Música Wilko Johnson actúa güei en Mieres de baldre nel ciclu de conciertos de Cajastur by asturnet 11 de marzu, 2005 El guitarrista y compositor británicu Wilko Johnson ofrez esti vienres 11 un conciertu de baldre nel centru Cajastur de Mieres dientro’l ciclu Música del s.XX qu’organiza la Obra Social y Cultural de la entidá. L’ex componente del míticu grupu de los 70 Dr.Feelgood actuará xunta la so formación actual:Normam Watt-Roy, al baxu y Monti, a la batería, pa presentar los temes del so discu ‘Red Hot Rocking Blues”, el so segundu album en solitariu. El que fuera vocalista y autor de bona parte del repertoriu de la mítica banda británica Dr.Feelgood acude a Mieres nuna actuación única n’Asturies de la so xira europea cola Wilko Band trenta años después de la edición del primer discu del grupu que lu dio a conocer:’Down By the Jetty’, un clásicu del rock más tresgresor de los años 70. Wilko Johnsonpresenta agora’l so segundu álbum en solitariu: ‘Red Rocking Blues’, grabáu en 2003 y nel que qu’amuesa la so particular visión del rock’n’blues con rebiyos setenteros y la contundencia de los sones del punk. Acompáñenlu na so aventura el baxista Norman Watt-Roy y a la percusión Monti, dos ex componentes de la banda na que Jonhson tocó después d’abandonar los Feelgood: The Bockheads. Nacíu na isla de Canven en 1947, Wilko Johnson fundó en 1971 la mítica banda Dr. Feelgood, un referente fundamental del rock’n’roll de la década de los 70, abandonando’l grupu en 1981 pa tocar n’otres formaciones como los Solid Senders y los Bockheads de Ian Dury. En 1998 grabó el so primer álbum en solitariu: ‘Going Back Home for Mystic’ y en 2003 el discu que ya presentó esi añu nuna minixira pol estáu español y qu’agora vuelve traer nesta riestra de conciertos per Europa que lu lleva a Mieres. 11 de marzu, 2005 0 FacebookTwitterPinterestEmail
Música Stukas vuelve a los sos oríxenes con discu nuevu by asturnet 11 de marzu, 2005 ‘A pesar de todo’ ye’l títulu del nuevu discu de Stukas, un trabayu nel que la veterana banda llangreana vuelve a los sos oríxenes musicales con una apuesta polos patrones fieles a les formes del rock’n’blues de los años sesenta y setenta. El grupu lideráu por José Ramón Ordóñez abre con esti trabayu una nueva etapa na so hestórica carrera y failo al través d’unes canciones cargaes de referencies a la situación actual de les cuenques. Stukas presenta esti sábadu 12 ‘A pesar de todo’ en Fnac de Siero con una actuación en directo. El nuevu discu de Stukas, en palabres del so vocalista: “resume’l llabor d’una etapa de transición ente l’anterior recopilatoriu grabáu con músicos del Conservatoriu de Llangréu y la incorporación al grupu de nuevos miembros, los cambios na banda coincidieron cola composición de temes nuevos y el discu ye reflexu del nuestru momentu actual”. Pa Ordoñez hai nel trabayu una vuelta a los oríxenes: “ta mui influenciáu pola música qu’empezamos tocando nos años 60 y 70, rock’n’roll y blues, presentes siempre nel nuestru repertoriu y que nesti discu fáense más evidentes”. La situación vivida nel contestu críticu de les cuenques tien un fiel reflexu nes lletres de les canciones, con títulos como:’Aquí me quedé’ o ‘Conmigo en la cuerda’, y nel espíritu del discu dende la mesma portada: les instalaciones abandonaes d’un pozu mineru. Ye una amuesa del comprosimu del grupu “cola nuestra realidá social”, afirma José Ramón Ordoñez: “ye una realidá desesperante na que la xente paez resignada a aceptar la situación ensin nengún enfotu pol futuru de les cuenques y de les xeneraciones más moces, nós reflexamos esa situación nes nuestres canciones, inda paeza poco habitual facer esti tipu de denuncia social nel formatu del rock’n’roll, nel nuestru casu ye dalgo que siempre ficimos y esti discu nun ye una escepción”. Stukas presenta ‘A pesar de todo’ con una actuación en vivo esti sábadu 12 a les ocho de la tarde en Fnac de Siero. 11 de marzu, 2005 0 FacebookTwitterPinterestEmail
