Sociedá Delegación del Gobiernu sanciona a ocho militantes de la Xunta pol 8 Setiembre by asturnet 26 d'ochobre, 2004 La Delegación del Gobiernu n’Asturies qu’empobina el socialista Antonio Trevín tien abiertu un espediente sancionador contra ocho militantes de la Xunta pola Defensa de la llingua que se manifestaron el pasáu 8 de Setiembre en Cuadonga énte les autoridaes institucionales d’Asturies. Los militantes de la Xunta reivindicaben énte la comitiva encabezada pol presidente del Principáu Vicente Álvarez Areces la reconocencia de la oficialidá pal asturianu. L’apertura del espediente sancionador a los miembros de la organización en defensa de la llingua podía llevar a la Delegación del Gobiernu a impone-yos una multa administrativa por manifestase illegalmente y en presencia de les másimes autoridaes del gobiernu asturianu. Una de les formaciones integrantes del executivu presidíu por Areces, el Bloque por Asturies, acaba emitir un comunicáu nel qu’espresa el so “plasmu” ente la iniciativa sancionadora de la Delegación del Gobiernu central y acusa a los responsables de l’acción entamada contra la Xunta de pretender “amenorgar o silenciar una hestórica reivindicación que fai propia más del 60% de la población asturiana”. Nel so comunicáu el Bloque considera “escandaloso y provocador esti intentu de criminalizar a un movimientu y en concreto una reivindicación dafechu pacífica comomo fue y son toles que lleva a acu na cai la Xunta pola Defensa la Llingua”. Los socios minoritarios del gobiernu de coalición asturianu rematen afirmando qu’esta organización política “asume y defende como propia la reivindicación d’oficialidá del asturianu” fecha pola Xunta y caltién que mentantu nun s’igua esta situación llegal: “nun podemos falar d’otra cosa que de la privación, el secuestru o el robu de los nuesos derechos civiles”, dalgo que’l Bloque por Asturies considera “nun-y ta consentíu a nenguna institución pública, gobiernu o gobernante democráticu”. 26 d'ochobre, 2004 0 FacebookTwitterPinterestEmail
Tecnoloxía El Principáu presentó la so campaña pa fomentar la comunicación tecnolóxica by asturnet 26 d'ochobre, 2004 El conseyeru d’Educación y Ciencia, José Luis Iglesias Riopedre y el viceconseyeru de Presupuestos y Administración Pública, Luis Iturrioz Viñuela, presentaron ayer n’Uviéu el proyectu ‘Deprendizaxe Permanente en Rede’, col que se van ufiertar un total de 128 aules formatives pa favorecer l’accesu a la sociedá de la información de los asturianos. La rede d’aules va tar estructurada al través de los 85 telecentros esistentes n’Asturies y los Centros d’Educación de Persones Adultes (CEPAS). La campaña ta coordinada pola Fundación del Centru Tecnolóxicu pal Desarroullu de les Tecnoloxíes de la Información y la Comunicación (CTIC). El director de proyectos de la Fundación CTIC, Francisco Prieto Díez, acompañó a los representantes del gobiernu autonómicu na presentación de la campaña ‘Deprendizaxe Permantente en Rede’ y señaló que la mesma básase “nel afitamientu de los recursos que tán funcionando” con tres aspectos fundamentales: l’ampliación de la ufierta formativa al unificar los recursos disponibles de los Telecentros y los CEPAS; l’usu de la rede de Telecentros como soporte pal alumnáu de les Aules Mentor y la difusión del proyectu n’entrambes redes. El conseyeru d’Educación, José Luis Iglesias Riopedre calificó de “hestóricu” l’alcuerdu entamáu cola Fundación CTIC, que permite poner en marcha el proyectu divulgativu “dao que se multipliquen les posibilidaes de tolos ciudadanos d’Asturies p’acceder la sociedá de la información y el conocimientu” al xuntar los recursos de los Telecentros y los Centros d’Adultos. Pela so banda el viceconceyeru Iturrioz amosó el so contentu por esti proyectu y adelantró que “l’ésitu ta aseguráu porque los Centros d’Asultos ya disponíen de conteníos informativos y agora van contar con una mayor difusión al unificar los medios colos Telecentros, qu’a la so vez van ufiertar un valor añadíu, como ye’l de prestar estos servicios”. La rede agora unificada cuenta con 85 telecentros y les 18 aules d’informática y 25 aules mentor o de formación a distancia de los CEPAS. 26 d'ochobre, 2004 0 FacebookTwitterPinterestEmail
