Sociedá El Conseyu Consultivu del Principáu escomenzó los sos llabores by asturnet 3 de payares, 2005 El Conseyu Consultivu del Principáu escomenzó esti miércoles 2 los sos llabores como organismu asesor de la comunidá. Ente les sos xeres principales ta l’estudiu de la reforma estatutaria y solventar les duldes que les distintes instituciones d’Asturies-y planteen. Hasta agora el Conseyu Consultivu recibió abondes peticiones d’asesoramientu d’administraciones locales esmolecíes por solventar asuntos de calter patrimonial. De agora pa en delantre esti organismu va ser l’encargáu d’escamplar tales cuestiones. El Conseyu Consultivu del Principáu ta presidíu por Bernardo Fernández y formen parte d’él Francisco Bastida, Luisa Fernanda del Valle Caldevilla, Fernando Fernández Noval y Juan Luis Rodríguez-Vigil. 3 de payares, 2005 0 FacebookTwitterPinterestEmail
Sociedá El Conceyu de Xixón promociona l’usu del asturianu nel comerciu by asturnet 2 de payares, 2005 La Oficina Muncipal de la Llingua del Conceyu de Xixón y la Unión de Comerciantes local acaben de poner en marcha la campaña “Nel comerciu asturianu yes bienveníu/bienvenida” col oxetivu de fomentar l’usu de la nuestra llingua nes pequeñes y medianes empreses d’esi sector.La campaña inclúi 25.000 trípticos, bolses, axendes y ‘chuletes’ cola traducción de los principales productos. La iniciativa de la Oficina de la Llingua de Xixón féxóse pública va unos díes con presencia de la conceyal de la estaya llingüística Carmen Rúa y del edil responsable de Comerciu y Promoción Económica, José María Pérez. Nel actu de presentación tamién tuvieron el director de la Oficina de Política Llingüístia del Principáu, Ramón d’Andrés y la presidenta de la Unión de Comerciantes de Xixón, Ana Menéndez. La representante de les pequeñes y medianes empreseses d’esti sector amosóse convencida de que la ufierta de la comunicación n’asturianu significa “un valor añadíu” a los productos en vienta. La campaña ta financiada por Política Llingüística en 4.000 de los 9.368 euros nos que ta basáu el so coste. El númberu de trípticos que van repartise cola traducción de los principales productos y frases usuales ye de 25.000, repartíos en bloques de 5.000 por cada sector del comerciu: frutería, pescadería, etc. La Unión de Comerciantes de Xixón participa nel Conseyu Asesor de la Oficina Municipal de la Llingua y esta ye la primer iniciativa qu’entama en colaboración col Ayuntamientu pa fomentar l’usu del asturianu nel comerciu local. 2 de payares, 2005 0 FacebookTwitterPinterestEmail
Sociedá Les conclusiones de la Escuela Fermín Penzol encamienten a instituciones gallegues y asturianes el so compromisu coles llingües d’entrambes comunidaes by asturnet 2 de payares, 2005 Les conclusiones finales de la Escuela Permanente Fermín Penzol celebrada’l pasáu fin de selmana en Ribadeo piden-y al gobiernu del Principáu la oficialidá de la llingua asturiana y del gallegu-asturianu, ente otres midíes de normalización social. Al empar encamiéntase a instituciones y colectivos de Galicia qu’énte la problemática llingüística d’Asturies actúen con “diplomacia y solidaridá”. El documentu final apaez firmáu polos profesores de la Universidá de Vigo Xosé Henrique Costas y Anxo Lorenzo, asina como pol profesor de la Universidà d’Uvièu Xulio Viejo, tolos tres en calidá de coordinadores del testu que sofiten los representantes de les otres universidaes gallegues presentes: A Coruña y Santiago. El puntu col qu’escomienza’l documentu ye un llamáu de los participantes nel alcuentru de Ribadeo a la sociedá y a les instituciones de Galicia y d’Asturies “pavanzar na reconocencia y el respetu de les respectives tradiciones y patrimoniu cultural y llingüísticu”. El segundu puntu de les conclusiones insta al Gobiernu del Principáu a facer oficial na prósima reforma estatutaria l’asturianu y el gallegu-asturianu “nos territorios onde son variedades autóctonas”, mentantu pídese que se faga efectiva la Llei d’Usu “destas linguas” y a que siga les recomendaciones feches pol Conseyu d’Europa sobre l’aplicación de la Carta Europea de