Patrimoniu Ochenta espertos busquen propuestes cualificaes n’Uviéu pa una meyor conservación del horru by asturnet 29 de payares, 2004 L’horru, a debate. Unos ochenta espertos en patrimoniu y arquitectura popular debaten dende esta mañana n’Uviéu el valir cultural del singular graneru asturianu, nun congresu que se cellebra nel Auditoriu d’Uviéu y que no so primer xornada analizará el papel del horru na hestoria, na antropoloxía y nel arte autóctonos con ponencies, ente otros, de los estudiosos Juaco López, Armando Graña, María José Valle y Roberto González-Quevedo. Asina, depués de la inaguración formal del congresu, na que participaron estremaes autoridaes de la política y la cultura asturianes, el discutiniu arrancó con tres comunicaciones de José Ángel Rivas, Xuan Pedrayes y Pedro de Llano, mientres qu’a partir del mediudía el programa prevé la intervención d’otros cinco espertos pa falar de calterístiques orixinales de los horros del Valle’l Trubia, Quirós, Cuaña, Grao, Yernes y Tameza, Belmonte y Somiéu. La sesión de la tarde culminará con un alderique sobro los problemes d’estudiu y conservación del graneru autóctonu asturianu que tará moderáu por Gerardo Díaz-Quirós y contará cola participación del diseñador gráficu Ástur Paredes; el director del Muséu Etnográficu del Purblu d’Asturies, Juaco López; y los espertos Ignacio Ruiz de la Peña ya Ignacio Alonso. El congresu, qu’acabará mañana, martes, quier atropar información y propuestes cualificaes pa garantizar el caltenimientu del horru como elementu identitariu d’Asturies. Nes últimes dos décades, casi 3.500 horros foron remocicaos con ayudes de l’Alministración autonómica. Programa íntegru del Congresu 29 de payares, 2004 0 FacebookTwitterPinterestEmail
Patrimoniu Belenos convoca otru añu’l Seminariu d’Estudios Asturianos en La Puela d’Allande by asturnet 17 de payares, 2004 La Fundación Belenos tien convocada pa los díes 20 y 21 de Payares la quinta edición del so Seminariu d’Estudios Asturianos pa los díes 20 y 21 de Payares en La Puela d’Allande. La tema del Seminariu d’esti añu va ser “L’Asturcón: simboloxía y mitu del caballu de los Astures” y va cuntar cola participación de destacaos especialistes como Antón Álvarez Sevilla, Irene Seco Serra, María del Mar Gabaldón o Alberto Álvarez Peña. El Seminariu d’Estudios Asturianos de Belenos va entamar el sábadu día 20 cola conferencia de María del Mar Gabaldón sobro dellos “aspeutos simbólicos y relixosos del caballu na Edá del Fierro”. Seguirála Irene Seco Serra falando de “El caballu asturcón nes fontes clásiques” y completarán el programa d’esa primer xornada Antón Álvarez Sevilla falando de “Los ponis celtes” y Alberto Álvarez Peña al rodiu de “Resclavos míticos del caballu na tradición asturiana”. El domingu día 21 de Payares, la Fundación Belenos pondrá-y puntu final a esta quinta edición del so Seminariu d’Estudios Asturianos con una Mesa Redonda sobro “L’Asturcón y los ponis celtes, perspectives de futuru”. Los interesaos en participar nesti Seminariu d’estudios Asturianos de la Fundación Belenos puen contautar cola organización nos teléfonos 985463090 y 64600504. La inscripción, que tien un preciu matrícula de 36 euros, considérase fecha namái que col ingresu na cuenta 2048-0000-26-0340123307 d’esos 36 euros. Pa los inscritos ufiértase tamién agospiu opcional en réxime de pensión completa na “Nueva Allandesa”, dende la xinta del sábadu a la xinta del domingu, too incluyío, por un preciu de 54 euros. 17 de payares, 2004 0 FacebookTwitterPinterestEmail
