Sociedá Consuelo Vega ye la nueva Direutora Xeneral de Promoción Cultural by asturnet 25 de xunetu, 2007 Redacción. La filóloga y ensayista en llingua asturiana Consuelo Vega (Bustiye, Ayer, 1961) ta acabente de convertise na nueva Direutora Xeneral de Promoción Cultural del Gobiernu del Principáu d’Asturies. Vega ye conocida pol so llabor como ensayista en llingua asturiana y hasta agora trabayaba nel Institutu Adolfo Posada. Ente les sos obres tán ‘Cera frío’qu’algamó’l premiu María Xosefa Canellada. Vega ta acabante d’espublizar cola editorial Trabe una antoloxía de monólogos escritos por muyeres, titulada ‘Ente muyeres’. Amás, na Radio del Principáu d’Asturies dirixe y presenta ‘Paraísu natural’, un magacine cultural y d’actualidá que lleva n’antena yá más de diez meses. 25 de xunetu, 2007 0 FacebookTwitterPinterestEmail
Sociedá Xunta de Conceyales Asturianistes n’Uviéu by asturnet 20 de xunetu, 2007 Esti martes 17 de xunetu, nel hotel AC dUviéu, aconceyáronse los cargos electos dUNIÓN URAS-PAS (11 conceyales, 2 alcaldes) y les executives de los partios col oxetivu de coordinar la política asturianista que llevarán nos sos respectivos conceyos. Esta ye la primera XUNTA DE CONCEYALES ASTURIANISTES desta llexislatura, na que, ente otros asuntos, alcordose facer estes xuntes polo menos una vegada cada tres meses. La noticia na web d’Unión Asturianista 20 de xunetu, 2007 0 FacebookTwitterPinterestEmail
Sociedá La Xunta pola Defensa de la Llingua vuelve a pidir la oficialidá del asturianu pa la reforma del Estatutu by asturnet 17 de xunetu, 2007 Redacción. La Xunta Pola Defensa de la Llingua Asturiana (XPDLA) fizo ayeri un llamáu a “tolos sectores democráticos pa que tean preparaos pa movilizase en cuantes entamen los trabayos de reforma del Estatutu d’Autonomía”. La XPDLA espresó la so intención de lluchar “democráticamente” porque’l nuevu testu que s’apruebe recueya la oficialidá de la llingua asturiana, porque “un estatutu ensin oficialidá ye un esatutu antidemocráticu y represor y eso nun ye bono p’Asturies nin pa los asturianos”. La Xunta respondió a les declaraciones del conseyeru d’Educación, Jose Luis Riopedre, sobre les negociaciones pa la ellaboración del nuevu Estatutu, y a la posibilidá d’incluyir la oficialidá del asturianu nel mesmu, dalgo que’l responsable autonómicu refuga. La Xunta recordó al conseyeru y a la Federación Socialista Asturiana, que “tienen d’escoyer ente les llibertaes o la represión”, “Riopedre tien d’escoyer ente reprimir a los que piden drechos o dar llibertaes pa qu’use l’asturianu quien quiera. Cola primer opción unos sufren discriminación; cola segunda, toos tienen derechos llegales”, señaló’l comunicáu. La Xunta refugó de la mesma manera l’argumentación del responsable autónomicu, cuando señaló que “cuando se negocia naide tien de quedar como vencedor o vencíu”. Los defensores del asturianu entrugáronse a esti respectu: “¿Cómo quier que se sienta’l ciudadanu que quier usar l’asturianu y l’alministración lu niega porque nun ye oficial?”. 17 de xunetu, 2007 0 FacebookTwitterPinterestEmail
Sociedá Alborá Llibros torna otra vuelta a la actividá by asturnet 17 de xunetu, 2007 Alborá Llibros torna dende’l 19 de xunetu colos mesmos conteníos de siempres pero con otra direición. La célebre llibrería asturianista de Xixón, echól pieslle el pasáu 6 de xunu dempués de cuasi trenta años dactividá. Asitiada na Plaza Romualdo Alvargonzález, nun primer momentu nun llocal pequeñu nel númberu 4 y más tarde y hasta güei nel 5, la llibrería convirtióse nun referente de les llibreríes de temática asturiana, embaxo la xerencia de Xicu y Pilar Yepes. Alborá Llibros va siguir abierta dende’l 19 de xunetu embaxo la xestión de ‘Distribuciones Cimadevilla’, pero como llibrería xeneralista. La crisis nel mercáu del llibru lleva años pesllando llibreríes nAsturies. La primera foi Seronda dAvilés, a principios desti añu foi la Llibrería Ítaca, asitiada nel barriu LArena de Xixón y que tuvo en funcionamientu alredor de trés años. Xixón queda agora ensin nenguna llibrería especializada en llibros asturianos. La llibrería, que llegó a ser editorial, editó llibros tan recordaos como Coses Vivíes de Mánfer de la Llera o les ediciones llitúrxiques nasturianu, amás de los llibros de rutes de Xuerde Morán, ente munchos otros. Per munchos años foi llugar pa la presentación de llibros nasturianu y autores como Xuan Xosé Sánchez Vicente, Antón García o Humberto González presentaron dalgunos de los sos llibros ellí. Lúltimu actu públicu foi un recital de los autores de la revista Formientu, que se celebról vienres 23 de marzu. 17 de xunetu, 2007 0 FacebookTwitterPinterestEmail