les Llingües Rexionales y Minoritaries. Les recientes iniciatives provenientes de Galicia hacia Asturies y la polémica entamada a esti llau del Eo tamién se traten nes conclusiones de la Escuela Fermín Penzol cuando se pide “al gobiernu gallegu y a los movimientos sociales, políticos y culturales de Galicia a actuar con diplomacia y solidaridá tocantes a la problemática llingüística dAsturies”. Tocante a la normalización nel Principáu pídese l’apoyu del gobiernu autonómicu a la rede municipal de servicios llingüísticos y a los conceyos de la Tierra Navia-Eo a “la realización d’una política decidida de normalización de la so variedá llingüística” nesa comarca. Les conclusiones rematen con un llamamientu a que les instancies académiques gallegues y asturianes dialoguen “col envís de superar malentendíos y entamar víes de collaboración científica ya intercambiu intelectual” y la Universidá de Vigo ofrezse como interlocutor “siempre que se trate de promover el diálogu, la reflexón y l’ establecimientu d’espacios d’alcuentru abiertos y participativos”. 2 de payares, 2005 0 FacebookTwitterPinterestEmail
Sociedá El RIDEA rescata la obra “El habla de Lena” de Jesús Neira by asturnet 2 de payares, 2005 El Real Institutu d’Estudios Asturianos (RIDEA) acaba de reeditar “El habla de Lena” de Jesús Neira, una obra ya clásica de la dialectoloxía asturiana publicada en 1955 y que marcó un fitu nel estudiu de los estudios llingüísticos del país. El trabayu de Neira ye una obra de referencia de los estudiosos de temes filolóxicos relacionaos cola llingua asturiana y nella ta la base de les polémiques teoríes del investigador l.lenense sobre la diversidá dialectal del nuestru idioma. “El habla de Lena” ye al empar un volume de consulta imprescindible p’afondar na conocencia de les peculiaridaaes locales del asturianu nel conceyu natal del que col tiempu diba ser un de los másimos detractores del movimientu pola recuperación llingüística y fundador, xunto al profesor Alarcos y l’eruditu Jesús Evaristo Casariego, de l’asociación Amigos de los Bables. 2 de payares, 2005 0 FacebookTwitterPinterestEmail
Sociedá Llamazares afirma que nun hai nada qu’impida’l qu’Asturies sea Nación by asturnet 2 de payares, 2005 El coordinador xeneral d’Izquierda Unida Gaspar Llamazares declara nuna entrevista concedida a un diariu d’Uviéu que nun hai nada qu’impida na Constitución española pa qu’Asturies pueda definise como nación “igual que ye Principáu” y qu’ello depende namás de “la voluntá política” de la propia comunidá. Na entrevista apurrida pol coordinador federal d’IU al periódicu La Nueva España, Llamazares respuende a la pregunta de si Asturies podía definise nel so Estatutu como nación, lo mesmo que Cataluña nel proyectu de nuevu Estatut, respuende que eso “depende de los asturianos” y que “nada na Constitución impide que, al igual que ye Principáu, sea tamién nación, namás ye voluntá política” y diz que sobre’l respective “habrá de pronunciase la comunidá autónoma”. Na mesma entrevista el cabezaleru federal d’Izquierda Unida manifiesta l’enfotu de la so formación el que’l pautu de gobieru IX-BA col PSOE termine la lexislatura: “tamos convencíos de que vamos presentar un bon balance”. Llamazares advierte respective a esta visión positiva del pautu de que “nun queremos qu’esa llectura la faga el PSOE d’asuntos que nós llevamos a fechu, como política social y vivienda”. 2 de payares, 2005 0 FacebookTwitterPinterestEmail
ConvocatoriesFiestes L’Ayuntamientu de Mieres convoca’l XV Premiu Teodoro Cuesta de Poesía by asturnet 1 de payares, 2005 L’Ayuntamientu de Mieres convoca un añu más el so Premiu de Poesía Teodoro Cuesta dotáu con cuatro mil euros y la publicación de la obra ganadora. La edición númberu quince del certame coincide nesta ocasión col 176 aniversariu del nacimientu del escritor que da nome al premiu. El plazu de pieslle pa l’acoyida d’orixinales coincide cola fecha del aniversariu de Teodoro Cuesta el prósimu 9 de payares. Hasta agora algamaron el premiu convocáu pol Area de Cultura de Mieres los nomes más representativos de la lliteratura asturiana actual, ente ellos Berta Piñán, Xuan Bello, Lourdes Álvarez, Antón García, Martín López-Vega, Pablo Antón Marín Estrada, Vanessa Gutiérrez o la última ganadora, l’académica Marta Mori d’Arriba. 1 de payares, 2005 0 FacebookTwitterPinterestEmail
