Sociedá El PSOE defenderá nel debate autonómicu que los asturianos “somos distintos, nunca más importantes” by asturnet 6 de setiembre, 2004 “Nun van ser les denominaciones de ‘hestóriques’ les que provoquen esmolición ente nosotros; nun pensamos qu’haiga comunidá ensin hestoria, en tou casu con otra hestoria”. Con esa frase resumió esta tarde’l voceru parlamentariu’l PSOE, Fernando Lastra, nel Plenu institucional del 8 de Setiembre, la opinión de los socialistes sobro’l nuevu debate al rodiu l’Estáu de les Autonomíes, nel que’l PSOE defenderá que los asturianos “somos distintos, nunca meyores o más importantes”. Na sesión estraordinaria cola que los tres grupos políticos con representación na Xunta Xeneral del Principáu abrieron güei les cellebraciones del Día d’Asturies, Lastra empezó citando al escritor Xuan Bello -que citaba a so vez a José Ortega y Gasset pa dicir que los primero que se ve d’Asturies al entrar per Payares “ye que nun se ve”-, acabó llamando a “olvidanos de los nuesos problemes por unes hores y cellebrar la romería”, y afitó l’alcuerdu y el consensu como los dos pegollos nos que, na so opinión tien que s’apoyar la inminente redistribución del poder efectivu de les comunidaes autónomes. Pa ello, entiende’l voceru socialista acordies colo asoleyao en díes pasaos por otros cabezaleros del PSOE asturianu, la llende de les reclamaciones autonomistes ta en que “nenguna singularidá o particular característica hestórica o cultural suponga privilexos o discriminaciones” ente los ciudadanos del Estáu español. Poro, les cuestiones identitaries nun paecen tar na axenda inmediata de los socialistes asturianos: “Falamos más de la patria que de les coses que nos faen tar a gustu nella”, sentenció Lastra, n’alusión a servicios como l’emplegu, la educación y la sanidá. El PP opina lo mesmo, yá que casi en términos esactos pronuncióse’l voceru’l Partíu Popular na Xunta Xeneral, Juan Morales, pa quien lo fundamental nun ta en facer del Principáu “una nacionalidá hestórica, que ya lo ye, sinón una Asturies de primer nivel de riqueza, emplegu y perspectives de futuru, más allá de debates terminolóxicos. La oficialidá como obligación Nesi escenariu de declaración d’intenciones énte’l prósimu discutiniu del nuevu modelu autonómicu, el tercer partíu en representación nel Parlamentu asturianu pero sociu de Gobiernu de los socialistes, Izquierda Xunida-Bloque por Asturies, foi l’únicu en destacar “la obligación irretrucable del reconocimientu de la oficialidá de la llingua asturiana, non sólo como garantía de drechos básicos sinón amás, y ensin complexos, como una de les nuestres aportaciones más singulares al patrimoniu cultural español y européu. La vocera de la coalición, Noemí Martín, que lleó’l so discursu institucional dafechu n’asturianu, reivindicó asinamesmo “la bayura cultural como daqué arriquecedor y positivo, daqué a afitar y compartir”. Pol so llau, la presidenta de la Xunta Xeneral, María Jesús Álvarez, que peslló’l Plenu institucional, defendió’l calter “precursor” d’Asturies na reivindicación de la so autonomía y evocó el “exemplar rexonalismu asturianu” definíu tamién por Ortega y Gasset nun mitin cellebráu en 1932 nel Teatru Campoamor d’Uviéu. 6 de setiembre, 2004 0 FacebookTwitterPinterestEmail
