Sociedá Asturies y Galicia piden que’l poblamientu específicu de les dos comunidaes se tenga en cuenta na financiación autonómica by asturnet 31 de xineru, 2006 Los gobiernos de Galicia y Asturies coincidieron en reivindicar la dispersión del poblamientu como seña característica d’entrambes comunidaes pa que se tenga en cuenta nel tema de la financiación autonómica. Al rematar el cume ente los executivos de les dos comunidaes los presidentes Touriño y Areces consideren superaes vieyes amarraces a un y otru llau del Eo, y valoren mui positivamente l’alcuentru. Los dos mandatarios pronunciaron la mesma frase en falando de les conclusiones del cume astur-galaicu: “hai que velar polos reequilibrios territoriales, la cohesión social y la igualdá de los ciudadanos independientemente de ónde vivan”. Nesi sen, los cabezaleros de la Xunta y del Principáu, refervieron que les particularidaes del poblamientu en Galicia y Asturies. cola dispersión como característica, tienen ser teníos en cuenta a la hora de redistribuir los fondos xenerales de la financiación. L’avieyamientu de la población, con delles de les tases más baxes de natalidá del estáu, ye otra especificidá que reivindicaron. 31 de xineru, 2006 0 FacebookTwitterPinterestEmail
Sociedá Ábrese la matrícula pal cursu avanzáu d’asturiano pa periodistes by asturnet 31 de xineru, 2006 La Oficina de Política Llingüística en colaboración col Seminariu de Filoloxía Asturiana de la Universidá d’Uviéu, organiza un cursu avanzáu de llingua asturiana empobináu a profesionales de los medios de comunicación. El plazu pa matriculase ta abiertu dende esti martes 31 al prósimu 8 de febreru. Los destinatarios del módulu formativu son titulaos en periodismu o profesionales acreditaos que desenvuelvan el so llabor en medios informativos y la duración del cursu ye de treinta hores repartíes a lo llargo de tres díes de la selmana:miércoles, xueves y viernes de 18.00 a 20.00 hores. Ramón d’Andrés Díaz y Xulio Viejo Fernández son los directores d’esti cursu de calter gratuítu y que va impartise nel Campus del Milán del 8 de febreru al 10 de marzu. Les inscripciones pueden facese nel mesmu Campus, nel despachu 2513 de la Facultá de Filoloxía o na Conseyería de Cultura (Pl.Sol, e/n) n’horariu de 9.00 a 14.00 hores hasta’l prósimu 8 de febreru. 31 de xineru, 2006 0 FacebookTwitterPinterestEmail
Sociedá “Asina foi’l surdimientu” dedicó’l so programa a la comunciación by asturnet 31 de xineru, 2006 L’entamu de la relación ente la xeneración de los 60 y Conceyu bable, l’Academia de la Llingua, los modelos llingüísticos nos medios de comunicación o los problemes calterísticos del movimientu asturianista, foron dellos de los temos sobro los que falaron Próspero Morán, director d’Asturnews, y Naciu Galán esti llunes pela nuechi nel programa de radio “Asina foi’l Surdimientu…”, que s’emite na emisora local lluanquina Onda Peñes nel dial 107.7 FM. Col sofitu de Isabel Muñoz, Naciu Galán fizo tamién un repás de la trayeutoria profesional del periodista y profesor universitariu. Próspero Morán, director d’Asturnews, foi entrevistáu esti llunes a les ocho menos cuartu de la tarde nel programa de radio “Asina foi’l Surdimientu…”, que s’encuentra na so segunda temporada d’emisión y que trata de repasar al traviés de les persones más representatives del Surdimientu los trenta años que pasaron dende’l nacimientu de Conceyu Bable. El programa entrevistó nes últimes selmanes a persones tan signficatives como Xosé Lluis García Arias, Xuan Bello o Pablo Xuan Manzano. Inaciu Galán y González ye’l conductor d’esti espaciu que s’emite quincenalmente, col envís de repasar los últimos trenta años de la mano de los colectivos culturales y políticos que foron naciendo dende 1974 pa trabayar na recuperación llingüística y pol ameyoramientu del país. Xunta Naciu Galán collaboren davezu Isaac de l’Arada, Sabel Tuñón y Xabiel Fernández, amás de cuntar cola participación de los siguidores del programa que previamente unvíen les sos preguntes pal entrevistáu. 31 de xineru, 2006 0 FacebookTwitterPinterestEmail