Sociedá Les instituciones gallegues piden l’entendimientu con Asturies nel congresu de Ribadeo by asturnet 31 d'ochobre, 2005 La polémica entamada a esti llau del Eo tuvo bien presente nes xornaes celebraes en Ribadeo embaxo l’agospiu de la Escola Fermín Penzol de la Universidá de Vigo. Xosé Henrique Costas, representante de la institución organizadora, reclamó nel empiezu del congresu la cooficialidá pal asturianu y pal gallegu-asturianu, y criticó l’espolín que s’armó por estes xornaes n’Asturies. Otros participantes nel alcuentru coincidieron con Costas y reivindicaron la Escola Permanente como llugar d’atopada ente les dos comunidaes. Xosé Henrique Costas, de la Universidá de Vigo, calificó de “ignorantes interferencias políticas” les reacciones suscitaes a esti llau del Eo pola convocatoria del congresu de Ribadeo y denunció les que consideró «presións para boicotear a colaboración do galego e do asturiano». Na mesma llinia el primer teniente d’alcalde del conceyu agospiador Fernando Suárez criticó a los “detractores que intentan dinamitar o noso entendimento”. El responsable de la Oficina de Política Llingüística del Principáu, Ramón d’Andrés respondió a les crítiques dica Asturies na so intervención en Ribadeo afirmando que “l’entendimientu tamién pasa pola diplomacia y pola comprensión” que Galicia tien de tener pa coles instituciones d’Asturies. D’Andrés dixo nel alcuentru que les reacciones de dalgunos conceyos del Navia-Eo yeren “comprensibles” énte determinaes iniciatives “poco afortunaes”, al tiempu que pidió un consensu sobre les llingües falaes n’Asturies. Na xornada de pieslle de les xornaes el director xeneral de Difusión Cultural de la Xunta de Galicia, Luis Bará, afirmó que “l’entendimientu y el respetu mutuu” yeren imprescindibles p’asegurar la sobrevivencia de la llingua asturiana y de la fala del Navia-Eo. 31 d'ochobre, 2005 0 FacebookTwitterPinterestEmail
Sociedá El CAO denuncia la falta de voluntá de diálogu del PSOE énte les demandes d’oficialidá by asturnet 31 d'ochobre, 2005 El Conceyu Abiertu pola Oficialidá (CAO) denuncia la postura ríxida del grupu socialista na Xunta Xeneral a aceptar cualaquier diálogu cola plataforma cívica. A pocos díes de la convocatoria d’una manifestación n’Uviéu embaxo’l lema “La oficialidá ye la solución” el CAO señala al PSOE como l’únicu grupu presente na cámara asturiana que se niega a falar sobre les reivindicaciones de la plataforma en materia de derechos llingüísticos. Fontes del CAO manifestaron a Asturnews la so decepción énte la postura de los socialistes, que se negaron mesmo aceptar el documentu reivindicativu elaboráu pol colectivu unitariu. De los tres grupos con representación parlamentaria, tanto el popular como’l d’Izquierda Xunida-Bloque por Asturies caltienen abiertes meses de diálogu col CAO, mientres el PSOE nin siquier llegó a baraxar esta posibilidá. Nos últimos meses el Conceyu Abiertu pola Oficialidá aconceyó col PP y con IX-BA. De los resultaos d’eses reuniones la plataforma sacó en conclusión que los populares ufierten una actitú receptiva a siguir falando inda refuguen de momento asumir les reivindicaciones del Conceyu sobre la reconocencia d’oficialidá. Izquierda Xunida-Bloque, pel so llau, en consecuencia cola so participación nel CAO y col so propiu programa políticu, asume como propies les demandes sobre derechos llingüísticos. PP ya IX-BA comprometiéronse a siguir calteniendo abiertos los calces de diálogu cola plataforma. El Conceyu Abiertu pola Oficialidá fexo públicu’l so malagustu cola actitú de cerazón del PSOE mientres se vuelca en difundir la convocatoria del prósimu 5 de payares n’Uviéu, qu’espera masiva. Asina el CAO entamó entrambos magüestos esti domingu 30 en Xixón y n’Uviéu col fin de facer visible’l llamáu a la manifestación del sábadu y nos prósimos díes va intensificar los llabores de difusión de la convocatoria. 31 d'ochobre, 2005 0 FacebookTwitterPinterestEmail