Sociedá Les Xornaes de l’Academia analizaron la formación del estándar asturianu by asturnet 25 d'ochobre, 2004 El profesor Emilio Ridruejo de la Universidá de Valladolid pronunció la primer conferencia de les XXII Xornaes Internacionales d’Estudiu de l’Academia de la Llingua Asturiana. Na ponencia titulada: “El aprovechamiento de los mecanismos analógicos en los procesos de estandarización de las lenguas. El ejemplo del asturiano”, Ridruejo remembró que’l procesu de fixación de la llingua asturiana entamáu pola Academia sigue les pautes xenerales de procesos similares y calterizase por una combinación de rigor filolóxicu y curiáu énte un posible rechazu social al estándar ellaboráu. El profesor de la Universidá de Valladolid emponderó’l llabor desenvueltu pola Academia de la Llingua en procuru d’un modelu común pal asturianu comparándolu coles situaciones vivíes por otros idiomes minorizaos. “En toles sociedaes hai un grupu cabezaleru y de prestixu que fixa l’estándar llingüísticu y non siempre lu acaben aceptando los propios falantes”, aseguró Ridruejo, que punxo’l casu del swahili en Kenia, consideráu artificiosu y estrañu pola propia población. El prestixu social del grupu cabezaleru ye esencial nesos procesos, a xuiciu del autor de la conferencia, “inda a veces son otros factores los qu’influin, mesmo l’azar o razones de tipu prácticu, como sucede en Singapur, onde la fixación del estándar del malayu empobínalu la Cámara de Comercio, guiándose pola fala de los sos propios empleaos o de los empresarios locales” afirmó Ridruejo. Nuna conferencia na que’l filólogu vallisoletanu empezó evocando el so primer contactu cola llingua asturiana nos sos años d’estudiante al través de los trabayos dialectolóxicos de Zamora Vicente, Lapesa y otros autores, foi desgranando los mecanismos pelos que s’avecen formar los modelos xenerales de les llingües. Aparándose nel casu del asturianu Emilio Ridruejo destacó les singularidaes que presentaba la normativización de la nuestra llingua, un procesu nel que s’apostara por preservar bien de rasgos de les variantes “probablemente -barruntó- por razones de calter sociollingüísticu en gran parte, pa evitar un posible rechazu social de los propios falantes o de los grupos roceanos al procesu”. Dende una óptica esterna a la realidá asturiana Ridruejo acolumbró per un llau la esistencia bultable d’una situación de diglosia y per otru de variantes fondamente arraigaes en comunidaes pequeñes y conservadores, productu del islamientu xeográficu. Reconoció qu’énte una situación tala el llabor entamáu pola Academia de la Llingua nun hubo ser fácil, sobremanera teniendo en cuenta que “nun se cuntaba con una tradición normalizadora anterior y los modelos d’otres realidaes non siempre tienen aplicación xeneral”. El profesor de la Universidá de Valladolid terminó la so conferencia alendando a los sos colegues de l’Academia asturiana nel so trabayu normativizador y remató afirmando que “si esi llabor non siempre yera comprendíu pola sociedá o remanecía dalguna posible reacción de rechazu polos falantes, yera lo natural y una amuesa de que la llingua asturiana taba viva”, na so opinión: “namás les llingües que nun provoquen nenguna reacción nin favorable nin contraria tan muertes, namás eses son llingües artificiales”. Na sesión inaugural de les Xornaes intervinieron tamién con comunicaciones Miguel Ramos Corrada, Xosé Lluis García Arias, Héctor García Xil, Liliana Díaz Gómez y Xulio Viejo. La profesora Carmen Muñiz Chacón de la Universidá d’Uviéu punxo pieslle a la xornada cola conferencia: “La entonación y el conxuntu de rasgos prosódicos ba carauterización d’una llingua”. Les Xornaes d’Estudiu siguen güei a les 16,30 con una ponencia del americanu David Heap alrodiu de les encuestes del Atlas Llingüísticu de la Península Ibérica n’Asturies y comunicaciones d’Ana Cano, Esperanza Mariño, Pilar Fernández, Mª del Mar Martín y Xuan Santori. 25 d'ochobre, 2004 0 FacebookTwitterPinterestEmail