Patrimoniu Mieres busca financiación pa crear rutes montunes con diez grandes escultures de seres mitolóxicos by asturnet 12 de payares, 2004 Diez grandes figures en bronce de xanes, cuélebres y busgosos. L’Ayuntamientu de Mieres quier da-y más puxu turísticu al valle de Cuna y Cenera cola creación de tres rutes montunes al rodiu de la mitoloxía esculpida, un proyectu que güei se presenta al públicu na so versión orixinal en maera, pero que tovía nun tien la financiación necesaria. Pa poder llevalu alantre, los responsables municipales de Mieres buscarán implicar a conceyos prósimos y prevén la posibilidá d’executar la iniciativa por fases pa evitar un gran desembolsu económicu d’una sola vegada. Si a la fin s’algama el dineru necesariu, les biesques de Cuna y Cenera tarán ‘habitaes’ por diez escultures d’otros tantos seres mitolóxicos cuyes dimensiones variarán de forma proporcional a los personaxes, hasta los cinco metros d’altor de la representación del cuélebre. De forma adicional, el proyectu, idegáu pol escultor llocal José Antonio Llonguera, inclúi l’allugamientu d’otres tres figures, una d’elles alegórica a los estudiosos de la mitoloxía, otra n’homenaxe a Valentín Villar en Cenera y una tercera n’alcordanza d’Aurelio de Llano nes inmediaciones del Muséu Etnográficu de Gallegos. La iniciativa complétase cola creación d’un puntu d’interpretación pa esplicar el paisaxe y la cultura del conceyu y, mui especialmente, cola recuperación del pueblu abandonáu de Foz, onde’l Consistoriu proyecta escenificar actividaes populares tradicionales como la recoyida’l maíz o la mazana, abiertes a la participación de los visitantes. Too ello son futuribles. Pol momentu, el públicu pue agüeyar a partir de güei nel Hotel de Mieres, allugáu na cai Oñón, los diseños orixinales de les escultures en maera. L’amuesa quedará inagurada, baxo’l títulu ‘Bosque Encantáu’, a les 19,30 hores pol alcalde de la villa, Luis María García. 12 de payares, 2004 0 FacebookTwitterPinterestEmail
Patrimoniu El Principáu cree superáu el “caos absolutu” nes grandes obres culturales comprometíes por Cascos by asturnet 10 de payares, 2004 Superóse el “caos absolutu” instauráu pol anterior Gobiernu central y siguiránse “criterios oxetivos”. Esi ye’l diagnósticu del Executivu asturianu sobro los grandes proyectos comprometíos por Francisco Álvarez-Cascos pa sufragar obres n’Asturies col denomináu 1 por cientu cultural, obligación de cada ministeriu de reservar esi procentaxe p’acciones culturales nes inversiones propies de más de 100 millones de pesetes. Sólo siete d’esos proyectos se mantienen en pie. Al xuiciu de la conseyera de Cultura y vocera’l Gobiernu asturianu, la socialista Ana Rosa Migoya, por primer vez s’algamó una “clarificación” nos proyectos comprometíos en tol Estáu pol PP y que diben ser sufragaos na so mayor parte pol ministeriu de Fomento, tuteláu por Álvarez-Cascos, al ser esi departamentu el que mayores inversiones xenera. Pal Gobiernu autonómicu, canten les cifres: Anque los conservadores prometieron un total de 900 millones d’euros pa financiar proyectos culturales en toa España, el nuevu Gobiernu socialista constató que namás hai disponibles 35 millones. Y eso, insistió güei Migoya, demuestra que l’anterior Executivu del PP fizo “pura propaganda”. Poro, la titular de Cultura advirtió-y al alcalde d’Uviéu, Gabino de Lorenzo (PP), qu’esi ayuntamientu habrá acatar los nuevos criterios afitaos en Madrid pa saber si pue o non financiar con cargu al 1 por cientu cultural dos grandes obres: El soterramientu de