Comunicación L’asturianu yá esiste na realidá televisiva: Sandra aporta a Gran Hermano by asturnet 5 de setiembre, 2004 Sandra, con 28 años, adientróse esti domingu 5 na casa de Gran Hermano falando asturianu dafechu y presentándose tamién en llingua asturiana nel vídiu de presentación que fai esti programa de Telecinco qu’entamaba esti domingu primeru de setiembre la so sesta edición. Sandra, que yera la segunda asturiana qu’entraba na casa de Gran Hermano d’anguaño depués del xixonés Nicky, ye un bon exemplu de munches y munchos neños que ñacieron en Francia o Bélxica y que depredieron el “castellán” que falaba so ma, que nun yera talu sinon asturianu dafechu. Nun hai más que sentir a la má de Sandra pa dase cuenta del bon acentu asturianu que tien. Un acentu que ye menos ñatural nuna rapaza qu’espolleta en Francia y vivi en Benidorm, pero a la que-y presta falar asturiano cola normalidá del que fala la llingua que más siente. La entrada de Sandra foi un torbellín nel que dexó bien nidio que l’asturianu esiste y ye una llingua de comunicación con frases costantes de costrucción asturiana. Nel vídiu de presentación, depués de pedir una botellina sidra nel chigre que tien so má en Benidorm, dexó bien claro que fala asturianu: “Tamos equi na sidrería la mio má en Benidorm onde voi a tomar la mio sidrina”, anque la ma dexó bien nidio qu’a lo que diba yera “a moñase colos amigos y a ayudar a mamá pa na”. Sandra respuende perfectamente al perfil de la mocedá asturiana: gayolera, galana y coles idegues mui nidies: “Nun trabayé nunca… Consiguiéronme siempre tolos mis caprichos… porque soi mui caprichosa”. La programación televisiva de la seronda va tener una bona riestra de protagonistes asturianos, depués de qu’esti domingu entrara tamién Nicky na casa de Gran Hermano y de qu’ún de los más afamaos cocineros asturianos, Jose, s’anunciare como’l nuevu Arguiñano de la televisión pública. Dende esti domingu día 5 de setiembre pela nueche, Nicky sedrá l’otru protagonista asturianu y darréu d’ello de l’actualidá del corazón n’Asturies por mor de la so participación en “Gran Hermano” . Nicky ye un rapaz de Xixón qu’enantes foi rapaza y que gracies a la melecina y a munches operaciones ye agora un home, sigún desplicó elli mesmu nun vídiu de presentación. La entrada de Nicky na casa de Gran Hermano garantiza la presencia constante d’esti xixonés y de Sandra, l’asturiana de fala y de corazón, anque viva en Benidorm, nos medios audiovisuales y na prensa a lo llargo d’esti mes de setiembre. Artículu d’opinión: “Tiémblenme les pates” 5 de setiembre, 2004 0 FacebookTwitterPinterestEmail
Sociedá El programa’l 30 aniversariu de Conceyu Bable plantega más d’una decena d’actos en cinco ciudaes by asturnet 5 de setiembre, 2004 Más d’una decena d’actos, ente conciertos, esposiciones, presentaciones lliteraries, actividaes relixoses y manifestaciones artístiques. Esa ye la cifra d’eventos que proyecten los organizadores de la conmemoración del 30 aniversariu de Conceyu Bable, que se desendolcarán ente’l 22 y el 26 de payares n’estremaos puntos d’Asturies y culminarán, según el programa provisional, nuna espicha y un menifiestu finales. Magar que la llista d’actos entá tien calter provisional y depende d’algamar el preste de les instituciones y entidaes implicaes, esi programa afita un conciertu’l cantautor Carlos Rubiera en Xixón como l’apertura de les cellebraciones, qu’entamaríen tamién con una esposición de pegatines n’asturianu. Na parte musical, los organizadores de los actos -alitaos dende la Oficina de Política Llingüística’l Principáu- prevén un conciertu de tonada na Cuenca’l Nalón, un recital folk na del Caudal y un festival rock n’Avilés, amás d’un conciertu caberu d’intérpretes del denomináu Nuevu Canciu Astur n’Uviéu. Esi sedría’l pieslle de les cellebraciones, que remataríen con un actu d’homenaxe a los miembros desapaecíos de Conceyu Bable y una espicha y un manifiestu finales. Ente los propósitos del grupu de persones qu’entamen los eventos del anivesariu del hestóricu collectivu fundacional del asturianismu figuren amás la realización de varios actos lliterarios, la fechura d’actividaes vinculaes al ámbitu relixosu y un siguimientu informativu especial, como yá adelantara Asturnews, por parte’l centru territorial de Televisión Española n’Asturies. TVE estudia entamar una programación especial pa conmemorar los 30 años de Conceyu Bable 5 de setiembre, 2004 0 FacebookTwitterPinterestEmail