Sociedá Empiecen n’Uviéu les XXIII Xornaes d’Estudiu de l’Academia de la Llingua by asturnet 24 d'ochobre, 2004 David Heap, de la Universidá de de Western Ontario, nos Estaos Xuníos y Paquita Suárez Coalla, de la City University of New York, van ser los espertos cimeros de les XXIII Xornaes Internacionales d’Estudiu que s’inauguren güei y van cuntar cola participación de munchos otros espertos como Emilio Ridruejo, Carmen Muñiz, Roberto González-Quevedo y el direutor d’Asturnews, Próspero Morán,ente otros. El profesor de la Universidá de de Western Ontario David Heap va falar nes Xornaes sobro ‘Las encuestas del ALPI para Asturias’ y Paquita Suárez Coalla de la City University of New York va disertar alrodiu de La experiencia de la escritura dende dos llinguas marxinadas:l’asturianu y el castellanu Na programación de les xornaes, amás d’estes conferencies tan previstes otres del académicu de la llingua asturiana Roberto González-Quevedo sobre Símbolos de Sangre;, otra de Carmen Muñiz Cachón, de la Universidá d’Uviéu, sobro La entonación y el conxuntu de rasgos prosódicos na carauterización d’una llingua; y d’Emilio Ridruejo, de la Universidá de Valladolid, sobro ‘El aprovechamiento de los mecanismos analógicos en los procesos de estandarización de las lenguas. El ejemplo del asturiano’. Comunicaciones estremaes Amás de la participación del Profesor de Periodismu de la Universidá Carlos III de Madrid y académicu de la llingua asturiana, Próspero Morán que falará sobro ‘El periodismu alternativu y les llingües minoritaries’, presentaránse nes Xornaes comunicaciones d’Ana Cano González ‘L’álbum de Josefina Pérez Ayala’; Xosé Lluis Campal ‘Sobre el bable (1902), una reflexón d’un interesante artículu periodísticu de fai más d’un sieglu apaecíu por entregues en El Carbayón’, Xosé Lluis García Arias ‘Galicismos’; Miguel Ramos Corrada ‘Dalgunos casos de yeísmu n’asturianu’ o Xulio Viejo Vázquez ‘Valoración, intercomunicación y dialectoloxía: la vivencia de la llingua nel Quirós tradicional’. Xunta estos espertos presentarán comunicaciones otros como Liliana Díaz Gómez, María del Pilar Fernández González, Héctor García Gil, Esperanza Mariño Davila, María del Mar Martín Martín, Xuan Porta Allende, Rafael Rodríguez Valdés, Xuan Santori Vázaquez, Aníbal González Miyares, Hermenegildo Bardio Díaz y Javier Fernández Irigoyen. 24 d'ochobre, 2004 0 FacebookTwitterPinterestEmail
Sociedá IX-BA amuésense contentos pol aumentu nun 20% en política llingüística by asturnet 21 d'ochobre, 2004 El coordinador xeneral d’Izquierda Xunida d’Asturies, Jesús Iglesias, y el secretariu xeneral del Bloque por Asturies, Roberto Colunga, amosáronse contentos del resultáu de la negociación presupuestaria colos sos socios del PSOE tocante a les sos pretensiones en política cultural. Nuna rueda de prensa convocada pa valorar les cuentes de la comunidá resaltaron l’aumentu nun 20% del dineru empobináu a promoción y planificación llingüística. Depués de los recientes desalcuentros calteníos ente la coalición IX-BA colos sos socios de gobiernu del PSOE por cuenta de la política siguida pola Conseyería de Cultura en materia de normalización llingüística y de la rocea barruntada a propósitu de les partíes reservaes pal asturianu nel proyectu presupuestariu del executivu, entrambes partes paecen haber llegao a un alcuerdu p’aumentar estes partíes na midida deseada pol responsable de la Oficina de Política Llingüística, Ramón d’Andrés: alrodiu d’un 20% respective al exerciciu anterior. Col aumentu de la partida presupuestaria en materia llingüística, Cultura espera cubrir les espectavives xeneraes pola prósima puesta en marcha y aplicación del Plan de Normalización, qu’habrá tar ellaboráu y aprobáu enantes de fin d’añu, según anunciara’l presidente asturianu Vicente Álvarez Areces apocayá nel Debate d’Orientación Política del Principáu. El sofitu a la Rede de Normalización Llingüística de los conceyos y la revisión toponímica van ser otros de los proyectos favorecíos por esti medre nel