Música Los asturianos Mala Reputación nominaos a los premios MP3 como meyor grupu de rock by asturnet 10 de marzu, 2005 El grupu asturianu La Mala Reputación apaez na llista de nominaos pa los premios alternativos MP3 na categoría de meyor grupu de rock del añu. La banda orixinaria del oriente d’Asturies apaez nominada xunto a Fito & Fitipaldis, Sunday Drivers y Marea. Creaos pa reconocer a los artistes de la escena independiente los premios MP3 decídense pela elección on-line y abierta de tolos usuarios de la rede que-yos pete apurrir el so votu a los nominaos nes distintes categoríes. Nes votaciones iniciaes el pasáu 24 de febreru los asturianos van los segundos con un 30 por cientu d’apoyos, siguiendo percerca a Fito&Fitipaldis que recibieron hasta agora’l 33 por cientu de votos. Los premios organízalos l’e-zine vascu langazua.net, xunta otros e-zines de tol estáu, ente ellos asturiesrock.com y amás del so calter alternativu a la industria musical, son los únicos premios a artistes abiertos a la votación del públicu. La selección de los finalistes a los premios MP3 fízose col recuentu de los artistes nominaos por cada fancín de la rede que quiso participar y que tenía la opción d’escoyer tres candidatos en caduna les categoríes. La categoría de rock onde concurre La Mala Reputación ye la única na qu’hai cuatro candidatos debío al empate de votos que s’algamó na selección. La nominación del grupu asturianu ye consecuencia del ésitu que ta algamando el so últimu discu: ‘A por ellos'( Kangurín Records,2004). Mientres se conocen los resultaos de la votación final de los premios MP3, La Mala Reputación sigue cola so xira ‘La Gira Mata 2004’ que va tener la so prósima cita en Valencia esti sábadu 12 nel Festifallas. 10 de marzu, 2005 0 FacebookTwitterPinterestEmail
Música El músicu astur-americanu Michael Lee Wolfe participa nun conciertu de Radio 3 by asturnet 8 de marzu, 2005 Michael Lee Wolfe presenta estos díes el so discu ‘Corners of the world’ en Madrid. Ente les comparecencies en distintos medios de radio y televisión, el músicu americanu graba esti miércoles una actuación en directu dientro los Conciertos de Radio 3 que se va emitir prósimamente na 2 de TVE. Coincidiendo cola promoción del so discu na capital del estáu, el guitarrista afincáu n’Asturies tien a puntu de rematar un nuevu trabayu nel que continúa el so apueste polos soníos contundentes del bluegrass. La presentación en Madrid de ‘Corners of the world’ pasaos dalgunos meses después de la so edición pol sellu asturianu Ámbitu ye pa Lee Wolfe: “una de les coses estrañes que nos suelen suceder a los músicos independientes de vez en cuando”. El guitarrista americanu asiste con desenfadáu distanciamientu a esta minixira promocional qu’inclúi la grabación el miércoles 9 d’un directu nos Conciertos de Radio 3: “supongo que nos dará a conocer…un pocoñín más a la xente que sigue la música que facemos, dalgo que pa los folkies ye mui americano, pa los siguidores del bluegrass demasiao folkie y pa nós lo que nos presta tocar pa divertinos”. Michael Lee Wolfe va tar acompañáu nes actuaciones madrilanes polos sos avezaos compañeros de viaxe nos sos trabayos de bluegrass: Ángel Ruiz al banxu y Dani Casielles al contrabaxu. El guitarrista trabaya anguaño en dar los últimos remates a un nuevu discu del qu’adelantró a Asturnews que va titulase: “Asturies Bluegrass Sessions” y del que dixo “ye otru viaxe d’esta aventura na que tamos por divertinos y tocar un tipu de música nel que nos afayamos a gustu porque permite bien de posibilidaes d’improvisar y tocar de manera llibre”. 8 de marzu, 2005 0 FacebookTwitterPinterestEmail