Sociedá El Principáu edita ‘in extremis’ cartelos y programes n’asturianu del 8 de Setiembre pa los actos de Mieres by asturnet 5 de setiembre, 2004 L’asturianu tará presente na propaganda institucional del Día d’Asturies de forma parcial y sólo depués d’un arreglu d’última hora. El Gobiernu autonómicu ta acabante editar n’esi idioma cartelos y programes de les actividaes del 8 de setiembre en Mieres, mientres la promoción de los actos institucionales de mañana mantiénse dafechu en castellán. Una quexa de la Oficina de Política Llingüística propició la igua ‘in extremis’. La selmana pasada, en viéspores de les cellebraciones y diez díes depués d’una primer presentación en Xixón de los actos del 8 de setiembre con publicidá sólo en castellán, el director de la Oficina, Ramón D’Andrés, elevó un escritu a los sos superiores de la Conseyería de Cultura, Comunicación Social y Turismu nel qu’avisaba del ‘escaezu’ institucional y alertaba de qu’esi olvidu “dexaba en mal llugar” el compromisu’l Gobiernu cola promoción y normalización del asturianu. Hores depués, l’Executivu autonómicu encamentó-y a la Oficina de Política Llingüística la torna al asturianu de la propaganda de los actos del día 8, y la propia conseyera, la socialista Ana Rosa Migoya, anunció la presencia de la llingua asturiana na publicidá editada pol Gobiernu. Los cartelos y programes tán acabante salir de la imprenta. Magar d’esa igua parcial, que mantién dafechu en castellán les invitaciones pal actu solemne nel que mañana s’entregarán les Medalles d’Asturies, dos de los tres partíos qu’integren la coalición que gobierna’l Principáu, Izquierda Xunida y Bloque por Asturies, afondaron güei el so distanciamientu de les cellebraciones oficiales ya insistieron na necesidá de que l’asturianu tenga una mayor presencia institucional. Asina, mientres Izquierda Xunida llamó güei a “influyir nel Gobiernu, empobinándolu phacia posiciones muncho más identificaes cola llingua” y reivindicó la inclusión de la coficialidá na inminente reforma del Estatutu d’Autonomía, el Bloque por Asturies faló abiertamente d’escaezu “sistemáticu” de la llingua asturiana nel Executivu autonómicu. Dambes formaciones cellebrarán el 8 se Setiembre nel parque Los Pericones de Xixón. La presencia del asturianu nel 8 de Setiembre divide a los tres partíos que gobiernen el Principáu 5 de setiembre, 2004 0 FacebookTwitterPinterestEmail
Comunicación Les emisores llibres piden collaboración pa ufiertar más programación n’asturianu by asturnet 3 de setiembre, 2004 Les emisores radiofóniques de cálter llibre qu’ufierten programación n’asturianu davezu tan faciendo llamamientos a tolos interesaos pa que propongan proyectos de programes qu’incluir na nueva programación d’esti añu. Tanto Radio Sele n’Uviéu como Onda Peñes en conceyu Gozón faen abierta esa convocatoria, que tien a la llingua de nueso como referente cimeru. “Onda Peñes. Facer Radio” ye una emisora que punxera en marcha hai tiempu la Asociación Cultural El Gaxarte y tolos años llama a los interesaos en facer radio a presenta-yos proyectos de programes pa preparar la so programación de seronda, inviernu y primavera. Esti añu, como ya asocediera nel anterior van tener preferencia los que tean n’asturianu y los que nun seyan exclusivamene musicales y dan de plazu hasta’l 15 de setiembre. Los interesaos puen unviar los proyectos al Apartáu de correos 94, 33440-Lluanco o al corréu elletrónicu ondes@gaxarte.com. Les consultes puen facese tamién al teléfonu 985882626. Y lo mesmo ta faciendo Radio Sele, que fai un brinde a tolos interesaos en facer radio n’asturianu a ponese en contactu con ellos cola fin de preparar la parrilla d’esta temporada que vien. Nel casu de la única emisora llibre dafechamente n’asturianu qu’entamara a emitir n’Asturies, ye requisitu que’l proyectu de programa tea empobináu a la normalización del asturianu. Pue llamase al so teléfonu, 984211684 y dexar una forma de contactu si nun tan. Tamién se pue unviar un fax al mesmu númberu o un corréu elletrónicu a radiosele@asturies.org . La so páxina web ye www.radiosele.net. 3 de setiembre, 2004 0 FacebookTwitterPinterestEmail