presupuestu destináu a la promoción de la llingua asturiana. Cúmplense asina les desixencies planteaes nesta materia polos representantes d’Izquierda Xunida-Bloque por Asturies na negociación de les cuentes autonómioques colos socialistes nel gobiernu de coalición. Na rueda de prensa celebrada na sé d’Izquierda Xunida d’Asturies, n’Uviéu, los cabezaleros de les dos formaciones firmantes del alcuerdu de gobiernu col PSOE d’a mediaos de 2003 amosáronse tamién contentos por otres desixencies en política cultural como un aumentu nes cantidaes empobinaes al complexu arqueolóxicu de Tito Bustillo, en Ribesella; al parque prehestóric de Teberga o al Centru d’Arte d’Avilés. Ciérrase asina un capítulu de negociación qu’empezó solmenáu de tensiones y desalcuentros, sobremanera no tocante ala posición caltenida pol PSOE y la titular de Cultura, Ana Rosa Migoya respective a la política llingüística. L’últimu desalcuentru tuvo fecha recién al desvelase que Migoya nun asistió a un importante alcuentru de gobiernos autonómicos de comunidaes con llingua propia y qu’amás ocultó esa información a los sos socios de gobiernu. Entós, el conseyeru d’Izquierda Xunida, García Valledor y el coordinador xeneral de la coalición n’Asturies, Jesús Iglesias tuvieron dures palabres pa la falta de sensibilidá del PSOE respective al asturianu. Agora estes diferencies paecen salvaes pa consiguir l’aprebación de los presupuestos autonómicos pa 2005. 21 d'ochobre, 2004 0 FacebookTwitterPinterestEmail
Tecnoloxía Visiónica 0.4 trai a Xixón los últimos paisaxes del arte audiovisual by asturnet 21 d'ochobre, 2004 Xixón acueye los díes 21, 22 y 23 d’ochobre la celebración de Visiónica 0.4, una cita coles últimes tendencies de la creación artística na cultura contemporánea. Ente les actividaes programaes hai un ciclu de conferencies , actuaciones en directu de Djs, entrambes esposiciones de diseñu gráficu y d’obxetos robóticos, montaxes tecnolóxicos y una amuesa de paisaxes dixitales. L’Antigu Institutu, el salón del Monte de Piedá, el Muséu Barjola y la sala Astragal son los escenarios d’esti alcuentru cola creación artística más actual. Visionica 0.4 ye’l primer eventu dedicáu al arte y a la cultura avanzada qu’entama Kinetik, un colectivu surdíu a finales de 2003 col obxetivu de difundir les nueves tendencies de la cultura contemporánea. Nel alcuentru, organizáu en colaboración cola Obra social y cultural de Cajastur, va haber una serie de conferencies nes que participen Pedro Jiménez, José Cervera y Sergi Sánchez; una amuesa de diseñu gráficu con representación de Vasava Artworks, Xnographics, Gee.Oh.Dee, Ipsum Planet, Majid Abassi, Reza Abedini, Kostas Stratigos, Pablo Nanclares y Jorge Lorenzo; una esposición d’obxetos robóticos y montaxes tecnolóxicos con obres de Cuco Suárez, Oscar Gómez y David Cabellos, y Íñigo Bilabao; y una esposición de paisaxes dixitales de Ben Sheppe, Patrick Ehrlund, Sixis Motiongraphics, Rob LOren, Jesse Braun y Roberto Tuñón. El programa de proyecciones cuenta con dellos cortos, pieces esperimentales y creaciones dixitales de Tampere School of Art and Media, Actop, Especial Zemos 98_6, Solu, Eduardo Acosta, Ben Sheppe, Patrick Ehrlund y Sixis Motiongraphics. A lo llargo de les proyecciones van desenvolvese actuaciones en directu de los djs Muerto+Íñigo Bilbao, Tommy Vicananza, Eulogio+Rob Loren y Eduardo Acosta. 21 d'ochobre, 2004 0 FacebookTwitterPinterestEmail
Sociedá El nomamientu d’un académicu gallegu pola rexón asturiana de Navia-Eo arma una encesa polémica by asturnet 14 d'ochobre, 2004 La escoyeta como nuevos miembros de la Real Academia de la Llingua Gallega de cuatro representantes del llamáu ‘galego exterior’,ente ellos el filólogu llugués Carlos Varela pa la rexón asturiana del Navia-Eo ta armando dende la conocencia d’esta decición una encesa polémica n’Asturies. En declaraciones a dellos medios responsables de l’Academia de la Llingua Asturiana denuncien esti fechu como una intromisión d’instituciones ensin potestá llegal en territoriu asturianu y organizaciones del ámbitu nacionalista como Andecha