Sociedá Areces enfótase en que les Cortes de Madrid apreben un Estatut constitucional dafechu by asturnet 31 d'ochobre, 2005 El presidente del Principáu Vicente Álvarez Areces amosóse enfotáu en que’l pasu del proyectu de nuevu Estatutu pa Cataluña peles Cortes Xenerales valga p’afaya-y un conteníu constitucional dafechu. El xefe del executivu autonómicu cuenta que nel Congresu y nel Senáu va buscase la manera na que’l testu catalán tea acordies colos principios de solidaridá y cohesión territorial recoyíos na Carta Magna. Areces respondió con esti enfotu a la pregunta fecha na Xunta Xeneral pol diputáu del PP Ovidio Sánchez na que s’interesaba por saber si el cabezaleru del gobiernu asturianu diba pidir que se convocara una conferencia de presidentes autonómicos pa tratar de la reforma del Estatut. Areces contestó en primer instancia que la conferencia de presidentes más prósima nel tiempu tenía por asuntos a tratar los d’inversiones en I+D y sobre los recursos naturales, especialmente los hidráulicos. Darréu, el presidente asturianu, espresó’l so enfotu y el del so gobiernu en que’l pasu del testu elaboráu pol parlamentu catalán pel Congresu y pel Senáu diba valir pa que se limaran los aspectos menos constitucionales del proyectu: “les Cortes Xenerales van servir sin duda pa que s’apruebe un estatutu que sea plenamente constitucional, que respuenda a los intereses xenerales y onde Asturies, por supuestu, va velar polos sos intereses y va defender les sos posiciones a través de lo qu’ ellí s’esprese”, diz Areces na so respuesta a Ovidio Sánchez. 31 d'ochobre, 2005 0 FacebookTwitterPinterestEmail
Sociedá La Xunta Xeneral pronúnciase pola corrección del Estatut nel Congresu de Madrid by asturnet 27 d'ochobre, 2005 El parlamentu asturianu pronuncióse na so sesión d’esti xueves 27 alrodiu del proyectu d’Estatutu pa Cataluña y pidió la corrección de dellos artículos del proyectu. Énte dos iniciatives presentaes pol PSOE y el PP, la Xunta Xeneral decidió a la fin sumar los grupos de tolos grupos políticos, incluíos Izquierda Xunida-Bloque por Asturies, pa pidir la igua del testu. Mentantu el republicanu catalán Carod Rovira calificaba dende un mediu asturianu la iniciativa de “insólita”. Los tres grupos parlamentarios de la Xunta Xeneral votaron a favor de la camudación de dellos artículos del proyectu d’Estatut aprebáu pel parlamentu de Catalunya. Según manifestaba la propuesta del PSOE, sofitada por PP ya IX-BA, tratáse d’evitar la discriminación d’Asturies y d’otros territorios como consecuencia de posibles “privilexos políticos o económicos” de la comunidá catalana. El grupu popular namás votó contra una de les propuestes socialistes qu’espresaba la so convición de que l’Estatut diba ser enmendáu nel Congresu. Izquierda Xunida-Bloque matizó’l so votu afirmando que si bien “hai aspectos del proyectu d’Estatut que nun compartimos tampoco pensamos qu’haya de sacralizase la Constitución”. Pel so llau, el cabezaleru d’Esquerra Republicana de Catalunya, Josep Lluis Carod Rovira calificó de “insólitu” el pronunciamientu del parlamentu asturianu en declaraciones al periódicu asturianu Les Noticies. Na edición d’esti viernes el semanariu publica una entrevista col políticu catalán na que Carod diz que “toi seguru de qu’a nin un solu de los diputaos del parlamentu catalán se-y diba ocurrir opinar sobre lo que tienen de facer n’Asturies” y que “el futuru de Cataluña vamos decidilu equí, non n’Asturies, lo mesmo que’l futuru d’Asturies nun se va decidir en Cataluña”. Na entrevista concedida al semanariu asturianu el líder d’ERC tamién se manifiesta sobre la iniciativa del so grupu nel Congresu sobre llingües del estáu y lo que podía afectar a Asturies y después de declarar que desconoz el casu específicu de la nuestra comunidá diz que: “les coses nun se resuelven namás que col refugu, tien qu’haber una alternativa que pase pel sofitu a la riqueza llingüística d’Asturies”. 27 d'ochobre, 2005 0 FacebookTwitterPinterestEmail