Sociedá La presencia del asturianu nel 8 de Setiembre divide a los tres partíos que gobiernen el Principáu by asturnet 2 de setiembre, 2004 Vagamar nel Gobiernu’l Principáu pol usu institucional de la llingua asturiana. L’ausencia del asturianu nes invitaciones y programes oficiales de los actos del 8 de Setiembre, que tendrán epicentru en Mieres, lleva a Izquierda Xunida a acusar de “contradictoriu” al Executivu del que forma parte, provoca’l distanciamientu del Bloque por Asturies y motiva la negación del PSOE, sociu mayoritariu nel Gobiernu, qu’anuncia publicidá institucional n’asturianu. Asina lo aseguró ayeri en Mieres la conseyera de Cultura, Comunicación Social y Turismu, Ana Rosa Migoya, quien refugó’l comunicáu emitíu hores antes pol Bloque por Asturies -compañeru de los socialistes nel Executivu- nel qu’esta organización anunciaba’l so distanciamientu de les cellebraciones oficiales en Mieres en protesta pola ausencia institucional nelles de la llingua asturiana. Güei toca-y el turnu a Izquierda Xunida, el tercer sociu de Gobiernu. Nuna nota pública, la coalición declárase esmolecida énte “les contradicciones del Gobiernu asturianu en tornu al compromisu cola normalización de la llingua asturiana” y acusa al Executivu -nel que ta presente al traviés de dos conseyeríes- de manifestar “despreciu” p’hacia l’idioma autóctonu “olvidando” la so presencia digna nos actos del 8 de Setiembre, un escaezu que n’opinión d’IX “ye reflexu d’una visión d’Asturies superficial y frívola”. En consecuencia colo anterior, Izquierda Xunida d’Asturies saca pechu na defensa de la llingua asturiana y demánda-y al Gobiernu’l Principáu un progresivu incrementu del usu y visibilidá d’esti idioma nel planu institucional. Hasta tal puntu paez llegar el desalcuerdu, qu’IX y el Bloque cellebrarán la so propia fiesta del 8 de Setiembre nuna carpa allugada nel parque xixonés de Los Pericones, lloñe de Mieres. Según fontes del Gobiernu autonómicu consultaes por Asturnews, l’asturianu tará parcialmente presente en ciertos aspectos de la propaganda institucional del Día d’Asturies, depués que l’Executivu recibiera un toque d’atención ‘in extremis’ sobro l’escaezu. Primero, en castellán El pasáu 20 d’agostu, el director xeneral de Deportes del Principáu, Daniel Gutiérrez Granda, dio a conocer en Xixón el programa oficial de los actos del Día d’Asturies, posando xunta un cartel promocional retuláu dafechu en castellán y facilitándo-yos a los medios de comunicación un programa d’actos confeccionáu nesa mesma llingua, con presencia del asturianu n’espresiones mui puntuales. Por esa razón, y énte la falta d’invitaciones oficiales y programes en llingua asturiana pa promocionar los actos institucionales del 8 de Setiembre, el Bloque por Asturies emitió ayeri un comunicáu nel que se desmarca de les cellebraciones oficiales del Día d’Asturies y separa a los sos afiliaos qu’ostenten cargos públicos nel Gobiernu’l Principáu de les cellebraciones entamaes pol Executivu. El Bloque llama l’atención, na so comunicación pública, sobro l’olvidu de la llingua asturiana “en publicaciones oficiales” y declara’l so llabor en defensa l’asturianu “prindáu” polos sos socios nel Executivu autonómicu, al tiempu que denuncia que l’actitú de los socialistes convierte en “papel moyao” el propiu alcuerdu de Gobiernu no que cinca a la protección y puxu del idioma asturianu dende l’Alministración autonómica. 2 de setiembre, 2004 0 FacebookTwitterPinterestEmail