Música Bras Rodrigo busca nuevos caminos pa la gaita nun discu abiertu al mestizaxe by asturnet 3 de marzu, 2005 ‘Xermandía’ ye’l títulu del primer trabayu discográficu del gaiteru Bras Rodrigo, una obra abierta a la influencia d’otros soníos amás de los tradicionales asturianos y de sencia atlántica. El so autor tenta fuxir de les etiquetes y de les estétiques cerraes pa entamar un camín nel qu’esplora les posibilidaes de mestizaxe del son xenuín de la gaita astur con ritmos d’un llau al otru del mundu. El discu preséntase esti sábadu en Fnac. Bras Rodrigo afirma énte esti primer trabayu discográficu que como músicu “nun me presta encerrame en nenguna llende, intento esplorar caminos abiertos a la influencia de cualquier ritmu dende’l soporte de la música tradicional”. L’autor de ‘Xermandía’, pon como exemplu, de la so manera d’entender la música el primer corte del discu:”Asturianos nel Caribe” nel que la gaita solista mécese con sones y percusiones del mar antillanu: “Si pensamos naquellos emigrantes asturianos que llegaben a Cuba, ellí atopábense con otros sones distintos a los que taben avezaos y d’esi alcuentru principiaba una nueva música”. El gaiteru de Perlora, declara sentise admirador del trabayu d’artistes asturianos como los integrantes de Llan de Cubel Felpeyu, Corquiéu o la Asturiana Mining Company, y d’otros que tan desenvolviendo’l so llabor alrodiu de la música tradicional, sicasí a él “con un fondu respetu y ensin dir contra nenguna idea nin pretender afitala tampoco, préstame siguir el mio propiu camín y esi camín llévame peles veredes esploraes nesti discu”. En ‘Xermandía’ siéntense los ecos novedosos d’esos mestizaxes en pieces como les dos versiones del Adagio d’Albinoni, una siguiendo los patrones de la música clásica y la otra les bases de programación de la electrónica. Al empar la interpretación de Rodrigo a la gaita remanez los ecos provechosos de los maestros clásicos asturianos. Rubén Bada al vigulín y bouzuki, Lorena Prieto a les percursiones, Israel Sánchez a la batería y Sergio Rodríguez, baxu y programaciones, acompañen al gaiteru de Perlora nesti discu. Editáu pol sellu Grabaciones Pola, ‘Xermandía’ preséntase esti sábadu a les 20,00 hores en Fnac. 3 de marzu, 2005 0 FacebookTwitterPinterestEmail
Música Ramón Prada amúesase sorprendíu de la so nominación a los Premios de la Música con un “discu humilde que tuvo poca difusión” by asturnet 25 de febreru, 2005 Ramón Prada confesó sentíse sorprendíu al conocer la so nominación como finalista de los Premios de la Música na categoría ‘Meyor álbum de nueves músiques’ con un discu “humilde, con 500 copies de tirada y qu’alpenes tuvo difusión”. El músicu considérase afortunáu de figurar al llau de compositores como Andreas Prittwitz o José Luis Encinas. Anguaño Prada trabaya na posibilidá d’estrenar n’Asturies la so obra ‘Keltikhé’ El compositor de Cangues ta nomináu a los premios que concede la SGAE pol so álbum ‘Veinte canciones de amor y un poema desesperado’, un trabayu del qu’alpenes se fexo una tira de mediu millar de copies y que’l propiu autor considera “humilde, non de los más ambiciosos” de la so obra. En declaraciones a Asturnews Ramón Prada afirmó qu’esti reconocimientu ye “importante en cuantes val pa date a conocer más y a qu’haya una mayor difusión de la propia obra” y amosó la so sorpresa, amestada d’alegría, de tener como finalista de los Premios de la Música un discu suyu “xunto a trabayos de xente de la calidá de José Luis Encinas´, José Antonio Ramos, Andreas Prittwitz”. La decisión de los miembros electores de la SGAE conoceráse’l prósimu 22 d’Abril nel trescursu de la so gala añal. Mentantu llega esi momentu Prada trabaya en nueves composiciones y enfótase na posibilidá de presentar dientro poco tiempu nun conciertu n’Asturies (probablemente en Xixón)la so obra ‘Keltikhé’, estrenada con gran ésitu nel últimu festival de Lorient. L’autor d’obres emblemátiques como ‘La nueche celta’ y la mencionada ‘Keltikhé’ reconoció que la so participación n’eventos como Lorient foi “fundamental a la hora de difundir el mio trabayu alluende Asturies y probablemente ello desplique qu’un discu de tan poca tirada y difusión” como el nomináu a los Premios de la SGAE “tuviera tan bona acoyida y acabara selecionándose”. 25 de febreru, 2005 0 FacebookTwitterPinterestEmail