Astur califíquenlo de ‘política espansionista’ de Galicia. Mentantu se conocíen les distintes reacciones negatives a la controvertía decisión de l’Academia Gallega, el recién miembru Carlos Varela arrepostiaba con dures descalificaciones contra la másima institución llingüística d’Asturies y los que ponen en custión el so polémicu llabor nun territoriu nel que llegalmente namás tien competencia l’Academia Asturiana. En declaraciones al diariu uvieín ‘La voz d’Asturias’, Varela, inda reconociendo que ‘la potestá administrativa y educativa’ na zona ye de la comunidá autónoma asturiana y que ‘llegalmente esi área ye responsabilidá de l’Academia la Llingua’, al so xuiciu: ‘ye l’únicu casu n’Europa nel que l’academia d’una llingua tutela a otra’. El nuevu académicu gallegu achacó la polémica a ‘cuestiones más personales que polítiques’ y tuvo dures palabres pa l’Academia de la Llingua Asturiana y los sos másimos responsables. Nes sos declaraciones, Carlos Varela, nun aclarió en base a qué potestá llegal asume la representación de la fala d’una zona ayena al ámbitu d’actuación administrativa de l’Academia Gallega, respective a la que son clares les disposiciones xurídiques d’Asturies tanto nel ámbitu cimeru del Estatutu d’Autonomía como no tocante a la función de l’Academia de la Llingua Asturiana como institución encamentada pa cuestiones llingüístiques en tol territoriu asturianu. Pel so llau la organización nacionalista Andecha Astur fexo públicu un comunicáu nel que califica de ‘agresión territorial y espansionista’ la decisión de l’Academia Gallega y píde-y al gobiernu asturianu la presentación de ‘una quexa formal’ énte la Xunta de Galicia, encamentando ‘una retificación d’esi determín agresivu que supón violentar la plena competencia d’Asturies sol so territoriu en materia llingüística’. Andecha amuesa al empar nel so comunicáu el so “firme sofitu” a l’Academia de la Llingua Asturiana y critica al responsable de la Oficina de Política Llingüística del Principáu, Ramón d’Andrés, al qu’acusen de tentar ‘quitar fierro’ a la polémica en declaraciones suyes tres conocer la noticia del nomamientu de Carlos Varela. 14 d'ochobre, 2004 0 FacebookTwitterPinterestEmail
Sociedá L.Lena entama la normalización de los nomes tradicionales de llugar del conceyu by asturnet 14 d'ochobre, 2004 L’ayuntamientu de L.lena va empezar esti mesmu mes la colocación de cartelos señalizadores en 22 llugares del conceyu revisaos cola so denomación tradicional. L’anunciu féxolu la conceyal de Cultura Paz García, acabante la reunión que caltuvo colos miembros de la Xunta de Toponima del gobiernu del Principáu aconceyada en La Pola pa rematar los trámites del espediente toponímicu del conceyu. A esta reunión asistieron per parte de la Conseyería, el director xeneral de Cultura y Política Llingüística, Carlos Madera y el responsable de la Oficina de Política Llingüística, Ramón d’Andrés. Ésti últimu resaltó la bona disposición de les autoridaes del conceyu l.leniegu pa emprimar la corrección toponímica de los llugares de la so xurisdición, que calificó d’exemplar. El conceyu de L.lena foi ún de los primeros n’encamentar a la Xunta Asesora de Toponima la revisión del so nomemclátor pa recuperar los nomes tradicionales de llugar non conseñaos oficialmente. Dende que se costituyó esti órganu asesor de la Conseyería de Cultura del gobiernu asturianu ya son 13 los conceyos que pidieron entamar los trámites pa la igua de la so toponimia y espérase que nos prósimos meses vayan sumándose a la pitición de revisión de los sos respectivos nomemclátores otros conceyos más. Según la Llei d’Usu del Asturianu, una vez aprebaos pela Xunta de Toponimia y el propiu Conceyu, los nomes de llugar tradicionales van ser la forma oficial de los topónimos ensin quitar pa que se pueda caltener xunta dellos la denominación castellanizada. La conceyal de Cultura de L.lena anunción qu’esti mesmu mes diben empezar colocase les primeres señales colos topónimos revisaos en 22 llugares y qu’enantes de final d’añu diba siguise con otros venti pueblos. La denominación del conceyu va ser d’agora pa en delantre billingüe: L.lena/Lena. 14 d'ochobre, 2004 0 FacebookTwitterPinterestEmail