Sociedá L’estudiu sociollingüísticu de Xixón basaráse en 600 entrevistes y tará llistu pa fin d’añu by asturnet 2 de setiembre, 2004 Seiscientes entrevistes. A partir d’esa amuesa ellaboraráse l’estudiu sociollingüísticu de Xixón que prepara’l caderalgu de Ciencia Política na Universidá’l País Vascu Francisco Llera Ramo por encargu de la Oficina Municipal de la Llingua, una investigación pionera nel ámbitu llocal cuyos resultaos definitivos tarán llistos, en forma de publicación, nes últimes selmanes de 2004. Esa ye, a lo menos, la previsión del propiu director del estudiu, qu’espera poder ufrir un primer avance de conclusiones na segunda quincena’l mes d’ochobre y qu’ultima la ellaboración del cuestionariu nel que va afitase’l trabayu. Pa ello, Francisco Llera manexa cuestiones estrayíes de los dos estudios sociollingüísticos que yá dirixó pal conxuntu’l territoriu asturianu, a les que se sumarán entrugues específiques pal ámbitu de Xixón. La investigación, que quier valir como una ferramienta estadística pa recomendar orientaciones de política llingüística nel conceyu, tomará en cuenta’l conceyu y la ciudá de Xixón como un “vanguardista crisol d’Asturies”, por mor de la estremada procedencia de la so población, y nesi sen trazará, según avanzó Llera, “una cierta diferenciación de zones”. La Oficina Municipal de la Llingua de la ciudá más populosa d’Asturies, creada en xineru pasáu tres del pactu que PSOE ya Izquierda Xunida-Bloque por Asturies rubricaron pa gobernar el municipiu, afitóse nos sos primeros siete meses de funcionamientu como ún de los más activos servicios municipales de normalización, completando una actividá que va de les tornes al asturianu de guíes y boletinos municipales al asesoramientu pal usu de la llingua asturiana nes presentaciones del Circu’l Sol. 2 de setiembre, 2004 0 FacebookTwitterPinterestEmail
Sociedá Los premios ‘Príncipe’ retomen l’actividá col galardón de la Concordia, al qu’opten 39 candidatos by asturnet 2 de setiembre, 2004 Los premios ‘Príncipe de Asturias’ 2004 afronten la so recta final. Un total de 39 canditatures procedentes de venti nacionalidaes distintes opten al ‘Príncipe’ de la Concordia, que se falla’l prósimu martes n’Uviéu y que completará’l palmarés de la edición d’anguaño de los galardones, a falta sólo del fallu’l xuráu del premiu de Deportes. Les más de trenta personalidaes encargaes d’elixir al ganador na estaya de la Concordia aconceyarán nel hotel Reconquista dende primer hora del llunes y ente elles tarán el director de la Real Academia de la Historia, Gonzalo Anes; el delegáu del Gobiernu n’Asturies, Antonio Trevín; y el presidente autonómicu, Vicente Álvarez Areces. Magar d’ello, el xuráu tará constituyíu casi na so totalidá por altos cargos de grandes empreses, nuna llarga llista que va d’Electricidade de Portugal a Cepsa, Vocento -antes Grupu Correo-, Asturiana de Zinc y los principales bancos. Toos ellos tendrán enriba la mesa de trabayu una relación de candidatures llegaes d’Alemania, Arxentina, Bolivia, Brasil, Burundi, Colombia, Cuba, España, Estaos Xuníos, Guatemala, Holanda, India, Isllandia, Israel, México, Mozambique, Perú, Sudáfrica, Uruguay y Venezuela. El premiu ‘Príncipe de Asturias’ de la Concordia, que na edición de 2003 algamó la creadora de Harry Potter, Joanne Kathleen Rowling, ta empobináu a distinguir a persones o collectivos que destaquen nel ámbitu internacional nun llabor pola fraternidá, la llucha contra la inxusticia, la probitú, la ignorancia o la enfermedá. Web oficial de la Fundación ‘Príncipe de Asturias’ 2 de setiembre, 2004 0 FacebookTwitterPinterestEmail