Música Dixebra apuesta pol metal-rap y el reggae nel so nuevu discu, que tará nel mercáu en mayu by asturnet 24 de febreru, 2005 Metal-rap y reggae inspiraos polos soníos contundentes de Red Hot Chili Peppers y Race Against the Machine. Asina sonará’l nuevu discu de Dixebra, que tará nel mercáu en tornu al mes de mayu y cuya grabación acércase al ecuador de los temes previstos nos Estudios Tutu de Corvera. La banda avilesina, que cellebra los sos 18 años n’escena, busca impregnar tolos temes del nuevu trabayu con un soníu común ya identificativu. En total, el grupu, únicu referente durable de la música rock en llingua asturiana, tien yá prácticamente completaos ocho temes que yá tán grabaos a la espera namás de que se-yos añadan les melodíes de gaita y los arreglos de vientos. A diferencia de trabayos anteriores, Dixebra optó nesta ocasión por ‘cocinar’ con más calma el que va ser l’octavu cd de la banda, centrando la grabación nos estudios rexentaos en Corvera pol técnicu de soníu’l grupu, Sergio Rodríguez, y espaciando los procesos de rexistru y mezcla final. Con esi plantegamientu, los integrantes de Dixebra prevén completar la grabación del nuevu discu nes caberes selmanes de marzu, col envís de poder presentar en directu los temes del trabayu nel mes de mayu. La banda entaína agora, poro, los trabayos finales de composición y d’acoplamientu de lletres, dientro d’un procesu de creación que culminará nunes 17 canciones de les qu’a la fin saldrá la esbilla definitiva. Según precisó’l vocalista y cofundador de la banda, Xune Elipe, el grupu decidirá depués qué facer colos ‘descartes’ y una de les posibilidaes más viables sedrá almacenar esos temes yá grabaos y nun escoyíos pa incluyilos en futuros discos recopilatorios. L’últimu discu con temes de nueva creación que Dixebra sacó al mercáu, ‘Sube la marea’, ellaboróse na primavera de 2002 nos estudios guipuzcoanos Gárate. Dende entós, la banda fizo una única nueva incursión na edición discográfica, a finales de 2003, col asoleyamientu’l llibru-discu ‘Cróniques d’un pueblu’, qu’axuntaba remasterizaciones de temes anteriores y un testu cola hestoria’l grupu firmáu pol periodista Francisco Álvarez. Web oficial de Dixebra 24 de febreru, 2005 0 FacebookTwitterPinterestEmail
Música Los Berrones lleven la música n’asturianu a niveles masivos de difusión con un conciertu en Radio 3 by asturnet 22 de febreru, 2005 Los Berrones estiren l’exitosu rastru del so discu en directu. La banda de Tolivia, pionera na difusión masiva del pop-rock en llingua asturiana y resurdida anguaño al calor del so últimu trabayu editáu, grabará la prósima selmana en Madrid un conciertu de 30 minutos de duración entamáu pola emisora Radio 3 que depués sedrá difundíu por esa cadena pública y en ‘La 2’ de Televisión Española. Según precisaron responsables de Radio Nacional d’España, el conciertu grabaráse’l miércoles 2 de marzu nes instalaciones de la Casa de la Radio, allugaes na llocalidá madrilana de Prado del Rey. Los Berrones rexistrarán unos treinta minutos de repertoriu énte un públicu máximu de 70 persones, que ye l’aforu del ‘Estudiu Música 1’, nuna sesión pa la que la cadena pública inda dispón d’invitaciones de baldre. La emisión posterior del recital de la banda de Llaviana produciráse unes dos selmanes depués de la grabación, según la estimación de los responsables de Radio 3, y podrá escuchase a partir de les 22 hores nel espaciu habitual d’esta emisora nel que los recitales se difunden de llunes a xueves. En ‘La 2’, Los Berrones podrán vese nuna franxa horaria menos accesible, a partir de la 1 de la madrugada. Dirixíos pol comunicador Paco Pérez-Bryán, los ‘Conciertos de Radio 3’ recibieron hasta agora a más d’ochocientos grupos y solistes, ente bandes afitaes nel panorama estatal, conxuntos estranxeros y grupos españoles qu’aprovechen el programa pa presentar y espardir los sos primeros trabayos. Solicitú d’asistencia al conciertu de Radio 3 22 de febreru, 2005 0 FacebookTwitterPinterestEmail