Cine L’Atenéu Obreru de Xixón remembra’l so 125 aniversariu con un ciclu d’Iciar Bollain by asturnet 30 de xineru, 2006 L’Atenéu Obreru de Xixón escomienza esti llunes 30 les actividaes de la conmemoranza del so 125 aniversariu con un ciclu de cine dedicáu a Iciar Bollain. El ciclu repasa tola obra cinematográfica de la realizadora de “Hola ¿estás sola?”, incluyendo los sos cortometraxes. El Teatru Xovellanos ye’l sitiu escoyíu pa l’amuesa de les proyecciones de la obra de Bollain, que van escomenzar toes a les 20.30 de la tarde. Esti llunes 30 van ponese el cortometraxe “Baja corazón”y “Hola ¿estás sola?”; el martes 31 los títulos que se proyecten son “Los amigos del muerto” y “Flores del otro mundo”. El ciclu remata el prósimu 1 de febreru col cortometraxe “Amores que matan” y el llargometraxe “Te doy mis ojos”. Los actos del 125 aniversariu del Atenéu incluyen tamién entrambes esposiciones que van celebrase a lo llargo del añu, una sobre la hestoria de la institución y otra con caricatures del dibuxante republicanu Emilio Vera, feches mientres taba presu na Cárcel de Coto tres la toma de Xixón poles tropes de Franco. Conferencies y actividaes relacionaes col axedrez van completar el programa de la conmemoranza del Atenéu Obreru. 30 de xineru, 2006 0 FacebookTwitterPinterestEmail
Sociedá Touriño afirma que l’idioma nunca va ser un problema ente Asturies y Galicia by asturnet 30 de xineru, 2006 L’asuntu de l’idioma centró l’interés mediáticu de la primer xornada del cume astur-galaicu. El presidente de la Xunta de Galicia, Emilio Pérez Touriño declaró que “la llingua nunca fue nin va ser un problema ente Asturies y Galicia”, mientres el so vicepresidente, el nacionalista Anxo Quintana manifestaba’l so contentu de que los conceyos del occidente quieran siguir siendo asturianos “y por munchos años” -recalcó con ironía, Quintana-, al tiempu que dixo que “los que quieran ser gallegos vamos recibilos colos brazos abiertos”. Pal líder del BNG, sicasí “hai asturianos que comparten la llingua gallega y eso contribúi a la bayura cultural d’Asturies”. El vicepresidente de la Xunta fexo estes declaraciones enantes del empiezu del cume de Santiago de Compostela y col ánimu de quitar fierro a les pretensiones del nacionalismu gallegu sobre estayes d’otres comunidaes que consideren culturalmente afines citó al escritor Manuel Rivas pa dicir que “gallego puede ser cualquiera” y que “si falara de poner trabancos a quien quixera incorporase a Galicia o ser gallegu diben acusame de racista o xenófobu”. El del idioma y el de la propuesta de nuevu estatutu del Bloque Nacionalista Gallego colos puntos polémicos sobre los conceyos de comunidaes vecines fueron los únicos sobre los que paeció barruntase dalgo de roceano y el tonu xeneral del alcuentru entre los executivos de Touriño y Areces foi cordial. La vía transcantábrica, la elaboración d’un rexistru telemáticu de les dos comunidaes y la colaboración n’estinción d’incendios, asina como l’intercambiu de distintes esperiencies de xestión fueron otros de los asuntos trataos na primer xornada del cume ente la Xunta de Galicia y el Gobiernu del Principáu que sigue a lo llargo d’esti llunes 30 pa falar d’otros temes d’interés común. 30 de xineru, 2006 0 FacebookTwitterPinterestEmail