Sociedá Xuristes pol Asturianu fizo repás a les alegaciones del Principáu nel casu de la cuestión dinconstuticionalidá sobre la Llei dUsu by asturnet 15 de xunetu, 2007 Redacción. L’Aconceyamientu de Xuristes pol Asturianu protestó ayeri pola “ actitú del gobiernu asturianu na causa xudicial pol drechu del lletráu Xurde Blanco Puente a poder rellacionase n’asturianu cola alministración asturiana”, na que’l titular del Xulgáu de lo Contencioso-Alministrativo númberu 3 d’Uvieu anunció la posibilidá d’interponer una cuestión d’inconstitucionalidá escontra los artículos 2, 4 y 7 de la Llei d’usu del asturianu de 1998. Los miembros de l’asociación esplicaron que’l demandante Xurde Blanco Puente “presentó con tiempu, argumentos abondos en defensa de la Llei”, mientres que pela so parte, el Ministeriu Fiscal nun presentó alegaciones polo que Xuristes pol Asturianu “entiende que la fiscalía nun tien interes n’ocupase de los drechos llingüísticos de los asturianos”. Pal colectivu de xuristes “l’executivu asturianu fai del fenómenu llingüísticu causa de confrontación política coles sos alegaciones”. Y ye que los servicios xudiciales del Principáu entamó’l so escritu defendiendo “la plena vixencia del artículu 4 del Estatutu d’Autonomía, reconociendo l’usu de la llingua nos ámbitos culturales, artísticos y sociales… campañes institucionales de publicidá y comunicación, de publicaciones, del BOPA, de llogotipos diversos…”. Pero diciendo al mesmu tiempu qu’hai una “imposibilidá de que los empleaos públicos usen o se comuniquen nel exerciciu de les funciones que-yos son propies en llingua distinta al castellanu”. Con estes alegaciones, pa Xuristes pol Asturianu queda claro que pal PSOE “l’emplegu del asturianu tien de circunscribise a la bohemia cultural y artística” y “a la ciudadanía con particularidaes culturales”. 15 de xunetu, 2007 0 FacebookTwitterPinterestEmail
Sociedá Dase por segura la continuidá de Ramón d’Andrés na direición de Política Llingüística by asturnet 11 de xunetu, 2007 El diariu La Voz d’Asturies da por segura na so edición de güei xueves, 12 de xunetu, la continuidá de Ramón d’Andrés al frente de la Oficina de Política Llingüística, dientru l’organigrama de la Conseyería de Cultura, talamente como se venía comentando nesta selmana. El calter continuista de los nomamientos recientes nel tercer gobiernu Areces facía albidrar la continuidá de la Oficina de Política Llíngüística, anque nun yera segura la del so cabezaleru, Ramón d’Andrés. Pero nesta selmana foron delles les voces qu’afalagaron la figura de Ramón d’Andrés tres del so trabayu al frente de la Oficina y delles más les que dieron por seguro la so continuidá como direutor de la Oficina. La seguranza cola qu’asoleya na so edición impresa de güei La Voz de Asturias esa continuidá fai pensar que pue dase por segura, como tamién la intención de que se desaniciu l’Axencia de Cooperación. La Voz fai anuncia de la continuación de Ramón d’Andrés 11 de xunetu, 2007 0 FacebookTwitterPinterestEmail
Sociedá Areces noma Conseyera de Cultura a la Xerente de la OSPA by asturnet 9 de xunetu, 2007 Encarnación Rodríguez, anguaño xerente de la Orquesta Sinfónica del Principáu d’Asturies, y con un currículu de perfil dafechamente xestor, va ser la Conseyera de Cultura y Turismu del nuevu Gobiernu de Vicente Álvarez Areces, nomáu esti llunes Presidente namái que colos votos de los diputaos socialistes na Xunta Xeneral. L’anterior Conseyera de Cultura, Ana Rosa Migoya, pasa a dirixir Alministraciones Públiques y caltien la Portavocía del Gobiernu. La nueva Conseyera de Cultura ye llicenciada n’Económiques y tien una llarga carrera na Alministración como xestora, ensin más contautu