Música El Principáu recupera l’alcordanza de Torner con un conciertu y la reedición del so cancioneru popular by asturnet 17 de febreru, 2005 Conferencies, un video documental, un premiu pa musicólogos mozos, la reedición del ‘Cancioneru popular de la lírica asturiana’ y un recital n’Uviéu cola participación de la intérprete de tonada Anabel Santiago y el gaiteru Alberto Varillas. Esi ye’l programa col que’l Principáu quier recuperar l’alcordanza del musicólogu uvieín Eduardo Martínez Torner, de cuyu fallecimientu se cumplen güei 50 años. Nesa riestra d’actividaes, qu’esta mañana presentó’l director xeneral de Promoción Cultural, Carlos Madera, destaca’l conciertu a partir de cuatro ‘suites’ de Torner que s’interpretará el prósimu 26 de febreru nel conservatoriu d’Uviéu, un conciertu abiertu a los cantares de romería, de filandón y vaqueiros. La iniciativa de la conseyería de Cultura nun ye la única que quier recuperar l’alcordanza del musicólogu uvieín nel cincuentenariu’l so fallecimientu. El colexu públicu xixonés que lleva’l so nome en Xixón abre a partir de güei una riestra de charres y recitales conmemorativos y, tamién en Xixón, l’Ayuntamientu esparde’l legáu de Torner nuna guía pa escolinos de Primaria. N’Uviéu, ciudá natal del estudiosu de la música tradicional asturiana, el conservatoriu superior ‘Eduardo Martínez Torner’ sumaráse a los homenaxes, mientres que’l Departamentu de Musicoloxía de la Universidá d’Uviéu sopesa l’asoleyamientu d’un llibru sobro la esperiencia vital y profesional de Torner. Alumnu na Schola Cantorum de París y collaborador de Ramón Menéndez Pidal, güéspede de la Residencia d’Estudiantes -onde conoció ente otros artistes entós mozos a Federico García Lorca y Salvador Dalí-, Eduardo Martínez Torner (Uviéu, 1888 – Londres, 1955) ye inda güei l’estudiosu de referencia nel folclore asturianu, depués que’l so cancioneru fora revisáu y reinterpretáu por dellos grupos de la escena folk d’anguaño, a la gueta de pieces tradicionales que tuvieren documentaes. Una web portuguesa atropa les quinientes pieces del cancioneru de Torner con versiones midi 17 de febreru, 2005 0 FacebookTwitterPinterestEmail
Música Espertos de Nava y Bimenes participen na ellaboración d’un llibru européu sobro música tradicional by asturnet 16 de febreru, 2005 La tradición sonora europea, en comuña. Músicos y profesores de les escueles de música de Nava y Bimenes participen na ellaboración d’un manual de repertoriu y métodu de música tradicional qu’ultimen espertos de seis países europeos. Los representantes asturianos participen dende güei en Finlandia na segunda seisión de trabayu’l proyectu comunitariu ‘Entramus’, que pretende da-y puxu a los sones tradicionales d’Europa. Trátase del segundu alcuentru de los países qu’integren el grupu, depués de la primer toma de contactu que tuvo llugar el pasáu mes de payares n’Asturies, cuya participación nel proyectu ta representada pola Escuela de música del Ayuntamientu de Nava y la Escuela de música tradicional de l’asociación ‘Los Yerbatos’ de Bimenes, dambes encuadraes na Mancomunidá de la Sidra. Nesta ocasión, los profesores de dambos centros d’enseñanza musical, acompañaos de técnicos de la propia Mancomunidá, perfilen hasta’l prósimu domingu na llocalidá finlandesa de Loimaa, a unos 150 quilómetros de Helsinki, tanto los conteníos del llibru que se prepara como los oxetivos mesmos del proyectu ‘Entramus’, avaláu espresamente pola Unión Europea al traviés del programa Sócrates. Xunta la Mancomunidá de la Comarca de la Sidra, intégrense na rede europea d’escueles de música tradicional asociaciones y centros de Marinha Grande, en Portugal; Saint Groux, en Francia; Rotterdam, n’Holanda; Cosenza y Prato, n’Italia; y de la llocalidá de Loimaa, en Finlandia. 16 de febreru, 2005 0 FacebookTwitterPinterestEmail