l’autopista ‘Y’ en Santuyano pa salvaguardar el templu prerrománicu allugáu nel entornu, y la creación del Muséu Militar de Trubia. El llunes pasáu, el Gobiernu central avanzó que sólo siete de los 17 proyectos comprometíos pol PP p’Asturies siguen en pie: los remocicamientos de les cubiertes de la Catedral, el claustru’l monasteriu de San Pelayu, la Torre’l Reló de Castropol y el monasteriu de Corniana; la preservación del cascu hestóricu de Llastres; les obres na Casa Hevia, en Villaviciosa; y la fechura’l proyectu de recuperación del entornu de la ilesia de Santuyano, n’Uviéu. 10 de payares, 2004 0 FacebookTwitterPinterestEmail
Patrimoniu Cultura impulsa’l Muséu de la Llechería, en Morcín, con una ayuda de 3.600 euros by asturnet 2 de payares, 2004 Un total de 3.600 euros pa da-y puxu al Muséu Etnográficu de la Llechería, allugáu en La Foz de Morcín. La Conseyería de Cultura, Comunicación Social y Turismu destina esa cantidá a sufragar los seguros, suministros, comunicaciones y gastos d’alquiler del equipamientu, y subvenciona con otros 2.200 euros infraestructures del Muséu Vaqueiru de Naraval, en Tinéu. Dientro de la convocatoria d’ayudes económiques a museos y colecciones museográfiques de titularidá privada, Cultura reparte el total de les subvenciones ente cuatro museos: El de la Llechería, el de Naraval, el Muséu Tixeleiro -pa cuyu inventariu s’empobinen 4.100 euros- y l’equipamientu xixonés ‘Evaristo Valle’. Ye esti centru cultural el que lleva la mayor parte de les perres concedíes pola Conseyería: 9.000 euros pa sufragar los costos de la esposición ‘Evaristo Valle, el paisaje religioso’, y otros 2.700 pal caltenimientu de talleres educativos entamaos pol muséu. Según publicó’l Boletín Oficial del Principáu d’Asturies (BOPA) na so edición del sábadu pasáu, la inversión pública nel Muséu de la Llechería destinaráse al pagu de seguros, alquiler y factures d’agua, lluz y teléfonu del centru, mientres que nel casu’l Muséu Vaqueiru de Naraval l’ayuda de Cultura sufraga l’alquisisicón d’una alarma y un sistema d’estintores; el pagu del suministru elléctricu, y la edición de cartafueyos promocionales del centru. 2 de payares, 2004 0 FacebookTwitterPinterestEmail
Patrimoniu Cangas va acoyer la celebración del congresu nacional d’Europarc España by asturnet 5 d'ochobre, 2004 El conceyu de Cangas, onde s’alluga la Reserva de la Biosfera de Muniellos, el principal espaciu protexíu d’Asturies, va acoyer en xuno del prósimu añu l’alcuentru nacional d’Europarc, la organización na que se xunten les instituciones implicaes na planificación y xestión de los espacios naturales protexíos del estáu español. La candidatura pa qu’Asturies fuera sé d’esti conceyu empobinárala la Conseyería asturiana de Mediu Ambiente y agora confírmase la so aceptación. Na organización Europarc España afáyense más de 500 espacios naturales protexíos con una superficie total que sobrepasa los 3,2 millones d’hectarees. Creóse en 1993 y ye miembru activu de la Federación de Parques Naturales y Nacionales d’Europa (EUROPARC), organización paneuropea que se creó en 1973 y axunta instituciones de 34 países dedicaes a la xestión d’arees protexíes y a la defensa de la naturaleza. Ente los oxetivos del congresu que va celebrase en Cangas tán los principales de la organización conservacionista: actuar como observatoriu de la evolución y l’estáu de los espacios protexíos, facilitar l’intercambiu y la difusión d’información ente los responsables de la xestión d’esos espacios y promover la profesionalización y cualificación del personal de los parques naturales. 5 d'ochobre, 2004 0 FacebookTwitterPinterestEmail