Sociedá Francisco Llera retrúca-y a Areces qu’apostar poles señes d’identidá “refuerza la España plural” by asturnet 1 de setiembre, 2004 Reforzar señes d’identidá como la llingua asturiana ye “reforzar la España plural” y evita’l contrasentíu de reconocer qu’Asturies “tien más arraigu diferencial que naide” y renunciar llueu a esa singularidá. Asina retruca Francisco Llera Ramo, caderalgu de Ciencia Política na Universidá’l País Vascu y director de los dos estudios sociollingüísticos de referencia n’Asturies, a la tesis del presidente autonómicu, Vicente Álvarez Areces, que posterga la coficialidá del asturianu “pa nun reforzar lo que nos separa de los demás”. En declaraciones a Asturnews, Llera atribuyó les pallabres del presidente -publicaes el pasáu domingu nuna entrevista asoleyada pol diariu ‘La Nueva España’- a una “enfermedá crónica del asturianismu institucional”, y afirmó que l’argumentu emplegáu por Areces pa postergar la declaración del asturianu como llingua coficial na inminente reforma del Estatutu d’Autonomía “riza’l rizu pa xustificar un prexuiciu previu”. N’opinión del caderalgu de la Universidá vasca, pretender “ser más solidariu que naide” a costa de renunciar a la identidá propia llevaría a Asturies a cayer nuna asimetría “esaxerada por defectu” en rellación al restu de comunidaes autónomes qu’integren l’Estáu español. Un fechu especialmente preocupante, a xuiciu de Llera Ramo, nun momentu nel que la llingua asturiana afronta una “oportunidá hestórica na que hai más condiciones que nunca” pa la so declaración como idioma cooficial na prósima reforma estatutaria. Mantener una actitú contraria a ello, entiende’l politólogu y director del Euskobarómetru, “sedría mui arriesgao pal PSOE”. La Xunta pola Defensa de la Llingua tilda de “irresponsable” a Areces por postergar la coficialidá 1 de setiembre, 2004 0 FacebookTwitterPinterestEmail
Sociedá Llanes entama los trámites pa edificar n’El Sablón el primer palaciu de congresos del Oriente by asturnet 31 d'agostu, 2004 Llanes quier tener el so propiu gran equipamientu pa convenciones y eventos culturales. L’Ayuntamientu negocia yá con propietarios de terrenos averaos a la playa’l Sablón pa edificar enriba d’ellos el Palaciu de Congresos de la villa, que sedrá’l primer inmueble d’eses característiques nel Oriente asturianu ya incorporará un aparcamientu soterráu de grandes dimensiones. Según confirmó l’alcaldesa de Llanes, la socialista Dolores Álvarez, el Consistoriu entamó yá los trámites pa mercar les parceles elexíes y empezar, darréu los terrenos seyan propiedá municipal, el llargu procesu alministrativu y de construcción que culminará na edificación del palaciu. Llanes busca col nuevu equipamientu meyorar los sos atractivos turísticos y da-y puxu al renome que’l conceyu yá tien ente los visitantes qu’acuden a la llocalidá dende fuera d’Asturies, esplotando’l denomináu turismu de congresos como un ventaxosu motor del sector llocal de servicios, más allá de la temporada de veranu. Dos grandes opciones Anguaño, namás les dos principales ciudaes d’Asturies cuenten con equipamientos asemeyaos al que quier llevantar l’Ayuntamientu de Llanes. Uviéu acueye gran parte de los congresos y convenciones que se cellebren nel Principáu, emplegando l’Auditoriu ‘Príncipe de Asturias’ -con capacidá p’acoyer eventos pa ente 50 y 2.300 persones- como sustitutu’l futuru Palaciu de Congresos, que yá s’edifica nel barriu de Buenavista sobro un diseñu del arquitectu Santiago Calatrava. Pol so llau, Xixón cuenta con un palaciu de congresos nel recintu de la Feria Internacional de Muestres d’Asturies, na oriella drecha’l ríu Piles, un inmueble que cuenta con un salón d’actos con capacidá pa 800 persones, una sala de conferencies con un aforu de 200 asistentes y un espaciu polivalente de 600 metros cuadraos. 31 d'agostu, 2004 0 FacebookTwitterPinterestEmail