Sociedá “Asina foi’l Surdimientu…” entrevista a Próspero Morán by asturnet 30 de xineru, 2006 Próspero Morán, director d’Asturnews, va ser entrevistáu güei a les ocho menos cuartu de la tarde nel programa de radio “Asina foi’l Surdimientu…”, presentáu por Naciu Galán, y que s’emite na emisora local lluanquina Onda Peñes nel dial 107.7 FM. Esti programa, que s’encuentra na so segunda temporada d’emisión y que trata de repasar al travies de les persones más representatives del Surdimientu los trenta años que pasaron dende’l nacimientu de Conceyu Bable, entrevistó nes últimes selmanes a persones tan signficatives como Xose Lluis García Arias, Xuan Bello o Pablo Xuan Manzano. Inaciu Galán y González ye’l conductor d’esti espaciu que s’emite quincenalmente, col envís de repasar los últimos trenta años de la mano de los colectivos culturales y políticos que foron naciendo dende 1974 pa trabayar na recuperación llingüística y pol ameyoramientu del país. Xunta Naciu Galán collaboren davezu Isaac de l’Arada, Sabel Tuñón y Xabiel Fernández, amás de cuntar cola participación de los siguidores del programa que previamente unvíen les sos preguntes pal entrevistáu. 30 de xineru, 2006 0 FacebookTwitterPinterestEmail
Cine “Nenyure” de Jorge Rivero aspira pol Goya al meyor cortu de non ficción by asturnet 29 de xineru, 2006 La película “Nenyure” del realizador mierense Jorge Rivero puede algamar esti domingu 29 pela nueche na ceremonia d’entrega de los Goya el premiu al meyor cortometraxe documental. El filme de Rivero ye una de les cuatro qu’opten a esti premiu del que se va desvelar el nome del ganador na gala televisada de la fiesta añal del cine español. “Nenyure” estrenóse nel Festival de Cine de Xixón y viaxó dende entós per dellos otros certámenes con una bultable acoyida de crítica y públicu. Rodada n’inglés con sotítulos, la cinta del realizador mierense retrata los espacios abstractos y concretos d’una barriada obrera de la cuenca talo s’amuesa anguaño, en plenu fin de la industria del carbón y convertida nuna polvorienta sucesión repetía de nichos, un cementeriu con ventanes y seres inda vivos. Jorge Rivero pertenez a una xeneración de nuevos realizadores asturianos que tenten definir una triba de cine centrada na realidá y nel retratu despiadáu del entornu ambiental de l’Asturies actual. El so últimu trabayu fue la filmación del poema “Ente nós” de Vanessa Gutiérrez dientro’l proyectu colectivu “Cinco poemes”.Ye autor tamién del documental musical “Pasamientu”, sobre’l discu del mesmu títulu del colectivu etnográficu Muyeres. 29 de xineru, 2006 0 FacebookTwitterPinterestEmail
Sociedá Amnistía Internacional presentó n’Uviéu un informe sobre la política esterior de Zapatero by asturnet 27 de xineru, 2006 La Unidá Territorial d’Amnistía Internacional n’Asturies presentó esti xueves 26 n’Uviéu l’informe “Política Exterior y Derechos Humanos del Gobierno español: ¿Una política de gestos?” qu’analiza el períodu comprendíu ente xineru de 2004 y setiembre de 2005. Nél la organización critica que’l compromisu cola defensa de los derechos humanos espresáu pol Gobiernu de Rodríguez Zapatero,nel so programa electoral y en múltiples foros internacionales, nun se concreta en medíes efectives na práctica. Francisco Javier Fernández , responsable de comunicación de Amnistía Internacional n’Asturies afirmó na presentación del informe que “Ye mui negativo que la defensa de los derechos humanos nun sea un aspectu visible, relevante y