiernu y otru d’Andecha por Carreño. El PP, que fizo dalgún averamientu al asturianismu na campaña, ye l’únicu que partíu que xube en votos, pero’l PSOE namás baxa un diputáu y xube’l porcentaxe de votos. Vicente Alberto Álvarez Areces paez posicionase como’l próximu presidente d’Asturies, col apoyu d’Izquierda Xunida-Bloque por Asturies-Los Verdes. L’asturianismu políticu paez el gran perdedor d’estes eleiciones autonómiques, onde nun consigue posicionase nel Parllamentu Asturianu nin nos grandes conceyos, onde amás, Izquierda Xunida pierde posiciones. 27 de mayu, 2007 0 FacebookTwitterPinterestEmail