cola aición cultural que la xestión como Xerente de la Orquesta Sinfónica del Principáu (OSPA). El perfil d’Encarnación Rodríguez fai albidrar una política continuista nel ámitu cultural de la tercer lexislatura d’Areces como Presidente. Les otres incorporaciones del Gobiernu de diez COnseyeríes anunciáu esti llunes por Areces son Pilar Rodríguez, como Conseyera de Bienestar Social, José Ramón Quirós, Conseyeru de Salú y Servicios Sanitarios, y Belén Fernández, nueva Conseyera de Mediu Ambiente y Desarrollu Rural. Los conseyeros que siguen son María Jose Ramos, na Conseyería de la Presidencia ya Igualdá, Jaime Rabanal, n’Economía y Asuntos Europeos, José Luis Iglesias Riopedre, como Conseyeru d’Educación y Ciencia, Francisco González Buendía, en Política Territorial ya Infraestructures, y Graciano Torre, como Conseyeru d’Industria y Emplegu. 9 de xunetu, 2007 0 FacebookTwitterPinterestEmail
Sociedá IX camienta que’l gobiernu ye continuista y de “perfil políticu mui baxu” by asturnet 9 de xunetu, 2007 El coordinador xeneral d’Izquierda Xunida y voceru parlamentariu d’IX-BA-Los Verdes destacó del Gobiernu d’Areces el so “carácter continuista” y el fechu de que ye un executivu de “perfil políticu miu baxu” y de persones “afines a Areces”. Jesús Iglesias quiso dexar afitao que na opinión de la coalición, el nuevu Executivu tien una evidente “vocación de provisionalidá”. El secretariu Xeneral d’IX tamién asoleyó que la composición del executivu “amuesa la nula voluntá de reforciar el Gobiernu”, porque nelli “hai pocos políticos y esa nun ye una bona garantía p’afrontar los problemes d’Asturies”. 9 de xunetu, 2007 0 FacebookTwitterPinterestEmail
Sociedá La guia de Telefónica arrecueye los topónimos oficiales by asturnet 7 de xunetu, 2007 La nueva guía de Telefónica del 2007-2008, que se repartió va poques feches, recueye tolos topónimos asturianos oficiales, tanto nel índiz alfabéticu del principiu, como nes direcciones qu’apaecen na propia guía. La Oficina de Política Llingüística ocupóse en tou esti tiempu d’informar curioso a Telefónica de los cambios oficiales de les denominaciones toponímiques, pa la soaplicación. 7 de xunetu, 2007 0 FacebookTwitterPinterestEmail
Sociedá Piden 8400 o añu de cárcele pa un militante de la Xunta pola Defensa de la Llingua que corrixó un cartelu by asturnet 2 de xunetu, 2007 Redacción. La Xunta pola Defensa de la Llingua Asturiana informaba estos díes del momentu nel que ta’l procesu xudicial contra Xose Antón Cadierno, por una acción consistente na corrección d’un rótulu de carretera. El fiscal pide pa el una multa de 8483’94 euros, 7210€ de pena y 1283’94€ por desperfectos, o la sustitución por un añu de privación de llibertá. Una pitición que pa la XPDLA ye “escandalosamente desproporcionada” y “ta basada nuna interpretación claramente tendenciosa del Códigu Penal, que fai rescamplar la so intencionalidá política en contra de la reivindicación llingüística”. Asinamesmo, la XPDLA recuerda que “la Llei d’Usu y Promoción del Asturianu recueye nel so artículu 15.1. que los topónimos de la Comunidá Autónoma del Principáu d’Asturies han tener el so nome oficial na so forma tradicional…”. Anque la Llei foi aprobada va más de nueve años, los sucesivos gobiernos asturianos incumplen y vulneren sistemáticamente’l conteníu d’esti artículu. Lo que pa la Xunta ye “una imposición allegal pola vía de los fechos consumaos, una toponimia falsa, castellanizada y deformada col únicu oxetivu de facer desapaecer la llingua asturiana de los nomes propios de los nuesos llugares”. La Xunta pola Defensa de la Llingua Asturiana “quier denuciar, en primer llugar, la dureza implacable cola que la fiscalía actúa contra un ciudadanu por correxir un rótulu de carretera que yá taría na forma correcta si les alministraciones respetasen la llei”. Amás, añaden que “la situación d’indefensión xenerada pola so dexadez y complicidá ente l’incumplimientu de la llegalidá per parte de les alministraciones”. La Xunta pola Defensa de la Llingua Asturiana va ufrir a Xose Ántón Cadierno “tol apoyu y solidaridá que fagan falta pa sacar alantre esti procesu”. 2 de xunetu, 2007 0 FacebookTwitterPinterestEmail