Patrimoniu El proyectu pa Tito Bustillo queda fuera de los presupuestos xenerales del Estáu by asturnet 30 de setiembre, 2004 El gobiernu español destina a la comunidá autónoma asturiana 3.450.000 euros pa infraestructures culturales nel exerciciu de 2005 dientro los presupuestos del Estáu. L’aportación de l’administración central empobínase a proyectos consideraos prioritarios como l’ampliación del Muséu Arqueolóxicu, l’Archivu Hestóricu y la remocicación del monesteriu de Curniana. Nos presupuestos nun s’inclúi dala partida pal proyectu de Tito Bustillo que queda aparcáu hasta concretase dafechu. Nos presupuestos xenerales del Estáu elaboraos pol gobiernu central inclúense partides pa otres actuaciones en materia d’infraestructures culturales como la remocicación del monesteriu de Valdediós o la del Palaciu Hevia de Villaviciosa. Pa la cueva de Tito Bustillo y el so entornu nun apaez conseñada nenguna cantidá, posponiéndose les partíes necesaries hasta l’algame d’un proyectu consensuáu. El proyectu pal xacimientu prehestóricu de Ribesella vien arrastrando una fonda carga polémica dende que se punxo enriba la mesa y tuvo los sos momentos más críticos nel enfrentamientu de postures ente l’administración asturiana y l’anterior ministru de Fomento. Les dificultaes de llevar a cabu un proyectu pa Tito Bustillo que respuenda a los deseos del conceyu riosellanu vienen motivaes pola intención prioritaria del gobiernu del Principáu de construir un muséu de la prehestoria en Teverga. Los planes del Principáu fueran contestaos con sucesives movilizaciones ciudadanes en Ribesella. 30 de setiembre, 2004 0 FacebookTwitterPinterestEmail
Patrimoniu Corvera movilízase pola conservación del llugar tradicional de Truyés y el so patrimoniu etnográficu by asturnet 29 de setiembre, 2004 Vecinos de Corvera axuntaos na Plataforma pola Defensa del Patrimoniu Cultural del conceyu decidieron na so última reunión unviar entrambos escritos a les conseyeríes d’Urbanismu y de Cultura del Gobiernu del Principáu col fin de pidir la reconocencia de l’aldea de Truyés como conxuntu hestóricu. La solicitú acompáñase de dos informes fechos por dos espertos nos que se resalta la importancia patrimonial del llugar y del so entornu. Nos citaos escritos arguméntase que l’interés etnográficu y hestóricu d’esti núcleu rural fai necesaria una intervención por parte de l’adminstración autonómica p’asegurar la so conservación. Tamién se pide a la Conseyería de Cultura qu’entame una investigación arqueolóxica nel entornu d’El Barreo y Las Canteras, nos alredores de l’aldea, énte los nicios de posibles allugamientos castreños La pitición de la plataforma concrétase n’algamar la catalogación del llugar como conxuntu hestóricu y evitar asina la destrucción de Truyés énte les actuaciones urbanístiques previstes nesa zona. 29 de setiembre, 2004 0 FacebookTwitterPinterestEmail
Patrimoniu El Gobiernu da-y lluz verde al remocicamientu de Santa María’l Narancu y San Xuan de Prioriu by asturnet 16 de setiembre, 2004 El templu prerrománicu de Santa María’l Narancu y la ilesia románica de San Xuan de Prioriu meyoren la so cara. El Conseyu de Gobiernu’l Principáu autorizó güei una inversión conxunta de 634.000 euros -unos cien millones de les vieyes pesetes- pa remocicar dambos edificios, allugaos nel conseyu d’Uviéu. Les obres foron encamentaes hai agora cinco meses pol Conseyu de Patrimoniu. Na primer reunión plenaria d’esi muérganu na presente