con impactu concretu na axenda política de les relaciones billaterales d’España con países del so entornu o del so área d’influencia como Marruecos, Colombia, Cuba o Guinea Ecuatorial; y qu’estos mesmos derechos se obvien nes relaciones con Estados Uníos, China o Rusia”, aseguró. Como un aspectu positivu, l’informe congráciase de la política del gobiernu español d’apoyu al marcu de Naciones Uníes y l’apuesta pola llegalidá internacional, y un discursu contra’l terrorismo vinculáu al respetu po los derechos y llibertaes fundamentales de les personas, asina como a la llucha contra la probeza. 27 de xineru, 2006 0 FacebookTwitterPinterestEmail
Sociedá La Xunta entrega el Pegollu y el Madreñazu de los sos premios Andrés Solar by asturnet 27 de xineru, 2006 El salón d’actos del Antigu Institutu de Xixón acueye esti viernes 27 la entrega de los Premios Andrés Solar que concede añalmente la Xunta Pola Defensa de la Llingua a aquelles persones o entidaes que se distinguieran bien pol so apoyu a la normalización o bien polo contrario. Una llectura de poesía y una actuación musical del grupu Dual van ilustrar l’actu. Na convocatoria d’esti añu la Xunta decidió conceder el premiu negativu: Madreñazu, al director xeneral del Ente Públicu de Comunicación del Principáu, José Antonio Pérez Ornia. El premiu Pegollu, positivu, fue nesta ocasión pa la empresa informática Araz S.L. La entrega va escomenzar a les 19.30 y amás del tradicional discursu de la Xunta faciendo resume del añu en materia de derechos llingüísticos y desplicando les razones que llevaron a la concesión d’un y otru premiu, los poetes Pablo Texón y Pablo Rodríguez van lleer dellos de los sos versos. El grupu Dual, formáu por Ígor Medio y Lisardo Prieto, va poner el pieslle al actu. Darréu la Xunta organiza la so tradicional espicha nel Llagar Cabrales de Xixón. 27 de xineru, 2006 0 FacebookTwitterPinterestEmail
Sociedá Areces considera ‘llamentable’ que’l PP refugue sumase a la reforma l’Estatutu by asturnet 27 de xineru, 2006 El presidente del Principáu, Vicente Álvarez Areces, calificó esti xueves 26 na feria FITUR de Madrid, de “llamentable” la negativa del PP a participar na reforma l’estatutu. Respective a l’aplicación p’Asturies del términu nacionalidá, Francisco Sosa Wagner, un de los padres de l’autonomía de la nuestra comunidá, afirma que “ta na Constitución y nun plantea mayores problemes”. Nun alcuentru colos medios desplazaos a cubrir la presencia d’Areces en FITUR, el cabezaleru del executivu autonómicu, manifestó la so sorpresa énte la posición caltenida pol partíu d’Ovidio Sánchez énte’l procesu de reforma: “cuando va unos meses reclamaba p’Asturies un estatutu de máximos, como’l catalán”. El presidente recalcó el so deséu de que la reforma pueda tar solventada na presente lexislatura. Per otru llau, el caderalgu de derechu administrativu Francisco Sosa Wagner, ún de los redactores del actual estatutu, declara nuna entrevista concedida al diariu El Comercio qu’Asturies “había reclamar un estatutu igual que’l de Cataluña al día siguiente de que les Cortes apreben l’Estatut” y respective a la denomación de la nuestra comunidá col términu de nacionalidá: “ye una denomación que tá incluida na Constitución y que nun plantea mayores problemes”, ya que “esti tipu de calificación nun tien nengún efectu xurídicu nin competencial”. Sosa Wagner manifiéstase dotramiente contrariu a la oficialidá pal asturianu: “sería una auténtica barbaridá que gravitaría enriba la educación de los neños”, diz l’ex conseyeru del primer gobiernu autonómicu. 27 de xineru, 2006 0 FacebookTwitterPinterestEmail