Sociedá Los desalcuentros en política llingüística faen peligrar el pautu PSOE-IX-BA by asturnet 13 d'ochobre, 2004 L’ausencia de representantes de l’administracion autonómica asturiana al alcuentru que xuntó en Barcelona a instituciones académiques y polítiques de les comunidaes con llingua propia y la desconocencia de la convocatoria por parte de los socios d’IX-BA nel gobiernu del presidente Areces, abúlten-yos a los dirixentes de la coalición federal una vuelta tuerca más nos desalcuentros en política llingüística colos socios del PSOE. Según declararon ayer el conseyeru de Xusticia y Esteriores, Francisco Javier García Valledor y el coordinadir d’Izquierda Xunida d’Asturies, Jesús Iglesias, l’ausencia del gobiernu autonómicu nel alcuentru de Barcelona -que sí contó con representación filolóxica al través de l’Academia de la Llingua- ye un fechu “grave” que nun consideren isláu tocante a la política siguida polos sos socios de gobiernu en materia de llingua asturiana. Valledor resumiólo con una frase común: “llueve en moyao” respective a esti asuntu. Nengún de los representantes d’Izquierda Xunida-Bloque por Asturies nel gobiernu asturianu foi informáu de la convocatoria entamada pola Generalitat de Cataluña y el Institut d’Estudis Catalans. El responsable de la Oficina de Política Llingüística dependiente de la conseyería xestionada pol socialista Ana Rosa Migoya, el profesor Ramón d’Andrés, tampoco supo nada de la esistencia de la convocatoria García Valledor y Iglesias coincidieron n’apuntar qu’estos desalcuentros en materia de normalización llingüística empeoren la relación colos sos socios del PSOE nun momentu nel que la mayoría gubernamental niégase a renegociar los presupuestos del Principáu col grupu parlamentariu d’IX-BA. 13 d'ochobre, 2004 0 FacebookTwitterPinterestEmail
Sociedá Cola futura llei de llingües del Estáu ábrese un camín a la esperanza pal asturianu by asturnet 11 d'ochobre, 2004 Roberto González-Quevedo, secretariu de l’Academia de la Llingua, representó a la institución asturiana nel aconceyamientu del pasáu 8 d’ochobre en Barcelona, nel que miembros de los diversos organismos lingüísticos del estáu se xuntaron pa poner en común les necesidaes esistentes nesta materia a nivel español. Nun foru paralelu asistieron representantes políticos de les comunidaes con idioma propiu, cola escepción del gobiernu asturianu. En declaraciones a Asturnews, l’académicu González-Quevedo amosóse contentu y enfotáu nos resultaos d’esi alcuentru inicial ente instituciones lingüístiques del estáu. Nel aconceyamientu, el representante asturianu pudo esponer la situación real del nuestru idioma, l’únicu de los presentes nel foru que nun ye oficial. “Hubo un fondu interés ente los representantes de les otres comunidaes pa col casu d’Asturies”, afirmó González-Quevedo. Un casu que nes sos propies palabres “ya yera conocíu en bona parte polos asistentes al alcuentru”. Un de les pretensiones d’esti foru ye la de puxar por una llei xeneral de les llingües del estáu y participar de manera activa na so ellaboración. Según informó nel alcuentru el Conseller en Cap de la Generalitat de Cataluña, Josep Bargalló, organizador del foru, esiste un compromisu seriu de la vicepresidenta del gobiernu central Teresa de la Vega y del propiu executivu que preside Rodíguez Zapatero p’agospiar esta llei qu’asegure’l futuru de la diversidá idiomática a nivel d’estáu. La mesma Teresa de la Vega tenía previsto asistir al alcuentru, según l’asturianu Roberto González-Quevedo, inda compromisos d’última hora impidiéron-ylo.En paralelo al foru llingüísticu entamóse un conceyu de representantes políticos de los gobiernos autonómicos. A esti alcuentru nun asistión nengún representante de l’administración asturiana. Asturies foi xunta la comunidá valenciana -que tampoco unvió representate llingüísticu- l’únicu territoriu con llingua propia ausente del foru. 11 d'ochobre, 2004 0 FacebookTwitterPinterestEmail