llexislatura autonómica, cellebrada’l 28 d’abril, aprobáronse les actuaciones qu’esta mañana algamaron el preste formal del Executivu autonómicu, lo qu’evidencia que la maquinaria burocrática del Principáu -inda tomando en cuenta’l ‘parón’ provocáu pol veranu- tarda varios meses n’iguar asuntos culturales rutinarios, pero d’envergadura. Según les previsiones de la Conseyería de Cultura, el remocicamientu de Santa María’l Narancu rematará antes de fin d’añu y basaráse na renovación de la cubierta y na igua de los pavimentos, que tán enforma deterioraos por mor de l’alta afluencia de visitantes al templu. Nesti aspectu, y énte la dificultá de cuidar con normalidá’l prau qu’arrodia el monumentu, el palaciu-templu quedará circundáu por una pavimentación de cantu rodáu na superficie esterior más averada al edificiu, pola que’l públicu accede al interior. Pol so llau, l’otru monumentu que sedrá remocicáu, la ilesia de San Xuan de Prioriu, allugada a 9 quilómetros d’Uviéu y contruyida a partir del sieglu XII, caltién l’únicu tímpanu hestoriáu del románicu asturianu. Na so xuntanza ordinaria de güei, el Conseyu de Gobiernu alcordó amás declarar como Bien d’Interés Cultural (BIC) el Palaciu de los García de Tinéu, colo que l’inmueble queda acoyíu a la másima protección prevista na Llei de Patrimoniu. 16 de setiembre, 2004 0 FacebookTwitterPinterestEmail
Patrimoniu Galicia basará la promoción del Camín de Santiago na concesión del ‘Príncipe de Asturias’ de la Concordia by asturnet 15 de setiembre, 2004 El nome d’Asturies tará en toles grandes promociones turístiques del Camín de Santiago en 2005. Darréu acabe l’Añu Santu Compostelanu inda en cursu, la Xunta de Galicia basará la difusión y propaganda de la ruta xacobea na concesión del premiu ‘Príncipe de Asturias’ de la Concordia, qu’una representación d’instituciones y comunidaes vinculaes al Camín recibirá n’Uviéu el mes prósimu. Según anunció ayeri el conseyeru gallegu de Cultura, Xesús Pérez Varela, el Gobiernu de Galicia, la sociedá Turgalicia y el Plan de Xestión del Xacobeo tienen claros dos puntos sobro los que van afitar la campaña de la ruta xacobea l’añu prósimu: La referencia destacada al galardón otorgáu n’Uviéu hai agora una selmana y el lema de la campaña, que sedrá “dame la to mano, toma la mio mano”. Premiu a El Guerruj Dotramiente, los xuraos de los Premios ‘Príncipe de Asturias’ finaron esti mediudía la so actividá de la edición d’esti añu col asoleyamientu’l fallu del galardón correpondiente a los Deportes, que recayó nel atleta marroquí Hicham El Guerruj pol so “compromisu col deporte y cola sociedá”, materializáu na ayuda a los necesitaos al traviés de la so participación n’acciones benéfiques y na “rebelión contra la desgracia” que-y impidiera, hasta esti veranu, algamar la medalla d’oru olímpica na so especialidá, la carrera de los 1.500 metros. Amás, el xuráu reconoció los méritos más recientes del “estraordinariu deportista” magrebí, que nes Olimpiaes d’Atenas llogró tamién la medalla d’oru na preba de los 5.000 metros, doblete del que namás hai un precedente na hestoria. Un total de 15 candidatures procedentes de nueve nacionalidaes opten al últimu de los ‘Príncipe’ de 2004, que na so edición anterior correspondió-y al Tour de Francia y que ta empobináu a persones, collectivos o instituciones que tengan algamao nueves metes “na llucha del home por superase a sigo mesmu”. El ‘Príncipe’ de la Concordia reconoz el simbolismu hestóricu de les pelegrinaciones a Santiago 15 de setiembre, 2004 0 FacebookTwitterPinterestEmail